Ima̍aki 9

1O̍ gba̍a ka de wa̍ hīka, “Lēchi̍-lēchi̍, n ā koko̍o de ala̍! Āchɛ ɛha̍ hɔ̄ amu u̍ma̍ama nīi i̍ ge̍ē pīyēku̍ o̍bū ni̍, kpɛɛ nīi e̍ ē ma̍ Ɔchwɔ̄lɛ̍ Oro̍ōre̍ yī Ɔwɔ nīi ge̍ē wā wɔhu̍-wɔhu̍ ma̍.”

Ibi̍īyē yī Iji̍sɔ̄ɔsi pīyata̍ ke̍e̍

(Ima̍tiyu 17:1-13; Ilu̍uku 9:28-36)

2Ɔ̄chī erīiyī wā ge̍ ga ma̍, Iji̍sɔ̄ɔsi bī Ipi̍ta ba̍la Ije̍mēehi ba̍la Ijɔ̍ɔn ku iyī nū. O̍ yɛ la iyɔ̄bū yī wā wa̍a̍ ga yɛwu olichīichō ɔha̍, aa̍ lōri̍īwā. Ibi̍īyē yī Iji̍sɔ̄ɔsi pīyata̍ ɔpɔ̄ɔpɛ̄ abɔ̍ɔ la iyɔ̄bū yī wā. 3Ɛjā otūlibi̍īyē yī nū hu̍ bāa ɔnya̍ri̍nya̍ri̍ ma̍, lɛ̍rɛ̍ kpɛ̍ɛ bāa ɔfra̍ta̍ta̍ ma̍. Ɔ̄chɔ̄chɛ i̍ ge̍ē na ɔjɔ̄jā ngma̍ i̍ngɔ̍ɔ lipu̍ yī yɛchɛ nūma̍ ē mɛ ni̍. 4Bɛ̍ɛ̄nɛ̄, aa̍ āchɛ ɛtɛ̍ɛta̍ ma̍ Ɛla̍yi̍ja ba̍la Imo̍sīisi nīi e̍ gblāa abɔ̍ɔ ē kɛlā ba̍la Iji̍sɔ̄ɔsi. 5Ipi̍ta hu oko̍o kpa̍ ka de Iji̍sɔ̄ɔsi hīka, “Ɔngūlɛ̄lā be̍e! O̍ hwɔhi kpɛ̍ɛji nīi alɔ hɔ̄ amu ma̍. Alɔ ge̍ē gwo̍ a̍ywɔ̍da̍ ɛta̍ de ala̍: ɔha̍ - iyī wɔ; ɔha̍ - iyī Imo̍sīisi; ɔha̍ - iyī Ɛla̍yi̍ja.” 6Ipi̍ta i̍ jo̍ōje̍ ɔjā nīi o̍ ge̍ē ka ma̍ gɛ ni̍. Wu̍chē oji̍ nɛ, e̍ de kpo̍ tūuhwi ɔlamu-ɔlamu.

7Akpɔ̍ɔwɔ ɔha̍ wā ɔpɔ̄ɔpɛ̄ ge̍ gbuhu kla̍ āā i̍ngɔ̍ɔ bri̍i̍. Ɔkɔlɛ̄lā ɔha̍ bū abɔ̍ɔ la akpɔ̍ɔwɔ ɔla̍ā hīka, “Ɔyi̍ otōtū yī u lēchi̍ lēchi̍ hɔ̄ ma̍ a̍nɛ. Ala̍ ā darɔ̄ku lɛlā yī nū.” 8A̍chi̍kpo̍ yī nū jiyeyī ke̍keke̍ wa̍a̍ ɔpɔ̄ɔpɛ̄; e̍ i̍ ma̍ ɔ̄chɔ̄chɛ gɛ ni̍. Iji̍sɔ̄ɔsi lōri̍īnū rɛ abɔ̍ɔ ba̍la aa̍ a̍nɛ.

