Luka 2

Dingol Yeesu

(Matiye 1.18-25)

1Der wakkati mum, Agustus laamiiɗo umuri himɓe jeyde leydi mum fu limee. 2Limgal artirgal ŋal waɗay maa der wakkati Kiriniyus laamanii leydi Siriya. 3Himɓe yahi gam limee, moy fu der genni to jeyaa.

4Yusufu bo ummii diga Nasaratu der leydi *Galili, yahi leydi Yahudiya faa Baytilaama, der genni Dawda laamiiɗo, gam der wuro Dawda e lenyol muuɗum nun o jeyaa. 5Yusufu yahi, yaari ɗaɓɓaaɗo mum Mariyama gooduɗo reedu. 6No ɓe jottii ton, wakkati dingol Mariyama yotti. 7O rimi suka gorko, afo makko, o soomi mo wudere, o fukkini dow fuɗo ko baali nyaamata, gam ɓe keɓay jaayri der werdude hoɓɓe.

Malaykaajo hollitanake durooɓe der ladde

8Foti der leydi nin, e woodi durooɓe, reenuɓe baali mum jemma der ladde. 9Malaykaajo Joomiraawo hollitanii ɓe, tedduŋal Joomiraawo yayni fiiltitini ɓe, go kulol manŋol nanŋi ɓe. 10Malaykaajo wi'i ɓe: «To on kulee, gam mi waddanii on habaru belɗo, kokkoowo himɓe fu seyo manŋo. 11Hanne on dimanaama Kisinoowo der genni Dawda. Kanko woni *Almasiihu Joomiraawo. 12Maane annitirton mo woni: on tawan sukeel keccel e sooma wudere, e fukkinaa dow fuɗo ko baali nyaamata.» 13Ɗon maa ɗon, malaykaaɓe konunkeeɓe dow kammu ɗuuɓɓe suppitoy, wari hawti e malaykaajo on, ɓee jetta Alla ɓee bi'a:

14«Tedduŋal wonanii Alla towuɗo,

jam dow leydi wonanoo himɓe ɓe o yiɗi.»

Durooɓe yahii Baytilaama

15No malaykaaɓe acci ɓe, witti dow, go durooɓe ɓen batontiri hakkune mum wi'i: «En jahu Baytilaama daaren ko waɗi, ko Joomiraawo annini en.» 16Ɓe jawɗii ɓe jahi ton, no ɓe jottii, ɓe tawi Mariyama e Yusufu, sukeel bo e fukkinaa dow fuɗo ko baali nyaamata. 17No ɓe ji'i sukeel ŋel, ɓe bati ko malaykaajo batunoo ɓe dow maggel. 18Nanuɓe haala ka durooɓe ɓen bati fu, haaynaare nanŋi ɗum. 19Mariyama kan e jogoo ka nani fu der ɓerne mum, e miijoo ka. 20Go durooɓe ɓen hogitii witti. Ɓee teddina Alla, ɓee maanta mo gam ko ɓe nani e ko ɓe ji'i deydey hande no malaykaajo batirnoo ɓe.

Yeesu juulnaama yaaraa suudu Alla

21No balɗe jeetati waɗi, suka on juulnaa, hokkaa inne Yeesu. Inne nen nun malaykaajo wi'uno o hokkee diga reedu makko heɓaakano.

Yeesu yaaraama der suudu Alla

22No nyalaane laaɓineego maɓɓe foti, hande no winniraa der tawreeta Muusa, saareeji makko etti mo yaari *Urusaliima gam ɓe kollaa mo Joomiraawo, 23gam nun Joomiraawo wi'i der tawreeta: «Suka gorko afo fu, laatanto nun Joomiraawo #2.23 Wurtaago 13.2, 12, 15..» 24Ɓe jahii bo sakkanoygo Alla hande no tawreeta Joomiraawo bati waɗee: tantabaraaji petti ɗiɗi naa bo, pooli ɗiɗi goɗɗi #2.24 Farillaaji Leewinkeeɓe 12.8.

