ZĨRINƆ 24

Yudanɔ Pɔlu káarakpanaa

1Gɔrɔ sɔɔro gbɛra sa'oriki Anania sù Sizaria kũ gbɛ̃ zɔ̃kɔ̃ kenɔ kũ dokadɔ̃ri kũ òdi pinɛ Tɛtuluo. Ò sù Pɔlu káara kpá bùsu gbɛ̃ zɔ̃kɔ̃ kĩnaa. 2Kũ ò Pɔlu sìsi, Tɛtulu fùtɛ àtɛn yã daala à pì: Felisi, kũ n arubarikaao ó bùsu katɛna aafia. N zia laasunlɛna mɛ́ à ó bùsuu kɛ̀ mana. 3Òdi n tɔ́ nna sí ògɔ̃ n sáabu kpá gu sĩnda pínkin gɔrɔ sĩnda pínki. 4Kũ má ye mà n yã gágaro, mani wɛ́ kɛmma ǹ sùru kɛ kũoo ǹ ó yã fítinna dí ma. 5O è kũ gbɛ̃ pì bi gudɛriimɛ. Àdi yãkete da Yudanɔ tɛ́ andunia gũn pínki, à de donyĩzɛ ɛ́kɛ kũ òdi ń sísi Nazɛradenɔ don'arɛde ũ. 6À ye se à Luda ɔn gbã̀ lɛ́, akũ o a kũ̀. 7-8Tó n a làla n zĩda, ĩni taari kũ ó lèa yãpura dɔ̃. 9Akũ Yudanɔ yã'i kàra ò pì lɛn yã pìnɔ de lɛ.

Pɔlu gina kũ a zĩdao Felisi arɛ

10Akũ bùsu gbɛ̃ zɔ̃kɔ̃ɔ pìi mìi kɛ̀ dékũ Pɔlunɛ de à yã o. Akũ Pɔlu pì: Lákũ má n dɔ̃ yãkpatɛkɛri ũ bùsu dí gũn a wɛ̃̀ dasi kɛ̀, a yãi matɛni ma mìbona yã o ma laakariia. 11Tó n gbɛ̀ka, oni onnɛ kũ ma gɛna Yurusalɛmu mà donyĩ kɛ de gɔrɔ kuri awɛɛplalaro. 12Odi ma e matɛn lɛ́kpakɔ̃a kɛ kũ gbɛ̃keo Luda ɔnnlo. Odi ma e matɛn yãkete da aduakɛkpɛnɔ gũn ke wɛ̃tɛ gũnlo. 13Gbɛ̃ pìnɔ ni fɔ̃ ò taari kũ ò lèma sèedade lennɛro. 14Ma sì kũ zɛ́ kũ òtɛn sísi donyĩzɛ ɛ́kɛ pìi gũnn matɛn do ó dizinɔ Ludai. Má yã kũ ò kɛ̃̀ Musa doka gũn kũ annabinɔ takadanɔ náanikɛna pínki. 15Ma wɛ́ dɔ Ludai lán mɔ́kɔ̃nɔ bà, kũ gbɛ̃ mananɔ kũ gbɛ̃ vãninɔ ni vu ń pínki. 16A yã mɛ́ à tò madìgɔ̃ ma zĩda toto gɔrɔ sĩnda pínki de ma swɛ̃̀ súngɔ̃ vĩ Luda arɛ ke bisãsiri arɛro. 17Ma wɛ̃̀kɛna kũ ma bùsuuo gbɛra ma ɛra ma su ma ɔ dàḿma ma sa ò 18Luda ɔnn. Kũ matɛn sa o ma gbã̀bonaa gbɛra, akũ ò ma le gwe. Mádi gbɛ̃nɔ kákararo, yãkete kunlo. 19Asia bùsu Yuda kenɔmɛ yãdenɔ ũ. Séde ò su ò yã bo kɔ̃ lɛ́n n kĩnaa. 20Tó lɛnlo, ǹ tó gbɛ̃ kũ ò kú lanɔ dà kũ ò lèma gɔrɔ kũ ò yãkpatɛ kɛ̀ kũmao o. 21Sé yã mɛ̀n do kũ ma òńnɛ kũ kòto gbãnao, gɛ̀nɔ vuna yã musun òtɛn yãkpatɛ kɛ kũmao.

22Felisi Yesu zɛ́ bɔkɔtɛna dɔ̃, akũ à lá kù Yudanɔ yãla à pì: Tó sozanɔ gbɛ̃ zɔ̃kɔ̃ Lisia sù, mani á yã mì dɛárɛ. 23À ò soza bàdenɛ àgɔ̃ Pɔlu dãkpã, ama à a gba zɛ́ à ĩam pá, à tó a gbɛ̃nɔ kpái.

Pɔlu kunna kpɛ́siran Sizaria

24Gɔrɔ pla gbɛra Felisi sù kũ a Yuda nanɔ kũ òdi pinɛ Durusilao. À Pɔlu sìsi, akũ à Kirisi Yesu náanikɛna yã màa. 25Pɔlu tɛn yã o manakɛnaa musu kũ zĩdakũnadɔ̃naao kũ yãkpatɛkɛna kũ àtɛn suo, akũ vĩna Felisi kũ̀ à pì: Ǹ futɛ ǹ tá gĩa. Gɔrɔ kũ ma ɔ lè mani ɛra mà n sísi. 26Àtɛn wɛ́ dɔ Pɔlui kũ ani gusarɛgba daarɛmɛ, akũ àdigɔ̃ a sísi gɛ̃̀n baaakɔ̃ à su fàai bo kãao. 27Kũ à kɛ̀ wɛ̃̀ pla, Pɔsiu Fɛsutu vùtɛ Felisi gɛ̃nɛ ũ. Kũ Felisi ye àgɔ̃ nna kũ Yudanɔ yãi, akũ à Pɔlu tò dana kpɛ́siran.

Currently Selected:

ZĨRINƆ 24: BB2005

Highlight

Copy