Luka 3

Waaji Yuhaana gaɗoowo batisi

(Matiye 3.1-12; Marku 1.1-8; Yuhaana 1.19-28)

1Wakkati Tiber, laamiiɗo Roma waɗi duuɓi sappo e joy der laamaare, Ponsu Pilaatu e laatii hooreejo leydi Yahudiya. *Eroodu bo e laatii hooreejo leydi Galili, mawniiko Filippu e laatii hooreejo Ituriya e Tarakonitis, go Lisaniyaasi e laatii hooreejo Abilenu. 2Go Annas e Kayafas e laatii hooreeɓe *limaamiiɓe. Wakkati mum nun Alla baddi Yuhaana ɓii Jekariya der haro. 3O wari o woosii takkol maayo Urdun, oo waajoo himɓe ɓe baylitoo ɓe tuuba, ɓe gaɗanee *batisi gam hakkeeji maɓɓe yaafee. 4Hande no annabi Esaaya batuno der dewtere mum wi'i:

«Daane gom e bata e semme der haro e wi'a:

Moƴƴinanee Joomiraawo laawol,

poortee laabi makko #3.4-6 Esaaya 40.3-5.

5Lugge fu sukkete,

baalle e tepaaje fu pusete.

Laabi turiiɗi fu foortete,

gayɗe tawaaɗe e laabi fu sukkete.

6Den himɓe fu, yi'an kisidam Alla.»

7Himɓe ɗuuɓɓe e wara to Yuhaana gam o waɗana ɓe *batisi, o bati ɓe o wi'i: «Onon ɓiɓɓe bolle pure, moy tintini on doggon mone Alla waroore? 8Accee kolliton diga e gaɗuuji mon no on baylitake on tuubii, to on bi'ee der ɓerɗe mon: ‟Iburahiima woni baaba amen.” Gam mii bata on e gooŋa. Alla tampataa ko etti kaaƴe ɗee ɗo, tagirana Iburahiima ɓiɓɓe. 9Kakkilee! Gam jammere ettaamaa dow gam feƴƴugo leɗɗe faa e ɗaɗi mum. Leggal ŋal rimataa ɓikkol geetol fu, wudditinte, wattee der yiite.»

10Go jama'aare ƴami mo wi'i: «Den ume nun haani men gaɗa?» 11O toontii ɓe o wi'i: «Gooduɗo toggooje ɗiɗi fu, hokkora mo woodaa woore, gooduɗo nafa bo waɗa hande nun.» 12*Jaɓooɓe ceede faada wari kanun bo waɗaneego *batisi, ɓe ƴami Yuhaana ɓe bi'i: «Moodibbo, ume haani men gaɗa?» 13O toontii ɓe o wi'i: «To on joɓinee goɗɗo ɓura ko desanaɗon.» 14Soogeeji bo ƴami mo wi'i: «Minon bo na, ume haani men gaɗa?» O wi'i ɓe: «To on jaɓiree goɗɗo ceede e semme, to on jammee bo goɗɗo, amma cawroree joddi mooɗon.»

15Jama'aare e wonunoo der keɗaaki, moy fu e miilunoo Yuhaana nun laatii *Almasiihu. 16Go Yuhaana bati ɓe wi'i: «Min, mii waɗana on *batisi e diyam, amma goɗɗo ɓuruɗo am baawɗe e wara, mi fotay du ko jimminii fitti lokkuli paɗe makko. O waɗanan on *batisi e *Ruuhu Ceniiɗo e yiite. 17Oo jogii besirɗum e junŋo makko, o wesan gawri makko, o hawrita ni faa fiyirde laaɓa. O loowa gawri der rummuure makko, o wula nyaane der yiite ŋe nyifataa faa abada.»

18E haalaaji ɗuuɗɗi Yuhaana waajorii himɓe *linjiila. 19Yuhaana felii *Eroodu, gam o hoowii Erodiya debbo mawniiko, kade bo oo waɗa kalluɗum goɗɗum ɗuuɗɗum. 20*Eroodu waɗii kade ko halli ɓeydi dow ko waɗunoo: O nanŋi Yuhaana o watti der kasu.

Yeesu waɗanaama batisi

(Matiye 3.13-17; Marku 1.9-11)

21Himɓe fu e waɗanee *batisi, go Yeesu bo waɗanaa batisi. Wakkati o du'otoo, kammu maɓɓitii, 22*Ruuhu Ceniiɗo jippii dow makko hande ɓannu tantabaraaru, go daane gom nanaa dow kammu e wi'a: «An woni *Ɓiɗɗo am jiɗaaɗo, mo ceyoriimi.»

Lenyol Yeesu

(Matiye 1.1-17)

23Yeesu waɗii jaka duuɓi laso e sappo go o fuɗɗa golle makko, o laati nun ɓii Yusufu ɓii Heli hande no miilaa. 24Heli ɓii Matat, Matat ɓii Leewi, Lewi ɓii Melki, Melki ɓii Yannay, Yannay ɓii Yusufu, 25ɓii Matatiya, ɓii Amos, ɓii Nahum, ɓii Hesli, ɓii Naggay, 26ɓii Maata, ɓii Matatiya, ɓii Semeyen, ɓii Yosek, ɓii Yoda, 27ɓii Yo'anan, ɓii Resa, ɓii Jorobabel, ɓii Salaatiyel, ɓii Neri, 28ɓii Melki, ɓii Addi, ɓii Koosam, ɓii Elmadam, ɓii Eri, 29ɓii Yeesu, ɓii Eli'ejer, ɓii Yorim, ɓii Matat, ɓii Leewi, 30ɓii Simeyon, ɓii Yahuuda, ɓii Yusufu, ɓii Yonam, ɓii Eliyakim, 31ɓii Meleya, ɓii Menna, ɓii Mattata, ɓii Natan, ɓii Dawda, 32ɓii Yesa, ɓii Obed, ɓii Bo'es, ɓii Salmuuna, ɓii Nasuuna, 33ɓii Aminadab, ɓii Adimin, ɓi Arni, ɓii Hisuruuna, ɓii Fares, ɓii Yahuuda, 34ɓii Yaakuubu, ɓii Isiyaaku, ɓii Iburahiima, ɓii Tara, ɓi Nakor, 35ɓii Saruku, ɓii Ragaw, ɓii Farek, ɓii Eber, ɓii Sala, 36ɓii Kayan, ɓii Arfasada, ɓii Sem, ɓii Nuuhu, ɓii Lamek, 37ɓii Matusala, ɓii Anuhu, ɓii Yaratu, ɓii Maleliyel, ɓii Kaynan, 38ɓii Enos, ɓii Setu, ɓii Aadamu, ɓii Alla.

Currently Selected:

Luka 3: BFB

Highlight

Copy