2 KƆRINTIDENƆ 1
1
Laakarikpatɛnaa
1Makũ Pɔlu, Kirisi Yesu zĩ̀rii Luda pɔyenyĩnaa gũn kũ ó gbɛ̃ Timɔtio, ókɔ̃nɔ mɛ́ o takada dí kɛ̃̀ sɔsi gbɛ̃ kũ ò kú Kɔrintinɔnɛ kũ Luda gbɛ̃ kũ ò kú Girisi bùsunnɔ ń pínki. 2Luda ó De kũ Dikiri Yesu Kirisio gbɛ̃kɛ kɛárɛ, à á gba aafiaa.
3Ò Luda ó Dikiri Yesu Kirisi De sáabu kpá, De Luda wɛ̃ndadɔ̃nnɛri nɛ̀sɛkpatɛrii pìi. 4Àdi ó laakari kpátɛwɛrɛ ó wɛ́tãmmana sĩnda pínki gũn, de ò le ò gbɛ̃ kũ ò kú bee wɛ́tãmmana kpate taka buri gũnnɔ laakari kpátɛńnɛ se kũ laaakarikpatɛbɔ kũ Luda ó laakarii kpàtɛowɛrɛo. 5Lákũ wari kũ Kirisi kɛ̀ɛ dì liwái nà, lɛmɛ dɔ ó laakarii dì kpátɛ manamana Kirisi yãi. 6Tó ótɛn wari dɔ, á laakarikpatɛna kũ á surabanaao yãimɛ. Tó Luda ó laakarii kpàtɛ, á laakarikpatɛna yãimɛ, de à le à wari dokɔ̃nɔ kũ ótɛn kɛ fɔ̃. 7Ó tãmaa vĩ á yã musu sikaa sari, zaakũ ó dɔ̃ lákũ á bàka kú kũoo warikɛnaa gũn nà, lɛn á bàka kú kũ ó laakarikpatɛnaao lɛ dɔ.
8Ó gbɛ̃nɔ, ó ye àgɔ̃ dɔ̃ lákũ ò ó wɛ́ tã̀ Asia bùsun nà. Ò mɛ̀ɛ ũ̀wá manamana de ó gbãna lɛ́la, bee ó wɛ̃̀ndi ó wɛ́ dɔi sero. 9Yã dàóla, ótɛn da o gamɛ. Abire ó lé, de òsun zɛ kũ ó zĩda gbãnaoro, séde Luda kũ àdi gɛ̀nɔ vu gbãna. 10À ó bó kari zɔ̃kɔ̃ɔ gũn, akũsɔ̃ ani ó bon. Àpiin ó wɛ́ dɔi à ó bon dɔ 11adua kũ átɛn kɛwɛrɛ gãi. Lɛmɛ gbɛ̃nɔ ni sáabu kɛnɛ dasi ó yã musu gbɛ̃kɛ kũ à kɛ̀wɛrɛ yãi gbɛ̃ dasinɔ aduakɛna sabai.
Pɔlu tá gboronaa
12Yã kũ odì a ĩa dãn dí: Ó laasun tɛn owɛrɛ, kũ Luda gbãnao ó kú kũ nɛ̀sɛpurao manafiki sari andunia gũn, atɛ̃nsa á kĩnaa. Andunia ɔ̃ndɔ̃n ó kúoro, séde Luda gbɛ̃kɛ. 13Odì takada ke kɛ̃árɛro, séde a kũ áni a kyó kɛ à dɔ̃ baasiro. 14Lákũ á ó dɔ̃ nà fíti tera, má ye à ó dɔ̃ sãnsãn, de à ĩa dã ó yã musu Dikiri Yesu sugɔrɔ zĩ, lákũ óni dã á yã musu nà.
15-16Yã pì náanikɛnaa gũn ma dìtɛ yã, tó matɛn gɛ́ Masedonia, mà bɔtɛ á kĩnaa mà á gwa káaku, mà ɛra mà su kũ á kĩnaao de à arubarika le gɛ̃̀n pla, gbasa à kpámai ma Yudea gɛnaa gũn. 17Kũ ma tá bire dìtɛ, ma yã futɛ kɛ̀n yá? Tó ma dìtɛ mà yã kɛ, andunia yã dì domɛnɛ arɛ mà pi, ee, ee ke oi, oin yá? 18Lákũ Luda náani vĩ nà, yã kũ o òárɛ bi eemɛ, adi kɛ oinlo. 19Luda Nɛ́ Yesu Kirisi kũ makũ kũ Silasio kũ Timɔtio o a yã waazi kɛ̀árɛ bi gbɛ̃ kũ àdi pi eemɛ, adi kɛ oinlo, àkũmɛ Luda ee ũ. 20Zaakũ lɛ́ kũ Luda gbɛ̃̀ sĩnda pínki yãpura dì kɛ a gũmmɛ. Abire yãi kũ Yesu Kirisi tɔ́o òdi pi, aami, Luda tɔ́bona yãi. 21Luda mɛ́ à ó zĩni pɛ̀tɛ Kirisi gũn kũ ákɔ̃nɔ, à ó dítɛ a pɔ́ ũ, 22à a sèedaa kɛ̀wá, à a Nini dà ó swɛ̃̀n pɔ́ kũ óni le zɛnkpɛkɛ ũ.
23Luda ma nɛ̀sɛ dɔ̃, àkũmɛ ma sèedade ũ. Kũ má ye mà á bobo á dànlo yãin mádi gɛ́ Kɔrinti doro. 24Adi kɛ ótɛn gbãna mɔárɛ á ludanaanikɛnaa musunlo, zaakũ a zĩni pɛ̀tɛ kɔ̀, ótɛn zĩ kɛ kãáo á pɔnna yãimɛ.
Currently Selected:
2 KƆRINTIDENƆ 1: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