25Gorko gom e tawano *Urusaliima, inne makko nun Simeyon. Gorko poonnitiiɗo nun, kulɗo Alla. Oo hettiniino garoowo moyta gonɗi Isira'iilaaɓe. *Ruuhu Ceniiɗo e woni dow makko. 26Ruuhu Ceniiɗo holli mo o maayataa to o yi'ay *Almasiihu mo Joomiraawo. 27Ruuhu ɗowi mo, o yahi suudu Alla. Foti den Yeesu, saareeji mum yaarii ɗum ton gam ɓe gaɗanaa mo ko tawreeta wi'i waɗee. 28Go Simeyon jaɓi mo e juuɗe mum, maanti Alla wi'i:

29«Joomiraawo, jooni, accu maccuɗo maaɗa maaya e jam hande no batirɗaa.

30Gam mi yi'ii kisidam maa e gite am,

31ɗam ciryaniɗaa himɓe duuniyaaru fu.

32Kanjam laatii jayŋol jaynanoowol himɓe ɓe lenyi janani. Ɗam teddinan bo himɓe Isira'iila.»

Annabaaku Simeyon e Haana

33Haynaare waɗi baaba e inna dow bateteeka dow suka on. 34Go Simeyon barkiɗini ɓe, bati Mariyama inna suka on wi'i: «Suka oo suɓa nun gam Isira'iilaaɓe ɗuuɓɓe yana, ɗuuɓɓe bo ummoo, o laatoto alaama ka himɓe jaɓataa. 35O sumpitan miilooji himɓe cuuɗiiɗi, an bo biisere ɓerne yuwete hande kaafahi.»

Ana annabiijo debbo

36Annabiijo debbo gom bi'eteeɗo Ana e tawaa ɗon, ɓii Fanuyel nun, mo lenyol Aser, o naywii booɗum. Der gataanaaku makko o ɓaŋaanomaa waɗi duuɓi jeeɗiɗi. 37Go goriiko maayi, o jooɗi nun o hoowaaka faa o waɗi duuɓi lasooji naay e naay. O wurtataako diga e suudu Alla. Ɗon o woni oo sujidana Alla jemma e nyalooma, oo suumoo, oo du'oo. 38Wakkati mum debbo on bo wurtoy wari e maanta Alla, e bata heɗiiɓe Alla faaboo *Urusaliima haala suka on.

Wittugo faa Nasaratu

39No ɓe gaɗi ko tawreeta Joomiraawo wi'i fu, ɓe bitti siire maɓɓe Nasaratu, der leydi *Galili. 40Go suka on e mawna e semmiɗa, oo hebbi hakkillo. Moƴƴere Alla bo e woni dow makko.

Yeesu yahii suudu Alla de o woodi duuɓi sappo e ɗiɗi

41Der duuɓol fu, saareeji Yeesu e yaha *Urusaliima gam nyaamoygo juulɗe *Paska. 42No Yeesu waɗi duuɓi sappo e ɗiɗi, saareeji makko yahi *Urusaliima hande no ɓe boowi waɗugo der tawaaŋal juulɗe ɗen. 43No ɓe keennyi juulɗe ɓee koota, Yeesu, jooɗii *Urusaliima, saareeji makko annaa. 44Ɓee miili o tawa nun der wuuraare yaadiiɓe maɓɓe, den ɓe jahi jahaaŋal nyalaane woore, go ɓe jahi to getti maɓɓe e banniraaɓe maɓɓe, ɓee daarta mo. 45Amma ɓe ji'ay mo, go ɓe bitti Urusaliima ɓee daarta mo. 46Ɓaawo balɗe tati, ɓe tawi mo der suudu Alla oo jooɗii hakkune *moodiɓɓe tawreeta e mawɓe. Oo hettinii ka ɓe batata, oo ƴama ɓe ƴanɗe. 47Hettinaniiɓe mo fu haaynaare nanŋi ɗum, gam annal e toonti makko. 48No ɓe ji'i mo, go ɗum haaynii ɓe, go inniiko wi'i mo: «Ɓiyam, gam ume gaɗanɗaa men nun, a yi'ay no min e baaba maa fu e men daartee, faa ɓerɗe amen biisii na?» 49O toontii ɓe o wi'i: «Ume daartirton am? On annaa no haanu nun mi hiinnoo golle baaba am na?» 50Amma ɓe paamay haala ka o bati ɓe. 51O hootidi e maɓɓe faa Nasaratu, oo ɗowtanii ɓe. Inniiko e jogoo kujje ɗen fu der ɓerne mum. 52Go Yeesu e mawna der faamu e ɓannu, oo fottani Alla e himɓe.

Currently Selected:

Luka 2: BFB

Highlight

Copy