ROMUDENƆ 6

Kunna Kirisi gũn

1Óni o deramɛɛ? Óni gí ògɔ̃ durunna kɛ de Luda gbɛ̃kɛ le àgɔ̃ karan yá? 2Oi! Lɛnlo! Ókɔ̃nɔ kũ ó de gɛ̀nɔ ũ durunna yã musu, à kɛ̀ dera ónigɔ̃ kpɛ́ ògɔ̃ durunna kɛ dɔɔ? 3Ókɔ̃nɔ kũ o da'itɛ kɛ̀ Kirisi Yesu pɔ́ ũnɔ, á dɔ̃ kũ ó lɛɛlɛ kãao a ga gũnloo? 4O ga kãao da'itɛkɛnaa gũn, ò ó vĩ kãao de ògɔ̃ kú kũ wɛ̃̀ndi dufuo, lákũ Kirisi bò gan kũ a De gbãna gakurio à kun nà.#Kɔl 2:12 5Lákũ o gɔ̃ kãao mɛ̀ dokɔ̃nɔ ũ a ga gũn nà, lɛn óni gɔ̃ kãao lɛ a vunaa gũn se. 6Ó dɔ̃ kũ ó dà zĩ gà kãao lía, de ó mɛ̀ durunnade kakatɛ òsun zɔ̀ ble durunnanɛ doro, 7zaakũ gbɛ̃ kũ à gàa bò durunna yãmmɛ. 8Lákũ o ga kũ Kirisio nà, ó a náani vĩ kũ ónigɔ̃ kú kãao dɔ. 9Ó dɔ̃ lákũ Kirisi bò gan nà, ani ga doro, ga gbãna vĩa doro. 10Zaakũ gana kũ à gà, à gà durunna yã musu gɛ̃̀n domɛ, kunna kũ à kun tera sɔ̃, à kun Luda pɔ́ ũmɛ. 11Lɛn ákɔ̃nɔ se, à á zĩda ditɛ gɛ̀nɔ ũ durunna yã musu lɛ, ánigɔ̃ kun Luda pɔ́ ũ Kirisi Yesu gũn. 12Abire yãi àsun tó durunna kí ble á mɛ̀ kũ ani gaa á dà vãni doárɛ arɛ doro. 13Àsun á mɛ̀guke kpá durunnaa vãnikɛbɔ ũro. À á zĩda kpá Ludaa gbɛ̃ kũ ò bò gan ò kunnɔ ũ, à á mɛ̀gunɔ kpáa yãmanakɛbɔnɔ ũ. 14Àsun tó durunna gɔ̃ gbãna vĩáwa doro, zaakũ á na doka ɔĩro, séde Luda gbɛ̃kɛ.

Yãmanakɛna zɔ̀nɔ

15Deran gwee? Lákũ ó kú doka ɔĩ doro nà, séde Luda gbɛ̃kɛ ɔĩ, ónigɔ̃ gí durunna kɛn yá? Oi! Lɛnlo! 16Á dɔ̃ kũ tó a á zĩda kpà gbɛ̃a átɛn mì natɛnɛ, á de ade zɔ̀ ũroo? Tó durunnan a á zĩda kpàa, áni gamɛ. Tó a mì nàtɛ Ludanɛ sɔ̃, áni bo mana. 17O sáabu kɛ̀ kũ Ludao, zaakũ durunna zɔ̀nɔn á ũ yã, akũ a mì nàtɛ yã kũ ò dàárɛ zɛ́azɛanɛ kũ nɛ̀sɛ mɛ̀n doo. 18A bo durunna yãn, a gɔ̃ yãmanakɛna zɔ̀nɔ ũ. 19Matɛn yã pì o lákũ bisãsiri yã'onaa bà á gbãnasarikɛ yãimɛ. Lákũ a á mɛ̀gunɔ kpà yã pãpãkɛna kũ yã vãnio zɔ̀nɔ ũ a yã vãni kɛ̀ nà, lɛn tera dɔ à á mɛ̀gunɔ kpá manakɛna zɔ̀nɔ ũ de á kunna gɔ̃ adona. 20Kũ á de durunna zɔ̀nɔ ũ yã, á bàka kú kũ yãmanakɛnaaoro. 21Àre kpaten a lè yã kũ a kɛ̀ yã kũ à kɛ̀árɛ wé'iyã ũ teranɔ musuu? Yã pìnɔ lakana bi gamɛ. 22Tera sà lákũ a bo durunna yãn nà átɛn do Ludai, á àreen kunna adona ũ, a lakana sɔ̃ bi wɛ̃̀ndi kũ àdi lákaromɛ. 23Durunna làada bi gamɛ, ama gba kũ Luda dàwɛrɛ kunna ó Dikiri Kirisi Yesu gũnn wɛ̃̀ndi kũ àdi lákaro ũ.

Currently Selected:

ROMUDENƆ 6: BB2005

Highlight

Copy