Ima̍aki 8

Iji̍sɔ̄ɔsi bī āchɛ u̍nɔ igwo̍ la ojōre̍

(Ima̍tiyu 15:32-39)

1O̍ i̍ ligbi̍gbo̍ o̍bū ni̍, ribi yī āchɛ ɛha̍ gba̍a wā ge̍ grēeyī. E̍ lyɛ̄mɛ̄ kpɛ̍ɛji. Ɔjɔ̄jā i̍ chī hɔ̄ abɔ̍ɔ nīi e̍ ge̍ē re̍ ni̍. Iji̍sɔ̄ɔsi hī a̍chi̍kpo̍ yī nū ɛra̍ koko̍o de wa̍ hīka, 2“Āchɛ nūma̍ lɛ u lɛhɛ̍ha̍ kpɛ̍ɛji. Wu̍chē oji̍ nɛ, e̍ gblāa amu tāa ami ɔ̄chī ɛta̍ mɛ̍. U̍ma̍ama, e̍ i̍ chī lɛ ɔjɔ̄jā lā amu ge̍ē re̍ gɛ ni̍. 3N ge̍ ka nīi e̍ pīya yī wɔlɛ̍ ji nīi n i̍ ge̍ de ojōre̍ de wa̍ o̍bū ni̍, e̍ chī ge̍ē pra̍a kpɛ̍tɛ̍kpɛ̍tɛ̍ la ɔpɔ̄pū. Wu̍chē oji̍ nɛ, āchɛ ɛha̍ yī wā bū la ɛbɛ oligbi̍gbo̍.”

4A̍chi̍kpo̍ yī nū ka bɛ̍ɛ̄nɛ̄ hīka, “Aba̍ chī hɔ̄ amu lipu̍ a̍chi̍ chukuru nūma̍ nīi ɔ̄chɛ ge̍ē ma̍ ojōre̍ ē bī āchɛ nūma̍ wa̍a̍ mɛ ma̍?”

5Iji̍sɔ̄ɔsi che wa̍ ikpo̍ hīka, ibrɛ̍ɛdi ɛmla̍a nīi ɛ̍lɛ bī abɔ̍ɔ ma̍?

E̍ ka ɔ̍lɔ - ākpā arāapa nɛ.

6O̍ koko̍o de āchɛ ɛla̍ā wa̍a̍ ka ɛ̍lɛ ge̍ hyāhɔ̄ la ajɛ. O̍ nāa ākpā yī ibrɛ̍ɛdi arāapa ɛla̍ā bī la abɔ̄, da Ɔwɔ o̍be. O̍ wā ge̍ de ibrɛ̍ɛdi ɛla̍ā hɛ̍ wa̍a̍, de nāa de a̍chi̍kpo̍ yī nū, ɛ̍lɛ ge̍ de kɔ̄ de āchɛ ɛla̍ā wa̍a̍. A̍chi̍kpo̍ yī nū de kɔ̄ de wa̍. 7A̍chi̍kpo̍ yī nū bī a̍yu̍u ɛha̍ pi̍nyɛ̍ abɔ̍ɔ. O̍ kwɛ̍ɛjī la ɔpiyɛ ɔyɔ̍ɔ̄ya̍ ma̍, o̍ de nāa de a̍chi̍kpo̍ yī nū ka ɛ̍lɛ ge̍ gba̍a de kɔ̄ de āchɛ ɛla̍ā. 8Ɔ̄chɛmɔ̄chɛ re̍ ojōre̍ ɔla̍ā nīi o̍ jɛ̄ ɔ̄ hwɔhi hwɔhi. Āchɛ ɛla̍ā wa̍a̍ gbajɛ la angrɔ̄ɔ u̍nɔ igwo̍. 9A̍chi̍kpo̍ yī nū kpo̍ irwi yī ojōre̍ ɔla̍ā nīi jɛ̄ wā hōhī ma̍ tū la obri̍bri̍ arāapa mōmu-mōmu. Iji̍sɔ̄ɔsi ka nīi āchɛ ɛla̍ā pīya bɛ̍ɛ̄nɛ̄. 10Anu̍ ɔlɔjā gatū la wɔwu̍ ɔpɔ̄ɔpɛ̄ ba̍la a̍chi̍kpo̍ yī nū pīya ga ajɛ yī Idamanu̍ta.

