Luka 8
8
Mapwevo vakafwilenga Yesu
1Kaha kufuma haze, Yesu ahichilenga mumembo-akembwe namumembo akwavo #4:15; Mat 4:23nakwambulula nakulumbununa mujimbu wamwaza wawangana waKalunga. Kaha vaze likumi navavali (12) apwile navo,
2 #
Mako 15:40-41; Mat 27:55-56; Luka 23:49 namapwevo vamwe nawa vahindwile kuvashipilitu vavapi nakumisongo — vapwile ava: Maliya uze vavulukilenga ngwavo muka-Mangatala#8:2 Nge ngwavo, wakulimbo lyaMangatala., muli ikiye mwálovokele vandemone vatanu navavali;
3Yowana pwevo lyaKuza kaselwa kaHelote; Suzana navakwavo vavavulu — vosena ava vakafwilengako naluheto lwavo.
Chishimo chamuka-kukuva
(Mat 13:1-15, 18-23; Mako 4:1-20)
4Kaha omu lizavu lyalinene lyavatu lyapwile nakukunguluka vakufuma kulimbo hilimbo lyakembwe nakwiza kuli Yesu, kaha avatelele chishimo ngwenyi,
5Muka-kukuva ayile nakukuva mbuto yenyi. Omu apwile nakukuva, yimwe yaholokelele kukulo yajila, kaha vayilyachile-lyachile, tujila vahelu vayilile.
6Yikwavo yaholokelele halilolwa, kaha omu yapwile nakukola, yomine chau mwomwo kayapwile nawekekeko.
7Yikwavo yaholokelele mukachi kamingonga, kaha yize mingonga yakolele nayo hamwe nakuyijiha.
8Yeka yaholokelele mumavu awilo, yakolele nakwima manona — halinona hilinona, likulukaji (100). Hakuvuluka vyuma evi, atambakanyine ngwenyi, #Mat 11:15Ou ali namatwitwi akwivwa, evwilile!
9Jino omu tumbaji twenyi vamuhulishile mwalumbunukila chishimo kana, avakumbulwile ngwenyi,
10Enu vanamihane kutachikiza mangana ápwile akusweka awangana waKalunga, oloze veka kuvanga muvishimo mangana,
#
Isa 6:9-10
Omu vali nakutala vazeneke kumona,
Omu vali nakwivwa chizeneke kuvalumbunukila.
11Jino, chishimo echi chalumbunuka ngana. #1 Teso 2:13; 1 Pet 1:23Mbuto akiko mazu aKalunga.
12Vákukulo yajila vakiko vaze vanevu mazu. Kaha liyavolo himweza nakuhukula aze mazu mumichima yavo, mangana vazeneke kufwelela nakuvalwila.
13Kaha váhalilolwa, vakiko vaze omu navevwa mazu, navawatambula nakuwahilila. Oloze kaveshi namiji yakuzamako, navafwelela aze mazu hatando yayindende kaha, oloze hakuveseka navaseza vyalufwelelo.
14Oloze hakuvuluka yize yaholokelele mumingonga, vakiko vaze navevwa mazu oloze hachiyoyelo chavo chize chakuzakamina vyamyaka yino, naluheto, naviseke vyahakaye, vapwa vafu vakuzeneka mihako.
15Hakuvuluka yize yamumavu amwaza, vakiko vaze navevwa mazu nakuwalama mumichima yamuchano yamwenemwene, kaha navemanga mihako hakujikiza mukuunda.
Linongo lyakumunyika zwalala
(Mako 4:21-25)
16 #
11:33; Mat 5:15 Naumwe wauchi mwawika linongo nakulifwikila mumulondo, chipwe kulihaka mwishi yakahela, oloze mwalihaka hachitumbikilo chalyo, mangana vaze navengila vamone zwalala.
17 #
12:2; Mat 10:26-27 Mwomwo kakweshi chakuswamanako navakazeneka kusolola hatoma, chipwe chakusweka navakazeneka kutachikiza nakusolola hatomako.
18Shikaho nyingililenu omu namwivwila, #19:26; Mat 13:12; 25:29mwomwo ou áli navyo navakamuwezelako. Oloze ou keshi navyoko, chipwe chize ashinganyeka ngwenyi ali nacho, navakamutambulacho.
