1 KƆRINTIDENƆ 16

Pɔlu wɛ̃tɛgɛna sorukɛnaa

1Luda gbɛ̃nɔ kámazakɛnaa yã musu, lákũ ma ò Galatia bùsu sɔsinɔ gbɛ̃nɔnɛ nà, à kɛ lɛ se. 2Azumanɛnna kũ azumanɛnnao á baadi gɔ̃ ɔgɔ kũ à lè a gbãna lɛ́n bo adona, àgɔ̃ kakara de àsun kámaza pì wɛtɛ gɔrɔ kũ ma suro yãi. 3Tó ma su, mani gbɛ̃ kũ a ń dítɛ ò gɛ́nɔ zĩ Yurusalɛmu kũ takadao kũ kámaza kũ a kàkara pìio. 4Tó à kũ̀ mà gɛ́mɛ sɔ̃, oni gɛ́ zɛmɛ.

Yã kũ Pɔlu kpàkpa à kɛnɔ

5Tó ma bɔtɛ kũ Masedonia bùsuuo, mani su á kĩnaa, zaakũ mani pã Masedonialamɛ. 6Matɛn kpákpa mà gɔrɔpla kɛ kãáo. Bee bunsirɛ se manigɔ̃ ye mà ble kãáo, áni gɛ́ zɛmɛnɛ gu kũ mani gɛ́n. 7Tera la má ye mà gɛ̃tɛáwala fàaro, matɛn kpákpa mà gɔrɔpla kɛ kãáo, tó Dikiri wè. 8Mani gɔ̃ Ɛfesu ari Pɛntikɔsi dikpɛ zĩmɛ, 9zaakũ Luda zɛ́ bòmɛnɛ manamana mà zĩ mana kɛ, akũsɔ̃ ma ibɛrɛnɔn dasi.

10Tó Timɔti sù à sù, àsun kɛnɛ búgubugu à vĩna kɛárɛro, zaakũ àtɛn zĩ kɛ Dikirinɛ lán ma bàmɛ. 11Á gbɛ̃ke sún a gya boro. À zàna kɛnɛ de à le à ká ma kĩnaa aafia, zaakũ makũ kũ ma gbɛ̃nɔ ó wɛ́ dɔi.

12Ó gbɛ̃ndo Apolo sɔ̃, madìgɔ̃ nakaraa gɛ̃̀n baaakɔ̃ à su à á gwa kũ ó gbɛ̃ kparanɔ. À ye sunaai gĩaro. Tó à zɛ́ lè, ani su.

Lɛ́dammana kpɛkpɛ

13Àgɔ̃ kú á laakariia, àgɔ̃ zɛna Yesunaanikɛnaa gũn. Àgɔ̃ wɔ́rɔgɔ vĩ, àgɔ̃ gbãna. 14À yã sĩnda pínki kɛ kũ yenyĩo.

15Á Sɛtɛfana bedenɔ dɔ̃, kũ mɔ́kɔ̃nɔ mɛ́ ò Yesude káakunɔ ũ Girisi bùsun, akũ ò ń zĩda kpà ògɔ̃ kpá Luda gbɛ̃nɔi. Ma gbɛ̃nɔ, ma wɛ́ kɛ̀áwa, 16à mì natɛ gbɛ̃ bire takanɔnɛ kũ gbɛ̃ kũ òtɛn kokari kɛ lɛɛlɛ zĩ dokɔ̃nɔ pìi gũnnɔ ń pínki. 17Ma pɔ kɛ̀ nna Sɛtɛfana kũ Fɔtunatuo kũ Akaikuo sunaaa, zaakũ ò gɔ̃̀mɛnɛ á gɛ̃nɛ ũmɛ. 18Ò tò ma laakarii kpàtɛ kũ á pɔ́o. À bɛ̀ɛrɛ lí gbɛ̃ bire takanɔnɛ.

19Asia bùsu sɔsinɔ gbɛ̃nɔ fɔ kpàáwa. Akila kũ Pirisilao kũ sɔsi gbɛ̃ kũ òdi kɔ̃ kakara ń bɛanɔ fɔ kpàáwa manamana Dikiri gũn. 20Ó gbɛ̃ kũ ó lɛɛlɛnɔ fɔ kpàáwa á pínki. À fɔ kpákɔ̃a kũ Luda gbɛ̃nɔ lɛ́pɛmmanaao. 21Makũ Pɔlu, ma ɔgbɛn dí. Ma fɔ kpàáwa. 22Tó gbɛ̃ke ye Dikiriiro, Luda láari boa. Ó Dikiri tɛn su. 23Dikiri Yesu gbɛ̃kɛ kɛárɛ. 24Má yeái á pínki kunna Kirisi Yesu gũn.

Currently Selected:

1 KƆRINTIDENƆ 16: BB2005

Highlight

Copy