ZĨRINƆ 19

Pɔlu kunna Ɛfesu

1Gɔrɔ kũ Apolo kú Kɔrinti, Pɔlu gɛ̃̀ Asia bùsuu guragura. Kũ à kà Ɛfesu, à Yesude kenɔ lè gwe, 2akũ à ń lá à pì: Kũ a Dikiri náani kɛ̀, a a Nini lè yá? Akũ ò wèa ò pì: Oi, ódi a Nini kunna yã ma sero. 3Akũ à ń lá à pì: Da'itɛ kpaten a kɛ̀ɛ? Ò wèa ò pì: Yahaya pɔ́mɛ. 4Akũ Pɔlu pìńnɛ: Yahaya gbɛ̃nɔ da'itɛ kɛ̀ ń nɛ̀sɛlitɛnaa sèeda ũmɛ. À ò gbɛ̃nɔnɛ ò gbɛ̃ kũ ani su a kpɛ náani kɛ. Yesun à tɛ́a gwe. 5Kũ ò yã pìi mà, ò da'itɛ kɛ̀ kũ Dikiri Yesu tɔ́o. 6Kũ Pɔlu ɔ nàḿma, Luda Nini dìdiḿma, akũ ò yãke buri ò ò annabikɛyã ò. 7Gbɛ̃ pìnɔ kà lán gbɛ̃nɔn kuri awɛɛpla bà ń pínki.

8Pɔlu dìgɔ̃ gɛ́ aduakɛkpɛn ari mɔ aakɔ̃. À yã òńnɛ kũ swɛ̃̀gbãnao, àtɛn yã gága kũńwo de ò a yãzɛ e kpata kũ à bò Luda kĩnaa musu. 9Ama ń gbɛ̃kenɔ sãgbãna kɛ̀ odi Luda yã síro, akũ ò zɛ́ pì vãni bò pari gũn. Akũ Pɔlu gbɛ̃ kũ ò Yesu náani kɛ̀nɔ sɛ̀tɛ ò bò ń tɛ́. Akũ àdigɔ̃ yã gága kũńwo Tiranu kyókpɛn lákũ gu dìgɔ̃ dɔ nà. 10À kɛ̀ lɛ ari wɛ̃̀ pla, akũ Asia bùsudenɔ Dikiri yã mà Yudanɔ kũ Girikinɔ ń pínki.

Seva nɛ́nɔ

11Luda Pɔlu gbà zɛ́ à daboyã bonsarɛnɔ kɛ̀. 12Lɛn bee tó ò ísimmawarabɔnɔ ke fùranɔ nà Pɔlu mɛ̀ɛa ò gɛ̀ɛ ò nà gyãrenɔa, òdi werekɔ̃amɛ ń tãnanɔ dì goḿma. 13Yuda tãnagommari kũ òdigɔ̃ kure kenɔ wɛ̀tɛ ò tãna go kũ Dikiri Yesu tɔ́o ò pì: O òárɛ kũ Yesu kũ Pɔlu dì a yã waazi kɛ tɔ́o, à goḿma. 14Yudanɔ sa'oriki kũ òdi pinɛ Seva nɛ́gɔ̃gbɛ̃ gbɛ̃nɔn supplanɔ mɛ́ òdi kɛ lɛ. 15Akũ tãna pìńnɛ: Má Yesu dɔ̃, akũsɔ̃ ma Pɔlu baaruu mà. Ákɔ̃nɔ sɔ̃, dín á ũu? 16Akũ tãnade pìi kùsiḿma à gbãna mɔ̀ńnɛ, à ń nɛ́ ń pínki à ń kĩnna, akũ ò bàa lɛ̀ ò bɔ̀tɛ ɔn pìi gũn punsi. 17Kũ Ɛfesudenɔ yã pìi mà Yudanɔ kũ Girikinɔ ń pínki, vĩna ń kũ, akũ ò Dikiri Yesu tɔ́ sɛ̀ lei. 18Akũ gbɛ̃ kũ ò Yesu náani kɛ̀nɔ sù òtɛni ń yãkɛnanɔ o gupuraa dasidasi. 19Pɔ́dammari kenɔ ń takadanɔ nàkɔ̃a ò sù ò kà tɛ́n pari wára. Kũ ò takada pìnɔ ɔgɔ dɔ̀dɔ, ò è à kà andurufu ɔgɔ mɛ̀n dúbu bupla akuri. 20Lɛn Dikiri yã tɛn dagula lɛ àtɛn gbãna kũ.

Yãkete futɛna Ɛfesu

21Yã birenɔ kɛnaa gbɛra Pɔlu zɛ̀o a nɛ̀sɛɛ gũn kũ ani bɔtɛ kũ Masedonia bùsuuo kũ Girisi bùsuuo à gɛ́ Yurusalɛmu à pì tó a gɛɛ gwe, séde à gɛ́ Romu. 22Akũ à a kpanyĩri gbɛ̃nɔn pla kenɔ zĩ̀ Masedonia, Timɔti kũ Erasatuo. Àkũ sɔ̃ à gɔ̃̀ Asia bùsun gĩa.