Naye yaYesu navandumbwenyi
(Mat 12:46-50; Mako 3:31-35)
19Jino naye navandumbwenyi vamalunga vejile kuli Ikiye, oloze kavahashile kumupandamako mwomwo walizavu.
20Kaha vamulwezele ngwavo, Noko navandumbwove vamalunga vanemana kuweluka, vanasake kukumona.
21Oloze avakumbulwile ngwenyi, #11:28; Yowa 15:14Mama navandumbwami vakiko vaze veji kwivwanga mazu aKalunga nakulingamo.
Yesu mwaholesa nyamanganda
(Mat 8:23-27; Mako 4:35-41)
22Likumbi limwe, Yesu engilile muwato natumbaji twenyi. Kaha avambile ngwenyi, Tuzaukenu musali yachijiva. Kaha vasunukile.
23Omu vapwile nakuya, Yesu alezukilile mutulo. Kaha nyamanganda ahuhwile hachijiva, nakusaka kuvavombesa, kaha vapwile muponde.
24Kaha vamupandamine nakumuhindula, ngwavo, #5:5; 8:45; 9:33, 49; 17:13Ove Mwata, Ove Mwata, natunonga! Ahindukile nakuhanjikila yize peho nakunganjanga chamakimba, vyaunjile, kaha kwapwile kwalendele#8:24 Nge ngwavo, hameya hanaundu chakuzeneka makanya nge chivanjilo..
25Kaha avambile ngwenyi, Lufwelelo lwenu lulihi? Woma wavakwachile, valikomokelele, hinavalyamba ngwavo, Ou apwa Iya mwahanjikila napeho#8:25 MuchiHelase ngwavo, jipeho. nameya numba vimwononoke ngana?
Yesu mwalovola vandemone muli lunga wakuNgelase
(Mat 8:28-34; Mako 5:1-20)
26Kaha vazaukile muwato nakuya musali, mungalila yaNgelase yakulitalasana naNgalileya.
27Omu Yesu afumine muwato nakuya hatunda, kwamuhumanganyine lunga wamulimbo lize lyakembwe ápwile navandemone, átwaminenga makumbi amavulu chakuzeneka kuvwala, katwaminenga muzuvoko, shina muvimbumbe vyakusendeleka kaha.
28Kaha omu amwene Yesu, atetumukile nakulimbila kumahinji enyi, atambakanyine ngwenyi, Ove Yesu, #Mako 5:7Ove MwanaKalunga Ou álitulaho, #Mat 8:29; Mako 1:24; Yowa 2:4Nguli nachitela muka nayOve? Ngunakulombo, kanda ungumwenesa makavako.
29Mwomwo Yesu ahanjikilile uze shipilitu waunyengwe ngwenyi, Mulovoke! Mwomwo uze shipilitu akwachilenga uze mutu mapapa kakavulu, kaha vamulaminenga wakukasa mumalenge najikuli javikungo, oloze avihokwelenga, kaha uze ndemone amupipwililenga mupambo.
30Yesu amuhulishile ngwenyi, Lijina lyove yove iya? Kaha amukumbulwile ngwenyi, Yami Lengiyona#8:30 Nge ngwenyi, Liyongomena. — mwomwo vandemone vavavulu vamwingilile.
31Kaha vamulembelelele Yesu kuchina mwavahangila #Kuso 9:2, 11; 11:7; 17:8muwina wakuzeneka kukuma.
32Jino, utanga wakutamo wavangulu wapwile nakulya haze hamukandu wapili, kaha vandemone vamulembelelele avetavise vengile muli vangulu. Kaha avetavishile.
33Vaze vandemone valovokele muli uze mutu nakwingila muli vaze vangulu, kaha utanga wosena wangulumukile kuze kwakumbolomoka namuchijiva chu-u, kaha vafwile.
34Omu tufunga vamwene chize chasolokele, vachinyine nakuchambulula mulimbo lize lyakembwe nakungalila yamande.
35 Vatu vayile nakutala chize chasolokele. Vahetele kuli Yesu kuwana uze mutu mwálovokele vaze vandemone — navwale, naundu, natwame kumahinji aYesu, kaha vevwile woma.
36Kaha vaze váchimwene hinavavalweza omu vámuhindwilile uze ápwilenga navandemone.