9E̍ yɛ ē hrāajɛ ē bū la yɛwu ɔla̍ā ma̍, Iji̍sɔ̄ɔsi ta̍ wā ɔna ka ɛ̍lɛ ge̍ e̍e koko̍o yī lɛlā nīi ɛ̍lɛ ma̍ ma̍ de ɔ̄chɔ̄chɛ ni̍, kpɛɛ nīi Ɔyi̍ yī Ɔngrɔ̄ɔ ɔ̍lɔ ge̍ hye̍ēyī la okū o̍bū.

10E̍ de lɛlā ɔla̍ā wa̍a̍ gbō iyī aa̍ ɛlɛjā ke̍e̍. E̍ yɛ ē che iyī wā ikpo̍ ka oji̍ ɔ̍lɔ u̍tu - ochi̍chi̍ yī ohye̍ēyī la okū ɔ̍lɔma̍ ma̍/? 11E̍ che Iji̍sɔ̄ɔsi ikpo̍ hīka, “Oji̍ - ohu̍ nīi āchɛ ongū Lihɔ yī Iju̍u chī ka hīka Ɛla̍yi̍ja ɔ̍lɔ ge̍ē yɔbū a̍nɛ ma̍?”

12Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Lēchi̍ nɛ, Ɛla̍yi̍ja ē wā yɔbū ge̍ē gbla̍a ɔjāha̍-ɔjāha̍ wa̍a̍ lɔ̄lā a̍nɛ. Kana̍ nīi Īpū yī Ɔwɔ chī ka ku̍ Ɔyi̍ yī Ɔngrɔ̄ɔ ma̍? E̍ ka ɔ̍lɔ ge̍ē mi̍chi̍ gba̍a̍. Āchɛ ɛ̍lɛ i̍ ge̍ē nāa ɔ̍lɔ bāa ɔjɔ̄jā ma̍ ni̍. 13N ge̍ē koko̍o ē de ala̍ hwōō! Ɛla̍yi̍ja wā gbi̍chɛ-gbi̍chɛ mɛ̍. Āchɛ ya̍ tāa anu̍ lɔkɔ nīi e̍ chikpo̍ ma̍, ba̍la ɔkɔ nīi Īpū yī Ɔwɔ ka ku̍ ɔ̄ ma̍ mɛ̍.”

Iji̍sɔ̄ɔsi nyiya ɔɔ̍pɛ̄ Ɔnɔ̄ngrɔ̄ɔ ɔha̍ nīi ku̍ yapri̍ija ɔdwɔ̄bi̍ ma̍.

(Ima̍tiyu 17:14-21; Ilu̍uku 9:37-43a)

14E̍ cha wā dikpo̍ba̍ a̍chi̍kpo̍ yī nū ehēhī bɛ̍ɛ̄nɛ̄, wā ge̍ ma̍ yɛ̄mɛ̄ yī āchɛ nīi ha̍du tū wā gblāa abɔ̍ɔ. Āchɛ ongū Lihɔ yī Iju̍u ɛha̍ gblāa abɔ̍ɔ ē ta̍ wā ahu̍lɛ̄lā. 15Āchɛ ɛla̍ā wa̍a̍ ma̍ Iji̍sɔ̄ɔsi ma̍, o̍ de ya̍ wā lɛbɛ̍bi̍. E̍ rɛ̄ɛnya yɛ grāa anu̍ ge̍ da ɔ̍ o̍be. 16Iji̍sɔ̄ɔsi che a̍chi̍kpo̍ yī nū ikpo̍ hīka, lɛlā oji̍ nīi ɛ̍lɛ ba̍la āchɛ ɛla̍ā ɛ̍lɛ ē ka ma̍?

17Ɔngrɔ̄ɔ ɔha̍ abɔ̍ɔ lipu̍ yī āchɛ ɛla̍ā hīyɔkɔ bɛ̍ɛ̄nɛ̄ hīka, “Ma̍ ko̍ō, Ɔngūlɛ̄lā! N bī ɔyi̍ yī u ɔnɔ̄ngrɔ̄ɔ wā ge̍ē de wɔ; wu̍chē oji̍ nɛ, o̍ ku̍ yapri̍ija ɔdwɔ̄bi̍. Yapri̍ija ɔla̍ā de ɔ̍ gwōko̍o ke̍e̍ mɛ̍. 18Yɛ̄grāa ɔha̍lɔha̍ nīi o̍ ge̍ wā la anu̍ mɛ̍, o̍ ē wu̍ ɔ̄ mla̍ajɛ; ɔyi̍ ē hu̍ū la oko̍o pu̍tu̍pu̍tu̍, ē rāngūu. O̍ ē de ɔ̍ ē ngmu̍wɔ̍hu̍ kwɔ̍kɔ̍rɔ̍ wa̍a̍. N ka de a̍chi̍kpo̍ yī wɔ hīka e̍ ge̍ de yapri̍ija ɔla̍ā nū hī ɔ̄, e̍ i̍ chī ya̍ i̍ngɔ̍ɔ mɛ ni̍.”

19Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ āchɛ i̍ de ɔtū che Ɔwɔ ni̍ nīi gblāa ma̍ ma̍! N ge̍ē hɔ̄ tāa ala̍ ge̍ē ba̍ aba̍ ma̍/? N ge̍ē u̍tu hɔ̄ tāa ala̍ ligbo̍ kana̍ o̍bū ma̍? Ala̍ ā bī ɔyi̍ ɔla̍ā wā ge̍ de u.” 20E̍ de ɔɔ̍pɛ̄ ɔnɔ̄ngrɔ̄ɔ ɔla̍ā bī ge̍ de Iji̍sɔ̄ɔsi bɛ̍ɛ̄nɛ̄.

Yapri̍ija ɔla̍ā ma̍ Iji̍sɔ̄ɔsi ɔpɔ̄ɔpɛ̄ ma̍, o̍ gwō ɔyi̍ ɔla̍ā chikichiki gba̍a̍, wu̍ ɔ̄ mla̍ajɛ. Ɔyi̍ gbo abɔ̍ɔ ē mi̍ya kpa̍ta̍kpa̍ta̍ la ajɛ, ē hu̍ū la oko̍o pu̍tu̍pu̍tu̍. 21Iji̍sɔ̄ɔsi che a̍dā yī ɔyi̍ ɔla̍ā ikpo̍ ka yapri̍ija ɔla̍ā ɔ̍lɔ ya̍ ɔ̍lɔ ligbo̍ kana̍ mɛ̍?

Ɔngrɔ̄ɔ ɔla̍ā koko̍o de ɔ̍ hīka, “O̍ ya̍ ɔ̄ bū la lɛɛ̍pɛ̄ɛ̍pɛ̄. 22Igbohu, o̍ ē chikpo̍ yī ode ɔ̍ ngmo̍ōngmo̍; o̍ ē tū ɔ̄ ta̍tū la ɔla̍, o̍ ē tū ɔ̄ ta̍tū la yenyi. Mlɛ̍ha̍ yī alɔ gɛ, nīi a ā tū alɔ wɔbɔ̄, nīi a ge̍ yɛ ge̍ē ya̍ mɛ̍!”

23Iji̍sɔ̄ɔsi hīya ɔngrɔ̄ɔ ɔla̍ā ɔkɔ hīka, “N̅n̄, nīi a ge̍ yɛ ge̍ē chɛ̄ mɛ ni̍? Ɔjāha̍-ɔjāha̍ wa̍a̍ lɛnyɛnya de ɔ̄chɛ nīi de ɔtū che Ɔwɔ ma̍.”

24A̍dā yī ɔyi̍ ɔla̍ā ka gbra ɔpɔ̄ɔpɛ̄ hīka, “Ādā, n de ɔtū che Ɔwɔ. Ɔtū ode chōche yī u i̍ lɛ ɛmla̍a ni̍. Tū u wɔbɔ̄ nīi n ā de ɔtū che brii gɛ!”

25Iji̍sɔ̄ɔsi ma̍ hīka āchɛ ɛ̍lɛ yɛ abɔ̍ɔ ē tu̍ rɛ ē wā ɔ̄kɔ̄kū ma̍, o̍ ka tāa yapri̍ija ɔdwɔ̄bi̍ ɔla̍ā hīka, “Awɔ yapri̍ija ɔdarɔ̄, gwōko̍o nūma̍! N koko̍o de wɔ mɛ̍, bīyɛchɛ hī ɔɔ̍pɛ̄ nūma̍! A ā ga ga ɛbɛ yī nū ge̍ gbo̍ gɛ ni̍!”

