ROMUDENƆ 11
11
Luda dí Isarailanɔ zukũnaro
1Ma pì yɔ́ɔ? Luda a zĩda gbɛ̃nɔ zùkũnan yá? Lɛnlo fá! Makũ bi Isaraila burin ma ũ. Ibrahĩ burin ma ũ Biliaminu buri gũn.#Flp 3:5 2Luda dí a gbɛ̃ kũ à gĩnakɛ à ń dɔ̃nɔ zukũnaro. Á Iliasu yã kũ à kɛ̃na Luda yãn díkĩna dɔ̃roo? Kũ à gɛ̀ɛ kũ Isarailanɔ yão Luda kĩnaa à pì: 3Dikiri, ò n annabinɔ dɛ̀dɛ, ò n gbagbakinɔ gbòro. Makũ mɛ́ ma gɔ̃ mado, akũ òtɛni ma wɛɛ.#1Ki 19:10 4Luda pì Iliasunɛ deramɛɛ? À pì, á gbɛ̃ kũ odi kútɛ Baalinɛronɔ kũna a pɔ́ ũ gbɛ̃nɔn dúbu suppla.#1Ki 19:18 5Lɛmɛ dɔ ń gbɛ̃ kpara kũ Luda ń sɛ́ a gbɛ̃kɛ gũnnɔ kpɛ́ kun ari gbãra. 6Lákũ à ń sɛ́ a gbɛ̃kɛ gũn nà, adi kɛ ń yãkɛna yãinlo. Tó lɛnlo, de Luda gbɛ̃kɛ nigɔ̃ gbɛ̃kɛ ũro. 7Deran gwee? Isarailanɔ dí yã kũ òtɛn wɛtɛ lero, ama ń gbɛ̃ kũ Luda ń sɛ́nɔ lè. Ń gbɛ̃ kũ ò gɔ̃̀nɔ sã tàta, 8lákũ à kɛ̃na Luda yãn nà ò pì:
Luda iwɛza dàńnɛ,
akũ ń wɛ́ dí gu ero,
ń sã dí yã maro ari kũ a gbãrao.
9Dauda pì dɔ:
Ń dikpɛkɛna gɔ̃ńnɛ tankutɛ ũ à ń kũ,
à gɔ̃ńnɛ gɛ̃̀siki ũ de à yã lúńnɛ.
10Ń wɛ́ sisi de òsun gu ero,
ń wó gɔ̃ kokona gɔrɔ sĩnda pínki.#Zab 69:22-23
11Ma pì yɔ́ɔ? Kũ Isarailanɔ gɛ̃̀ɛ sì, ò lɛ̀tɛ sãnsãnn yá? Lɛnlo fá! Ń taarinɔ yãin Luda buri pãndenɔ sura bà, de Isarailanɔ gɔ̃ba kpá kũńwo yãi. 12Lákũ ń taarinɔ mɛ́ à tò andunia karanaa lè nà, akũsɔ̃ ń funa mɛ́ à tò buri pãndenɔ karanaa lè, oni ń lɛ́ papana yã o dɔ yá?
Buri pãndenɔ surabanaa
13Matɛn yã o ákɔ̃nɔ buri pãndenɔnɛ sà. Lákũ má de zĩ̀ri ũ buri pãndenɔ kĩnaa nà, madì ĩa dã ma zĩ̀rikɛna yã musu, 14de mà a zĩda burinɔ nɛ̀sɛ vutɛ ò gɔ̃ba kpá, mà ń gbɛ̃kenɔ sura ba. 15Zaakũ Luda gina Isarailanɔi mɛ́ à tò andunia kɛ̀ kãao nna, tó à ɛ̀ra à ń sí dɔ, abire nigɔ̃ de deramɛɛ? Abire nigɔ̃ bi wɛ̃̀ndi ũ gɛ̀nɔnɛ.
