Likezo 4

1Heliluwu achidi kuhosha nawantu, atupristu nimukulumpi wamashidika amutembeli, niaSadusi, hiyakuyishintakesha; 2anatiyi dehi kutama chadi nakulejawu antu nawu mudi Yesu afu amba kasaŋuka. 3Hiyakuyikwata, hiyakuyisha mwakuyihembela, kulonda achiŋilili kucha, muloŋa henohu kuneli dehi melela. 4Ilaŋa mavulu anatiyi dehi mazu hiyakwitiya, kuchinda amayala ashikili kafwampi neyi makombakaji atanu.

5Chikunachi, anyuli jawu niakulumpi niansoneki, hiyakupompa muYerusalema, 6nikapristu muneni Anasi, niKayafwasi, niYowanu, niAlesanderi, nichisaka chakapristu muneni chejima. 7Hiyakuyimika mukachi, hiyakuyihula nawu, Ichichuma chimuneli munachili naŋovwinyi? nejina danyi? 8Petulu, nenzali dehi Spiritu Wajila, hakuyila nindi, Enu mwayulaŋa antu, ninenu awakulumpi, 9chimudi nakutwihula lelu iwu mudimu wawuwahi wutunakoleshi nachu muntu wadiŋi chifwayi; 10tiyenu chachiwahi mwiluki, wejima wenu mwahita aIsarela ejima nenu, ijina daYesu Kristu wakuNazareta, mwapopelenu kukulusu, asaŋulawu dehi kudi Nzambi mudi afu, mudi yena dimu munakoleli iwu muntu nemani kunu kumesu enu. 11Yesu diyi ilola dimwadiwili enu akwakutuŋa, delishiluwu namutu wewombu. 12Hikwekala kuhanda mudi wacheŋuku, muloŋa munu mwishina mukachi kawantu hiyanenkumu ijina dacheŋi dakuhanda nachuku.

13Chamwenuwu kuumika kwawaPetulu naYowanu, kuyitala komana hiyantu akadi kwiluka nyikanda, hela kwijila mumashikola amaana, hiyakuhayama. Chanayishinshikuwu ayiluka nikuyiluka, nawu wowu adiŋi laŋa naYesu. 14Chanamonuwu iyala akolesheluwu nemani nawu, hiyamweni mwakutadikilaku. 15Ilaŋa chanayilejuwu kufuma muchota ayi kumbadi, hiyakushakama hampùŋa. 16Nawu, Awa amayalawa tukuyila ŋahili Muloŋa chinjikijilu chanakoŋuwu hichakuyambaku, chinamwekani kudi antu ejima ashakama muYerusalema; hitukutwesha kudikala mwokuku. 17Tukuminenu dakuyikonkomwena chakuyizuwila, kulonda kufumisha hanu aleki kuhosha nawantu mwijina daYesu, kulonda nsaŋu iyi yibuli kutiyakana kwacheŋi mukachi kawantu. 18Hiyakuyitambika, hiyakuyileja naŋovu nawu, Bayi muhosha cheŋi hela kuleja antu mwijina daYesu, hela hantuku. 19Ilaŋa Petulu naYowanu hiyakuyakula nawu, Chachiwahi kumesu aNzambi kutiyilila enu, tahindi chachiwahi kutiyilila Nzambi? Sompenu ntahi enu aweni. 20Muloŋa kuleka kutena yuma yitwelili nikumona nikutiya, etu kwetu kutwesha nehi. 21Chanayikonkomwenuwu cheŋi chakuzuwa, hiyakuyumbaku, anakaŋanyi dehi kumona chuma chakuyibabeshela; anatiyi dehi woma wawantu, muloŋa antu ejima hiyakulemesha Nzambi hachuma chaneluwu. 22Ona muntu eliluwu chinjikijilu chakumukolesha wadiŋi wanyaka yakubadika makumi awana.

23Chanayilekuwu, hiyakuya kudi akwawu, hiyakushimuna mwejima mwanayihoshuwu kudi awakulumpi jawatupristu nikudi awakulumpi. 24Chanatiyuwu mwenomu, hiyakubidika kudi Nzambi namuchima wawu wumu hohu nawu; Eyi Mwanta, yeyi waleŋeli niiwulu niiseki nikaluŋalwiji, niyuma yejima yidumu; 25mwomu wahosheleli kukanwa kankakulula yetu kambuŋeyi Davidi neyi, AJentili anazuwilidi? Antu atoŋojokelidi chuma chamukunkulwayi? 26Anyanta ahamaseki anatandami, anyuli jawu hiyakushakama hampùŋa lwi naYehova nawindi awayishayi dehi manji. 27Chalala kwaamu, nikambuŋeyi wajila Yesu, iwawayishili manji, amupompeleli kudi aHerodi naPontusi Pilatu, hamu nawaJentili, ninyuza yawaIsarela, muŋanda yinu; 28eli mwakeŋa eli kwila chikasa cheyi, muwatoŋwelaŋahu dehi hampùŋa yeyi. 29Ichi dinu Mwanta, talaku chanatukonkomwenuwu chakuzuwa, atwiteji etu anduŋu jeyi tushimuni mazu eyi chakadi woma, 30iku wudi nakwolola chikasa cheyi nakukolesha antu, nakwila yinjikijilu niyihayamisha yakwila nejina dakambuŋeyi wajila Yesu. 31Chanalombuwu, omu mwapompeleluwu himukukanka; wejima wawu hiyakwinzala Spiritu Wajila, hiyakuhosha mazu aNzambi chakadi woma.

32Izaza dawantu etiyili, hiyakwikala namuchima wawu wumu, nayitoŋojoka yawu yimu, hikwadiŋi niwumu wehli nindi yuma yahetayi yindi kanka winduku; ilaŋa yuma yawu yejima hiyikwikala yebomba. 33Apostolu hiyakushimuna naŋovu yayeni wunsahu wawu wakusaŋuka kwasaŋukiliyi Mwanta Yesu mudi afu. Luwi lwalweni hilukuwanina wejima wawu; lwakwila kwosi muntu niwumu wabulili chumaku; 34muloŋa antu adiŋi namaha, hela matala, hiyakuyilandisha, hiyakuleta mali ayuma yanalandishuwu, 35hiyakutulila kunyendu yawapostolu, hiyakupaŋila hamuntu hamuntu mwanabuliluwu.

36Yosefu, atumbiluwu kudi apostolu ijina di kwawu daBaranaba, daya mukwila nawu Sakukundeja, kaLevi wavwalikili kuKipirosi; 37wadiŋi nakapata, hakukilandisha, hakuleta owu mali, hakuyitulila kunyendu yawapostolu.

Currently Selected:

Likezo 4: MW62

Highlight

Copy