ZĨRINƆ 23

1Pɔlu wɛ́ pɛ̀ gbãnadenɔa à pì: Ma gbɛ̃nɔ, yãke tɛni ma swɛ̃̀ vĩ Luda arɛro ari kũ a gbãrao. 2Akũ sa'oriki Anania ò a dogarinɔnɛ ò a lɛ́ a lɛ́a. 3Akũ Pɔlu pìnɛ: Luda n lɛ́ se, bisãsiri kaka nɛ́. Ń vutɛna ntɛn yãkpatɛ kɛ kũmao doka musu, akũ mɔkɔ̃n sɔ̃ n bo a kpɛ, n pì ò ma lɛ́. 4Akũ dogari pìnɔ pì: Mɔkɔ̃mmɛ ntɛn Luda sa'oriki sɔ̃sɔ̃ lɛ yá? 5Pɔlu pì: Gbɛ̃nɔ, má dɔ̃ sa'orikinlo, zaakũ ò kɛ̃̀ Luda yãn ò pì òsun ó bùsu gbãnade tɔ́ vãni síro.

6Pɔlu dɔ̃ kũ gbãnade pìnɔ gbɛ̃kenɔ bi Sadusinɔmɛ, ń gbɛ̃kenɔ sɔ̃ Farisinɔ, akũ à òńnɛ gbãngbãn: Ma gbɛ̃nɔ, Farisin ma ũ, Farisinɔ nɛ́n ma ũ. Gɛ̀nɔ vuna tãmaa kũ má vĩ yãin átɛn yãkpatɛ kɛ kũmao. 7Kũ à yã pìi ò, Farisinɔ kũ Sadusinɔ fùtɛ kũ kɔ̃o kũ lɛ́kpakɔ̃ao, akũ kɔ̃kakararinɔ kpàatɛ lɛu pla. 8Sadusinɔ dì pi gɛ̀nɔ dì vuro, akũsɔ̃ malaikanɔ kũ nininɔ kunlo. Farisinɔ sɔ̃ ò zɛ̀ kũ yã pìnɔo pínki. 9Ò zuka gbãna kà ń tɛ́, akũ Farisi kũ òdi doka dańnɛ kenɔ fùtɛ kũ lɛ́kpakɔ̃a gbãnao ò pì: Ódi yã vãni ke le gbɛ̃ diaro. Tó nini ke malaika mɛ́ à yã ònɛ sɔ̃ bi? 10Kũ lɛ́kpakɔ̃a kɛ̀ gbãna, sozanɔ gbɛ̃ zɔ̃kɔ̃ tɛn vĩna ma de gbɛ̃nɔ sún Pɔlu kɛ yákiyakiro yãi, akũ à ò a sozanɔnɛ ò kipa ò gɛ̃ ń tɛ́ ò a kũ ò gɛ́ kãao ń bùran.

11Zĩ birea gwãani Dikiri bò à sù Pɔlua à pì: Ǹ laakari kpátɛ! Lákũ n ma yã ò Yurusalɛmu la nà, séde ǹ o Romu dɔ.

Lɛ́kpakũsũna Pɔlui

12Kũ gu dɔ̀, Yuda kenɔ kàkara asiri gũn ò la dà ò pì oni pɔ́ blero oni í miro ari ò gɛ́ Pɔlu dɛo. 13Lɛ́kpakũsũrii pìnɔ de gbɛ̃nɔn buplala. 14Ò gɛ̀ɛ sa'orikinɔ kũ gbɛ̃ zɔ̃kɔ̃nɔ kĩnaa ò pìńnɛ: O sì kũ Ludao o pì tó ódi Pɔlu dɛro, tó o pɔ́ blè, Luda láari bowá. 15Ákɔ̃nɔ kũ gbãnadenɔ á pínki à gɛ́ à o sozanɔ gbɛ̃ zɔ̃kɔ̃ɔnɛ à suárɛ kũ Pɔluo lákũ ò pi á ye à a yãnɔ tàasi ká tera de a káakupɔla bà. Ókɔ̃nɔ sɔ̃ ónigɔ̃ kú soru gũn ò a dɛ zɛ́n ari àgɔ̃ gɛ́ ká la.

