1 KƆRINTIDENƆ 9

Zĩ̀rinɔ ń zĩda busana Kirisi baaru nna yãi

1Má a zĩda vĩnloo? Zĩ̀riin ma ũroo? Mádi wɛ́ si ó Dikiri Yesu lɛ́roo? Ákɔ̃nɔmɛ á de ma zĩ gbɛ̀ ũ Dikiri gũn fá? 2Bee tó má de zĩ̀ri ũ gbɛ̃ pãndenɔnɛro, má deárɛ a ũ fá. Kunna Dikiri gũn ma kunna zĩ̀ri ũ sèedaan á ũ.

3Yã kũ madì o ma vãniborinɔnɛn dí: 4Má pɔ́blena kũ pɔ́minaao zɛ́ vĩ ma zĩ gũnloo? 5Má a zɛ́ vĩ màgɔ̃ tɛ́ kũ nɔ Yesudeo gu kũ matɛn gɛ́n lán zĩ̀ri kparanɔ kũ Dikiri dakũnanɔ kũ Pitao bàroo? 6Makũ kũ Baanabao ó gbɛ̃nɔn pla, ókɔ̃nɔ ó zɛ́ vĩ ò ó ɔzĩ tónloo? 7Dí mɛ́ àdi soza ble kũ a zĩda bɔ̀kɔ ɔgɔoo? Dí mɛ́ àdi lí ba, akũ àdi a nɛ́ bleroo? Dí mɛ́ àdigɔ̃ zù dã, akũ àdi a vĩ miroo?

8Bee kũ bisãsiri yãkɛnanɔn ma lɛ̀kɔ̃aárɛ, à kú Musa doka gũn lɛroo? 9À kɛ̃na Musa doka takadan ò pì, àsun lɛ́sɔ da zùunɛ gɔrɔ kũ àtɛn pɔ́wɛ gbɛ̃ro. Zùun Luda dì laakari dɔa yá? 10Ó yãi à yã pìi òroo? Ee, ó yãin ò yã pìi kɛ̃̀, de búbari gɔ̃ sɛ̃̀ wa kũ tãmaaao, pɔ́wɛgbɛ̃ri gɔ̃ pɔ́ gbɛ̃ kũ tãmaaao, de à a baka le a gũn. 11Tó o Luda yã tɔ̃̀ á tɛ́, akũ o ó bakaa lèáwa, yãken yá? 12Tó dakenɔ zɛ́ bire vĩáwa, óni ó pɔ́ o dɔ yá? Ódi sɛ́tɛ zɛ́ bire gũnlo, o yã sĩnda pínki fɔ̃̀, de òsun zɛ́ zɔ̃ Kirisi baaru nnanɛro yãi. 13Á dɔ̃ kũ Luda ɔn zĩkɛrinɔ dì Luda ɔn pɔ́ bleroo? Luda gbagbaki sa'orinɔ dì ń baka le gbagbaki pìi gũnloo? 14Lɛn Dikiri dìtɛ a baarunnakparinɔ gɔ̃ pɔ́ ble baaruu pì kpana yã musu lɛ. 15Bee kũ abireo mádi zɛ́ pìnɔ ke sɛ́ro, akũsɔ̃ mádi abirekũ o de ò kɛmɛnɛ yãinlo. Ga manamɛnɛ de abirekũla. Gbɛ̃ke ni le à kpá ma ĩadãna dínɛro. 16Kirisi baarunnakpana demɛnɛ ĩadãna yã ũro, tilasi mɛ́ à gbá dìma. Waiyoo makũ, tó matɛn baaru nna pì kpáro. 17Tó matɛn zĩ pì kɛ kũ ma zĩda pɔyeinaaomɛ, mani wɛ́ dɔ ma bakaaimɛ. Lákũ Luda mɛ́ à nàmɛnɛ ma ɔĩ nà, à kɔ̃ sì kũmao mà kɛ. 18Bɔ́mɛ ma àre ũu? Tó ma baaru nna pìi kpà ɔsãsãnaa sari, tó mádi doka kũ má vĩ baaru nna pì kpanaa gũn kɛḿmaro, ma àreen gwe.

19Bee kũ gbɛ̃ke ma vĩro, ma a zĩda dìtɛ zɔ̀ ũ gbɛ̃ pínkinɛ, de mà gbɛ̃nɔ le dasi yãi. 20Kũ má kú kũ Yudanɔ, ma gɔ̃ lán ń bà, de ò ma yãzɛ e yãi. Kũ má kú kũ Musa dokadarinɔ, ma gɔ̃ a dàri ũ, bee kũ à iko vĩmaro, de a yã dàrinɔ ma yãzɛ e yãimɛ. 21Kũ má kú kũ dokadarisarinɔ, ma gɔ̃ lán ń bà, de ò ma yãzɛ e yãi. Adi kɛ ma bo Luda doka zɛ́nnlo, Kirisi mɛ́ à iko vĩma. 22Kũ má kú kũ gbɛ̃ busananɔ, ma busa, de ò ma yãzɛ e yãi. Madì gɔ̃ pɔ́ sĩnda pínki ũ gbɛ̃ sĩnda pínkinɛ, bee dera, de mà le mà ń gbɛ̃kenɔ sura ba. 23Yã kũ madì kɛ pínki, madì kɛ Kirisi baaru nna yãimɛ, de mà a baka le a arubarikaa gũn.

24Bàkpakũsũnaa gũn, gbɛ̃ sĩnda pínki mɛ́ àdi bàa lɛ́, ama á dɔ̃ kũ gbɛ̃ mɛ̀n do mɛ́ àdi bleroo? À bàa lɛ́ lɛ se, à le à ble. 25Kɔ̃kɔ̃'ori sĩnda pínki dì a zĩda tùtu kɛ, àdi a zĩda foru kɛ yã sĩnda pínki musu. Àdi kɛ lɛ fùra kũ àdi yaka lena yãi. Ókɔ̃nɔ sɔ̃, a pɔ́ kũ àdi yakaro yãimɛ. 26Abire yãi bà kũ matɛn lɛ́, má dɔ̃ pɔ́ kũ matɛn pɛ́a, adi kɛ matɛn ɔsi ká gukorianlo. 27Oi, madì wari dɔ ma mɛ̀ɛa, madì ma mɛ̀ɛ taki kɛ, de ma waazikɛna dakenɔnɛ gbɛra, másun bo pãro yãi.

Currently Selected:

1 KƆRINTIDENƆ 9: BB2005

Highlight

Copy