26Ɔpɔ̄ɔpɛ̄, yapri̍ija ɔla̍ā gwō ɔyi̍ ɔla̍ā chikichiki dwɔ̄bi̍-dwɔ̄bi̍, ti̍ira̍gba̍ ku̍ya̍a̍ o̍bū bīyɛchɛ hī ɔyi̍ ɔla̍ā ke̍e̍ bɛ̍ɛ̄nɛ̄. Ɔyi̍ pra̍a kpɛ̍tɛ̍kpɛ̍tɛ̍ ɔpɔ̄ɔpɛ̄, de ya̍ bāa okū ma̍. Āchɛ yɛ̄mɛ̄mɛ̄ ka hīka ɔ̍lɔ ko̍ōku̍ mɛ̍. 27Iji̍sɔ̄ɔsi gāa ge̍ de abɔ̄ ku̍ ɔ̄, nāa anu̍ nīichō. O̍ nīichō yarɛ ke̍e̍.

28Yɛ̄grāa nīi Iji̍sɔ̄ɔsi pīya ga ipu̍nu̍ ma̍, a̍chi̍kpo̍ yī nū gāa ge̍ che ɔ̍ ikpo̍ fi̍yɛ̍; oji̍ ɔ̍lɔ hu̍ nīi aɛ̍lɛ i̍ nū yapri̍ija ɔdwɔ̄bi̍ ɔla̍ā mɛ ni̍ ma̍/?

29Iji̍sɔ̄ɔsi koko̍o de wa̍ hīka, “Ita yī yapri̍ija ɔdwɔ̄bi̍ nūma̍, ɔjɔ̄jā i̍ ē nū wā mɛ ni̍; ɔ̍chi̍kpa̍kpa̍ ɔhā ojōji.”

Iji̍sɔ̄ɔsi gba̍a kɛlā ku̍ ɔpīyaku̍ yī nū

(Ima̍tiyu 17:22-23; Ilu̍uku 9:43b-45)

30E̍ wā ge̍ pīya hī ɛbɛ ɔla̍ā, yɛ i̍ngɔ̍ɔ ga iyɔ̄bū iyɔ̄bū abɔ̍ɔ la ajɛ yī Iga̍līli. Iji̍sɔ̄ɔsi i̍ chikpo̍ nīi ɔ̄chɔ̄chɛ ge̍ je̍ ɛbɛ nīi o̍ hɔ̄ ma̍ ni̍. 31Wu̍chē oji̍ nɛ, o̍ yɛ ē ngū a̍chi̍kpo̍ yī nū lɛlā. O̍ ka de wa̍ hīka, “E̍ ge̍ē tu̍labɔ̄ hī Ɔyi̍ yī Ɔngrɔ̄ɔ de āchɛ̄ɛchɛ nīi e̍ ē de ɔ̍ ē ngmo̍. Ɔ̄chī ɔmɛta̍, o̍ chī ge̍ē hye̍ēyī la okū.”

32A̍chi̍kpo̍ yī nū i̍ je̍ ochi̍chi̍ yī lɛlā ongōngū nūma̍ ni̍. O̍ chī de ya̍ wā uhuhwi la oche ɔ̍ ikpo̍.

Ɔ̄chɛ nīi gɔ̄ga ma̍

(Ima̍tiyu 18:1-5; Ilu̍uku 9:46-48)

33E̍ wā ge̍ gbajɛ la Ikapa̍num bɛ̍ɛ̄nɛ̄. Yɛ̄grāa nīi e̍ chɛ̄ ga u̍nu̍ ɔha̍ ma̍, Iji̍sɔ̄ɔsi che a̍chi̍kpo̍ yī nū ikpo̍ hīka, “Oji̍ nīi ala̍ yɛ ē ta̍ iyī ala̍ ahu̍ u̍uma la ɔpɔ̄pū ma̍/?”

