ZĨRINƆ 18

Pɔlu gɔrɔ pla kɛna Kɔrinti

1Abire gbɛra Pɔlu bò Atɛni à gɛ̀ɛ Kɔrinti. 2À kpàkũ kũ Yuda keo gwe, Pɔntu bùsu gbɛ̃ kũ òdi pinɛ Akila kũ a nanɔ Pirisilao. Ò sù kũ Itali bùsuuo dufumɛ, kũ Siza Kalaudiu dìtɛ Yudanɔnɛ ò bɔtɛ Romu yãi. Pɔlu gɛ̀ɛ ń kĩnaa, 3akũ à kìpaḿma, àtɛn zĩ kɛ kũńwo kũ ɔzĩdokɔ̃nɔkɛrinɔmɛ ń ũ yãi. Zaakũ bizakutakɛrinɔmɛ ń ũ ń pínki. 4Kámmabogɔrɔ zĩ pínki àdi waazi kɛ aduakɛkpɛn àtɛn wɛtɛ Yudanɔ kũ Girikinɔ a yãzɛ e.

5Kũ Silasi kũ Timɔtio bò Masedonia bùsun ò sù, Pɔlu zɛ̀ kũ waazikɛnaao àtɛn o Yudanɔnɛ swáswa kũ Yesumɛ Arumasihu ũ. 6Kũ Yudanɔ ibɛrɛɛ sɛ̀ kãao ò a sɔ̃̀sɔ̃, akũ à a pɔ́kasanɔ kpùkɛ à pì: Yã kũ a kɛ̀ wí á musu, ma yãn doro. Zaa tera mani gɛ́ buri pãndenɔ kĩnaamɛ. 7Kũ à bò gwe à gɛ̀ɛ à kìpa buri pãnde donyĩri kũ òdi pinɛ Titiu Yusutu bɛa aduakɛkpɛ pìi sarɛ. 8Aduakɛkpɛ gbɛ̃ zɔ̃kɔ̃ Kirisipu Dikiri náani kɛ̀ kũ a bedenɔ ń pínki. Kɔrintide kũ ò Pɔlu yã mànɔ Yesu náani kɛ̀ dasi, akũ ò da'itɛ kɛ̀. 9Gwãani kea Dikiri ò Pɔlunɛ wɛ́gupu'enaa gũn à pì: Ǹsun tó vĩna n kũro, ǹsun kámma bo kũ yã'onnɛnaaoro, 10zaakũ gbɛ̃nɔn kú ma pɔ́ ũ dasidasi wɛ̃tɛ dí gũn. Makũ mɛ́ má kú kũnwo, gbɛ̃ke ni n kũ à wari dɔmmaro. 11Akũ Pɔlu wɛ̃̀ do kũ mɔ suddoo kɛ̀ gwe àdigɔ̃ Luda yã da gbɛ̃nɔnɛ.

12Gɔrɔ kũ Romu gbɛ̃ Galio de Girisi bùsu gbɛ̃ zɔ̃kɔ̃ ũ, Yudanɔ lɛ́dokɔ̃nɔ kɛ̀ ò fùtɛ Pɔlui, ò gɛ̀ɛ kãao yãkpatɛkɛkia 13ò pì: Àkũ mɛ́ àtɛn tɛ́ ká gbɛ̃nɔgu ògɔ̃ donyĩyã kũ à pã̀ ó dokanɛ kũna. 14Kũ Pɔlu ye à yã o, akũ Galio pì Yudanɔnɛ: Yudanɔ, tó dà ke taari zɔ̃kɔ̃ɔn à kɛ̀ yã, à kũ̀ mà mɛna kãáo. 15Lákũ átɛn yãkete ká gbɛ̃nɔ tɔ́ yã musu nà kũ á zĩda dokao, abirekũ gɔ̃̀ á yã ũmɛ. Ma gi yã bire taka kɛkɛnaaimɛ. 16Akũ à pɛ̀ḿma à ń bɔ́tɛ yãkpatɛkɛkpɛn. 17Akũ pari aduakɛkpɛ gbɛ̃ zɔ̃kɔ̃ Sɔsɔtɛnɛ kũ̀ ò a gbɛ̃̀gbɛ̃ yãkpatɛkɛkpɛ lɛ́a. Ama adi kɛ Galionɛ yãke ũro.

Pɔlu tana Antiɔku

18Pɔlu gɔrɔ pla kɛ̀ Kɔrinti dɔ, akũ à lɛ́ zà Yesudenɔa à gɛ̃̀ gó'itɛn àtɛn tá Siria bùsun. Pirisila kũ Akilao gɛ̀ɛ kãao. À mìi bò Kɛnkɛrɛa lɛ́ kũ à sɛ̀ à Ludanɛ yãi. 19Kũ ò kà Ɛfesu, Pɔlu Pirisila kũ Akilaoo tò gwe. A gɛ̀ɛ aduakɛkpɛn ò yã lɛ̀kɔ̃a kũ Yudanɔ, 20akũ ò wɛ́ kɛ̀a à gɔrɔ pla kɛ kũńwo. Akũ à gì, 21ama kũ àtɛn lɛ́ zaḿma à pì: Tó Luda wè, mani ɛra mà su á gwa. Akũ à bò Ɛfesu kũ gó'itɛo. 22Kũ à kà Sizaria, à gɛ̀ɛ à fɔ kpà sɔsi gbɛ̃nɔa zaa Yurusalɛmu, akũ à tà Antiɔku. 23Kũ à gɔrɔ pla kɛ̀ gwe, à ɛ̀ra à dà zɛ́n à gɛ̀ɛ wɛ̃tɛ kũ wɛ̃tɛo Galatia bùsun kũ Firigia bùsuuo à Yesudenɔ gbà gbãna ń pínki.

Apolo waazikɛna Ɛfesu

24Yuda ke kun a tɔ́n Apolo, Alɛsandaria gbɛ̃mɛ. A lɛ́nna, akũsɔ̃ à Luda yã dɔ̃ manamana. 25Ò Dikiri zɛ́ yã dànɛ, akũ Yesu yãdannɛna a kũ̀ gbãna. Àdi dańnɛ a zɛ́a, ama Yahaya da'itɛkɛna yãn à dɔ̃. À sù Ɛfesu, 26akũ à nà yã'onaaa aduakɛkpɛn kũ swɛ̃̀gbãnao. Kũ Pirisila kũ Akilao a yã mà, akũ ò a sìsi ò Luda zɛ́ yã bɔ̀kɔtɛnɛ sãnsãn. 27Kũ Apolo ye à gɛ́ Girisi bùsun, Yesudenɔ a gbà swɛ̃̀ɛ, akũ ò takada kɛ̃̀ Yesude kũ ò kú gwenɔnɛ de ò a kũ ɔplapla. Kũ à kà gwe, à ɔ dà gbɛ̃ kũ ò Yesu náani kɛ̀ Luda gbɛ̃kɛ gãinɔa manamana. 28Zaakũ a yã Yudanɔ fù pari gũn mámmam, à mɔ̀ńnɛ Luda yã gũn kũ Yesumɛ Arumasihu ũ.

Currently Selected:

ZĨRINƆ 18: BB2005

Highlight

Copy