Joani 18

1Chanahoshiyi mazu awa, Yesu hakwidika nawatumbanji twindi, hakuya kwishinadi dakaloŋa Kidironi kwadiŋi itempa, hakwijila mu yomweni nawatumbanji twindi. 2Ilaŋa iwu Yudasi wamufukejeli, welukiluku, muloŋa Yesu wayilaŋaku kakavulu nawatumbanji twindi. 3Yudasi chanatambuliyi chendu chamashidika niatulama kudi awakulumpi jawatupristu nikudi aFwarisi, hakuya kwenoku namanoŋu niyimunyi niyitwa. 4Dichi Yesu weluka dehi yuma yejima yikukeŋa kumushikena, hakuyikinkilila. Hakuyihula nindi, Mukukeŋanyi? 5Hiyakumwakula nawu, Yesu wakuNazareta. Yesu hakuyila nindi, Diyi ami. NiYudasi wamufukejeli, nemani chimu nawu. 6Ochu chayililiyi nindi, Diyi ami; hiyakufunta mankinkanyima, adimbuka niheseki. 7Hakuyihula cheŋi nindi, Mukukeŋanyi? Nawu, Yesu wakuNazareta. 8Yesu hakuyakula nindi, Nayileji dehi nami diyi ami; dichi neyi yami mudi nakukeŋa, yilekenu awa adiyili kwawu; 9kulonda izu dahoshayi dehi dilumbuluki, deliliyi nindi, Awa wanyinkeli hinajimbeshuhu hela wumuku. 10Dichi Shimona Petulu wadiŋi nampoku yakabali, hakuyihola hakutapa nduŋu yakapristu muneni, kutapa kwakumuketula itu dindi dachidiilu. Ijina danowu nduŋu Malikusa. 11Dichi Yesu hakumwila Petulu nindi, Somekaku mpoku yeyi muchindalu chayu; lupasa lwananyinkiyi Tata nibuli kunwa?

12Ochu chendu, nimukulumpi wawatulama, niatulama twawaYudeya, hiyakumukwata Yesu, hiyakumukasa. 13Asambilili kumutwala kudi Anasi, muloŋa diyi mukwesanu waKayafwasi wadiŋi kapristu muneni hamwakowu. 14Yena Kayafwasi diyi walejeli aYudeya maana akwila nindi, Chinawahi muntu wumu afwili awa antu.

15Shimona Petulu hakumulonda Yesu, nikambanji mukwawu nawa. Owu kambanji mukwawu amwiluka dehi kudi kapristu muneni, hakwijila naYesu muchipaŋu chakapristu muneni. 16Ilaŋa Petulu hakwimana hanzi kuchisu. Owu kambanji mukwawu elukawu kudi kapristu muneni, hakwidika, hakuhosha namumbanda wahembelaŋa kuchisu, hakumwiŋija Petulu. 17Dichi chaŋadima chamumbanda wahembelaŋa kuchisu, hakumwihula Petulu nindi, Nineyi nawa wukambanji kaniwu muntu, tahindi? Yena hakwila nindi, Nehi, hiyamuku. 18Henohu anduŋu naawatulama adiŋi nakwimana kwenoku, abutula dehi kesi kamakala. Adiŋi nakwota kesi namashika adiŋuku, niPetulu nawa hakwimana nawu nakwota kesi.

19Dichi kapristu muneni hakumwihujola Yesu nsaŋu yawatumbanji twindi, nichalejelaŋayi antu. 20Yesu hakumwakula nindi, Ami nahosheli hatooka kumesu awantu ejima. Nayilejelaŋa mafuku ejima mumashikola nimutembeli mwapompelaŋa aYudeya ejima. Hinahoshuhu dehi chuma hambaduku. 21Wukupihujoleladi? Yihuli antu adiŋi nakuntiya chinahoshelaŋa. Wena eluka chinahosheli. 22Chanahoshiyi mwenimu, kalama wemenuku hakumweta Yesu mbaŋala, nindi, Kapristu muneni wumwakuli chenochu? 23Yesu hakumwakula nindi, Neyi nahoshi chatama, shimunaku chinatamishi, ilaŋa neyi chachiwahi wunaŋetelidi? 24Anasi hakumutemesha kudi kapristu muneni Kayafwasi chochamukasawu.

25Henohu Shimona Petulu saŋa emenayi nakwota kesi. Dichi hiyakumwihula nawu, Nineyi nawa wukambanji kindi? Yena hakudikala nindi, Nehi, hiyamuku. 26Kuchinka kambanji wumu kakapristu muneni, ntaŋa yanowu muntu aketulawu itu kudi Petulu, nindi, Ami hinakumona chimu nindi mwitempaku? 27Dichi Petulu hakudikala cheŋi; ikombu edikila nihohenohu.

28Dichi hiyakumufumisha Yesu kudi Kayafwasi kwadiŋiyi, hiyakumwiŋija mwitala dakusompela. Henohu kunachi dehi. Ilaŋa wenawu kwijila mwitala dakusompela nehi, akenda kadiŋilola, kulonda atweshi kudya paseka. 29Dichi Pilatu hakwidika hanzi hadi wena nindi, Iwu muntu munamuholokeli namuloŋanyi? 30Hiyakumwakula nawu, Neyi yeniwu muntu hadiŋi mukwakutamishaku, twadikumuleta kudeyi? 31Pilatu hakuyila nindi, Mutambulenu mumusompeshi enu aweni mwaya nshimbi jenu. AYudeya hiyakumwila nawu, Etu kujaha muntu chinjila; 32kulonda mazu ahosheliyi Yesu, ashimwiniyi mwakafwilayi alumbuluki.

33Dichi Pilatu hakufunta cheŋi mwitala dakusompela, hakumutambi ka Yesu, hakumwila nindi, Eyi komana wuMwanta wawaYudeya? 34Yesu hakwakula nindi, Wunahoshi mwenimu eyi aweni, tahindi anakulejumu kudi antu acheŋi? 35Pilatu hakwakula nindi, Ami nikaYudeya, tahindi? Muza weyeyi aweni niakulumpi jawatupristu, diwu anakuleti kudami. Wunelidi? 36Yesu hakwakula nindi, Wanta wami hiwampata yamunu mwishinaku; neyi wanta wami wadiŋi wampata yamunu mwishina, ambuŋami adi kulwa, kulonda abuli kunhana kudi aYudeya; wanta wami hiwamunuku. 37Dichi Pilatu hakumwila nindi, Eyi komana wumwanta? Yesu hakumwakula nindi, Wunahoshi eyi aweni neyi nimwanta; dichi chinavwalikilili, dichi chinenjilili mumpata yamunu mwishina, kulonda nakeli chinsahu chansaŋu yalala. Akwansaŋu yalala ejima atiyaloŋa izu dami 38Pilatu hakumwihula nindi, Nsaŋu yalala yika?

Chanahoshiyi mwenimu hakwidika cheŋi hadi aYudeya, hakuyila nindi, Ami kwami hinamumoni nachitelaku. 39Ilaŋa mukweti chaaku chakwila chiŋa niyumbiluku muntu wumu hapaseka. Dichi munakeŋi niyumbiluku Mwanta wawaYudeya, tahindi? 40Dichi hiyakuvwakuka nakubidika cheŋi naŋovu nawu, Bayi yeniwuku, chiŋa Baraba. Yena Baraba wadiŋi kapondu.

Currently Selected:

Joani 18: MW62

Highlight

Copy