1 KƆRINTIDENƆ 14

Yãkeburi'ona kũ annabikɛyã'onaao

1À tó yenyĩ doárɛ arɛ, à wɛ́ pɛ́ Luda Nini gbanɔa, atɛ̃nsa annabikɛyã'onaa. 2Gbɛ̃ kũ àtɛn yãke buri o tɛn yã o kũ gbɛ̃nɔonlo, sé Luda, zaakũ gbɛ̃ke tɛn maro, àtɛn asiriyã o kũ Luda Nini gbãnaomɛ. 3Gbɛ̃ kũ àtɛn annabikɛyã o tɛn yã o kũ gbɛ̃nɔomɛ, àtɛni ń gba gbãna, àtɛn lɛ́ daḿmamɛ, àtɛni ń nɛ̀sɛ kpátɛńnɛmɛ. 4Gbɛ̃ kũ àtɛn yãke buri o tɛni a zĩda karamɛ, gbɛ̃ kũ àtɛn annabikɛyã o tɛn sɔsi gbɛ̃nɔ karamɛ. 5Má ye à yãke buri o á pínki, ama má ye à annabikɛyã o de abirekũla. Annabikɛyã'ori de yãkeburi'orila, séto òtɛn bɔkɔtɛ de sɔsi gbɛ̃nɔ le ò kara.

6Ma gbɛ̃nɔ, tó ma suái, akũ ma yãke buri ò kãáo, bɔ́ àreen à vĩárɛɛ? Séde ma yã'ona gɔ̃ de yãwɛwɛ̃na ũ ke dɔ̃na ke annabikɛyã'ona ke yãdannɛnaa. 7Lɛn à de lɛ kũ pɔ́'ɔborinɔ dɔ. Úra ke mɔrɔɔ, tó àtɛn ũ bo súsuro, oni le ò dɔ̃ deran àtɛn o nà yá? 8Tó kãkãki ũ dí bo súsuro, sozanɔ ni zĩ̀ soru kɛro. 9Lɛmɛ ákɔ̃nɔ se, tó átɛn yãke buri o, akũ òtɛn maro, deran oni yã kũ átɛn o gbá dɔ̃ nàa? Á yã ni gɛ̃ ĩamɛ. 10Yãnɔ buri dasi andunia gũn, ń ke bɔkɔtɛnaa sariro. 11Tó òtɛn buri kũ madì a yã maro o, manigɔ̃ de a òriinɛ gbɛ̃ zĩ̀tɔ ũmɛ, akũsɔ̃ anigɔ̃ demɛnɛ gbɛ̃ zĩ̀tɔ ũ se. 12Lɛmɛ ákɔ̃nɔ sɔ̃, lákũ á kokari vĩ kũ Luda Nini gbanɔ nà, à kokari kɛ àgɔ̃ gɛ́o arɛ, de sɔsidenɔ le ò kara.

13Abire yãi yãkeburi'ori wɛ́ kɛ de à le à yã kũ àtɛn o bɔkɔtɛ. 14Tó ma adua kɛ̀ kũ yãke burio, ma nini mɛ́ à kɛ̀, ma laasun dí domɛnɛ arɛro. 15Tɔ̀, yã pì de deramɛɛ? Mani adua kɛ kũ ninio, mani kɛ kũ laakariio dɔ. Mani lɛ̀ sí kũ ninio, mani sí kũ laakariio dɔ. 16Tó n Luda tɔ́ nna sì kũ ninio, deran gbɛ̃ dufu kũ à kú gwe ni pi, aami, sáabu kũ n kpà yã musuu? Zaakũ adi yã kũ n òo dɔ̀rɔ dɔ̃ro. 17Bee tó n sáabu kpà a zɛ́a, adi n Yesude dake gbãna kararo. 18Ma Luda sáabu kɛ̀, kũ madì yãke buri o deála á pínki, 19ama kɔ̃kakaranaa gũn tó ma yã mɛ̀n sɔɔro ò kũ laakariio, ma yã dàońnɛ, à manamɛnɛ de mà yã mɛ̀n ũgbangba o kũ yãke buriola.

