ZĨRINƆ 22

1Ma gbɛ̃nɔ kũ ma marenɔ, à sã kpá à ma yãzɛ ma tera. 2Kũ ò mà àtɛn yã ońnɛ kũ Eberu yão, ò zɛ̀ kítikiti. Akũ Pɔlu pì: 3Yudan ma ũ, ò ma i Taasu, Silisia bùsummɛ, akũ ma kɛfɛn blè wɛ̃tɛ gũn la. Gamaliɛli kĩnaan ma doka kũ ó dizinɔ kũna dàdan a zɛ́a. Má ania vĩ Ludanɛ lákũ á kun nà gbãra á pínki. 4Ma wɛ́ tã̀ donyĩ zɛ́ pì sɛ̀rinɔa ari ń gbɛ̃kenɔ gàga, ma gɔ̃gbɛ̃ kũ nɔgbɛ̃nɔ kũ̀kũ ma ń ká kpɛ́siran. 5Sa'oriki kũ gbɛ̃ zɔ̃kɔ̃nɔn de ma sèedadenɔ ũ ń pínki. Ma takada kũ ò kɛ̃̀ Damasuku Yudanɔnɛ sì ń ɔĩ, matɛn gɛ́ gwe mà gbɛ̃ pìnɔ kũkũ mà su kũńwo Yurusalɛmu ò wɛ́ tãḿma.

Pɔlu a Yesu zɛ́ sɛna bàbannɛnaa

(Zĩr 9:1-19; 26:12-18)

6Kũ má tɛ́ zɛ́n, ma ka kãni kũ Damasukuo ifãntɛ̃ kà mìdangura, akũ kãnto gupura zɔ̃kɔ̃ɔ bò ludambɛ à dàmala. 7Ma bo ma lɛtɛ zĩtɛ, akũ ma kòtoo mà ò pìmɛnɛ: Solu, Solu, à kɛ̀ dera ntɛn wɛ́ tãmaa? 8Akũ ma pì: Dímɛ n ũu, Dikiri? Akũ à pìmɛnɛ: Makũmɛ Yesu Nazɛra kũ ntɛn wɛ́ tãa ũ. 9Gbɛ̃ kũ ò kú kũmaonɔ gupura pìi è, ama odi gbɛ̃ kũ àtɛn yã o kũmao kòto maro. 10Akũ ma a là: Bɔ́n mani kɛɛ, Dikiri? Akũ à pìmɛnɛ mà futɛ mà gɛ̃ Damasuku. Gwen oni yã kũ a dìtɛmɛnɛ mà kɛ omɛnɛ pínki. 11Gupura pì í gbãna tò ma wɛ́ dí gu e doro, akũ ma gbɛ̃nɔ ma kũ ma ɔa ò gɛ̃̀ kũmao Damasuku.

12Donyĩri ke kú gwe kũ òdi pinɛ Anania. Àdi mì natɛ Luda dokanɛ, akũsɔ̃ Damasuku Yudanɔ pínki dì a tɔ́ nna sí. 13À sù ma kĩnaa à zɛ̀ ma sarɛ, akũ à pìmɛnɛ: Solu ma gbɛ̃, ǹ ɛra ǹ gu e. Gwe gɔ̃̀nɔ ma wɛ́ wɛ̃̀, akũ ma a è. 14À pì ó dizinɔ Luda mɛ́ à ma sɛ de mà wɛ́ kɛ pla kũ Gbɛ̃ Manao mà yã ma a lɛ́n mà a pɔyenyĩna dɔ̃. 15À pì manigɔ̃ de a sèedade ũ màgɔ̃ yã kũ ma è kũ yã kũ ma màao o gbɛ̃ sĩnda pínkinɛ. 16Akũ à pì bɔ́n matɛn dã dɔɔ, mà futɛ mà da'itɛ kɛ ma durunnanɔ ni kɛ̃ma kũ à sísinaao.

Pɔlu zĩna buri pãndenɔ kĩnaa

17Kũ ma ɛra Yurusalɛmu, matɛn adua kɛ Luda ɔnn, akũ ma wɛ́gupu è. 18Ma Dikiri è, à òmɛnɛ mà kɛ likalika mà bo Yurusalɛmu, zaakũ gbɛ̃nɔ ni yã kũ matɛn o a musu síro. 19Akũ ma pì Dikirinɛ, ò dɔ̃ sãnsãn kũ madìgɔ̃ gɛ̃ aduakɛkpɛ kũ aduakɛkpɛnwo de màgɔ̃ a náanikɛrinɔ ká kpɛ́siran ògɔ̃ ń gbɛ̃. 20Kũ òtɛni à sèedade Sitivĩ dɛ sɔ̃, makũ má kú gwe ma zɛ kũ a dɛ̀rinɔ má ń utanɔ kũnańnɛ. 21Akũ Dikiri pìmɛnɛ mà gɛ́, áni ma zĩ ari buri pãndenɔ kĩnaa zã̀zã.

Pɔlu bi Romu gbɛ̃mɛ

22Ò sã kpà a yãi ari à gɛ̀ɛ à kà buri pãndenɔ yã pìia, akũ ò nà wikia ò pì: À a dɛ! Gbɛ̃ dí taka kunna zɛ́ vĩro! 23Òtɛn wiki lɛ́ òtɛni ń utanɔ kpukɛ òtɛn bùsutiti fã musu. 24Akũ Romu sozanɔ gbɛ̃ zɔ̃kɔ̃ɔ pì ò gɛ̃ kũ Pɔluo ń bùran, ò a gbɛ̃ kũ flã̀ao ari à yãpura o ò le ò yã kũ òtɛn wiki dɔa a yãi ma. 25Kũ òtɛn Pɔlu ɔnɔ poro de ò a yĩ, à pì soza bàde kũ à kú gwenɛ: Á a zɛ́ vĩ à Romu gbɛ̃ gbɛ̃ yãkpatɛkɛnaa sari yá? 26Kũ sozaa pì yã pìi mà, à gɛ̀ɛ à pì ń gbɛ̃ zɔ̃kɔ̃ɔnɛ: Bɔ́n ĩni kɛɛ? Gbɛ̃ pì bi Romu gbɛ̃mɛ. 27Akũ gbɛ̃ zɔ̃kɔ̃ɔ pìi sù à Pɔlu là à pì: Ǹ omɛnɛ, Romu gbɛ̃mɛ n ũ yá? À wèa à pì: Ee. 28Akũ gbɛ̃ zɔ̃kɔ̃ɔ pìi pìnɛ: Ma ɔgɔ dasi kpàmɛ, akũ ma gɔ̃ Romu gbɛ̃ ũ. Akũ Pɔlu pìnɛ: Makũ sɔ̃ ò ma i a ũmɛ. 29Akũ gbɛ̃ kũ ò yei ò yã lalaa yãnɔ bòru kpɛ gɔ̃̀nɔ. Kũ gbɛ̃ zɔ̃kɔ̃ɔ pìi dɔ̃̀ kũ Pɔlu bi Romu gbɛ̃mɛ, vĩna a kũ̀ kũ à tò ò mɔ̀ɔ kàa yãi.

Yuda gbãnadenɔ yãkpatɛkɛna kũ Pɔluo

30A gu dɔ̀ kũ gbɛ̃ zɔ̃kɔ̃ɔ pì ye à yã kũ Yudanɔ sùo sãnsãn ma, à mɔ̀ɔ pòroa, akũ à sa'orikinɔ kũ Yuda gbãnadenɔ kàkara à sù kũ Pɔluo ń arɛ.

Currently Selected:

ZĨRINƆ 22: BB2005

Highlight

Copy