Āchɛ yī Ifa̍rasīi ɛha̍ chikpo̍ ge̍ē ma̍ lɛlā ɔlɛbɛ̍bi̍

(Ima̍tiyu 16:1-4)

11Āchɛ yī Ifa̍rasīi ɛha̍ wā la ɛbɛ yī Iji̍sɔ̄ɔsi ge̍ yɛ ē ta̍ ɔ̄ ahu̍lɛ̄lā. E̍ chikpo̍ ge̍ē ku̍ ɔ̄ lɛlā ɔha̍. Wu̍chē yī ɔla̍ā, e̍ ka ɔ̍lɔ ge̍ yɛ̍ɛ̄lā ɔlɛbɛ̍bi̍ nīi - ɔ̍lɔ ge̍ē chabɔ̄ hīka Ɔwɔ ɔ̍lɔ chɛ̄ku ɔ̍lɔ ma̍. 12Iji̍sɔ̄ɔsi hīiru du̍mɔ̍ ka hīka, “Oji̍ - ohu̍ nīi alyɛchɛ nūma̍ ē chikpo̍ ge̍ē ma̍ lɛlā ɔlɛbɛ̍bi̍ ode chabɔ̄ ma̍/? Ehe̍e! Lēchi̍-lēchi̍, n ge̍ē koko̍o ē de ala̍! Lɛlɛ̄lā ɔlɛbɛ̍bi̍ ode chabɔ̄ i̍ngɔ̍ɔ i̍ hɔ̄ de āchɛ nūma̍ ni̍.”

13Iji̍sɔ̄ɔsi ku̍ pīya hī āchɛ ɛla̍ā, ku̍chē ga wɔwu̍. E̍ pīya bū abɔ̍ɔ, hɛ̍ li̍hu ārɛ̄ yɛ gāa oe̍ ɔla̍nū bɛ̍ɛ̄nɛ̄.

Ūkpɔ̄tū ɔngmu̍wɔ̍hu̍ yī āchɛ yī Ifa̍rasīi

(Ima̍tiyu 16:5-12)

14A̍chi̍kpo̍ yī Iji̍sɔ̄ɔsi de mwanyī, e̍ i̍ bī ojōre̍ ɔha̍lɔha̍ ni̍. Ākpā yī ibrɛ̍ɛdi ūkpo̍he nīi e̍ lɛ tū abɔ̍ɔ la wɔwu̍ a̍nɛ. 15Iji̍sɔ̄ɔsi ta̍ wā ɔna yī lɛlā hīka, “Ala̍ ā deyīkōkū! Ala̍ ā gbō iyī ala̍ hī ɔjā obī ibrɛ̍ɛdi nōnū yī Āchɛ yī Ifa̍rasīi ba̍la Ihɛ̍rɔ̄ɔdi.”

16A̍chi̍kpo̍ yī nū gblāa abɔ̍ɔ ē ka ē de iyī wā ka ibrɛ̍ɛdi nīi aɛ̍lɛ i̍ bī ni̍ ma̍ nīi ɔ̍lɔ yɛ aa̍ ka a̍nɛ.

17Iji̍sɔ̄ɔsi je̍ ɔjā nīi e̍ yɛ ē ka de iyī wā ma̍ ɔpɔ̄ɔpɛ̄. Wu̍chē yī ɔla̍ā, o̍ da wa̍ hīka, “Oji̍ - ohu̍ nīi ala̍ chōo̍chē kɛlā ku̍ ibrɛ̍ɛdi i̍bōbī ni̍ ma̍? Re̍ka ala̍ i̍ jo̍ōkū yī lɛlɛ̄lā we̍ ni̍? Ūkpɔ̄tū yī ala̍ ma̍ ko̍ōku̍? 18Ala̍ i̍ tū īkprī ɔmyɛ̍ma̍ ni̍? Kɛ̄ɛ ala̍ i̍ tū arɔ̄ ɔplɛ̍ɛ̄lā ni̍? Ala̍ i̍ bla gɛ ni̍? 19Yɛ̄grāa nīi n de ākpā yī ibrɛ̍ɛdi ɛrwɔ̄ hɛ̍ de āchɛ u̍nɔ igwo̍lɛpa che ohu igwo̍ ma̍ bɛ̍ɛ? Obri̍bri̍ ɛmla̍a nīi ala̍ kpo̍ onīi e̍ re̍ jɛ̄ wā hōhī tū ma̍?”

E̍ ka ɔ̍lɔ - obri̍bri̍ igwo̍lɛpa nɛ.

20O̍ gba̍a ka hīka, “Yɛ̄grāa nīi n chī de ākpā yī ibrɛ̍ɛdi arāapa hɛ̍ de āchɛ u̍nɔ igwo̍ ma̍ bɛ̍ɛ? Obri̍bri̍ ɛmla̍a nīi ala̍ kpo̍ nīi e̍ re̍ jɛ̄ wā hōhī tū ma̍?”

