1 KƆRINTIDENƆ 7

Nɔsɛnaa

1Takada kũ a kɛ̃̀ yã musu, à manamɛ gɔ̃gbɛ̃ gɔ̃ kun nɔ sari. 2Ama kũ pãpãkɛna dàgula yãi, gɔ̃gbɛ̃ sĩnda pínki gɔ̃ a nɔ vĩ, nɔgbɛ̃ sĩnda pínki gɔ̃ a gɔ̃ vĩ. 3Gɔ̃gbɛ̃ gɔ̃ pɔ́ kũ à kɔ̃ sìo kɛ a nanɔnɛ. Nɔgbɛ̃ gɔ̃ kɛ a zãnɛ lɛ se dɔ. 4Nɔgbɛ̃ mɛ̀ kun a zĩda pɔ́ ũro, sé a zã pɔ́ ũ. Lɛmɛ dɔ gɔ̃gbɛ̃ mɛ̀ kun a zĩda pɔ́ ũro, sé a nanɔ pɔ́ ũ. 5Àsun gíkɔ̃nɛro, séde a màkɔ̃nɛ de à laakari dɔ aduakɛnaaa gĩa, gbasa à á kɛna kɛ, de Setan sún ɔ̃ndɔ̃ kɛárɛ à fu mɛnaaro yãi. 6Lɛ́n ma dàáwa, adi kɛ tilasinlo. 7Má ye gbɛ̃ sĩnda pínki gɔ̃ de lán ma bà, ama baadi kũ a gba kũ Luda dànɛɛomɛ, gbɛ̃ dí kũ a pɔ́o, gbɛ̃ dire kũ a pɔ́o.

8Matɛn yã díkĩna o posenɔnɛ kũ gyaanɔnɔ. À mana ògɔ̃ kun ńdo lán ma bà, 9ama tó oni fɔ̃ ò ń zĩda kũro, ò nɔ sɛ́, ò zã kɛ, zaakũ kɔ̃sɛna mana de lukana kɔ̃ila.

10Matɛn yã ditɛ nɔdenɔnɛ kũ gɔ̃denɔ, adi kɛ makũnlo, Dikirimɛ. Nɔgbɛ̃ sún gí a zãiro, 11gɔ̃gbɛ̃ sún pɛ́ a nanɔaro. Tó nɔgbɛ̃ sù à gì a zãi, à gɔ̃ pose kesɔ̃ à ɛra a zãi.

12Matɛn o gbɛ̃ kparanɔnɛ, adi kɛ Dikiri mɛ́ à òro. Tó á gbɛ̃ke nɔ Yesusaride vĩ, akũ nɔ pì ye àgɔ̃ kú kãao lɛɛlɛ, àsun pɛ́aro. 13Lɛmɛ dɔ tó nɔgbɛ̃ gɔ̃ Yesusaride vĩ, akũ gɔ̃ pì ye àgɔ̃ kú kãao lɛɛlɛ, àsun gíiro. 14Zaakũ Luda dì gɔ̃ Yesusaride sí a nanɔ yãi, akũsɔ̃ àdi nɔ Yesusaride sí a zã yãi. Tó lɛnlo, ń nɛ́nɔ nigɔ̃ gbãsĩmɛ. Ama tera ń kunna adona. 15Tó Yesusaride pìi gìi, à gíi. Yã bire taka gũn ń kunna kũ kɔ̃o bi tilasinlo. Luda á sísi, à á sɛ́ àgɔ̃ kun aafiamɛ. 16Nɔgbɛ̃, ke ĩni n zã sura ba, ń dɔ̃ yá? Gɔ̃gbɛ̃, ke ĩni n nanɔ sura ba, ń dɔ̃ yá?

À zɛ kũ á gwenaao

17Baadi zɛ kũ a gwena kũ Luda a dìtɛnwo gɔrɔ kũ Dikiri a sìsi. Lɛn madì da sɔsi gbɛ̃nɔnɛ lɛ wɛ̃tɛ kũ wɛ̃tɛo pínki. 18Luda gbɛ̃ sìsi tɔ̃̀zɔ̃naden yá, àsun wɛtɛ à kɛ gyɔfɔrɔde ũro. Luda gbɛ̃ sìsi gyɔfɔrɔden yá, àsun tɔ̃̀ zɔ̃ro. 19Tɔ̃̀zɔ̃na yãke vĩro, akũsɔ̃ gyɔfɔrɔ yãke vĩro, sé àgɔ̃ yã kũ Luda dìtɛnɔ kũna. 20Lákũ baadi kun nà gɔrɔ kũ Luda a sìsi, à zɛo lɛ. 21Luda n sisi zɔ̀ ũn yá? Ǹsun a damu kɛro. Ama tó n su n gɔ̃ zĩdade ũ zɛ́ è, ǹ bo zɔ̀blenan. 22Zɔ̀ kũ Dikiri a sìsi gɔ̃̀ zĩdade ũ Dikiri pìi gũmmɛ. Lɛmɛ dɔ zĩdade kũ Dikiri a sìsii gɔ̃̀ Kirisi zɔ̀ ũ. 23Luda á lú, à fĩnaa bò. Àsun gɔ̃ bisãsiri zɔ̀ ũro. 24Ma gbɛ̃nɔ, lákũ baadi kun nà gɔrɔ kũ Luda a sìsi, à zɛ kũ Ludao lɛ.