37Kaha liyongomena lyosena kuze kwahita ngalila yavaka-Ngelase lyalembelele Yesu afume mukachi kavo, mwomwo woma waunene wavakwachile. Shikaho engilile muwato nakukinduluka.
38Uze lunga mwálovokele vaze vandemone amulembele ngwenyi ayenga nenyi. Oloze Yesu amuhilwishile ngwenyi,
39Hiluka kwimbo lyove ukambulule vyuma vipwaha nakulingila Kalunga. Kaha ayile, ambulwilenga muze mwimbo lyalinene mwosena vize amulingilile Yesu.
Yesu mwahindula pwevo nakusangula mwanaYailu
(Mat 9:18-26; Mako 5:21-43)
40Jino omu Yesu akindulukile, lize lizavu lyamutambwokesele mwomwo vosena vapwile nakumuvandamina.
41Kaha kwejile lunga, lijina lyenyi Yailu, apwile #Mako 5:22muka-kuyula musunangonga#8:41 Tala ha4:16.. Kaha alimbilile kumahinji aYesu nakumulembelela ngwenyi ayenga nenyi kuzuvo yenyi,
42mwomwo apwile namwanenyi wapwevo, umwe-lyamunwe, wamyaka kafwe likumi nayivali (12), ápwile hakamwihi nakufwa.
Jino omu Yesu apwile nakuya, mazavu avatu apwile nakumushindakanya.
43Kaha kwapwile pwevo ápwile namusongo wakuhita manyinga myaka likumi nayivali (12), kaha chipwe amanyishile vikumba vyenyi vyosena kuli vimbuke, oloze nayou áhashile kumuka wauchi.
44Ejile kunyima yaYesu nakukwata kuukundwilo wachikovelo chenyi chachisuku, kaha hahaze vene aze manyinga ápwilenga nakuhita omine chau.
45Kaha Yesu ambile ngwenyi, Iya nangukwate? Omu vosena vahamikile, Petulu ambile ngwenyi, #5:5Ove Mwata, awa mazavu akiko ali nakukujingilika nakukushindakanya!
46Oloze Yesu ambile ngwenyi, Kuli umwe nángukwate, mwomwo ngunatachikiza kuli Ami kunafumu ngolo.
47Kaha uze pwevo, omu alimwene ngwenyi kaswamineko, ejile, oku ali nakuchikima nakulimbila hamavu kumahinji enyi, amulwezele kumeso avatu vosena chuma námukwachila, nomu vanamuhindula hahaze vene.
48Kaha amwambile ngwenyi, Ove mwanami#8:48 MuchiHelase ngwavo, Ove mwanami wapwevo., #7:50; 17:19; 18:42; Mat 9:22lufwelelo lwove lunakuhindula#8:48 Mokomoko ngwenyi, Lufwelelo lwove, lunakulwili kumusongo wove.. Yakonga mukuunda.
49Shimbu apwile Yesu nakuhanjika, umwe wakuzuvo yauze muka-kuyula musunangonga ejile nakumulweza ngwenyi, Mwanove wapwevo nafu lyehi, Kanda tuhu umuyanjisa Muka-kunangulako.
50Oloze Yesu hakuchivwa, amukumbulwile ngwenyi, Kanda wivwa womako, fwelela kaha, kaha navamuhindula#8:50 Mokomoko ngwenyi, Mwanove navamulwila kumusongo wenyi wosena..
51Jino omu ahetele kuzuvo, ketavishile vosena kwingilamoko, shina Petulu naYowano naYakova, naise yauze kanyike wapwevo nanaye naIkiye kaha.
52Kaha vosena vapwile nakulila nakulishona, oloze Yesu avambile ngwenyi, Kanda mulìlako, mwomwo kafwileko, #Yowa 11:13nasavala tulo kaha.
53Kaha vamungumukile wo-o, hakutachikiza ngwavo nafu.
54Oloze amukwachile kulivoko, nakumusanyika ngwenyi, Ove kanyike, katuka!
55Kaha shipilitu yenyi yahilukile muli ikiye, kaha hahaze vene akatukile. Yesu avalwezele vamuhane vyakulya.
56Kaha visemi jenyi valikomokelele, oloze Yesu avalwezele #9:21; Mat 8:4; Mako 3:12; 7:36vazeneke kulwezako chipwe umwe echi chinasoloka.
Currently Selected:
Luka 8: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
