ZĨRINƆ 20

Pɔlu gɛna Masedonia bùsun kũ Girisio

1Kũ zuka làka, Pɔlu Yesudenɔ kàkara à ń gbá swɛ̃̀ɛ à lɛ́ zàḿma, akũ à gɛ̀ɛ Masedonia. 2Kũ àtɛn gɛ̃tɛ bùsu birela, à gbɛ̃nɔ gbà swɛ̃̀ kũ yãnɔ dasi ari à gɛ̀ɛ à kào Girisi, 3akũ à mɔ aakɔ̃ kɛ̀ gwe. Kũ àtɛn gɛ́ gɛ̃ gó'itɛn de à tá Siria bùsun, à mà Yudanɔ lɛ́ kpàkũsũai, akũ à zɛ̀o à ɛra à tá kũ Masedonia kpao. 4Gbɛ̃ kũ ò gɛ̀ɛ zɛnɛnɔ tɔ́n dí: Bɛrea gbɛ̃ Piru nɛ́ Sopata kũ Tɛsalonika gbɛ̃nɔ Arisitaku kũ Sɛkunduo kũ Dɛbi gbɛ̃ Gayusio kũ Timɔtio kũ Asia bùsu gbɛ̃nɔ Tikiku kũ Torofimuo. 5Gbɛ̃ birenɔ dòwɛrɛ arɛ ò gɛ̀ɛ, òtɛni ó dã Toroasi. 6Ókɔ̃nɔ sɔ̃ Burodi Futɛnasari dikpɛ gbɛra o gɛ̃ gó'itɛn Filipi, akũ gɔrɔ sɔɔro gbɛra o ń lé Toroasi. Gwen o azuma do dɛ̀n.

Yutiku lɛtɛna bona wondon

7Azumanɛnna zĩ o kɔ̃ kàkara de ò burodi só lɛɛlɛ. Pɔlu tɛn waazi kɛńnɛ. Kũ à ye à tá tó gu dɔ̀, akũ à dà yãla ari lizãndo. 8Fitila dasi kú kpɛ́ musu gu kũ ó kɔ̃kakaranan. 9Kɛfɛnna ke vutɛna wondoo gũn kũ òdi pinɛ Yutiku, àtɛn idekũ dɛdɛ. Kũ Pɔlu waazikɛnaa kɛ̀ gbã̀na, i a lɛ̀, akũ à bò zaa kpɛ́ musu pì lɛu aakɔ̃de wondoo gũn à lɛ̀tɛ, akũ ò à sɛ̀ gɛ̀ ũ. 10Akũ Pɔlu kìpa à kùsia, akũ à a sɛ̀ à kpà a kùla à pì: Àsun tó swɛ̃̀ kɛ̃águro, à kú wɛ̃̀ndiio. 11Kũ à ɛ̀ra à dìdi musu, à burodii lìlikɔ̃rɛ à sò, akũ à yã ò manamana ari gu dɔ̀o, akũ à dà zɛ́n. 12Akũ ò tà kũ kɛfɛnna pìio bɛ̃nɛ, gbɛ̃nɔ nɛ̀sɛ yĩda kũ̀ manamana.

Zaa Toroasi ai Milɛtu

13Ókɔ̃nɔ sɔ̃ o gɛ o gɛ̃ gó'itɛn, o do Pɔlunɛ arɛ o ta Aso, wɛ̃tɛ kũ óni a sɛ́n. Lɛn à zɛ̀o lɛ, zaakũ à ye à gɛ́ gwe gɛ̀sɛmɛ. 14Kũ à ó lé Aso, akũ o a sɛ̀ o gɛ Mitilɛni. 15Kũ gu dɔ̀, o bo gwe kũ gó'itɛo o gɛ Kio. Gu làa dɔna o gɛ Samɔ, akũ a gɔrɔ aakɔ̃de zĩn o ka Milɛtu. 16Pɔlu zɛ̀o yã à do Ɛfesui de gɔrɔ sún gɛ̃a Asia bùsunlo yãi, zaakũ àtɛn wã de à le à ká Yurusalɛmu ari Pɛntikɔsi dikpɛ gɔ̃ kámɛ, tó ani sí kɛ.

