1 KƆRINTIDENƆ 15
15
Kirisi vuna gan
1Ma gbɛ̃nɔ, baaru nna kũ ma kpàárɛ, kũ a sì a zɛon, má ye mà ɛra mà dɔágu. 2Baaru nna pì mɛ́ ani á sura ba, tó á waazi kũ ma kɛ̀árɛ pì kũna. Tó lɛnlo, á Yesunaanikɛnaa kɛ̀ pãmɛ. 3Yã kũ à deńla kũ ma sì, ma dàárɛn dí: Kirisi gà ó durunna yãi, lákũ à kɛ̃na Luda yãn nà. 4Ò a vĩ̀, akũ à fùtɛ a gɔrɔ aakɔ̃de zĩ, lákũ à kɛ̃na Luda yãn nà. 5À a zĩda mɔ̀ Pitanɛ, akũ à a zĩda mɔ̀ a ìba gbɛ̃nɔn kuri awɛɛplanɔnɛ dɔ. 6Abire gbɛra à a zĩda mɔ̀ ó gbɛ̃nɔnɛ kũ ò kɔ̃ kàkara gu dokɔ̃nɔn, ò de gbɛ̃nɔn wàa pla kpɛ́ basɔɔrola. Ń daside kun ari tera, ama ń gbɛ̃kenɔ andunia tò. 7Abire gbɛra à a zĩda mɔ̀ Yamisinɛ, akũ à a zĩda mɔ̀ zĩ̀rinɔnɛ ń pínki. 8Ń pínki gbɛra à bò à sùmai, ma gɔ̃ lán nɛ́ kɔ̃nɔsɛnaa bà. 9Zaakũ Luda zĩ̀rinɔ tɛ́ makũmɛ kpɛ́, mádi ká ò ma sísi zĩ̀riro, zaakũ ma wari dɔ̀ sɔsi gbɛ̃nɔa. 10Gba kũ Luda dàmɛnɛ yãi má de gbɛ̃ kũ má de a ũ ũ, akũsɔ̃ gba kũ à dàmɛnɛ pì ginaro, zaakũ ma kokari kɛ̀ deńla ń pínki. Makũ mɛ́ ma kɛ̀ro, gba kũ Luda dàmɛnɛ mɛ́ à tò ma kɛ̀. 11Tɔ̀, à bò ma kĩnaan yá ke ń kĩnaa, yã kũ ótɛni a waazi kɛ a sìn gwe.
Gɛ̀nɔ vuna gan
12Lákũ ótɛn Kirisi futɛna gan waazi kɛ nà, à kɛ̀ dera á gbɛ̃kenɔ dì o gɛ̀nɔ ni vuroo? 13Tó gɛ̀nɔ ni futɛ ganlo, de Kirisi dí vuro. 14Tó Kirisi dí vuro sɔ̃, de ó waazikɛnaa kɛ̀ pã, akũsɔ̃ á Kirisi náanikɛnaa kɛ̀ pã, 15o gɔ̃ Luda sèedade ɛ́kɛdenɔ ũ, kũ o ò à Kirisi vù yãi. Zaakũ tó gɛ̀nɔ dì vuro, de Luda dí a vuro. 16Tó Luda dì gɛ̀nɔ vuro, de Kirisi dí vuro. 17Tó Kirisi dí vuro, á Kirisi náanikɛna àre vĩro, akũ á kú á durunna gũn ari tera, 18gbɛ̃ kũ ò andunia tò Kirisi gũnnɔ sɔ̃, ò sã̀tɛ. 19Tó ó kunna kũ wɛ̃̀ndiio dí yãin ó wɛ́ dɔ Kirisii ado, de wɛ̃ndadenɔn ó ũ de gbɛ̃ sĩnda pínkila.
