1 KƆRINTIDENƆ 11

1Àgɔ̃ ma yãkɛnaa dada, lákũ madì Kirisi pɔ́ dada nà.

Nɔgbɛ̃nɔ pɔ́kuna ń mìia yã

2Ma á sáabu kpà kũ ma yã dìgɔ̃ dɔágu yã sĩnda pínki gũn, akũsɔ̃ á kɛ̀otokɔ̃nɛ kũ ma dàárɛnɔ kũna. 3Má ye àgɔ̃ dɔ̃ kũ Kirisi mɛ́ à gɔ̃gbɛ̃ sĩnda pínki mì ũ, gɔ̃gbɛ̃ mɛ́ à nɔgbɛ̃ mì ũ, akũsɔ̃ Luda mɛ́ à Kirisi mì ũ. 4Gɔ̃gbɛ̃ kũ àtɛn adua kɛ ke àtɛn annabikɛyã o kũ pɔ́o kuna a mìia tɛni a mì kpe bomɛ. 5Nɔgbɛ̃ kũ àtɛn adua kɛ ke àtɛn annabikɛyã o mìgbã tɛni a mì kpe bomɛ, à de lákũ à mì kpárankparan bàmɛ. 6Tó nɔgbɛ̃ dí pɔ́ kú a mìiaro, à a mìkã kɛ̃rɛ. Lákũ mìkãkɛ̃rɛna ke mìbona de nɔgbɛ̃nɛ wé'iyã ũ nà, à pɔ́ kú a mìia. 7Adi kũ gɔ̃gbɛ̃ pɔ́ kú a mìiaro, kũ à de Luda taka kũ a gakurio ũ yãi. Nɔgbɛ̃ sɔ̃, àkũmɛ gɔ̃gbɛ̃ gakuri ũ. 8Zaakũ Luda dí gɔ̃gbɛ̃ bo nɔgbɛ̃ gũnlo, nɔgbɛ̃n à bò gɔ̃gbɛ̃ gũn. 9Adi gɔ̃gbɛ̃ kɛ nɔgbɛ̃ yãiro, nɔgbɛ̃n à kɛ̀ gɔ̃gbɛ̃ yãi. 10Abire yãi kũ malaikanɔ yão dɔ, séde nɔgbɛ̃ gɔ̃ pɔ́ kú a mìia a zã doka sèeda ũ. 11Dikiri gũn nɔgbɛ̃ kun a zĩdanɛ gɔ̃gbɛ̃ sariro, gɔ̃gbɛ̃ sɔ̃, à kun a zĩdanɛ nɔgbɛ̃ sariro. 12Lákũ nɔgbɛ̃ bò gɔ̃gbɛ̃ gũn nà, lɛn dɔ gɔ̃gbɛ̃ dì bo nɔgbɛ̃ gũn lɛ, akũsɔ̃ pɔ́ sĩnda pínki dì bo Luda kĩnaamɛ.

13À yã pìi laasun lɛ́ à gwa. Nɔgbɛ̃ aduakɛna mìgbã mana yá? 14Á dɔ̃ á zĩdanɛ kũ mìkã gbã̀na de gɔ̃gbɛ̃nɛ wé'iyã ũroo? 15Ama tó nɔgbɛ̃ vĩ, à denɛ gakuri ũmɛ, zaakũ Luda nɔgbɛ̃ gbà mìkã à daalamɛ. 16Tó gbɛ̃ke ye à lɛ́kpakɔ̃a kɛ, àgɔ̃ dɔ̃ kũ ókɔ̃nɔ kũ Luda sɔsi gbɛ̃nɔ, ó yã pãnde kũnaro, sé abirekũ.

Dikiri pɔ́ble

(Mat 26:26-29; Maa 14:22-25; Luk 22:14-20)

17Yã kũ má ye mà daárɛ tera gũn, mani á sáabu kpáro, zaakũ á kɔ̃kakaranaa dì vãni iárɛ de a manala. 18Káaku gĩa ma mà, tó a kɔ̃ kàkara, adì bo kɔ̃ kpɛ gã̀ kũ gã̀aomɛ. Ma yã pìi sì kpado. 19Séde kɛ̃kɛ̃kɔ̃ana gɔ̃ kú á tɛ́, de ò yãpuradenɔ dɔ̃ á tɛ́. 20Tó a kɔ̃ kàkara, adi kɛ Dikiri pɔ́blen adì blero, 21zaakũ á baadi dì wã a pɔ́bleimɛ. Nàa dì gbɛ̃kenɔ dɛ, wɛ̃ dì gbɛ̃kenɔ dɛ. 22Á bɛ vĩ à pɔ́ ble, à í minloo? Ke adì Luda sɔsi gbɛ̃nɔ gya bo à wé'i da pɔ́saridenɔamɛ? Mani oárɛ deramɛɛ? Mani á sáabu kpán yá? Kài! Mani á sáabu kpá yã bire musuro.

23Yã kũ ma sì Dikiri kĩnaa, ma dàárɛn dí: Zĩ kũ ò Dikiri Yesu kpàḿma, a gwãani pìia à burodii sɛ̀, 24akũ à aubarika dàn, à lìlikɔ̃rɛ, akũ à pì, a mɛ̀ kũ áni kpá á yãin dí, àgɔ̃ abirekũ kɛ a yã dɔnaágu yãi. 25Lɛmɛ dɔ kũ ò pɔ́ blè ò làka, à toko sɛ̀ à pì, Luda bàka kunna kũ gbɛ̃nɔ dufu a aru gãin dí. Tó átɛn mi, àgɔ̃ mi a yã dɔnaágu yãi. 26Zaakũ tó a burodii pìi sò, tó a í pìi mì, átɛn Dikiri ga baaru kpá ari àgɔ̃ gɛ́ sumɛ.

27Abire yãi tó gbɛ̃ burodii pìi sò, tó à Dikiri í pìi mì, burodi kũ í pìio yãdanaa sari, à taari kɛ̀ Dikirinɛ a mɛ̀ kũ a aruo yã musumɛ. 28Baadi a zĩda yã gwa, gbasa à burodii pì só, à í pì mi, 29zaakũ tó gbɛ̃ sò, tó à mì Dikiri mɛ̀ dɔ̃naa sari, à yã dà a zĩdalamɛ. 30Abire yãi gyãrenɔ kũ aafiasaridenɔ kɛ̀ dasi á tɛ́, akũsɔ̃ gbɛ̃ kũ ò kɛ̀ sarinɔn kĩanaro. 31Tó óni ó zĩda yã gwa, Dikiri ni ó taari lero. 32Tó à ó taari è, àtɛni ó totomɛ, de yã sún daóla kũ anduniaoro yãi. 33Abire yãi ma gbɛ̃nɔ, tó a kɔ̃ kàkara, átɛn Dikiri pɔ́ ble, àgɔ̃ kɔ̃ dã. 34Tó nà tɛn gbɛ̃ dɛ, à pɔ́ ble a bɛa, de á kɔ̃kakarana sún yã iárɛro yãi. Mani yã kũ gɔ̃̀nɔ bɔkɔtɛárɛ, tó ma su.

Currently Selected:

1 KƆRINTIDENƆ 11: BB2005

Highlight

Copy