Kɛfɛnnanɔ kũ nɔkparenɔ

25Kɛfɛnnanɔ kũ nɔkparenɔ yã musu mádi yãke ma Dikiri kĩnaaro, ama lákũ má náani vĩ Dikiri sùruu gũn nà, lán ma laasun de nàn mani oárɛ. 26Wɛ́tãmmana kũ à kun tera mɛ́ à tò, matɛn da à mana kũ gbɛ̃ zɛ kũ a kunnaao. 27Tó ń nɔ vĩ, ǹsun pi ĩni a gbarɛro. Tó ń vĩ sɔ̃ro, ǹsun wɛtɛ ǹ sɛ́ro. 28Tó n sɛ̀ sɔ̃, ńdi durunna kɛro. Tó nɔkpare zã kɛ̀ sɔ̃, adi durunna kɛro. Gbɛ̃ birenɔ ni yã le andunian, akũ má ye abire taka á lero. 29Ma gbɛ̃nɔ, yã kũ matɛn on dí: Gɔrɔ dí gɔ̃ zã̀ro. Zaa tera nɔdenɔ gɔ̃ lán gbɛ̃ kũ ò vĩronɔ bà. 30Ɔ́ɔdɔrinɔ gɔ̃ lán gbɛ̃ kũ òtɛn ɔ́ɔ dɔronɔ bà. Pɔnnadenɔ gɔ̃ lán gbɛ̃ kũ ń pɔ nnaronɔ bà. Pɔ́lurinɔ gɔ̃ lán gbɛ̃ kũ ò pɔ́ke vĩronɔ bà. 31Anduniablerinɔ gɔ̃ lán gbɛ̃ kũ òtɛn bleronɔ bà, zaakũ lákũ andunia dí kun nà tera tɛn gɛ̃tɛmɛ.

32Má ye àgɔ̃ kun damu sarimɛ. Pose dì laakari dɔ Dikiri yãnɔa, yã kũ à kɛ̀ Dikirigun àdi kɛ. 33Nɔde dì laakari dɔ andunia yãnɔa, yã kũ à kɛ̀ a nanɔgun àdi kɛ, 34akũ àdigɔ̃ kú kũ laasun plao. Nɔ pose ke nɔkpare dì laakari dɔ Dikiri yãnɔa, àdi a mɛ̀ kũ a ninio kpáa. Nɔzãre sɔ̃, àdi laakari dɔ andunia yãnɔa, yã kũ à kɛ̀ a zãgun àdi kɛ. 35Adi kɛ matɛn mɔ̀kakɔ̃ana kpáárɛnlo. Ma abirekũ ò á aafia yãimɛ, de à yã kɛ a zɛ́a, à á zĩda kpá Dikiria gu pãnde gwanaa sari.

36Tó gbɛ̃ nɔkpamma vĩ, tó a sɛ́gɔrɔ tɛn gɛ̃, akũ à kɛ̀nɛ wé'iyã ũ, tó à a kàka lán dí bà, à a sɛ́ lákũ à kɛ̀nɛ nà, adi kɛ durunna ũro. Ò kɔ̃ sɛ́. 37Ama tó à yã pìi bò a nɛ̀sɛmmɛ, akũ tilasi dí a kákaro, akũ à a zĩda kũna dɔ̃, tó à dà a swɛ̃̀n kũ áni a nɔkpare pì sɛ́ro, à kɛ̀ manamɛ. 38Lɛmɛ gbɛ̃ kũ à a pɔ́ sɛ̀ kɛ̀ mana, ama gbɛ̃ kũ adi a pɔ́ sɛ́ro kɛ̀ mana de abirekũla.

39Nɔgbɛ̃ bi a zã pɔ́mɛ gɔrɔ kũ a zã kú kũ wɛ̃̀ndiio. Tó a zã sù à andunia tò, à zɛ́ vĩ à zã kɛ kũ gɔ̃ kũ à yeiio, ama gɔ̃ pì gɔ̃ kun Dikiri pɔ́ ũ. 40Bee kũ abireo tó à gɔ̃̀ pose, matɛn da a pɔ nigɔ̃ nna de tó à zã kɛ̀la. Matɛn da makũ, má Luda Nini vĩ se.

Currently Selected:

1 KƆRINTIDENƆ 7: BB2005

Highlight

Copy