Mark 12

Vinyi fie sunianfuɛ'm bé wun nyanndra

(An `nian Mat 21:33-46; Lik 20:9-19)

1Jésus buli nyanndra wie kleli be. Ɔ seli kɛ: «Bian kun di i vinyi fie. Ɔ sili i wun, yɛ ɔ kpɛli vinyi'n i nzue cuɛnwlɛ, ɔ kplannin akpa fleiin kun, yɛ ɔ fa wlali vinyi fie sunianfuɛ'm bé sa nun nan ɔ'a ɔ mɛn wie nun . 2Kɛ ɔ juli vinyi'n i tilɛ'n, ɔ sunmɛnnin i sran kun vinyi sunianfuɛ'm be sin kɛ ɔ ko fɛ i liɛ blɛ i. 3Be trɛli i be boli i, be kɛnnin i bo nan ɔ'a toto i sa a sɛ i sin. 4Ɔ sunmɛnnin i sran kun ekun bé wun lɔ, be boli i fɛ, yɛ be yoli i tɛ kpa. 5I nsan su liɛ'n b'ɔ sunmɛnnin i'n, be kunnin i. I sin ɔ sunmannin wie mun ekun, be boli wie, yɛ be kunnin wie. 6Ɔ man ɔ kɛ i wa yasua'n b'ɔ ti i anwlɛn su ba'n i kunngba cɛ. Ɔ sunmɛnnin i be wun lɔ ekun, ɔ seli kɛ: ‹Min wa'n liɛ'n, be wa bu i sran.› 7Sanngɛ kɛ vinyi fie sunianfuɛ sɔ'm be wunnin i'n, be seli be wiengu kɛ: ‹I aja difuɛ'n yɛ, an `bla man e kun i nan i ninnge'm be yo e liɛ.› 8Yɛ be trɛ i be kunnin i-ɔ, nan b'a yi i vinyi fie'n sin lɔ. 9?Nguɛ yɛ vinyi fiefuɛ'n ɔ wa yo-ɔ? Ɔ ´ba, ɔ ´kun vinyi fie sunianfuɛ mun, yɛ ɔ ´fa vinyi fie'n wla sran uflɛ'm bé sa nun.

10?Nyanmiɛn Ndɛ nga be kleli i kɛ:

‹Yɛbuɛ nga sua kplanfuɛ'm be yili i blo'n,

i yɛ ɔ'a kaci yɛbuɛ kpa

b'ɔ tra sua'n i cɔnjɔ'n i ase'n,

11i sɔ'n fin e Min'n, yɛ kɛ e wun i'n,

ɔ bo é nuan'n.›

amun nian kɛnngɛn-mɛn i le ?»

12Kɛ be wunnin i wlɛ kɛ be ti yɛ Jésus buli nyanndra sɔ'n, be waan be ´trɛ i, sanngɛ sran'm bé wun srɛ ti be yacili i lɛ, be jaoli i wun lɛ be ɔli.

Sezar i lapo'n

(An `nian Mat 22:15-22; Lik 20:20-26)

13Be sunmannin Farizifuɛ mun nin Erɔdfuɛ wie mun Jésus wun lɔ kɛ be ko tie i nuan bo ndɛ nan be jran su fa trɛ i. 14Be wa seli i kɛ: «Nja, e si kɛ a di nanwlɛ. Yɛ e si ekun kɛ a sro-man sran fi, afin a nian-man sran nyrun yɛ a yo sa-a, yɛ a kle sran mun Nyanmiɛn atin'n nanwlɛ nun. ?E `su lapo man Sezar? E su, annzɛ nán man e su?» 15Kɛ Jésus wunnin kɛ be su to i gblɛ'n, ɔ seli be kɛ: «?Nzu ti yɛ an kan min nian-an? An `fa denie kun blɛ min man n nian.» 16Be blɛli i kun, yɛ ɔ usali be kɛ: «?Wan yɛlɛ ng'ɔ o su yɛ'n? ?Yɛ wan sanuan yɛlɛ ng'ɔ klɛ su lɛ'n?» Be seli i kɛ: «Sezar yɛ ɔ o su-ɔ, yɛ i sanuan yɛ ɔ o su-ɔ.» 17Yɛ ɔ seli be kɛ: «Sɛ ɔ ti sɔ'n, an `fa ng'ɔ ti Sezar liɛ'n mɛn i, yɛ ng'ɔ ti Nyanmiɛn liɛ'n, an `fa mɛn i.» Ndɛ ng'ɔ kannin'n boli bé nuan.

