MATEU 2
2
1Henohu havwalikiliyi Yesu kuBetelemi wamuYudeya, hanyaka yadiŋiyi mwanta Herodi, kwenjili akwamaana afumini kumusela, hiyakushika kuYerusalema. 2Nawu, Owu Mwanta wawaYudeya navwaliki, wudi kudihi? Muloŋa twamweni katumbwa kindi kumusela, tunenzi nakudifukula kudi yena. 3Mwanta Herodi chanachitiyiyi, hakwakama hamu nawakwaYerusalema ejima. 4Hakupompesha awakulumpi jawatupristu niansoneki ejima awantu awa, hakuyihula kwamba kavwalikilayi Kristu. 5Hiyakumwila nawu, KuBetelemi wamuYudeya; muloŋa dichi chasonekeliyi kaprofwetu 6nindi, Eyi Betelemi wamwituŋa daYuda, hiwakehela mukachi kawatulamba amuYudaku; muloŋa mudeyi dimu mwakafuma nguvulu, wakela kabiŋa kawantu ami aIsarela.
7Henohu Herodi hakutambika akwamaana kwakanka wawu, hakuyihula chakashinshi hamwekeni katumbwa. 8Hakuyitemesha kuBetelemi nindi, Yenu mukeŋakeŋi chachiwahi owu mwana wanyanya; neyi munamumoni dehi munfuntishili izu, kulonda ninami nakayi nakudifukula kudi yena. 9Wena chanamutiyuwu mwanta hiyakuya; nawu atali, komana katumbwa kamwenuwu kumusela hikakutwamina kumbidi yawu, nichikayili nakwimana hadiŋi owu mwana wanyanya. 10Chamwenuwu katumbwa, hiyakuzaŋalala muzaŋalu wabadika nankashi. 11Eŋila nimwitalodu, hiyakumona owu mwana wanyanya hamu namama yindi Mariya; hiyakudinata heseki nakudifukula kudi mwana; hiyakujikula mwadiŋi yuma yawu yalema, hiyakuhimulambu la nyilambu yawuru nilibona nimora. 12Chanayilejuwu mukulota nawu bayi afunta kudi Heroduku, hiyakuya kwituŋa dawu njila yacheŋi.
13Dichi cheliluwu wena anayi dehi, kaŋelu kaYehova hakumwekana kudi Yosefu mukulota nindi, Nyamukaku wutwali iwu mwana wanyanya nimama yindi, wutemukili kuEjipitu, wakashakami kwenoku, kufumaku chiŋa nakuleji; muloŋa Herodi wakakeŋakeŋa iwu mwana wanyanya nindi amukisaŋani. 14Hakunyamuka, hakutwala owu mwana wanyanya nimama yindi nawufuku, hakuya kuEjipitu. 15Hakushakama kwenoku ninichi chafwiliyi Herodi, kulonda mwahosheliyi Yehova mudi kaprofwetu mwakalumbuluki, mweliliyi nindi, Natambikili mwanami kuEjipitu kwadiŋiyi.
16Herodi chanamoniyi nindi anamudiwuli kudi akwamaana, hakusweja kuzuwa nankashi, hakutemeshaku njita yakujaha anyana amayala ejima adiŋi muBetelemi, niadiŋi kuŋinza jawu jejima, nianyaka yiyedi niabulili kushika munyaka yiyedi, nakweseka mwatiyililiyi chakashinshi kudi akwamaana. 17Henohu mwahosheliyi kaprofwetu Yeremiya himukulumbuluka, 18mweliliyi nindi, KuRama atiyili izu dakutumpa, nimakumbu aweni; Racheli hakudila anyanindi. Kumukundeja kwonti kwindi, muloŋa anyanindi kwosi.
19Ilaŋa chanafwiyi Herodi, kaŋelu kaYehova hakumwekana kudi Yosefu mukulota, omu muEjipitu. 20Nindi, Nyamukaku wutwali iwu mwana wanyanya nimama yindi, wuyi mwituŋa daIsarela; muloŋa antu akeŋeli kujaha iwu mwana wanyanya afwa dehi. 21Hakunyamuka, hakutwala owu mwana wanyanya nimama yindi, hakwinza mwituŋa daIsarela. 22Iluŋa chanatiyiyi nawu Akelawusi naswani dehi wanta watata yindi Herodi muYudeya, hakutiya woma wakuya kwenoku; chanamulejuwu mukulota, hakutondolwela kumbadi yaŊaliliya. 23Hakuya nakushakama kumukala ijina dawu Nazareta; kulonda mwahosheluwu atuprofwetu mulumbuluki; mweliluwu nawu, Akamutena nawu kaNazareta.
Currently Selected:
MATEU 2: MW62
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.