Pɔlu lɛ́zana Ɛfesu gbɛ̃ zɔ̃kɔ̃nɔa

17Pɔlu gbɛ̃nɔ zĩ̀ sɔsi gbɛ̃ zɔ̃kɔ̃nɔa Ɛfesu à pì ò su Milɛtu. 18Kũ ò kà, akũ à pìńnɛ: Á dɔ̃ lákũ madì kɛ nà gɔrɔ kũ má kú kãáo zaa zĩ kũ ma gbá pɛ̀tɛ Asia bùsun la. 19Ma zĩ kɛ̀ Dikirinɛ zĩdabusanaa gũn kũ wɛ́'io. Ma wari kɛ̀ Yudanɔ lɛ́kpakũsũnamai yãi. 20Mádi karana yãke utɛárɛro, ma waazi kɛ̀árɛ ma dàárɛ gupuraa kũ á bɛnɔ. 21Ma lɛ́ dà Yudanɔa kũ Girikinɔ ń pínki ò arɛ dɔ Ludaa ò ó Dikiri Yesu náani kɛ. 22Tera sà matɛn gɛ́ Yurusalɛmu lákũ Luda Nini ma dan nà, yã kũ ani ma le gwe má dɔ̃ro. 23Wɛ̃tɛ kũ wɛ̃tɛo Luda Nini tɛn omɛnɛ kpɛ́sira kũ wɛ́tãmmanaao tɛni ń dã. 24Ama ma wɛ̃̀ndi bɛ̀ɛrɛ vĩmɛnɛ doro, séde mà yã kũ matɛn pɛ́a le mà zĩ kũ Dikiri Yesu dàmɛnɛ kɛ mà a mì dɛ. Àkũmɛ Luda gbɛ̃kɛ baarunnakpana gbɛ̃nɔnɛ ũ.

25Ákɔ̃nɔ kũ ma kure á tɛ́ ma kpata kũ à bò Luda kĩnaa waazi kɛ̀árɛnɔ, má dɔ̃ tera sà kũ óni wɛ́ kɛ pla doro. 26A yã mɛ́ à tò ma òárɛ gbãra, tó á gbɛ̃ke sã̀tɛ, ma yãn gwe doro. 27Ma Luda pɔyenyĩna pínki òárɛ, mádi a ke utɛárɛro. 28À laakari dɔ á zĩdaa kũ sã kũ Luda Nini á dítɛ ń gbɛ̃ zɔ̃kɔ̃nɔ ũnɔ ń pínki. À Luda sɔsi gbɛ̃ kũ à ń lú kũ a zĩda aruo pìnɔ gwa. 29Má dɔ̃ kũ ma tanaa gbɛra lɛwanna pãsĩ kũ ò sãnɔ wɛ̃nda vĩronɔ ni si á tɛ́. 30Bee á gbɛ̃kenɔ ni futɛ ò yãlɛkpɛrɛ dańnɛ de ò gbɛ̃nɔ gá ò naḿma. 31A yã mɛ́ à tò àgɔ̃ kú a laakariia. Lákũ ma lɛ́ dà á baadia kũ wɛ́'io nà fãnantɛ̃ kũ gwãanio wɛ̃̀ aakɔ̃ dagura kámmabonaa sari, à tó a yã gɔ̃ dɔágu.

32Tera sà matɛni á na Ludanɛ a ɔĩ kũ a gbɛ̃kɛ yã kũ ani fɔ̃ à gbãna karaárɛo, à á gba zɛ́ de á baka gɔ̃ kú kũ a gbɛ̃nɔ ń pínki. 33Mádi gbɛ̃ke ɔgɔ ke a pɔ́kasa ke ni dɛro. 34Á dɔ̃ kũ á zĩdao kũ ma zĩ kɛ̀ kũ ma zĩda ɔomɛ, akũ ma pɔ́ kũ ó a ni vĩ kũ ma gbɛ̃nɔo lè. 35Má mɔ̀árɛ yã sĩnda pínki gũn à zĩ kɛ lán dí bà à kpá gbãnasaridenɔi. Yã kũ Dikiri Yesu ò gɔ̃ dɔágu kũ à pì gbadana pɔnna vĩ de gbasinala.

36Yã bire onaa gbɛra à kùtɛ a kosoa kũ ń gbɛ̃ sĩnda pínkio à adua kɛ̀. 37Ń wɛ́ pà kũ wɛ́'io ń pínki ò mlɛ̃̀mlɛ̃ Pɔlua ò lɛ́ pɛ̀pɛa. 38Yã kũ à tò ń pɔ sira kũ̀ zɔ̃kɔ̃ mɛ́ à de kũ à pì ń wɛ́ ni kɛ pla doro. Akũ ò zɛ̀nɛ ari gó'itɛ kĩnaa.

Currently Selected:

ZĨRINƆ 20: BB2005

Highlight

Copy