Sran'm be cɛnlɛ'n i su sa usalɛ

(An `nian Mat 22:23-33; Lik 20:27-40)

18Sadisefuɛ mun bɔ be waan, sɛ sran wu-ɔ ɔ cɛn-man'n , be bali Jésus wun lɛ, be usɛli i kɛ: 19«Nja, nian ndɛ bɔ Moiz klɛ mannin ye-ɔ, i waan: ‹Sɛ sran wie i niaan b'ɔ nin i yi'n b'a wu-man ba'n ɔ wu'n, man i niaan'n ja bla'n ekun nan ɔ nin i be wu ba, nan i niaan'n i osu'n ɔ'a nunnun-man .› 20Yasua nso be o lɛ, be ti niaan. Be nyrun kpɛn'n jali bla, i sin be nian sɔ'n ɔ wa wuli, ɔ'a nyan-man ba b'ɔ ´kɛ i osu-ɔ. 21Ng'ɔ mɛntɛn i'n, ɔ jɛli i angboti'n, ɔ nin i a wu-man ba, i kusu wa wuli. Be nsan su'n nin be nga mun be jali bla kunngba'n, be kusu be wa wuli. 22Be nso'n, be nun wie fi be nin i b'a wu-man ba. Kɛ be kwlaa be wuli'n, i sin bla'n kusu wa wuli. 23?Kɛ sran'm be ´cɛn'n, bla sɔ'n ɔ ´yo be nun onin liɛ, afin be nso'n be jɛli i?» 24Jésus seli be kɛ: «Amu'an fɔn. ?An si sa ti'n? Afin an wun-man Nyanmiɛn Ndɛ nga be klɛli'n i wlɛ, yɛ kusu amun wun-mɛn i wlɛ kɛ Nyanmiɛn kwla sa kwlaa yo. 25Afin kɛ sran'm be ko cɛn'n, yasua su ja-man bla kun, yɛ bla kusu su ja-man bian kun, sanngɛ be ´yo kɛ anz'm bɔ be o Nyanmiɛn su lɔ'n sa. 26?Be nga be wuli'n be cɛnlɛ'n i wun ndɛ liɛ'n, amu'an kanngan-man Moiz i fluwa'n b'ɔ kle susrɛ'n i wun ndɛ'n nun'n i nun le? Ɔ klɛli i kɛ: ‹N ti Abraam, nin Izaak, nin Zakɔb be Nyanmiɛn .› 27Nyanmiɛn ti-man be nga be wuli'n be Nyanmiɛn, sanngɛ ɔ ti be nga be nyin o su'n be Nyanmiɛn. Amu'an fɔn dan kpa.»

Mmla'n i nun dan'n

(An `nian Mat 22:34-40; Lik 10:25-28)

28 Mmla klefuɛ'm be nun kun tili be ndɛ nga be kan'n. Kɛ ɔ wunnin kɛ Jésus tɛli be su kpa'n, ɔ wunngeli Jésus wun lɛ, yɛ ɔ usɛli i kɛ: «?Mmla'n i nun dan'n yɛlɛ onin?» 29Jésus seli i kɛ: «Nian, i nun dan'n yɛ: Izraɛlfuɛ mun, an `tie, e Min Nyanmiɛn'n i kunngba cɛ yɛ ɔ ti e Min nin-ɔn. 30Amun `klo amun Nyanmiɛn'n kpa, amun `fa amún wla'n kwlaa guɛ i su, man amun akunndan'n kwlaa trɛn i su, yɛ amun fa amun wunmiɛn'n kwlaa yo like ng'ɔ kle kɛ amun klo i'n.» 31Yɛ nian ng'ɔ mɛntɛn i'n yɛ: «Amun klo amun wiengu kɛ amun fa klo amun bɔbɔ amun wun'n sa. Mmla wie fi nun-man lɛ bɔ i dan tra be-ɔ .» 32Mmla klefuɛ'n seli i kɛ: «Nja, ɔ ti kpa, kɛ a se kɛ Nyanmiɛn ti kunngba yɛ uflɛ nun-mɛn i sin'n, ɔ ti nanwlɛ. 33Yɛ kɛ be klo i kpa'n, bɔ be fa bé wla'n kwlaa guɛ i su'n, bɔ be akunndan'n kwlaa trɛn i su'n, bɔ be fa be wunmiɛn'n kwlaa yo like ng'ɔ kle kɛ be klo i'n, bɔ be klo be wiengu kɛ be bɔbɔ sa'n, i sɔ'n ti kpa tra tɛ nga be yrɛ i nnɛn kɔlikɔli'n, nin like nga be fa man Nyanmiɛn'n i kwlaa .» 34Kɛ Jésus wunnin kɛ ɔ tɛ su kpa'n, ɔ seli i kɛ: «Ɔ ka kan a ´yo mɛn nga Nyanmiɛn sie'n i nunfuɛ.» Ɔ man sran fi a trɛ-mɛn i anwlɛn a usɛ-mɛn i sa kun.