23Gɔrɔ birean yãkete fùtɛ manamana Dikiri zɛ́ yã musu. 24Andurufupiri ke kun a tɔ́n Dɛmɛtɛriu, àdi Atɛmi tãnakpɛ taka pi kũ andurufuuo. A pìri dakenɔ dì àre zɔ̃kɔ̃ le zĩ pìia. 25Akũ à ń kákara kũ ń gbɛ̃dake kũ òdi zĩ bire taka kɛnɔ à pìńnɛ: Gbɛ̃nɔ, á dɔ̃ kũ ɔzĩ dimɛ ó bleki ũ. 26Átɛn e akũsɔ̃ átɛn ma lákũ Pɔlu tɛn kɛ nà, kũ à pì tãna kũ ò ń pínɔ bi dikirinɔnlo. À gbɛ̃nɔ mìi lìtɛ dasidasi, ò a yãzɛ è. Adi kɛ Ɛfesu lan adoro, ari kũ Asia bùsu gu dasiomɛ. 27Yã dí ni fɔ̃ à kisira iwɛrɛ fá. Adi kɛ ó ɔzĩ lɛtɛna adonlo, a yã ni tó tãna nɔgbɛ̃ zɔ̃kɔ̃ Atɛmi kpɛ́ kɛ pã, tãna kũ Asia bùsudenɔ kũ andunia gbɛ̃nɔ pínki dì donyĩ kɛnɛɛ pì gakuri kɔ̀ ni ɛ́.

28Kũ ò yã pìi mà, ń pɔ fɛ̃̀, akũ ò nà wikilɛnaaa ò pì: Ɛfesudenɔ Atɛmi zɔ̃kɔ̃. 29Wɛ̃tɛ wã̀, gbɛ̃nɔ bàa lɛ̀ òtɛn sí kɔ̃kakarakɛkin, akũ ò Masedonia bùsu gbɛ̃nɔn pla Gayusi kũ Arisitaku kũ òdi gɛ́ wɛ̃tɛa kũ Pɔluonɔ kũ̀ ò gɛ̀ɛ kũńwo gwe. 30Pɔlu ye à gɛ̃ zà pìi gũn, akũ Yesudenɔ dí wenɛro. 31Asia bùsu gbɛ̃ zɔ̃kɔ̃ kenɔ bi a gbɛ̃nnanɔmɛ, akũ ò gbɛ̃nɔ zĩ̀a ò lɛ dàa àsun gɛ̃ zànlo. 32Kɔ̃kakaranaa yàka, gbɛ̃nɔ tɛn wiki lɛ́ òtɛn kɔ̃ yã maro, zaakũ pari dɔ̃ tó bɔ́yãin ò kàkarairo. 33Yudanɔ ɔ sɔ̃̀ Alɛsandai à yã o, akũ zàa gũn gbɛ̃kenɔ tɛn lɛ́ dɔa. Akũ Alɛsanda ɔ kɛ̀ńnɛ de ò yĩtɛ, à ye à Yudanɔ bàka bo yãn gbɛ̃nɔ wára. 34Kũ ò a dɔ̃̀ Yuda ũ, akũ ń pínki wiki sìkũn lɛɛlɛ lán awa pla bà ò pì: Ɛfesudenɔ Atɛmi zɔ̃kɔ̃.

35Akũ wɛ̃tɛ gbɛ̃ zɔ̃kɔ̃ ń zuka zɛ̀ à pì: Ɛfesudenɔ, gbɛ̃ sĩnda pínki dɔ̃ kũ á de tãna zɔ̃kɔ̃ Atɛmi kpɛ́ dãkpãri ũ kũ a surakpasao. 36Lákũ gbɛ̃ke ni fɔ̃ à bo abirekũ kpɛro nà, à á zĩda kũ tɛɛnɛ. Àsun yãke kɛ kũ wãnaoro. 37A su kũ gbɛ̃ dínɔ la, odi ɔ na ó tãnakpɛ pɔ́kearo odi ó tãna tɔ́ vãni síro. 38A yã mɛ́ à tò, tó Dɛmɛtɛriu kũ a pìri dakenɔ yã vĩ kũ gbɛ̃keo, yãkpatɛkɛgɔrɔ kun kũ yãkɛkɛrinɔ. Ò gɛ́ kɔ̃ sísi gwe. 39Tó á yã pãnde vĩ dɔ, oni gɔ̃gɔ̃árɛ kɔ̃kakarana kũ gbãnadenɔ gbɛ̀kaa gũn. 40Zaakũ oni fɔ̃ ò ó taari le zuka kũ ò kà gbãra díkĩna yãi. Óni yãzɛde le ò o zuka pìi musuro, zaakũ à gbá vĩro. 41Yã bire onaa gbɛran à gbɛ̃nɔ gbàrɛ.

Currently Selected:

ZĨRINƆ 19: BB2005

Highlight

Copy