Joani 19

1Pilatu hakumukwata Yesu, hakumuvupola nachikoti. 2Mashidika hiyakuyinda chibaaba chanyimbambaŋoma, hiyakumuvwikachu kunamutu, amuvwika niihina dawusombu. 3Hiyakuya kudi yena, hiyakumwila nawu, Eyi Mwanta wawaYudeya, kalombu! Hiyakumweta namakasawu. 4Pilatu hakwidika cheŋi, hakuyila nindi, Talenu, hinukuyiidishilayi kulonda mwiluki nenu ami hinamumoni nachitelaku. 5Dichi Yesu hakwidika, navwali chibaaba chanyimbambaŋoma ninodu ihina dawusombu. Pilatu hakuyila nindi, Talenu iwu muntu! 6Dichi awakulumpi jawatupristu niatulama chanamumonuwu, hiyakubidika nawu, Mupopelenu kukulusu, mupopenu! Pilatu hakuyila nindi, Mutambulenu enu aweni, mumupopeli kukulusu; ami kwami hinamumoni nachitelaku. 7AYudeya hiyakumwakula nawu, Etu tukweti lushimbi, lushimbi olu lwelaŋa nawu nateli kufwa, muloŋa waditeneni nindi, ni mwana kaNzambi. 8Dichi Pilatu chanatiyiyi mazu awa, yotiya niwoma wasweja. 9Hakwijila mwitala dakusompela, hakumwihula Yesu nindi, Eyi wafuma kudihi? Yesu kumwakula nehi. 10Dichi Pilatu hakumwila nindi, Eyi kuhosha nanami nehi? Eyi kwiluka neyi ami ni kweti Ŋovu jakukuumbaku, ni kweti niŋovu jakukupopela kukulusu, nehi? 11Yesu hakumwakula nindi, Neyi abula kukwinka Ŋovu jakufuma mwiwulu, mutenowu wunakaŋanyi kuŋila chuma. Dichi iwu nanhani kudeyi wukweti muloŋa wakubadika.

12Henohu Pilatu hakukeŋa nindi amuumbuku. Ilaŋa Yudeya hiyakubidika nawu, Neyi wukumuumbaku yeniwu, hiwukwikala ibwambu daKesaruku; muntu waditenaŋa nindi nimwanta, halemeshaŋa Kesaruku. 13Dichi Pilatu chanatiyiyi mazu awa, hakumwidisha Yesu, hakushakama hetanda dakusompela kwatenaŋawu nawu, Kuchisesa chamalola; muHeberu nawu, KuGabata. 14Denodu dadiŋi ifuku dakuloŋesha paseka; hadiŋi neyi kwiji ora yamuchitanu nayimu. Hakuyila aYudeya nindi, Talenu Mwanta wenu! 15Wena hiyakubidika nawu, Waadi! Waadi! Mupopelenu kukulusu! Pilatu hakuyila nindi, Nipopeli Mwanta wenu kukulusu? Akulumpi jawatupristu hiyakumwakula nawu, Mwanta wetu Kesari hohu; hitukweti mwanta wacheŋuku. 16Dichi hakumuhana kudi wena kulonda amupopeli kukulusu.

17Dichi hiyakumukwata Yesu, hiyakumutwala. Yena hakwidika, iku nadisendeli kulusu yindi, hakuya kwatenaŋawu nawu, Kuchaŋu; muHeberu nawu, Kugologota. 18Hiyakumupopela kukulusu kwenoku, hamu nawakwawu ayedi, wumu hambadi, wumu hambadi, Yesu mukachi. 19Pilatu hakusoneka ninsaŋu nawa, hakuyisha hakulusu. Asonekeluhu nawu, Yesu wakuNazareta, Mwanta wawaYudeya. 20Dichi nsaŋu iyi ayitaŋili kudi aYudeya amavulu; muloŋa oku kwamupopeleluwu Yesu kukulusu kwadiŋi kwakwihi naŋanda; ayisonekeli mwidimi dawaHeberu, nimwidimi dawaRoma, nimwidimi dawaHeleni. 21Dichi awakulumpi jawatupristu niaYudeya hiyakumwila Pilatu nawu, Bayi wusoneka neyi, Mwanta wawaYudeyaku; chiŋa neyi, Yena waditeneni nindi, Ami niMwanta wawaYudeya. 22Pilatu hakwakula nindi, Mwonsu munasoneki mwomu.