20Yãpura gũn Kirisi fùtɛ bona gan, àkũ mɛ́ à gàavu káaku ũ gbɛ̃ kũ ò wùtɛ ò i ònɔ tɛ́. 21Lákũ ga bò bisãsiri gãi nà, lɛn gɛ̀nɔ vunaa bò bisãsiri gãi lɛ. 22Kunna Adamu buri ũ tò ga dà gbɛ̃ sĩnda pínkila. Lɛmɛ dɔ gbɛ̃ kũ ò kú Kirisi gũnnɔ ni wɛ̃̀ndi le ń pínki. 23Baadi kũ a gɔrɔomɛ. Kirisi mɛ́ à gàavu káaku ũ, a gbɛra a gbɛ̃nɔ ni vu a sugɔrɔa. 24Gbasa gɔrɔ lɛ́ ká, Kirisi ni kíkɛ mì dɛ pínki kũ dokanɔ kũ gbãnanɔ, ani a kpata tó De Ludanɛ. 25Séde Kirisi gɔ̃ kí ble ari Luda gɔ̃ a ibɛrɛnɔ kɛ a tìntin ũ. 26Ibɛrɛ kũ ani a kakatɛ kpɛkpɛmɛ ga ũ, 27zaakũ Luda pɔ́ sĩnda pínki nà Kirisinɛ a ɔĩ. Kũ à pì, pɔ́ sĩnda pínki kú a ɔĩ, ó dɔ̃ kũ Luda kũ à pɔ́ sĩnda pínki nànɛ a ɔĩ pìi baasimɛ. 28Tó à pɔ́ sĩnda pínki nànɛ a ɔĩ, àpii Nɛ́ kũ à pɔ́ sĩnda pínki nànɛ a ɔĩ pì ni mì natɛnɛ, Luda pì nigɔ̃ de a pínki ũ pɔ́ sĩnda pínkinɛ.
29Gbɛ̃ kũ òdi da'itɛ kɛ gɛ̀nɔ gɛ̃nɛ ũ sɔ̃ bi? Tó gɛ̀nɔ dì vu yãpuraro, bɔ́yãi òdi da'itɛ kɛ ń gɛ̃nɛ ũu? 30Ókɔ̃nɔ sɔ̃, bɔ́yãi odìgɔ̃ ó zĩda da kari gũn gɔrɔ sĩnda pínkii? 31Kũ ĩa kũ madì dã á yã musu kunna Kirisi Yesu ó Dikiri gũnwo, madìgɔ̃ kú ga lɛ́imɛ lákũ gu dí dɔ nà. 32Tó ma zĩda yãin ma ɔsi kài kũ nɔ̀bɔ pãsĩnɔ zaa Ɛfesu, bɔ́ àreen à vĩmɛnɛɛ? Tó gɛ̀nɔ ni vuro,
ò pɔ́ ble, ò í mi,
zaakũ óni ga ziamɛ.
33Àsun tó ò á sãtɛro, gbɛ̃nna vãni dì dà mana yakamɛ. 34À su á laakariia súsu, àsun durunna kɛ doro, zaakũ á gbɛ̃kenɔ Luda dɔ̃ro. Ma abirekũ ò de à á wé'iyã dɔ̃ yãimɛ.
Gàavunɔ mɛ̀ɛ
35Gbɛ̃kenɔ ni pi, gɛ̀nɔ ni vu deramɛɛ? Mɛ̀ kpate takan onigɔ̃ vĩi? 36Yɔ̃nkɔ yãmɛ! Odì pɔ́ tɔ̃ à bɔ̀tɛ fɔ̃̀mbabonaa sariro. 37Tó ò pɔ́ tɔ̃̀, gbadon yoo ke pɔ́wɛ pãnde, àdi butɛ pɔ́wɛ pì ũro. 38Luda dì tó à butɛ lákũ à dìtɛ nàmɛ, baadi kũ a burio. 39Pɔ́ wɛ̃̀ndidenɔ pínki mɛ̀ dokɔ̃nɔro. Bisãsiri pɔ́ ado, nɔ̀bɔnɔ pɔ́ ado, bãnɔ pɔ́ ado, kpɔ̀nɔ pɔ́ ado. 40Ludambɛ pɔ́nɔn kun, andunia pɔ́nɔn kun. Ludambɛ pɔ́nɔ gakuri ado, andunia pɔ́nɔ gakuri ado. 41Ifãntɛ̃ gakuri ado, mɔvura pɔ́ ado, susunɛnɔ pɔ́ ado. Bee susunɛ pìnɔ ń gakuri adonadona kɔ̃omɛ.
