Likezo 2

1Chelili ifuku dapentekosta dinashiki dehi chikupu, wejima wawu adiŋi hamu mwomumu. 2Kukasumuka mwiwulu himukufumalushindu ludi neyi lwampepela yikukunka naŋovu yasweja nankashi, hilukwinzesha itala dejima mwadiŋi nakushakamawu. 3Hikukuyimwekena madimi aambuka, adi neyi nyizuzu yakesi; hiyikuwilawila hadi wena ejima hamuntu hamuntu. 4Wejima wawu hiyakwinzala Spiritu Wajila, hiyakutachika kuhosha madimi acheŋi, mwomwayinkeleluwu kudi Spiritu kuhosha.

5Henohu kuYerusalema kunashakami aYudeya, amayala akweti kalemesha kakulemesha Nzambi, anafumafumi kwahita nyuza yamunu mwishina yejima. 6Chinatiyakani olu lushindu, izaza dawantu hidikupompa, hiyakuketwila dakuhayama nikutiya woma, nanichi chadiŋi nakuyitiyawu nakuhosha wejima wawu, iwu mwidimi dindi, iwu mwidimi dindi. 7Wejima wawu hiyakukasumuka nikuhayama chikupu nawu, Talenu, awa akuhosha, wejima wawu hiyaŊaliliyaku? 8Indi tudi nakutiya ŋahi, wejima wetu hamuntu hamuntu, iwu mwidimi dindi dachisemwa, iwu mwidimi dindi dachisemwa? 9AParatiya nawaMediya, niaElamiti nawantu ashakama muMesopotamiya, nimuYudeya, nimuKapadosiya, nimuPontu, nimuAsiya, 10nimuFwirŋiya, nimuPamfwiliya, nimuEjipitu, nikumutamba waLibiya kwakwihi naKireni; nawantu anafumi kuRoma, aYudeya nawanabalumuki kwikala aYudeya; 11niaKereta niaArabiya; hitukuyitiya nakuhosha mumadimi etwetu aweni nakutena nyidimu yaNzambi yaŋovu. 12Hiyakukasumuka wejima wawu nikujinoka chikupu; hiyakudihula muntu namukwawu nawu, Ichi chaya mudihi? 13Ilaŋa makwawu hiyakuseha nawu, Anasheti dehi vinyu yayiha.

14Petulu hakwimana chimu nekumi nawumu, hakubidika nakuyileja nindi, Enu akwetu aYudeya, ninenu ejima mwashakama muYerusalema, leka niyileji chachiwahi mwiluki; ntiyililenu munukuyileja. 15Nami wenawa hiyanasheti neyi chimudi nakutoŋojokaku; kutoŋa ifuku dichidi ora yamuchisatu hohu. 16Chuma chimunamoni, chochuma chateneni kaprofwetu Yoweli, 17nindi, Nzambi nindi, Chakela hamafuku akukuminina, nakechila yaSpiritu yami hadi antu ejima; ni anyanenu amayala nawambanda akaprofweta, anyikwenzi enu akamona yimwenu, mapalenu amayala akalota malota. 18Mwamweni, nihadi anduŋu jami amayala nawambanda nakechila yaSpiritu yami hamafuku akalondelamu, akaprofweta. 19Nakamwekesha yuma yakuhayamisha mwiwulu haluzwizu, niyinjikijilu hamaseki mwishina; mashi ni kesi nikufwinda wishi. 20Itaŋwa dakabalumuka mwidima, nikakweji kakabalumuka nge neyi mashi, hamba kakeŋa kwinza ifuku daYehova datiyakana deneni. 21Chakela, muntu wakatambika ijina daYehova wakapuluka.

