ROMUDENƆ 12

Zĩkɛna Ludanɛ

1Abire yãi ma gbɛ̃nɔ, lákũ Luda ó wɛ̃nda dɔ̃̀ lɛ nà, ma wɛ́ kɛ̀áwa à á zĩda kpáa sa'opɔ bɛ̃nɛ mamberusari kũ àdi káagu ũ. Àkũmɛ á donyĩkɛna a zɛ́a ũ. 2Àsun tɛ́ andunia tera dí ágbairo. À tó Luda á dà litɛ, á laakari le à gɔ̃ dufu de à le à a pɔyenyĩna dɔ̃, yã kũ à mana, akũ à nna, akũ à papana.

3Gba kũ Luda dàmɛnɛ yãin matɛn o á pínkinɛ, àsun á zĩda mana bo de a mana lɛ́laro. Á baadi a zĩda ditɛ a yãpura lɛ́n, lákũ Luda a gbà zɛ́ à a náani kɛ nà. 4Bisãsiri mɛ̀ mɛ̀n do gunɔ vĩ dasi, ń baadi kũ a zĩomɛ. 5Lɛmɛ, bee kũ ó dasikɛo, ó mɛ̀ dokɔ̃nɔ Kirisi gũmmɛ, mɛ̀gu dakenɔn ó ũ.#1Kɔ 12:12 6Ó gba bò donadona kɔ̃nɛ lákũ Luda dàwɛrɛ nà a gbɛ̃kɛ gũn.#1Kɔ 12:4-11 Tó annabikɛyã'ona gban ń vĩ, ǹ kɛ n ludanaanikɛna lɛ́n. 7Tó zĩ̀rikɛnaamɛ, ǹ kɛ. Tó yãdannɛnaamɛ, ǹ dańnɛ. 8Tó lɛ́dammanaamɛ, ǹ daḿma. Tó gbadanaamɛ, ǹ da araga. Tó don'arɛdekɛmɛ, ǹ kɛ kũ kokario. Tó wɛ̃ndadɔ̃nnɛnaamɛ, ǹ dɔ̃ńnɛ kũ pɔnnao.

9À kũ̀ yenyĩ gɔ̃ manafiki sari. À kpɛ li yã vãninɛ, à zɛ kũ yã manao. 10Àgɔ̃ nna kũ kɔ̃o kɔ̃ gbɛ̃nɔ ũ. Àgɔ̃ wãna kũ bɛ̀ɛrɛlikɔ̃nɛnaao. 11Àgɔ̃ kokari vĩ ma'ã sari, á mɛ̀ gɔ̃ wãna Dikiri zĩ gũn. 12À pɔnna kɛ yã kũ á wɛ́ dɔi yã musu. À mɛna fɔ̃ warikɛnaa gũn. À mɛ̀ kpá wɛ́kɛnaaa. 13À kpányĩ kɛ Luda gbɛ̃ kũ pɔ́ tɛn kĩaḿmanɔnɛ. Àgɔ̃ nibɔ kɛ. 14À sa mana o á wɛ́tãmmarinɔnɛ. À sa mana ońnɛ, àsun ń káro.#Luk 6:28 15À pɔnna kɛ kũ pɔnnakɛrinɔo. À ɔ́ɔ dɔ kũ ɔ́ɔdɔrinɔo. 16Àgɔ̃ kú kũ kɔ̃o nna. Àsun á zĩda biro. À gbɛ̃nna kpá kũ takasidenɔo. Ásun á zĩda ditɛ yãdɔ̃rinɔ ũro.#Yaa 3:7 17Ásun yã vãni fĩna bo kũ a vãnioro. Àgɔ̃ yã kũ à mana gbɛ̃ sĩnda pínkinɛ kɛ. 18Tó ani sí kɛ, tó á a zɛ́ vĩ, àgɔ̃ nna kũ gbɛ̃ sĩnda pínkio. 19Ma gbɛ̃ yenyĩdenɔ, àsun mɔra ká gbɛ̃aro, à a tó kũ Ludao. À kɛ̃na Luda yãn ò pì:

Dikiri pì, akãa mɛ́ áni fĩna boḿma,

akãa mɛ́ áni fĩna boḿma.

20Tó nà tɛni n ibɛrɛ dɛ, ǹ pɔ́ble kpáa. Tó ímimɛ sɔ̃, ǹ a gba í. Tó n kɛ̀ lɛ, ntɛni a ɔ kánɛ a lɛ́mmɛ.#Yaa 25:21-22 21Ǹsun tó yã vãni zĩ̀ blemmaro. Ǹ zĩ̀ blea kũ yã manao.

Currently Selected:

ROMUDENƆ 12: BB2005

Highlight

Copy