1 KƆRINTIDENƆ 6

Yãkpatɛkɛna kũ kɔ̃o

1Tó á gbɛ̃ke yã vĩ kũ a Yesude dakeo, bɔ́yãi àdi gɛ́ yãkpatɛ kɛ kũ adeo Luda gbɛ̃nɔ kĩnaaroo, sé ludadɔ̃risarinɔ kĩnaa? 2Á dɔ̃ kũ Luda gbɛ̃nɔ mɛ́ oni yãkpatɛ kɛ kũ anduniaoroo? Lákũ ákɔ̃nɔ mɛ́ áni yãkpatɛ kɛ kũ anduniao nà, ádi ká à yãketenɔ gɔ̃gɔ̃roo? 3Á dɔ̃ kũ ókɔ̃nɔ mɛ́ óni yãkpatɛ kɛ kũ malaikanɔoroo? Oni andunia díkĩna pɔ́ o dɔ yá? 4Tó á yã bire taka gɔ̃gɔ̃na vĩ, áni gbɛ̃ kũ ò de sɔsi gbɛ̃nɔnɛ pɔ́ke ũronɔ sɛ́ yãgɔ̃gɔ̃rinɔ ũ yá? 5Ma abirekũ ò de mà wé'i daáwa yãimɛ. Á gbɛ̃ke vĩ á tɛ́ kũ a ɔ̃ndɔ̃ kà à a gbɛ̃nɔ yã gɔ̃gɔ̃ńnɛroo? 6Séto á gbɛ̃ do a gbɛ̃dake sísi yãkpatɛa Yesusaridenɔ kĩnaa yá? 7Lákũ á yã vĩ kũ kɔ̃o nà, a zã yãa kɔ̀ mámmam. Bɔ́yãin áni we ò á taki kɛroo? Bɔ́yãin áni tó ò á bleroo? 8Ákɔ̃nɔ adì gbɛ̃ taki kɛ, adì gbɛ̃ ble, bee á kɔ̃ tɛ̃nɛ. 9Á dɔ̃ kũ gbɛ̃ vãninɔ ni gɛ̃ kpata kũ à bò Luda kĩnaa gũnloo? Àsun á zĩda sãtɛro, pãpãkɛrinɔ ke tãnagbagbarinɔ ke zinakɛrinɔ ke gɔ̃gbɛ̃ karuanɔ ke gbɛ̃ kũ òdi wútɛ kũ ń gɔ̃gbɛ̃ dakeonɔ 10ke kpãninɔ ke wãkũdenɔ ke wɛ̃dɛrinɔ ke gbɛ̃yakarinɔ ke gbɛ̃blerinɔ, ń gbɛ̃ke ni gɛ̃ kpata kũ à bò Luda kĩnaa gũnlo. 11Á gbɛ̃kenɔ de lɛmɛ yã, akũ a zú ò, a gɔ̃ Luda pɔ́ ũ, Luda tò yã bò kãáo nna kũ Dikiri Yesu Kirisi tɔ́o kũ ó Luda Nini gbãnao.

Ò pãpãkɛna tó

12Adì pi, á yã sĩnda pínki kɛna zɛ́ vĩmɛ. Ama yãkenɔ àre vĩro. Adì pi, á yã sĩnda pínki kɛna zɛ́ vĩmɛ. Ama àsun tó yãke bà káárɛ á yĩnlo. 13Adì pi dɔ, pɔ́ble bi nɛ̀sɛ pɔ́mɛ, akũsɔ̃ nɛ̀sɛ bi pɔ́ble pɔ́mɛ. Bee kũ abireo Luda ni ń pínki kakatɛ. Mɛ̀ bi pãpãkɛbɔnlo, Dikiri pɔ́mɛ, akũsɔ̃ Dikiri mɛ́ à mɛ̀ɛ pìi gwàri ũ. 14Luda ó Dikiri bò gan, akũsɔ̃ ani ó bo gan kũ a gbãnao. 15Á dɔ̃ kũ á mɛ̀ mɛ́ à Kirisi mɛ̀gunɔ ũroo? Oni Kirisi mɛ̀gu sɛ́ ò kɛ karua mɛ̀gu ũn yá? Oi! 16Á dɔ̃ kũ gbɛ̃ kũ à kàkara kũ karuao kɛ̀ kãao mɛ̀ɛ dokɔ̃nɔ ũnloo? À kɛ̃na Luda yãn ò pì, ń gbɛ̃nɔn pla ni gɔ̃ mɛ̀ do ũ. 17Gbɛ̃ kũ à kàkara kũ Dikirio kɛ̀ kãao mɛ̀n do Nini gũn. 18À kɛ̃kɔ̃a kũ pãpãkɛnaao. Durunna pãnde kũ gbɛ̃ dì kɛ pínki bàka kú kũ a mɛ̀ɛoro. Pãpãkɛri sɔ̃, àdi durunna kɛ a mɛ̀ɛnɛmɛ. 19Á dɔ̃ kũ á mɛ̀ mɛ́ à Nini kũ Luda á gbá, kũ à kú á gũn kpɛ́ ũroo? Ákɔ̃nɔ á á zĩda vĩro, 20Luda á lú, à fĩnaa bò. Abire yãi à Luda tɔ́ bo kũ á mɛ̀ɛo.

Currently Selected:

1 KƆRINTIDENƆ 6: BB2005

Highlight

Copy