E̍ ka ɔ̍lɔ - obri̍bri̍ arāapa nɛ.

21O̍ che wa̍ ikpo̍ bɛ̍ɛ̄nɛ̄ hīka, “Anu̍ nīi ala̍ i̍ gba̍a jo̍ōkū yī lɛlɛ̄lā we̍ ni̍ a̍nɛ?”

Iji̍sɔ̄ɔsi nyiya ɔngrɔ̄ɔ opriyī ɔha̍ la Ibɛsa̍yi̍da

22E̍ wā ge̍ gbajɛ la Ibɛsa̍yi̍da bɛ̍ɛ̄nɛ̄. Āchɛ ɛha̍ bī ɔngrɔ̄ɔ opriyī ɔha̍ wā ge̍ de Iji̍sɔ̄ɔsi. E̍ ra̍ābɔ̄ de ɔ̍ ka ɔ̍lɔ ge̍ de abɔ̄ gwō ɔ̍lɔ. 23Iji̍sɔ̄ɔsi de abɔ̄ ku̍ opriyī ɔla̍ā la abɔ̄, bī ɔ̄ bīyɛchɛ hī ipwo̍gra ɔla̍ā ga ikō. O̍ ta̍arɛ tū ɔngrɔ̄ɔ ɔla̍ā la īkprī, de abɔ̄ che ɔ̍. O̍ che ɔ̍ ikpo̍ hīka ɔ̍lɔ yɛ abɔ̍ɔ ē ma̍ ɔjā ɔha̍ mɛ mɛ̍?

24Ɔngrɔ̄ɔ ɔla̍ā hu eyī hwa̍a̍ ga ichō ka bɛ̍ɛ̄nɛ̄ hīka, “N̅n̄, n yɛ amu ē ma̍ āchɛ̄ɛchɛ. E̍ chī lɛ u bāa ɛchi̍ ma̍. E̍ yɛ amu ē yɛɛ bɛ̍ɛ̍.”

25Iji̍sɔ̄ɔsi gba̍a de abɔ̄ kla̍ anu̍ la īkprī. Yɛ̄grāa nūma̍ ma̍, ɔngrɔ̄ɔ ɔla̍ā myɛ̍ma̍ chwaa o̍bū nīi o̍ de myɛ̍ma̍ i̍ngɔ̍ɔ ke̍e̍. O̍ ma̍ ɔjāha̍-ɔjāha̍ bāa ɔtɛri̍tɛri̍ ma̍ bɛ̍ɛ̄nɛ̄. 26Iji̍sɔ̄ɔsi ka ɔ̍lɔ ge̍ pīya ga wɔlɛ̍ gɛ! O̍ ta̍ ɔ̄ ɔna ka ɔ̍lɔ ge̍ e̍e ku̍chē ga wɔlɛ̍ɛchɛ ɔla̍ā o̍bū gɛ ni̍!

Ipi̍ta de ka gbada

(Ima̍tiyu 16:13-20; Ilu̍uku 9:18-21)

27Iji̍sɔ̄ɔsi ba̍la a̍chi̍kpo̍ yī nū wā ge̍ pīya ga wɔlɛ̍ɛchɛ ɛha̍ abɔ̍ɔ la Isi̍sari̍ya Ifili̍pāyi bɛ̍ɛ̄nɛ̄. E̍ yɛ la ɔpɔ̄pū ma̍, o̍ che a̍chi̍kpo̍ yī nū ikpo̍ hīka, “Ala̍ ā ka de um we̍ e̍e! Āchɛ u̍tu ka amɔ̍lɔ - ɔ̄nyɛ nɛ ma̍/?”

28A̍chi̍kpo̍ yī nū ka de ɔ̍ hīka “Āchɛ ɛha̍ ka aɔ̍lɔ - Ijɔ̍ɔn Ohuyenyi nɛ. Ɛha̍ ka aɔ̍lɔ - Ɛla̍yi̍ja nɛ. Āchɛ ɛha̍ chī ka aɔ̍lɔ - ɔ̄chɛ ɔkɛrɔ̄ yī Ɔwɔ nɛ?”

29Iji̍sɔ̄ɔsi che wa̍ ikpo̍ bɛ̍ɛ̄nɛ̄ hīka, “Ala̍ ma̍ bɛ̍ɛ? Ala̍ ā gbɛri̍ya̍ ka amɔ̍lɔ - ɔ̄nyɛ nɛ?”

Ipi̍ta hu oko̍o kpa̍ ka de ɔ̍ gbra hīka, “Awɔ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ.”

