ZĨRINƆ 21

Pɔlu tana Yurusalɛmu

1Ó kɛ̃naḿma gbɛra o gɛ̃ gó'itɛn o da zɛ́n o mìi pɛ̀ Kosua. Gu làa dɔnaao o ka Rode, akũ bona gwe o gɛ Patara. 2Gwen o gó'itɛ kũ àtɛn gɛ́ Fenisia bùsun lèn, akũ o gɛ̃n o da zɛ́n. 3Kũ o Sipiru è zã̀ dire, o pãnɛ ɔzɛi ótɛn gɛ́ Siria bùsun, akũ o ka Taya, gu kũ ò gó'itɛ aso bɔ̀tɛn. 4O Yesudenɔ wɛ̀tɛ, akũ o azuma do kɛ̀ kũńwo. Ń gbɛ̃kenɔ ò Pɔlunɛ kũ Luda Nini gbãnao kũ àsun gɛ́ Yurusalɛmuro. 5Ama kũ gɔrɔ pàpa kũ óni tá, o futɛ ótɛn tá. Ò gɛ̀ɛ zɛwɛrɛ ń pínki kũ ń nɔnɔ kũ ń nɛ́nɔ wɛ̃tɛ kpɛ ari ísira lɛ́a. Akũ o kutɛ ó kosoa o adua kɛ̀. 6Kũ o lɛ́ zàkɔ̃a, o gɛ̃ gó'itɛn. Mɔ́kɔ̃nɔ sɔ̃ ò ɛ̀ra ń bɛa.

7Bona Taya o ɛra o da zɛ́n ari o ka Tɔlɛmai. O fɔ kpà Yesudenɔa o kɛ kũńwo gɔrɔ do. 8Kũ gu dɔ̀, o futɛ o gɛ Sizaria. O gɛ o kipa baarunnakpari Filipi bɛa. Gbɛ̃nɔn suppla kũ ò ń sɛ́ yãnɔ domɛ. 9À nɛ́nɔgbɛ̃ annabinɔ vĩ gbɛ̃nɔn siikɔ̃ odi zã kɛ kɔ̀ro. 10O gɔrɔ pla kɛna gwe gũn annabi kũ òdi pinɛ Agabu bò Yudea bùsun à sù. 11Kũ à sù ó kĩnaa, à Pɔlu utabaa sɛ̀ à a zĩda gbánɔ kũ a ɔnɔ yĩ̀o à pì: Lákũ Luda Nini ò nàn dí: Gbɛ̃ kũ à bà dí vĩ, lɛn Yudanɔ ni a yĩ Yurusalɛmu ò a kpá buri pãndenɔa lɛ. 12Kũ o yã pìi mà, ókɔ̃nɔ kũ wɛ̃tɛpidenɔ o kútɛ kɛ̀ Pɔlunɛ àsun gɛ́ Yurusalɛmuro. 13Akũ à pì: Bɔ́yãi átɛn ɔ́ɔ dɔ átɛni ma nɛ̀sɛɛ yakamɛnɛɛ? Àsungɔ̃ yĩna ũ sero. Bee tó mani ga Yurusalɛmu Dikiri Yesu tɔ́ yãi, ma soru kɛ̀ kɔ̀. 14Kũ òdi fɔ̃ ò a milɛ blèro, o kámma bò o pì: Dikiri pɔyenyĩna kɛ. 15Abire gbɛra o soru kɛ̀, akũ o gɛ Yurusalɛmu. 16Yesude kũ ò kú Sizaria kenɔ gɛ̀ɛ ò kìpa kũoo Sipiru gbɛ̃ Nasɔ̃ bɛa. Yesudemɛ a ũ zaa zĩ.

Pɔlu gɛna Yamisi gwa

17Kũ o ka Yurusalɛmu, Yesudenɔ ó sí kũ pɔnnao. 18Kũ gu dɔ̀, Pɔlu gɛ̀ɛ kũoo Yamisi bɛa. Gbɛ̃ zɔ̃kɔ̃nɔ kakarana gwe ń pínki. 19Pɔlu fɔ kpàḿma, akũ à yã kũ Luda kɛ̀ a zĩ gãi buri pãndenɔ tɛ́ bàbańnɛ mámmam zɛ́azɛa. 20Kũ ò yã pìi mà, ò Luda sáabu kpà. Akũ ò pìnɛ: Ǹ yã pì gwa, ó gbɛ̃. Yudanɔ Yesu náani kɛ̀ dúbu ũgbangba, akũ ń pínki kokari vĩ Musa doka musu. 21Ò mà kũ ntɛn yã da Yuda kũ ò kú buri pãndenɔ tɛ́nɔnɛ ò kpɛ li Musa dokanɛ, òsun tɔ̃̀ zɔ̃ ń nɛ́nɔnɛro òsungɔ̃ ń futɛokarayãnɔ kũnaro. 22Óni kɛ deraa? Zaakũ oni gí n suna yã mairo. 23Ǹ kɛ lákũ óni onnɛ nà. Ó tɛ́ gbɛ̃nɔn siikɔ̃ kenɔ lɛ́ kɛ̀ Ludaa. 24Ǹ ń sɛ́ à gɛ́ gbã̀ bo á zĩdanɛ, ǹ ń fĩna bo de ò le ò mì bo, gbɛ̃ sĩnda pínki gɔ̃ dɔ̃ kũ yã kũ ò mà n musu bi yãpuranlo. Oni e kũ mɔkɔ̃n sɔ̃ ń tɛ́ Musa dokai. 25Buri pãnde Yesu náanikɛrinɔ sɔ̃, o takada kɛ̃̀ o òńnɛ o zɛo ò mì kɛ̃ nɔ̀bɔ kũ ò sa òo tãnaaaa kũ aruo kũ nɔ̀bɔ kùtukpanasario kũ pãpãkɛnaao.