16Tó ò burapɔ káaku kpà Ludaa, a kpara gɔ̃̀ arubarika pɔ́ ũmɛ. Tó lí zĩni de Luda pɔ́ ũ, a gã̀nɔn de a pɔ́ ũmɛ se. 17Luda kù lí yãpura gã̀ kenɔ zɔ̃̀zɔ̃, akũ à mɔkɔ̃n kũ ń de kùnnɛ lí ũ pɛ̀ a gbɛ̀n, de ǹgɔ̃ kun kũ kù lí mana zĩni gbãnao. 18Ǹsun kù lí yãpura gã̀ kũ à zɔ̃̀zɔ̃nɔ gya boro. N kɛ dera ntɛn ĩa dãa? Ń kun lí zĩni yãimɛ, adi kɛ lí zĩni mɛ́ à kun n yãiro. 19Ĩni pi, à lígãa pìnɔ zɔ̃̀zɔ̃ de à n pɛ́ ń gbɛ̀n yãimɛ. 20Lɛmɛ, ama à ń zɔ̃zɔ̃ kũ odi a náani kɛro yãi. Mɔkɔ̃n sɔ̃, n zɛki lè kũ ntɛn Luda náani kɛ yãi. Ǹsun n zĩda biro. Ǹ laakari kɛ! 21Lákũ Luda dí gí kù lí yãpura gã̀nɔ zɔ̃zɔ̃iro nà, ani gí n zɔ̃i sero. 22Ǹ gwa lákũ Luda mana nà, akũsɔ̃ à pãsĩ. À pãsĩ kũ gbɛ̃ kũ ò fùanɔ, akũ à manannɛ, tó n zɛ kũ a manakɛnaao. Tó lɛnlo, ani n zɔ̃mɛ se. 23Tó Isarailanɔ ń ludanaanikɛnasari tò, ani ɛra à ń pɛ́ ń gbɛ̀mmɛ, zaakũ à ń pɛna ń gbɛ̀n gbãna vĩ. 24Tó Luda n zɔ̃ kùnnɛ lía à n pɛ kù lí yãpuraa lákũ òdi kɛro nà, kù lí gã̀ yãpuranɔ ɛra à pɛna ń zĩda lía zɛ́ vĩ de abirelaroo?
Isarailanɔ surabana kpɛde
25Ma gbɛ̃nɔ, má ye àgɔ̃ asiriyã díkĩna dɔ̃, de á wɛ́ súngɔ̃ sira à á zĩda ditɛ ĩadãrinɔ ũro yãi. Isaraila kparanɔ sãgbãna kũ̀ gĩa ari buri pãndenɔ gɛ̃na kpata kũ à bò Luda kĩnaa gũn lɛ́ gɔ̃ ká. 26Abire gbɛra Luda ni Isarailanɔ sura ba ń pínki lákũ à kɛ̃na Luda yãn nà kũ ò pì:
Surabari ni bo Zaiɔ̃,
ani Yakubu burinɔ kɛ̃kɔ̃a kũ ludadɔ̃nasario.
27Ma bàka kunna kũńwo yãn gwe
gɔrɔ kũ mani ń durunna kɛ̃ḿma.
28Baaru nna pì yã musu ò de Luda ibɛrɛnɔ ũ á yãi. Luda gbɛ̃nɔ sɛna yã musu ò de Luda yenyĩdenɔ ũ ń dizi káakunɔ yãi. 29Zaakũ Luda gbanɔ kũ gbɛ̃ kũ à ń sísi à ń sɛ́nɔ dì sí litɛro. 30Ákɔ̃nɔ buri pãndenɔ ádi Luda yã ma yãro. Tera sà Luda sùru kɛ̀ kãáo kũ Isarailanɔ dí a yã maro yãi. 31Lɛn Isarailanɔ gì Luda yã mai lɛ tera, de Luda le à sùru kɛ kãáo gbasa à sùru kɛ kũńwo. 32Luda yãdasarikɛ kpà gbɛ̃ sĩnda pínkia de à le à sùru kɛ kũńwo ń pínki yãimɛ.
Luda sáabukpanaa
33Luda ɔ̃ndɔ̃ kũ a dɔ̃naao zɔ̃kɔ̃kɛ kà zã̀ fá!
Gbɛ̃ke ni fɔ̃ à bo yã kũ à zɛ̀o asiriaro.
Oni fɔ̃ ò a dɔ̀rɔ dɔ̃ro.
34Dí mɛ́ à Dikiri laasun dɔ̃ɔ?
Dí mɛ́ à yã dànɛ a lɛ́dammari ũu?
35Dí fĩna mɛ́ à dɔ Ludaa kũ ani bonɛɛ?#Ayu 41:11
36Pɔ́ sĩnda pínki bò a kĩnaamɛ,
ò kun kũ a gbãnao,
akũsɔ̃ ò kun a pɔ́ ũ.#1Kɔ 8:6
Ògɔ̃ a tɔ́ bo gɔrɔ sĩnda pínki. Aami.
Currently Selected:
ROMUDENƆ 11: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
