ROMUDENƆ 5

Kɛna nna kũ Ludao

1Lákũ Luda tò yã bò kũoo nna nà a náani kũ ótɛn kɛ yãi, ó nna kãao sà ó Dikiri Yesu Kirisi gãi. 2A náanikɛnaa gũn o zɛ́ lè a gãi o gɛ̃ Luda gbɛ̃kɛ kũ ó kúoo pìi gũn, akũ ótɛn pɔnna kɛ kũ Luda gakuri kũ ó wɛ́ dɔiio. 3Adi kɛ abiren adoro, ótɛn pɔnna kɛ kũ ó warikɛnaao dɔ, zaakũ ó dɔ̃ kũ wari dì su kũ mɛnao, 4mɛna dì su kũ dà manao, dà mana dì su kũ tãmaaao, 5tãmaa sɔ̃ àdi ó nɛ́ro, zaakũ Luda a yenyĩ dà ó nɛ̀sɛn a Nini kũ à ó gbá gãi. 6Ó gbãnasarikɛ gũn Kirisi gà ókɔ̃nɔ yãvãnikɛrinɔ gɛ̃nɛ ũ gɔrɔ kũ Luda dìtɛa. 7Gana gbɛ̃ mana gɛ̃nɛ ũ aragaro. Ke gbɛ̃ke ni we à ga gbɛ̃ mana gɛ̃nɛ ũ gwɛɛ, 8akũ Luda mɔ̀wɛrɛ deran á yewái nà, zaakũ ó durunnadekɛ gũnn Kirisi gà ó gɛ̃nɛ ũ. 9Lákũ yã bò kũoo nna nà sà a aru yãi, a ó sina Luda pɔfɛ̃a a gãi sika vĩ dɔ yá? 10Yã ó ĩni kũ Ludaomɛ, akũ o kɛ kãao nna a Nɛ́ gana yãi. Lákũ o kɛ kãao nna nà sà, ó surabana a kunna wɛ̃̀ndiio yãi sika vĩ dɔ yá? 11Adi kɛ adikĩnamɛ adoro, ótɛn pɔnna kɛ kũ Ludao dɔ ó Dikiri Yesu Kirisi kũ à tò o kɛ kãao nna gãi.

Kirisi yã lɛkɔ̃ana kũ Adamuo

12Gbɛ̃ mɛ̀n do yãin durunna gɛ̃̀ andunia gũn,#Naa 3:6 akũ durunna ga ì.#Naa 2:17 Lɛmɛ dɔ ga kú gbɛ̃ sĩnda pínkia, kũ gbɛ̃ sĩnda pínki durunna kɛ̀ yãi. 13Durunna kú andunia gũn de Musa doka gɔ̃ gɛ́ su. Gɔrɔ kũ doka kunlo, Luda dí durunna yã daro, 14ama sɛna zaa Adamua ari à gɛ̀ɛ pɛ́ Musaa ga kí blè gbɛ̃ sĩnda pínkia, bee gbɛ̃ kũ odi durunna kɛ lán Adamu sãtɛna bàronɔ. Adamu bi gbɛ̃ kũ ani su takamɛ.

15Ama Luda gba ni sí lɛkɔ̃a kũ Adamu taarioro, zaakũ lákũ gbɛ̃nɔ gà dasi nà Adamu ado sãtɛna yãi, Luda gbɛ̃kɛ kũ a gbao kũ à kà gbɛ̃nɔa dasi Yesu Kirisi ado gbɛ̃kɛ yãi de abirekũla. 16Luda gba ni sí lɛkɔ̃a kũ gbɛ̃ mɛ̀n do durunna pìioro. Taari mɛ̀n do pì mɛ́ à sù kũ yãkpatɛkɛnaao, akũ yã vùtɛ bisãsirinɔa. Taarinɔ sù kũ Luda gbao, akũ yã bò kũ gbɛ̃nɔ nna. 17Lákũ Adamu ado taari mɛ́ à tò ga sù à kí blè nà, Yesu Kirisi ado yã kũ à sùo zɔ̃kɔ̃ de abirekũla. Abire yãi gbɛ̃ kũ Luda gbɛ̃kɛ kɛ̀ńnɛ, kũ à tò yã bò kũńwo nna gba ũnɔ ni kí ble wɛ̃̀ndii gũn. 18Abire yãi lákũ taari mɛ̀n do pìi tò yã vùtɛ buri sĩnda pínkia nà, lɛmɛ dɔ yãmanakɛna mɛ̀n do pìi dì tó buri sĩnda pínki bo mana lɛ ò wɛ̃̀ndi le. 19Lákũ gbɛ̃ mɛ̀n do sãgbãna mɛ́ à tò gbɛ̃nɔ gɔ̃̀ durunnadenɔ ũ dasi nà, lɛmɛ dɔ gbɛ̃ mɛ̀n do yãmana ni tó gbɛ̃nɔ bo mana dasi. 20Doka sù de taari le àgɔ̃ kara yãimɛ. Ama kũ durunna kàra, Luda gbɛ̃kɛ kàra de abirekũla. 21Lákũ durunna kíblenaa sù kũ gao nà, lɛn dɔ Luda gbɛ̃kɛ kíblenaa dì tó ò bo mana lɛ, ò wɛ̃̀ndi kũ àdi lákaro le ó Dikiri Yesu Kirisi gãi.

Currently Selected:

ROMUDENƆ 5: BB2005

Highlight

Copy