20Ma gbɛ̃nɔ, á laasun súngɔ̃ de lán nɛ́nɔ pɔ́ bàro. Àgɔ̃ de lán nɛ́ fítinɔ bà yãvãnikɛnaa musu, ama á laasun gɔ̃ de gbɛ̃ ɔ̃ndɔ̃nanɔ pɔ́ ũ. 21À kɛ̃na Luda yãn ò pì:

Mani buriyã pãnde o gbɛ̃ díkĩnanɔnɛ gbɛ̃ zĩ̀tɔnɔ lɛ́n,

bee kũ abireo oni sã kpá ma yãiro.

22Abire yãi yãkeburi'ona de sèeda ũ Yesu náanikɛrinɔnɛro, sé Yesu náanikɛrisarinɔ. Lɛn dɔ annabikɛyã'ona dí kɛ Yesu náanikɛrisarinɔ pɔ́ke ũro, sé Yesu náanikɛrinɔ. 23Tó sɔsi gbɛ̃nɔ kɔ̃ kàkara ń pínki, akũ òtɛn yãke buri o ń pínki, tó gbɛ̃ dufunɔ ke Yesusaridenɔ sù gwe, oni pi ĩa kàḿmanloo? 24Tó gbɛ̃ sĩnda pínki tɛn annabikɛyã o sɔ̃, akũ Yesusaride ke gbɛ̃ dufu sù gwe, ani ń pínki yãzɛ dɔ̃ à a taari e, 25asiriyã kũ à kú a nɛ̀sɛn ni bo gupuraa, ani wútɛ a gbɛrɛa à mì natɛ Ludanɛ, gbasa à pi Luda kú á tɛ́ yãpura.

Donyĩkɛna zɛ́

26Óni pi deramɛɛ ma gbɛ̃nɔ? Tó a kɔ̃ kàkara, á baadi gɔ̃ lɛ̀ vĩ ke yãdannɛna ke yãwɛwɛ̃na ke yãkeburi'ona ke yãke buri pì bɔkɔtɛnaa. À a pínki kɛ, de gbɛ̃nɔ le ò kara. 27Tó òtɛn yãke buri o, gbɛ̃nɔn pla ke aakɔ̃, àsun de abirekũlaro. Ò kɔ̃ gba zɛ́, gbɛ̃ mɛ̀n do bɔkɔtɛ. 28Tó a bɔkɔtɛri kunlo, à lɛ́ nakɔ̃a kɔ̃kakaranaa gũn, à a pɔ́ o ado kũ Ludao. 29Annabikɛyã'orinɔ gbɛ̃nɔn pla ke aakɔ̃nɔ yã o, gbɛ̃ kparanɔ laasun lɛ́ ń yãa. 30Tó Luda yã sù gbɛ̃ kũ à vutɛnaa, gbɛ̃ kũ àtɛn yã o yĩtɛ. 31Á pínki áni fɔ̃ à annabikɛyã o dodo, à yã dadakɔ̃nɛ á pínki, à kɔ̃ kara. 32Sé annabikɛyã'orinɔ gɔ̃ ń lɛ́ kũna dɔ̃, 33zaakũ Luda ye yã yàaairo, sé a zɛ́de.

Lákũ sɔsi gbɛ̃nɔ dì kɛ wɛ̃tɛ kũ wɛ̃tɛo nà pínki, 34nɔgbɛ̃nɔ gɔ̃ yĩtɛna kɔ̃kakaranaa gũn, zaakũ ò yã'ona zɛ́ vĩro. Ò mì natɛ, lákũ ò ò Musa doka gũn nà. 35Tó ò ye ò yãke dɔ̃, ò ń zã gbɛkai bɛ, zaakũ nɔgbɛ̃ yã'ona kɔ̃kakaranaa gũn bi wé'iyãmɛ. 36Á kĩnaan Luda yã bòn yá? Ke á mɛ̀n do yãin à sùu?

37Tó gbɛ̃ tɛn da annabikɛyã'oriin a ũ ke gbɛ̃ kũ Luda Nini donɛ arɛ, àgɔ̃ dɔ̃ kũ yã kũ ma kɛ̃̀árɛ pì bi Dikiri yãditɛnaamɛ. 38Tó gbɛ̃ pã kpà adii, oni pã kpái se. 39Abire yãi ma gbɛ̃nɔ, à wɛ́ pɛ́ annabikɛyã'onaaa, ama àsun gí yãkeburi'onaairo. 40À yã sĩnda pínki kɛ a zɛ́a súsu.

Currently Selected:

1 KƆRINTIDENƆ 14: BB2005

Highlight

Copy