30Iji̍sɔ̄ɔsi ta̍ wā ɔna hīka ɛ̍lɛ ge̍ e̍e ka ochi̍chi̍ yī anu̍ de ɔ̄chɔ̄chɛ ni̍.

Iji̍sɔ̄ɔsi kɛlā ku̍ ichi̍ ba̍la ɔpīyaku̍ yī nū

(Ima̍tiyu 16:21-28; Ilu̍uku 9:22-27)

31Bɛ̍ɛ̄nɛ̄, Iji̍sɔ̄ɔsi kū abɔ̍ɔ ē ngū a̍chi̍kpo̍ yī nū lɛlā ma̍, o̍ koko̍o de wa̍ hīka, “Ala̍ ma̍ ko̍ō! Ɔyi̍ yī Ɔngrɔ̄ɔ ge̍ē mi̍chi̍ gba̍a̍. Ɛgabɔ̄ ba̍la alɛhu̍ aligbe ba̍la āchɛ ongū Lihɔ yī Iju̍u ge̍ē ta̍ ɔ̄. E̍ ge̍ē de ɔ̄ ngmo̍. Ɔ̄chī ɔmɛta̍, o̍ chī ge̍ē hye̍ēyī la okū.” 32Iji̍sɔ̄ɔsi de lɛlā nūma̍ yi̍ya hwōō de wa̍ lēchi̍ lēchi̍. Wu̍chē yī ɔla̍ā, Ipi̍ta hī ɔ̄ ɛra̍ ga ɛkū ge̍ yɛ ē ka tāa anu̍. 33Iji̍sɔ̄ɔsi pīya kpa̍ta̍ bɛ̍ɛ̄nɛ̄, ma̍ a̍chi̍kpo̍ yī nū ehēhī chi̍i̍ o̍bū ka tāa Ipi̍ta hīka, “Chi̍i! Tu̍ rɛ gāa hī u, Isa̍tan! Ɛri̍ya̍ yī wɔ - iyī āchɛ̄ɛchɛ nɛ, i̍ iyī Ɔwɔ ni̍.”

34Iji̍sɔ̄ɔsi hī alɔgbādu ɔla̍ā ɛra̍ ba̍la a̍chi̍kpo̍ yī nū bɛ̍ɛ̄nɛ̄, koko̍o de wa̍ hīka, “Ɔ̄chɛ nīi ge̍ chikpo̍ ge̍ē yɛ ē tāa ami, ɔlɔjā ge̍ tu̍labɔ̄ hī lɛlā yī anu̍ ɔlɔjā; o̍ ge̍ chrōoko̍o yī ichi̍ ɔmɔ̍ɔ̄ma̍, nīi o̍ ge̍ ku u la u̍tu. 35Wu̍chē oji̍ nɛ, ɔ̄chɛ nīi ge̍ chikpo̍ ge̍ē de ɔhɔ̄leyī yī nū gbōgbō, ɔlɔjā ge̍ē de ē pīyēbi̍. Ɔ̄chɛ nīi ge̍ chī de ɔhɔ̄leyī yī nū pīyabi̍ wu̍chē yī ami ba̍la Wɔ̄kā Ɔlwɔnyɛ yī Ɔwɔ, ɔlɔjā ge̍ē ma̍ ɔhɔ̄leyī yī nū. 36Ɔ̄chɛ ge̍ de yɛchɛ nūma̍ lɛ mɔri̍mɔri̍ nīi ɔhɔ̄leyī yī nū ge̍ chī pīyabi̍ ma̍ bɛ̍ɛ? Ɛpiyabuna ɔna̍ nīi ɔlɔjā lɛ ma̍? 37Ɔjɔ̄jā i̍ hɔ̄ abɔ̍ɔ nīi ɔ̄chɛ de ē hīya ɔhɔ̄leyī yī nū ni̍. 38Yɛchɛ ɔdwɔ̄bi̍ ba̍la i̍je̍ Ɔwɔ ni̍ nīi hɔ̄ ma̍ ma̍! Ɔ̄chɛ nīi ge̍ chi̍hi̍ya̍ yī ami ba̍la lɛlā yī u, ami Ɔyi̍ yī Ɔngrɔ̄ɔ titi ge̍ē chi̍hi̍ya̍ yī ɔlɔjā yɛ̄grāa nīi n ge̍ wā la rīgā ɔnɔ̄kɔ̄kū yī A̍dā yī u ba̍la ayɛ̍ɛ̄chɛ̄rɔ̄ ɛnɛ̄ɛhɛhi nīi ge̍ē ku u la u̍tu ma̍.”

Currently Selected:

Ima̍aki 8: YBASR

Highlight

Copy