1 KƆRINTIDENƆ 10

Laakarikɛna tãnagbagbanaai

1Ma gbɛ̃nɔ, má ye ó dizinɔ yã díkĩna dɔágu. Ò tɛ̀ tɛ́lukui ń pínki, ò táa ò ò bɔ̀tɛ Isira Tɛ̃ran ń pínki. 2Luda ń da'itɛ kɛ̀ tɛ́luku pìi gũn kũ ísira pìio ń pínki Musa ìbanɔ ũ. 3Ò Luda pɔ́ble dokɔ̃nɔ blè ń pínki, 4ò Luda í dokɔ̃nɔ mì ń pínki, zaakũ ò Luda kpi kũ à kú kũńwo í mì. Kpi pì sɔ̃ mɛ́ à Kirisi ũ. 5Bee kũ abireo ń daside yã dí ká Ludaguro, akũ ń gɛ̀ɛ gɔ̃̀ kpátɛ gbárannan. 6Yã pì dewɛrɛ sèeda ũ, de òsun yã vãni ni dɛ, lákũ ò a ni dɛ̀ nàro. 7Àsungɔ̃ de tãnagbagbarinɔ ũ lán ń gbɛ̃kenɔ bàro. À kɛ̃na Luda yãn ò pì: Gbɛ̃nɔ vùtɛ òtɛn pɔ́ ble, òtɛn í mi, akũ ò fùtɛ òtɛn pãpã kɛ. 8Òsungɔ̃ de pãpãkɛrinɔ ũ lán ń gbɛ̃kenɔ bàro. Ò pãpã kɛ̀, akũ ò gàga gɔrɔ dokɔ̃nɔ zĩ gbɛ̃nɔn dúbu baro awɛɛ'aakɔ̃. 9Òsun Dikiri lɛ́ ò gwa lán ń gbɛ̃kenɔ bàro. Ò a lɛ̀ ò gwà, akũ mlɛ̃̀nɔ ń sóso ò gàga. 10Àsun yãkete ká lán ń gbɛ̃kenɔ bàro. Ò yãkete kà, akũ ga malaika ń dɛdɛ.

11Yã pì ń lé sèeda ũ ókɔ̃nɔ kũ ó kú gɔrɔ kpɛdenɔaanɛ, akũ ò kɛ̃̀ takadan de ò ó gbao laakari yãi. 12Gbɛ̃ kũ àtɛn da á zɛna gbãna, à laakari kɛ lɛtɛnaai. 13Yɔ̃ogwana ke dí á léro, séde kũ àdi gbɛ̃ sĩnda pínki le baasiro. Luda náani vĩ, ani tó ò á yɔ̃ ò gwa de á gbãna lɛ́laro. Yɔ̃ogwanaa gũn ani á gba zɛ́ à mɛna fɔ̃ à bon.

14Abire yãi ma gbɛ̃ yenyĩdenɔ, à mì kɛ̃ tãnagbagbanaaa. 15Matɛn yã oárɛ laakaridenɔ ũ. À yã kũ matɛn oárɛ laasun lɛ́ á zĩda à gwa. 16Toko arubarikade kũ odì sáabu kpáoo, tó o mì, ó bàka kú kũ Kirisi aruoroo? Burodi kũ odì lílikɔ̃rɛ, tó o sò, ó bàka kú kũ Kirisi mɛ̀ɛoroo? 17Zaakũ burodi mɛ̀n domɛ, bee kũ ó dasikɛo ó mɛ̀ dokɔ̃nɔmɛ, ó baadi a baka vĩ burodi dokɔ̃nɔ pìi gũmmɛ. 18À gwa Isarailanɔa. Gbɛ̃ kũ à sa'opɔ blè bàka kú kũ Luda gbagbakioroo? 19Ma ò deramɛɛ? Matɛn o tãna sa'opɔble bi pɔ́ken yá? Ke ń tãnanɔ bi pɔ́ken yá? 20Lɛnlo, ma pì pɔ́ kũ ò sa òo, ò ò tãnaamɛ, adi kɛ Ludaanlo. Má ye á bàka gɔ̃ kú kũ tãnaoro. 21Áni fɔ̃ à Dikiri toko í mi kũ tãna pɔ́oro. Áni fɔ̃ à Dikiri pɔ́ ble kũ tãna pɔ́oro. 22Ke ó ye ò Dikiri nɛ̀sɛgɔ̃ba futɛmɛɛ? Ó gbãna kà a ũn yá?

23Òdi pi, yã sĩnda pínki zɛ́ vĩ. Lɛmɛ, ama yã sĩnda pínki àre vĩro. Òdi pi, yã sĩnda pínki zɛ́ vĩ. Lɛmɛ, ama yã sĩnda pínki karana vĩro. 24Gbɛ̃ke zĩda yã sún donɛ arɛro, sé a gbɛ̃dake yã. 25À nɔ̀bɔ kũ òtɛn yía ɛtɛn só yãke gbɛkanaa sari á laasun yãi, 26zaakũ zĩtɛ kũ pɔ́ kũ ò kúanɔ pínki bi Dikiri pɔ́mɛ. 27Tó Yesusaride á sísi pɔ́blea, tó à kɛ̀árɛ, tó a gɛ, à pɔ́ kũ ò kpàáwa ble yãke gbɛkanaa sari á laasun yãi. 28Tó ò sù ò òárɛ sa'opɔblemɛ, àsun blero laasun yãi kũ gbɛ̃ kũ à òárɛ yãio. 29Matɛn abirekũ o ade laasun yãimɛ, adi kɛ á pɔ́nlo.

Gbɛ̃ pãnde laasun yãin manigɔ̃ ma zĩda vĩro yá? 30Tó ma pɔ́ blè kũ sáabukɛnaao, bɔ́yãin òdi ma vãni bo pɔ́ kũ ma sáabu kɛ̀ɛii pì yã musuu? 31Yã kũ átɛn kɛ pínki, átɛn pɔ́ blen yá, átɛn í min yá, àgɔ̃ a pínki kɛ Luda tɔ́bona yãi. 32Àsun tó Yudanɔ ke Girikinɔ ke Luda sɔsi gbɛ̃nɔ fu á yãkɛna yãiro. 33Lɛn madì kɛ lɛ. Yã sĩnda pínki gũn madì kokari kɛ, de ma yã ká gbɛ̃ sĩnda pínkigumɛ. Madì ma zĩda pɔnna wɛtɛro, sé pari pɔ́, de ò le ò bo yãi.

Currently Selected:

1 KƆRINTIDENƆ 10: BB2005

Highlight

Copy