42Lɛn anigɔ̃ de lɛ gɛ̀nɔ vuna gɔrɔ zĩ. Òdi gɛ̀ vĩ à vã, ani vu vãnaa sari. 43Òdi gɛ̀ vĩ bɛ̀ɛrɛɛ sari, ani vu kũ gakurio. Òdi gɛ̀ vĩ gbãna sari, ani vu kũ gbãnao. 44Òdi gɛ̀ vĩ kũ andunia mɛ̀ɛo, ani vu kũ wɛ̃̀ndi kũ àdi lákaro mɛ̀ɛo. Lákũ andunia mɛ̀ kun nà, lɛmɛ wɛ̃̀ndi kũ àdi lákaro mɛ̀ kun lɛ dɔ. 45À kɛ̃na Luda yãn ò pì, gbɛ̃ káaku Adamu gɔ̃̀ gbɛ̃ bɛ̃nɛ ũ, ama Adamu kpɛde gɔ̃̀ Nini wɛ̃̀ndikpammari ũ. 46Adi kɛ wɛ̃̀ndi kũ àdi lákaro mɛ̀ mɛ́ àdi do arɛro, andunia mɛ̀ mɛ́ àdi do arɛ, a gbɛra sà wɛ̃̀ndi kũ àdi lákaro mɛ̀ɛ. 47Bisãsiri káaku bò bùsutiti gũmmɛ, a plade bò ludambɛmɛ. 48Gbɛ̃ kũ ò de zĩtɛ pɔ́ ũnɔ bòkɔ̃a kũ gbɛ̃ kũ à bò zĩtɛnwo. Gbɛ̃ kũ ò de ludambɛ pɔ́ ũnɔ bòkɔ̃a kũ gbɛ̃ kũ à bò ludambɛo. 49Lákũ ó de gbɛ̃ kũ à bò zĩtɛn taka ũ nà, lɛn ónigɔ̃ de gbɛ̃ kũ à bò ludambɛ taka ũ lɛ se.
50Yã kũ ma òon dí ma gbɛ̃nɔ. Tó kpata kũ à bò Luda kĩnaa bò gupuraa, óni le ò ble kũ ó mɛ̀ɛoro. Óni le ògɔ̃ kú gu kũ àdi vãro gũn kũ ó mɛ̀ kũ àdi vãoro. 51À ma, mani asiriyã oárɛ. Óni ga ó pínkiro, ama óni li ó pínki 52kãnto lán wɛ́'ipakɛnaa bà kãkãki kpɛde pɛna zĩ. Zaakũ kãkãki ni ũ bo, gɛ̀nɔ ni vu vãnaa sari, ókɔ̃nɔ sɔ̃ óni li. 53Séde ó mɛ̀ kũ àdi vã dí gɛ̃ a kũ àdi vãro gũn. Séde ó mɛ̀ kũ àdi ga dí gɛ̃ a kũ àdi garo gũn. 54Tó ó mɛ̀ kũ àdi vã gɛ̃̀ a kũ àdi vãro gũn, akũsɔ̃ ó mɛ̀ kũ àdi ga gɛ̃̀ a kũ àdi garo gũn, akũ yã kũ à kɛ̃na Luda yãn dí ni papa ò pì:
Ò zĩ̀i blè gaa, à mìi dɛ̀.
55Ga, n zĩ̀blena tɔ́n deraa?
Ga, n sɛwɛ kú mámɛɛ?
56Durunna mɛ́ à ga sɛwɛ ũ, durunna gbãna sɔ̃ àdi bo doka gũmmɛ. 57Ò Luda sáabu kɛ, kũ àdi tó ò zĩ̀ ble ó Dikiri Yesu Kirisi gãi. 58Abire yãi ma gbɛ̃ yenyĩdenɔ, à zɛ gbãna gíngin bona kũ kpɛo sari. À wɛ́ tã Dikiri zĩa gɔrɔ sĩnda pínki, zaakũ á dɔ̃ kũ zĩ kũ átɛn kɛ Dikirinɛ pãro.
Currently Selected:
1 KƆRINTIDENƆ 15: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
