Luka 7

Yesu mwahindula ndungo yakapitau

(Mat 8:5-13)

1 # 7:1-10; Yowa 4:46-53 Omu akumishile kunangula vatu vihande vyenyi vyosena, engilile muKapelenau.

2Jino kapitau kamaswalale apwile nandungo yenyi ápwile wamulemu chikuma kuli ikiye, kaha uze ndungo avijile, apwile hakamwihi nakufwa.

3Omu uze kapitau kamaswalale evwile puho yaYesu, atumine vakulwane javaYuleya nakumusanyika ezenga nakumuhindwila uze ndungo yenyi.

4Kaha omu vahetele kuli Yesu, vamulembelele chikuma ngwavo, Chinamutela Ove kumulingilacho,

5 # Vili 10:2 mwomwo azanga vaka-lifuchi lyetu, kaha natutungila nasunangonga#7:5 Tala ha4:16. yetu.

6Kaha Yesu ayile navo. Omu ahetele kwakamwihi nazuvo, uze kapitau kamaswalale atumine mazu namasepa jenyi ngwenyi, Ove Mwata, kanda uliyanjisako, mwomwo kangwatelamoko Ove kwingila muzuvo yami.

7Hakiko ngwamonanga ngwami kangwatelamoko kwiza kuli Ove. Shikaho hanjika kaha lizu ngamba yami ahinduke.

8Mwomwo nayami nawa nguwakutongola ngumutu vayula, kaha nguli namaswalale ngwáyula. Kaha nangwamba ou ngwami, Yako, kaha himwaya. Kaha mukwavo ngwami, Twaya, kaha himweza. Kaha ndungo yami ngwami, Linga echi, kaha himwalinga.

9Kaha omu Yesu achivwile chamukomwesele, kaha alumukile nakutala kulize lizavu lyamukavilenga nakwamba ngwenyi, Nangumilweza ngwami, chipwe tuhu muIsalele kanda lyehi nguwanemo lufwelelo lupwaha ngana.

10Kaha vaze vatumine omu vakindulukile kuzuvo, vawanyine uze ndungo ali lyehi kanawa.

Yesu mwayoyesa mwana tuliwe

11Kufuma haze, Yesu akatukile nakuya kulimbo limwe lyakembwe vavuluka ngwavo Nane, kaha tumbaji twenyi nalizavu lyalinene vayile nenyi.

12Omu apwile nakupandama kuchikolo chalize limbo, amwene vali nakulovola chivimbi, mwana walunga, apwile lyamunwe kuli naye, naye nawa tuliwe, kaha lizavu lyakutamo lyamuze mwimbo lyapwile nauze tuliwe.

13 # 7:19; 10:1; 11:39; 12:42; 13:15; 17:5-6; 18:6; 19:8; 22:61; 24:3 Kaha omu Mwata amumwene, amwivwilile keke, amwambile ngwenyi, Kanda ulilako.

14Kaha omu apandamineko, akwachile kumusela kaha vaze vaumbachile vemanyine kikili! Kaha ambile ngwenyi, Ove mwanalunga, nangukwamba ngwami, Hinduka!

15Kaha uze mufu akondomokele nakuputuka kuhanjika. Kaha Yesu amuhanyine kuli naye.

16Kaha woma wavakwachile vosena, hinavalisa Kalunga haupuhu wenyi hakwamba ngwavo, Vanakatula #7:39; 24:19; Mat 21:11; Yowa 6:14Kapolofweto wamunene mukachi ketu. Kalunga nalakana vatu jenyi.

17Kaha ou mujimbu wakumuvuluka watanjile muYuleya mwosena namujingalila josena jahachileko.

Yowano muka-kujimika mwatuma tumbaji twenyi kuli Yesu

(Mat 11:2-19)

18Tumbaji twaYowano vamwambulilile Yowano vyosena evi.

19Kaha Yowano atumine tumbaji twenyi vavali kuli Mwata vakamuhulise ngwavo, Ove yove Uze vashika kwiza tahi, nyi tutalilile weka?

20Kaha omu vahetele vaze malunga kuli Yesu vambile ngwavo, Yowano muka-kujimika vatu natutumu kuli Ove nakukuhulisa, ngwenyi, Ove yove Uze vashika kwiza tahi, nyi tutalilile weka?

21Halwola luze, #Mat 4:23; Mako 3:10ahindwile vavavulu kumisongo yavo, nakuuveji wavo, nakuli vashipilitu vavapi, kaha atonesele tupuputa vavavulu.

22Kaha avakumbulwile ngwenyi, Yenu mukamulweze Yowano evi munamono nevi munevu — ngwenu, #Isa 29:18-19; 35:5-6Tupuputa vali nakumona, vaka-kumbilikita vali nakutambuka kanawa, vaka-mbumba vali nakuvatomesa, tujika-matwitwi vali nakwivwa, vafu vali nakuvasangula, #4:18-19; Isa 61:1vaka-kuhutwa vali nakuvambulila mujimbu wamwaza.

23Kaha atokwa ou mwazeneka kumona chakumufutwisa muli Ami.

Milimo yaYowano muka-kujimika vatu

24Omu vafumineko valúwa jaYowano, Yesu aputukile kuhanjika kumazavu aze hakuvuluka Yowano, ngwenyi, Mwayile nakutala ika mupambo? Lihongo ványikishilenga kupeho tahi?

25Nyi jino mwayilemo nakutala ika? Mutu wakuvwala uvwalo wamwaza tahi? Talenu, vaze vávwala uvwalo waupahu nakuyoyela muuhando vatwama muvipango vyavamyangana.