26Akũ Pɔlu gbɛ̃ pìnɔ sɛ̀ à tà kũńwo. Kũ gu dɔ̀, ò gbã̀ bò ń zĩdanɛ, akũ à gɛ̃̀ Luda ɔnn de à gbã̀bogɔrɔ lɛ́ dìtɛ kũ sa kũ oni o ń baadinɛɛo.

Pɔlu kũna Luda ɔnn

27Kũ gbã̀bona gɔrɔ suppla bire kà lakana, Asia bùsu Yuda kenɔ Pɔlu è Luda ɔnn. Ò tɛ́ kà parigu, akũ ò a kũ̀. 28Òtɛn wiki lɛ́ ò pì: Isarailanɔ, à ó leo. Gbɛ̃ díkĩna mɛ́ àdigɔ̃ yã da gbɛ̃ sĩnda pínkinɛ gu sĩnda pínkia, kũ à bo ó gbɛ̃nɔ yã kpɛ kũ ó dokao kũ gu díkĩnao. Abire gbɛra à dɔkɛ̀ kũ Luda ɔnnwo dɔ à gɛ̃̀n kũ Girikinɔ. 29Ò ò lɛ kũ ò Ɛfesu gbɛ̃ Torofimu è kũ Pɔluo wɛ̃tɛ gũn yã yãimɛ, akũ òtɛn da Pɔlu gɛ̃̀ kãao Luda ɔn gũmmɛ.

30Wɛ̃tɛ wã̀, gbɛ̃nɔ bò kũ bàao zaa gu sĩnda pínkia ò sù ò Pɔlu kũ̀ Luda ɔnn ò a gàtɛ ò bò kãao. Gwe gɔ̃̀nɔ ò Luda ɔn pìi gbànɔ tàta. 31Kũ ò ye ò a dɛ, yã pì baaru Romu sozanɔ gbɛ̃ zɔ̃kɔ̃ kĩnaa lè, à mà Yurusalɛmu wã̀. 32Gwe gɔ̃̀nɔ à soza bàdenɔ sɛ̀ kũ a bàsaridenɔ, akũ ò gɛ̃̀ḿma kũ bàao. Kũ gbɛ̃nɔ sozanɔ gbɛ̃ zɔ̃kɔ̃ɔ pìi è kũ sozanɔ lɛɛlɛ, ò Pɔlu gbɛ̃naa tò. 33Akũ gbɛ̃ zɔ̃kɔ̃ɔ pìi nà Pɔlui à a kũ̀ à pì ò a yĩ kũ mɔ̀kakɔ̃ananɔ mɛ̀n pla. À ń lá à pì: Dín gbɛ̃ pì ũu? Bɔ́ yãn à kɛ̀ɛ? 34Akũ zàa gũn gbɛ̃nɔ tɛn wiki lɛ́ òtɛn yã dokɔ̃nɔ oro. Kũ zuka dí tó gbɛ̃ zɔ̃kɔ̃ɔ pìi fɔ̃̀ à yã pì sãnsãn maro, à pì ò gɛ́ kãao sozanɔ bùran. 35Kũ ò kà kãao didikia, sozanɔ mɛ́ ò a sɛ̀ gbɛ̃nɔ nanakɔ̃ana yãi. 36Zaakũ gbɛ̃ sĩnda pínki tɛ́i kũ wikio òtɛn pi: À a dɛ.

Pɔlu gina kũ a zĩdao

37Kũ ò ye ò gɛ̃ kũ Pɔluo sozanɔ bùran, akũ à gbɛ̃ zɔ̃kɔ̃ɔ pìi là à pì: Ĩni we mà yã ońnɛ yá? Akũ à a là à pì: Ndì Giriki yã ma yá? 38Misila gbɛ̃ kũ à fùtɛ kũ gbãnadenɔo zĩna à gɛ̀ɛ gbárannan kũ bùsudɛri gbɛ̃nɔn dúbu siikɔ̃nɔmɛ n ũroo? 39Pɔlu wèa à pì: Yudan ma ũ. Ò ma i Taasu, Silisia bùsummɛ. Wɛ̃tɛ tɔ́saridenlo. Ma wɛ́ kɛ̀mma ǹ ma gba zɛ́ mà yã o gbɛ̃nɔnɛ. 40À a gbà zɛ́, akũ Pɔlu zɛ̀ didikia à ɔ sɛ̀ gbɛ̃nɔnɛ. Kũ ò yĩ̀tɛ kítikiti, à yã òńnɛ kũ Eberu yão à pì:

Currently Selected:

ZĨRINƆ 21: BB2005

Highlight

Copy