Likezo 3

1Petulu naYowanu hiyakukanduka nawu epili mutembeli haora yakulomba, yoyamuchitanu nachiwana. 2Kwadiŋi iyala wachifwayi chanyendu, wufwayi wakuvwalika nawu; adiŋi nakumukamika hefuku hefuku kuchisu chatembeli chatenaŋawu nawu chaLubanji, kulonda alombaŋa tuyamukunkulu kudi antu adiŋi nakwijila mutembeli. 3Yenowu chanamoniyi aPetulu naYowanu hiyakukeŋa kwijila mutembeli, hakuyilomba kachamukunkulu. 4Petulu hakumushinshika swi-i, niYowanu hamu, nindi, Tutali. 5Hakuyitala, nindi keŋa atambuli kachuma kudi wena. 6Ilaŋa Petulu nindi, Ami kwami hinikweti hela siliva hela wuruku; chuma chinidi nachu dichi nukukwinka. Nakwili mwijina daYesu Kristu wakuNazareta, nami endaku. 7Hakumukwata kuchikasa chachidiilu, hakumuhindwisha; hohenohu ninyendu yindi nimafwahindi akutupokosu akwata niŋovu. 8Hakutumbuka, hakwimana, hakutachika kwenda; hakwijila nawu mutembeli nakwenda nakukiluka nakuhameka Nzambi. 9Antu ejima chanamumonuwu nakwenda nakuhameka Nzambi, 10hiyakumwiluka nawu, diyi wadiŋi nakushakamina tuyamukunkulu kuchisu chatembeli chaLubanji, hiyakukumina dakudihayamina nikujinoka nankashichuma chanamoniyi.

11Chaneliyi wuchidi wakwata aPetulu naYowanu, antu ejima hiyakupompa kudi wena lufuchi mwikeki datenaŋawu nawu daSolomoni, nakuhayama nankashi. 12Petulu chanachimoniyi, hakwakula antu nindi, Enu akwetu amayala aIsarela, chuma chanamoniyi iwu iyala munachihayaminidi? Mukutushinshikiladi, munatoŋojoki nenu yetu tunamwendeshi naŋovu jetwetu, indi nakujila kwetu, tahindi? 13Nzambi yaAbarahama naIsaka naYakoba, Nzambi yawankakulula jetu, nalemeshi kambuŋindi Yesu mwahaninenu, mwalekelenu chemeniyi kumesu aPilatu, chakeŋeliyi kumuumbaku. 14Ilaŋa enu mwalekeli Wajila, Waloŋa; mwalombeli kuyinka mbanji. 15Himukujaha Mwiniwumi asaŋulawu dehi kudi Nzambi mudi afu; chumochu twachimweni namesu. 16Nakukuhwelela ijina dindi, dimu munakoleli iwu iyala munamoni, mweluka dehi. Eŋa, kukuhwelela kwakukuhwelela yena, diku kunamwinki kukola kwalala kumunamoni namesu enu wejima wenu.

17Nochu dinu, enu ana kwetu, neluki nami enu mwachilili chakuyamba, dichi chelili nianyuli jenu nawa. 18Yuma yalejelaŋahu dehi Nzambi kutunwa twawatuprofwetu ejima, yakwila nindi Kristu windi akakabi, yinalumbulukili dehi mwenimu. 19Dichi dinu, balumukenu munyichima yenu, mufunti, kulonda akajimaŋeshi nyiloŋa yenu, kulonda kwinzi yilaaka yakuhizumwisha yakuleta Ŋovu jakufuma kwekala Yehova. 20Kulonda akatemeshi Kristu afuukwililuwu, diyi Yesu. 21Yenona chiŋa ekala mwiwulu nichamba kafuntishawu yuma yejima muyadiŋi, yoyatenena ŋahu dehi Nzambi kutunwa twawatuprofwetu twindi ajila akufumisha kushankulu. 22Mosi wahosheli chalala nindi, Yehova Nzambi wakayimwekeshela kaprofwetu wamudi ana kwenu wakekala neyi ami; wakamutiyililaŋa mwejima mwakayilejaŋayi. 23Muntu wakabula kutiyilila mazu akaprofwetu owu; akamunoŋesha chikupu mumuzowu. 24Eŋa, atuprofwetu ojima, kufumisha hadi Samweli ninawa alondelelumu, ahoshelumu wejima wawu, nakushimuna yuma yawena mafuku anu. 25Enu yenu anyana kawatuprofwetu, nikachitiyaŋenu chatiyaŋeniyi Nzambi nawankakulula jenu, chamwililuwu Abarahama kudi Nzambi nindi, Mudi anyaneyi dimu mwakakoolekela yisaka yahamaseki yejima. 26Nzambi chasaŋwiliyi kambuŋindi mudi afu, wásambilili kumutemesha kudenu, akayikiswili nkisu, nakuyibalumuna munyichima yenu wejima wenu, mufumi mukuluwa kwenu.

Currently Selected:

Likezo 3: MW62

Highlight

Copy