MATEU 3
3
1Wena mafuku owu hikukwinza Yowanu Mpapatishu nakushimuna mwisaŋa damuYudeya, 2nindi, Balumukenu munyichima yenu, muloŋa wanta wamwiwulu wunashiki dehi kwakwihi. 3Diyi atenenuwu mudi kaprofwetu Isaya nawu, Izu damukwakubilela mwisaŋa nindi, Loŋeshenu njila yaYehova, ololenu njila jindi jatulolu.
4Yowanu wavwelaŋa mahina amavuji anŋameli, nimwonji wachikaba mumayindi, kudya kwindi wadiilaŋa tubola niwuchi wamwisaŋa. 5Dichi antu akuYerusalema, niamuYudeya mwejima, niakumpata yejima yanyeŋumuka Yodana, hiyakuya kudi yena; 6hiyakuyipapatisha kudi yena mukaloŋa Yodana, hiyakwiteja mwavulumwinuwu. 7Chanamoniyi aFwarisi nawaSadusi amavulu hiyakwinza kuchipapatishu chindi, hakuyila nindi, Enu anyana katubandayula, nayileji kutemuka kuzuwa kwamba kenza hinyi? 8Soŋenu nyikabu yatelela kubalumuka mumuchima. 9Bayi mutoŋojoka kuhosha munyichima yenu nenu, Tukweti nkakulula yetu Abarahamaku. Tiyenu niyileji, Nzambi natweshi kutetula mumalolawa anyana kaAbarahama. 10Katataka anashi dehi chizembi kunyiji yanyitondu, dichi nyitondu yejima yikubula kusoŋa nyikabu yayiwahi akuyitemamu, akuyinatila mukesi. 11Chalala ami nidi nakuyipapatisha mumeji kulonda mubalumuki munyichima; ilaŋa owu wukwinza munyima yami wambadika Ŋovu, nkwabilu jindi ami kutela kujisenda nehi; yena wakayipapatisha mudi Spiritu Wajila nimukesi. 12Muchikasa chindi mudi lwalu; wakatookesha mwitala dindi dakuhulila, to-o chikupu; wakapompeshela tidiku munkalaŋa, hakwila mafulu wakayocha mukesi kakajimaŋa, bwi-i chikupu.
13Henohu Yesu hakufuma kuŊaliliya, hakwinza kuYodana kudi Yowanu, kulonda akamupapatishi kudi yena. 14Yowanu wakeŋa eli kumulekesha nindi Ami yami nateli kumpapatisha kudeyi, indi eyi winzi kudami? 15Ilaŋa Yesu hakumwakula nindi, Kumina dakwiteja katataka, muloŋa dichi chinatuteleli, kulonda kuwanisha kuloŋa kwejima. Hakumwiteja. 16Yesu chanamupapatishuwu, hohenohu azambuka nimumeji. Kutala mawulu hiyakumwenzulukila, hakumona Spiritu yaNzambi wudi nakusuluka neyi katela, hakuwila hadi yena. 17Kutiya mumawulu himukufuma izu nindi, Diyi Mwanami nakeŋa, natiyaloŋa kuwaha nankashi mudi yena.
Currently Selected:
MATEU 3: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