16Kũ Pɔlu dãre nɛ́gɔ̃gbɛ̃ ń yã kũ ò gɔ̃̀gɔ̃ɔ pìi mà, akũ à gɛ̀ɛ à gɛ̃̀ sozanɔ bùran à ò Pɔlunɛ. 17Akũ Pɔlu soza bàde sìsi à pìnɛ: Ǹ gɛ́ kũ kɛfɛnna dio á gbɛ̃ zɔ̃kɔ̃ kĩnaa, zaakũ à ye à baaru ke kpánɛ. 18Akũ à a sɛ̀ à gɛ̀ɛ kãao ń gbɛ̃ zɔ̃kɔ̃ kĩnaa à pì: Pɔlu kũ ò a dà kpɛ́n ma sisi à kútɛ kɛ̀mɛnɛ mà su n kĩnaa kũ kɛfɛnna dio. À yãke vĩ à ye à onnɛ. 19Akũ gbɛ̃ zɔ̃kɔ̃ɔ pìi kɛfɛnna pìi kũ̀ a ɔa à gɛ̀ɛ kãao gukpado ń pla, akũ à a là à pì: Bɔ́ yãn ń vĩ ǹ omɛnɛɛ? 20Akũ à pì: Yudanɔ mɛ́ ò lɛ́ kpàkũsũ, ò ye ò kútɛ kɛnnɛ ǹ su kũ Pɔluo ń gbãnadenɔnɛ zia, lákũ ò pi ò ye ò a yã gwa tera de a káakupɔla bà. 21Ǹsun weńnɛro, zaakũ ń gbɛ̃nɔ tɛni a dã zɛ́n ò de gbɛ̃nɔn buplala. Ò la dà ò pì oni pɔ́ blero oni í miro ari ò gɛ́ a dɛo. Ò soru kɛ̀ kɔ̀, n yãn ń sã dɔi. 22Gbɛ̃ zɔ̃kɔ̃ɔ pìi pì kɛfɛnna pìinɛ: Ǹsun tó gbɛ̃ke dɔ̃ kũ n òmɛnɛro. Akũ à a gbàrɛ.

Pɔlu gbarɛna Sizaria

23Akũ à soza bàde gbɛ̃nɔn planɔ sìsi à pìńnɛ: À o soza fɛ̃nɛdade gbɛ̃nɔn wàa donɔnɛ ò soru kɛ ò gɛ́ Sizaria ɔkɔsi úblegɔrɔ kũ sɔ̃de gbɛ̃nɔn baaakɔ̃ akurinɔ kũ sáride gbɛ̃nɔn wàa donɔ. 24À sɔ̃ yã kɛkɛ Pɔlunɛ à dia à gɛ́o bùsu gbɛ̃ zɔ̃kɔ̃ Felisi kĩnaa aafia. 25Akũ à takada kɛ̃̀nɛ à pì:

26Bùsu gbɛ̃ zɔ̃kɔ̃ Felisi, makũ Kalaudiu Lisia ma takada díkĩna kɛ̃̀nnɛ ma fɔ kpàmma. 27Yudanɔ mɛ́ ò gbɛ̃ díkĩna kũ̀ ò ye ò a dɛ. Kũ ma a dɔ̃̀ Romu gbɛ̃ ũ, akũ ma gɛ kũ sozanɔ ma a sìḿma. 28Kũ má ye mà a taari kũ ò lèa ma, ma a sɛ̀ ma gɛ kãao ń yãkpatɛkɛrinɔ kĩnaa. 29Gwen ma dɔ̃̀n kũ taari kũ ò lèa bi ń doka yãmɛ, adi yã kũ à kà ò a dɛ ke ò a da kpɛ́siran kɛro. 30Kũ ò lɛ́ kpàkũsũi, ò a yã kpãni kɛ̀mɛnɛ, akũ ma a gbàrɛmma gɔ̃̀nɔ ma ò yãdenɔnɛ ò gɛ́ kũ a yão n kĩnaa gwe.

31Akũ sozanɔ kɛ̀ lákũ ò òńnɛ nà ò Pɔlu sɛ̀ ò gɛ̀ɛ kãao Antipatari gwãani. 32Kũ gu dɔ̀, soza kũ òtɛn táa o gɛ̀sɛɛ pìnɔ Pɔlu nà sɔ̃denɔnɛ ń ɔĩ ò do kãao arɛ, akũ ò ɛ̀ra ò tà ń bùran. 33Kũ sɔ̃denɔ kà Sizaria, ò takada pìi kpà bùsu gbɛ̃ zɔ̃kɔ̃ɔ pìia, akũ ò Pɔlu nànɛ a ɔĩ. 34Bùsu gbɛ̃ zɔ̃kɔ̃ɔ pì takada pì kyó kɛ̀, akũ à Pɔlu là bùsu kũ à bòn. À mà kũ Silisia bùsuun à bòn, 35akũ à pìnɛ: Tó gbɛ̃ kũ ò yã vĩ kũnwonɔ sù, mani ma lákũ oni o nà. Akũ à pì ògɔ̃ a dãkpã Hɛrɔdu kipakia.

Currently Selected:

ZĨRINƆ 23: BB2005

Highlight

Copy