?Krist ti David i Anunman?

(An `nian Mat 22:41-46; Lik 20:41-44)

35Kɛ Jésus ´kle like Nyanmiɛn i sua nun'n, ɔ usali kɛ: «?Ɔ yo sɛ yɛ mmla klefuɛ'm be kwla se kɛ Krist ti David anunman nin-ɔn? 36Nyanmiɛn Wawɛ'n man David bɔbɔ seli kɛ:

‹E Min Nyanmiɛn'n seli min Min liɛ'n kɛ:

Tran ase min fama su wa

lele man n yi ɔ kpɔfuɛ'm be ase ɔ bo

nan n fa be n yo ɔ ja siesiewlɛ .›

37David bɔbɔ flɛli i i Min. ?Sɛ ɔ ti sɔ'n, ɔ yo sɛ yɛ ɔ ti i anunman-an? Sran kpanngban sɔ'n bɔ be tie i ndɛ'n, ɔ yo be fɛ.»

Jésus seli be kɛ be sasa bé wun mmla klefuɛ'm be lika

(An `nian Mat 23:1-36; Lik 20:45-47)

38Kɛ ɔ ´kle be like'n, ɔ seli be kɛ: «An `sasa amun wun mmla klefuɛ'm bɔ be klo tralɛ tɛnndɛn wla wlan sinlɛ'n, bɔ be klo kɛ be yo be like nzra nun'n, be lika. 39Kɛ be ´di like nzra nun'n, be klo sran dandan'm be tranwlɛ'n nun tranlɛ, yɛ be klo Nyanmiɛn ndɛ suanlɛ nin i srɛlɛ sua'n nun bia kpakpa su tranlɛ. 40Be de angboti mmla'm be awlo'n, yɛ be kan ndɛ tɛnndɛn kle Nyanmiɛn lelele kɛ sran'm be `bu be sran kpa. Be fɔ tulɛ liɛ'n ɔ wa yo tɛ kpa.»

Angboti bla kun i Nyanmiɛn sika yilɛ

(An `nian Lik 21:1-4)

41Kɛ Jésus ti Nyanmiɛn i sua'n nun sika guawlɛ'n i nyrun ndɛnman su lɛ'n, ɔ nian wafa nga sran'm be yi sika be gua nun'n. Anyanbeunfuɛ sunman be gua nun kpanngban. 42Angboti bla yalɛfuɛ kun kusu fa jɛtɛ mma kanngan nnyɔn b'ɔ ju kɛ bablu kun sa'n ɔ fa guali nun. 43Yɛ Jésus flɛli i sɔnnzɔnfuɛ mun nan ɔ'a se be kɛ: «Nanwlɛ, angboti bla yalɛfuɛ nga i sika liɛ'n b'ɔ yili'n ɔ tra be nga'm be liɛ nga be yi guali sika guawlɛ nun'n, 44afin be kwlaa nga'm be liɛ nga be yi'n, ɔ bu-man be kplɛ, sanngɛ bla nga liɛ'n, ɔ yili i yalɛ liɛ kan'n, i kwlaa ng'ɔ lɛ i b'ɔ fa di like'n yɛ ɔ fa mannin-ɔn.»

Currently Selected:

Mark 12: BB98

Highlight

Copy