23Mashidika chanamupopeluwu Yesu kukulusu, hiyakunona yuma yindi yakuvwala, hiyakwambula muwana, mashidika ejima hiyakuwanina iwu nachibalu chindi, iwu nachibalu chindi. Ilaŋa mupila windi wadiŋi wakutuŋa kufumisha kwiwulu, wejima wakadi muchiminu. 24Dichi hiyakudila wumu namukwawu nawu, Bayi tuwutabulaku, tuditondeli nachinjikijilu chakusakula nachu, tumoni muntu wukuwutambula; kulonda nyikanda yajila yilumbuluki, yasonekeluwu nawu, Yuma yami yakuvwala anadipaŋili mukachi kawu, mupila wami hiyakusakula nachinjikijilu chakusakula nachu. Dihu hafumini mashidika kwila yumiyi.

25Kwakwihi nakulusu yaYesu kwemeni mama yindi namana kwamama yindi wamumbanda, Mariya iŋoda Kiŋasi naMariya Mandaleni. 26Dichi Yesu chanamoniyi mama yindi nikambanji kindi akeŋeliyi anemani hamu kwakwihi, hakumwila mama yindi nindi, Eyi mumbanda, talaku mwaneyi owu. 27Hakumwila owu kambanji kindi nindi, Talaku mama yeyi owu. Kufumisha kumpinji oyu, owu kambanji hakumutwala kwiindi.

28Kulondela henohu, Yesu chanelukiyi nindi yuma yejima yinamani dehi, hakwila nindi, Natiyi mpwila; kulonda nyikanda yajila yilumbuluki. 29Kwenoku kwadiŋi nsaba yakutenteka, yenzala walwa wabatuka; hiyakunona siponja yenzala walwowu wabatuka, hiyakusha kuchiputa chahisopi hiyakumushayi kukanwa. 30Dichi Yesu chanatambuliyi owu walwa wabatuka, hakwila nindi, Chinamani. Yonoŋeka ninamutu windi, yotula niwumi windi.

31Chidadiŋi ifuku dakuloŋesha paseka, aYudeya hiyakeŋeli nyijimba yishali hamakulusu hasabatoyuku, muloŋa yenoyu sabata yadiŋi yalema, hiyakumulomba Pilatu nawu ayiteji kukotola nyendu yawu, ayifumishuku. 32Dichi mashidika hiyakwinza, hiyakukotola nyendu yanowu wakusambila, niyamukwawu apopeleluwu kumakulusu hamu nindi. 33Ilaŋa chanashikuwu hadi Yesu, kumumona nafwi dehi, hiyamukotweh nyenduku; 34Ilaŋa ishidika wumu hakumupwika iyoŋa kukabavu, henohu hikukwidika nimashi nimeji. 35Owu wamweni yumiyi nekali chinsahu, niwunsahu windi walala, yena neluki nindi nahoshi mwalala, kulonda ninenu nawa mwitiyi. 36Yumiyi ayilili kulonda nyikanda yajila yilumbuluki, yeliluwu nawu, Hiyakakotola hoku ifwaha dindi nidimuku. 37Nicheŋi mukanda wajila wukwawu nawu, Akatala hadi yena apwikiluwu.

38Kulondela hayumiyi Yosefu wakuAramateya, wadiŋi kambanji kaYesu, ilaŋa chakujinda nawoma wawaYudeya, hakumulomba Pilatu amwiteji kufumisha mujimba waYesu. Pilatu hakmnwiteja. Dichi hakwinza, hakufumisha mujimba windi. 39Hikukwinza nawa niNikodemu, owu wenjili hatachi kudi Yesu nawufuku. Hakuleta yitumbu yakubomba nimora nialowe, pezu yayu yashika neyi jipawundi nkulakaji. 40Hiyakunona mujimba waYesu, hiyakuwujiŋajiŋa mtunahina atooka hamu nanyitondu yamavumba amawahi, mwomuchaaku chajiikaŋawu nachu aYudeya. 41Oku kwamupopeleluwu kukulusu kwadiŋi itempa; omu mwitempa mwadiŋi ŋamu dadiha kanda akamikaŋamu dehi muntuku. 42Ochu chadiŋi ŋamu kwakwihi, hiyakumukamikamu, Muloŋa wefuku dawaYudeya dakulopesha paseka.

Currently Selected:

Joani 19: MW62

Highlight

Copy