22Enu akwetu amayala aIsarela, tiyenu niyileji, nami Yesu wakuNazareta, iyala etejeluwu kudi Nzambi nanyidimu yaŋovu, niyihayamisha, niyinjikijilu yeliliyi Nzambi nayena mukachi kenu, neyi chimuneluki dehi enu aweni; 23yena amuheni chakusambila dehi kushakama hampùŋa, chakwiluka ŋahu dehi kudi Nzambi, enu mwamupopeleli kukulusu namakasa awantu atama, himukumujaha. 24Nzambi chanamusubuliyi mumakabi akufwa, hakumusaŋula; muloŋa kufwa hikwadiŋi naŋovu jakumukwataku. 25Muloŋanamuteni dehi kudi Davidi nindi, Namweni Yehova kumesu ami mafuku ejima; wudi kuchikasa chami chachidiilu, kulonda jibuli kunkuma. 26Dichi muchima wami hiwukutiya kuwaha, niidimi dami hidikutena nsaŋu yakuluŋa; Eŋa, mujimba wami hiwukushakama nakuchiŋeja. 27Muloŋa hiwakanshiya mukaluŋaku, hela kumwiteja weyi wajila kumona kutoka nehi. 28Wakanleja njila yawumi; hakushakama kumesu eyi kudi muzaŋalu waweni.

29Enu ana kwami, leka niyileji nsaŋu yankakulula Davidi, nami wafwili dehi, amujiikili dehi, ŋamu dindi twekala nadu nilelu. 30Dichi chadiŋiyi kaprofwetu, nichelukiliyi nindi Nzambi nasanyiki dehi nakudishiilamu, nindi kudi anyana akavwalayi wakashakamisha wumu hetanda dindi dawanta; 31dichi chamwenaŋahu dehi chumichi, hakutena nsaŋu yakusaŋuka kwaKristu kwamudi afu, nindi hiyamushiyili mukaluŋaku, hela mujimba windi hiwamweni kutokaku. 32Yeniwu Yesu Nzambi wamusaŋwili mukufwa, wejima wetu tunachimoni namesu. 33Dichi chanamutúumbakeshuwu dehi nakumusha kuchikasa chaNzambi chachidiilu, chanatambuliyi dehi kudi Tata Spiritu Wajila akaniniyi, anechili chumichi chimuneli nikumona nikutiya. 34Muloŋa Davidi hakandamini mumawuluku; ilaŋa yomweni nahoshi nindi, Yehova wamwilili Mwanta wami, 35nindi, Shakamaku kuchikasa chami chachidiilu nichinakayilisha akwankunyi neyi itanda dakunyendu yeyi. 36Dichi enu akwamutaŋa waIsarela ejima, ilukenu kwenu chalala, iwu Yesu mwapopeleli kukulusu, Nzambi namubalumuni dehi kwikala niMwanta diyi, niKristu diyi.

37Chanatiyuwu mwenimu, alemana nimunyichima yawu. Hiyakuyila aPetulu nawapostolu amakwawu nawu, Enu ana kw-etu, tukwila ŋahi? 38Kuchinka Petulu nindi, Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nyiloŋa yenu; mutambuli chamukunkulu chaSpiritu Wajila. 39Muloŋa diyi ayikanawu dehi ninenu ni anyanenu, niantu ejima ekala kwakulehi, ejima akatambikawu kudi Yehova Nzambi yetu enzi kudi yena. 40Hakuyishimwina nakuyishinjila chikupu namazu amakwawu amavulu nindi, Pulukenu kudi antu achisakichi chaheŋa. 41Dichi wena atambwili mazu indi hiyakuyipapatisha; ifuku denodu hiyakubombelaku antu kafwampi neyi makombakaji asatu. 42Hiyakukakela mbe mukuleja kwawapostolu, nimukukundaŋana, nimukuhumuna mankendi, nimukulomba.

43Antu ejima atiya niwoma. Apostolu hiyakwila yihayamisha yayivulu niyinjikijilu. 44Owu ejima etiyili hiyakwikala hohamu; yuma yiikala niyawu yebomba 45Hiyakulandisha mahetawu niyuma yawu, hiyakupaŋila akwawu ejima mwabulililuwu. 46Hiyakukakela mutembeli hefuku hefuku, namuchima wawu wumu, nakuhumuna mankendi mumatalawu; 47hiyakutiya kuwaha nakudyaloŋana, nakuhameka Nzambi namuchima wawuwahi. Hiyakuyimona kuwaha kudi antu ejima. Mwanta hakubombelaku hefuku hefuku awa adiŋi nakuhanda.

Currently Selected:

Likezo 2: MW62

Highlight

Copy