ZĨRINƆ 25

Pɔlu zɛ̀ kũ gɛna Siza kĩnaao

1Fɛsutu vutɛna kpatan gɔrɔ aakɔ̃ gbɛra à fùtɛ Sizaria à gɛ̀ɛ Yurusalɛmu. 2Gwen sa'orikinɔ kũ Yuda gbãnadenɔ sù a kĩnaa ò fùtɛ kũ Pɔlu yão. Ò wɛ́ kɛ̀a 3à sùru kɛ à tó Pɔlu su Yurusalɛmu. Zaakũ ò zɛ̀o ò tankutɛ kpákpanɛ zɛ́n ò a dɛmɛ. 4Akũ Fɛsutu pìńnɛ: Pɔlu kú kpɛ́siran Sizaria, makũ sɔ̃ mani tá gwe tera. 5Á gbãnade kenɔ su ò gɛ́ kũmao. Tó à yã vãni kɛ̀mɛ, áni o.

6Fɛsutu kɛ̀ kũńwo lán gɔrɔ sɔraakɔ̃ ke gɔrɔ kuri taka bà, akũ à ɛ̀ra à tà Sizaria. Kũ gu dɔ̀, à vùtɛ a tìntinnwa à pì ò mɔ́ kũ Pɔluo. 7Kũ ò sù kãao, Yuda kũ ò bò Yurusalɛmunɔ lìkai, akũ ò yã zɔ̃kɔ̃ kũ odi fɔ̃ ò a sèedade lèronɔ dìa dasidasi. 8Pɔlu zɛ̀ kũ a zĩdao à pì: Mádi taari kɛ Yudanɔ doka ke Luda ɔnnnɛro, ke Siza. 9Fɛsutu tɛn wɛtɛ àgɔ̃ nna kũ Yudanɔ, akũ à Pɔlu là à pì: Ĩni we ǹ gɛ́ Yurusalɛmu de mà yãkpatɛ kɛ kũnwo gwe yã dínɔ musu yá? 10Pɔlu pì: Siza doka kũ à kũ̀ ò yãkpatɛ kɛomɛnɛ arɛn má zɛn la. Mádi taari kɛ Yuda kenɛro lákũ mɔkɔ̃n ń dɔ̃ sãnsãn nà. 11Tó ma taari kũ à kà ò ma dɛ kɛ̀, matɛn gí mà garo. Ama lákũ mádi yã kũ gbɛ̃ dínɔ tɛn o ma musu ke kɛro nà, gbɛ̃ke zɛ́ vĩ à ma kpáḿmaro. Gɛna Siza kĩnaan ma zɛo. 12Kũ Fɛsutu lɛ́ kpàkũsũ kũ a gbɛ̃nɔ à pì: Kũ Sizamɛ n zɛo, a kĩnaan ĩni gɛ́n.

Gɛna kũ Pɔluo kína Agaripa kũ Benisio arɛ

13Gɔrɔ pla gbɛra kína Agaripa kũ Benisio sù Sizaria de ò fɔ kpá Fɛsutua. 14Kũ òtɛn gɔrɔ pla kɛ gwe yãi, Fɛsutu bò kũ Pɔlu yão kína pìinɛ à pì: Gɔ̃gbɛ̃ ke kú la kũ Felisi a tò da kpɛ́siran. 15Kũ ma gɛ Yurusalɛmu, sa'orikinɔ kũ Yuda gbɛ̃ zɔ̃kɔ̃nɔ sùmɛnɛ kũ a yão ò pì mà sùru kɛ mà yã daala. 16Ma pìńnɛ tó gbɛ̃ kũ ò sù kũ a yão dí zɛ́ le à kɔ̃ e kũ gbɛ̃ kũ ò yã vĩ lɛɛlɛnɔ à yã wèḿmaro, ókɔ̃nɔ Romudenɔ odì a kpáḿmaro. 17Kũ o su la lɛɛlɛ, mádi zɛzɛro. Kũ gu dɔ̀ gɔ̃̀nɔ, akũ ma vutɛ ma tìntinnwa ma pì ò mɔmɛnɛ kũ adeo. 18Gbɛ̃ kũ ò taari lèaa pìnɔ yã ò, odi yã vãni kũ matɛn kpákpa o a musuro. 19Ò yãkete vĩ kãao ń donyĩzɛ yã musu kũ gɔ̃gbɛ̃ kũ òdi pinɛ Yesu yão. À gà, akũ Pɔlu zɛ̀ kũ a kunna wɛ̃̀ndin yão. 20Ma bídi kɛ̀ yã pì zɛ́ dɔ̃naaa, akũ ma a là tó à ye à gɛ́ Yurusalɛmu ò yã pì gɔ̃gɔ̃nɛ gwe. 21Akũ Pɔlu pì Romu kínan a zɛo ògɔ̃ a kũna. Akũ ma pì ògɔ̃ a dãkpã ari màgɔ̃ gɛ́ a gbarɛ Sizaa. 22Akũ Agaripa pì Fɛsutunɛ: Má ye mà gbɛ̃ pì yã ma ma zĩda. Akũ Fɛsutu pì: Ĩni yã ma a lɛ́n zia.

23Kũ gu dɔ̀ Agaripa kũ Benisio sù kũ gakuri zɔ̃kɔ̃ɔo, akũ ò gɛ̃̀ kɔ̃kakarakɛkpɛn kũ soza gbɛ̃ zɔ̃kɔ̃nɔ kũ wɛ̃tɛ gbɛ̃ bɛ̀ɛrɛdenɔ. Kũ Fɛsutu yã ò, ò sù kũ Pɔluo. 24Akũ Fɛsutu pì: Kí Agaripa kũ ákɔ̃nɔ kũ á kú kũoo lanɔ pínki, a gbɛ̃ dí è yá? Yuda kũ ò kú Yurusalɛmunɔ kũ gu dínɔ ń pínki gbɛ̃ pì yã sɛ̀ ò sùoma, òtɛn wiki lɛ́ma ò pì à mana àgɔ̃ kun doro. 25Makũ sɔ̃, mádi e à yãke kɛ̀ kũ à kà ò a dɛro, akũ lákũ à zɛ̀ kũ Sizao nà, ma zɛo mà a gbarɛa. 26Mádi yã pì gbá dɔ̃ gbasa mà takada kɛ̃ kínanɛ a yã musuro. A yã mɛ́ à tò ma su kãao á arɛ, atɛ̃nsa mɔkɔ̃n kína Agaripa, de yãlalanaaa gbɛra mà yã le mà kɛ̃. 27Zaakũ purusuna gbarɛḿmana taari kũ ò lèa sãnsãn onaa sari zɛ́ vĩ ma kĩnaaro.

Currently Selected:

ZĨRINƆ 25: BB2005

Highlight

Copy