26Nyi kumana mwayilemo nakutala ika? Kapolofweto tahi? Eyo, nangumilweza ngwami, ou ahambakana kapolofweto.

27Ou Ikiye vavuluka haze vasoneka ngwavo,

# Mala 3:1; Mat 11:10; Mako 1:2 Tala, nangutuma muluwa wami kulutwe lwove,

Ou mwátetekelako nakulongesa jila yove.

28Nangumilweza ngwami, muli vakusemuka kuli mapwevo, naumwe wauchi ahambakana Yowano. Oloze uze ákuminamo chikuma muwangana waKalunga amuhambakana.

29Vatu vosena, navaka-kutelesa nawa, omu vachivwile, vetavile ngwavo Kalunga wakwoloka, hakupwa #3:12; Mat 21:32vavajimikile mulujimiko lwaYowano.

30Oloze vaFwaliseu #Mat 22:35navakúluwa mujishimbi vakanyine kujina chaKalunga hali vakiko, mwomwo vakanyine kuvajimika kuli Yowano.

31 Yesu ambile ngwenyi, kaha jino, vatu vachisemunwino chino nanguvafwanyisa naka? Nyi vanapu nge veya?

32Vanapu nge vanyike vanatwame muchilanjilo nakulisanyika navakwavo nakwamba ngwavo,

Twamimbilanga tupyololo, kaha kamwakinangako,

Twamimbilanga lungungu, kaha kamwalilangako.

33Mwomwo omu ejile Yowano muka-kujimika vatu, #1:15kalile mboloko, kanwine vinyoko, kaha enu ngwenu, Ali nandemone.

34Mwanamutu omu neza, #5:29; 15:1-2; 7:36-50ali nakulya, ali nakunwa, kaha enu ngwenu, Talenu Muka-kufwa hakulya, Chitakwa, Sepa lyavaka-kutelesa navaka-shili!

35Olozenyi,

Mangana vanawasambisa kuli vana venyi vosena#7:35 Nge ngwavo, Mwata Ikiye Samangana, vana venyi hakumufwelela vanamusambisa..

Yesu muzuvo yakaFwaliseu Shimona

36Jino #7:36-50; Mat 26:6-13; Mako 14:3-9; Yowa 12:1-8kaFwaliseu umwe #11:37; 14:1asanyikile Yesu alyenga nenyi. Kaha engilile muzuvo yauze kaFwaliseu nakusendavala kumesa.

37Kaha kukasumuka, pwevo muka-shili wamulimbo lize lyakembwe we-e, hakutachikiza ngwenyi Yesu nasendavala kumesa muzuvo yauze kaFwaliseu, ejile nasaji yalilolwa yamaji alivumba lyamwaza,

38nakwimana kunyima yaYesu kuvikamba vyamahinji enyi, nakulila, kaha aputukile kuzovesa vikamba vyaYesu namasoji enyi, nakuwahunda najikambu jenyi nakusweswenya vikamba vyaYesu nakuviwavisa maji alivumba lyamwaza.

39Jino omu achimwene uze kaFwaliseu ámusanyikile, alyambile ngwenyi, Nge Ou apwanga #7:16; 24:19; Mat 21:11; Yowa 6:14Kapolofweto kachi natachikiza omu apwa ou pwevo namukwate, mwomwo muka-shili.

40Kaha Yesu amukumbulwile ngwenyi, Ove Shimona, nguli namazu nayove. Kaha ikiye amukumbulwile ngwenyi, Hanjika, Ove Muka-kunangula.

41 Kaha Yesu ngwenyi, Muka-kukongwesa jimbongo umwe apwile navaka-mikuli vavali. Umwe apwile namukuli wajindenali #7:41 Ndenali yimwe yapwile fweto yakuzachila likumbi limwe. makulukaji atanu (500), kaha mukwavo makumi atanu (50).

42Omu #Mat 18:25vahonene kumukindulwishila, avakonekelele vosena vavali. Jino umwe ulihi mwahambakana kumuzanga?

43Shimona amukumbulwile ngwenyi, Pamo ou vakonekelele mwamunene. Kaha Yesu amwambile ngwenyi, #10:28Unahanjika mwakwoloka.

44Kaha omu alumukile nakutala uze pwevo, amwambile Shimona ngwenyi, Unamumono ou pwevo nyi? Ngwengilanga muzuvo yove, #Kupu 18:4; 19:2; 43:24; Kuyu 19:21kawanguhananga meya akusana kumahinji amiko, oloze ikiye nazovesa mahinji ami namasoji enyi nakuwahunda najikambu jenyi.

45Kawangusweswenyangako, oloze kufuma haze ngwengilanga kalitwaminyine kungusweswenya kumahinji amiko.

46Kawawavisanga mutwe wami majiko, oloze ikiye nawavisa vikamba vyami maji alivumba lyamwaza.

47Shikaho nangukulweza ngwami, Milonga yenyi yashili, chipwe tuhu yayivulu, vanamukonekelayo — hakiko nanguzangila chikuma. Oloze ou návakonekela yayindende, mwasolola nawa zangi yayindende.

48Kaha amwambile uze pwevo ngwenyi, #Mat 9:2; Mako 2:5; Luka 5:20Milonga yove yashili vanakukonekelayo.

49Vaze vasendavalile nenyi vaputukile kulihwojola mumichima yavo ngwavo, Iya Ou numba akonekele mutu milonga yenyi yashili?

50Kaha Yesu amwambile uze pwevo ngwenyi, #Mat 9:22; Mako 5:34; Luka 8:48Kufwelela chove chinakulwili. Yakonga mukuunda.

Currently Selected:

Luka 7: LUE

Highlight

Copy