34Aa̍ wa̍a̍ hīdīdū. Wu̍chē oji̍ nɛ, yɛ̄grāa nīi e̍ yɛ la ɔpɔ̄pū ma̍, e̍ yɛ ē ta̍ iyī wā ahu̍ yī ɔ̄chɛ nīi - ɔmaga lipu̍ yī wā ma̍. 35Iji̍sɔ̄ɔsi pīya hyāhɔ̄ bɛ̍ɛ̄nɛ̄, de ɛra̍ hī aa̍ āchɛ igwo̍lɛpa ɛla̍ā, da wa̍ hīka, “Ɔ̄chɛ nīi ge̍ chikpo̍ ge̍ē kwɔ̄bū, ɔlɔjā ge̍ē gwīihi; o̍ ge̍ē hɔ̄ ɔ̍chɛ̍ yī āchɛ wa̍a̍.” 36Bɛ̍ɛ̄nɛ̄, o̍ bī ɔɔ̍pɛ̄ onīchi̍chɛ̍ ɔha̍ ge̍ rɛ la iyārɛ̄ɛpa yī wā wa̍a̍; de abɔ̄ che ɔyi̍ ɔla̍ā, tu̍ ɔ̄ bla̍a iyē. O̍ koko̍o de a̍chi̍kpo̍ yī nū hīka, 37“Ɔ̄chɛ nīi ge̍ ywɔ̍ɔnyɛ yī aɛ̍pɛ̄ enīchi̍chɛ̍ ita yī onūma̍ la riyī yī u, o̍ re̍ka ɔlɔjā ywɔ̍ɔnyɛ yī u. Ɔ̄chɛ nīi ge̍ chī ywɔ̍ɔnyɛ yī u, ɔlɔjā i̍ ywɔ̍ɔnyɛ yī amami ke̍e̍ ni̍; o̍ ywɔ̍ɔnyɛ yī ɔ̄chɛ nīi de u tɛ̄rɔ̄ ma̍ i̍ngi̍ngɔ̍ɔ.”

Ɔ̄chɛ nīi i̍ ge̍ - oluji yī alɔ ni̍ - ɔya alɔ nɛ

(Ilu̍uku 9:49-50)

38Ijɔ̍ɔn ka de Iji̍sɔ̄ɔsi bɛ̍ɛ̄nɛ̄ hīka, “Ma̍ ko̍ō, Ɔngūlɛ̄lā! Alɔ ma̍ ɔngrɔ̄ɔ ɔha̍ nīi o̍ yɛ ē bī riyī yī wɔ ē nū yapri̍ija ɔdwɔ̄bi̍ hī āchɛ. Alɔ ka tāa anu̍ hīka o̍ ge̍ pi̍ye̍mā; wu̍chē oji̍ nɛ, o̍ i̍ tū ribi yī alɔ nūma̍ ni̍!”

39Iji̍sɔ̄ɔsi hīyɔkɔ hīka, “Ala̍ e̍e da ɔ̍ hīka o̍ ge̍ pi̍ye̍mā ni̍! Ɔ̄chɛ ge̍ bī riyī yī u yɛ̍ɛ̄lā ɔlɛbɛ̍bi̍, ɔlɔjā i̍ ge̍ē kū aba̍bɔ̍ɔ ɔpɔ̄ɔpɛ̄ ka ɔdwɔ̄bi̍ yī u ē mɛ ni̍. 40Ɔ̄chɛ nīi i̍ ge̍ ka ɔdwɔ̄bi̍ yī alɔ ni̍, o̍ re̍ka ɔlɔjā - ɔya alɔ nɛ. 41Lēchi̍-lēchi̍, n ē koko̍o de ala̍! Ɔ̄chɛ nīi ge̍ kɔ̄ yenyi o̍klo̍o ūkpo̍he de ala̍ lɛ ɔbɔ̄bla hīka, ala̍ ɔ̍lɔ - āchɛ yī Ikra̍yisi nɛ, Ɔwɔ ge̍ē kla̍ ɔlɔjā ure̍.

Otu̍tū yī lɛlā ɔdwɔ̄bi̍

(Ima̍tiyu 18:6-9; Ilu̍uku 17:1-2)

42“Aɛ̍pɛ̄ enīchi̍chɛ̍ nūma̍ nīi de ɔtū che u ma̍, ɔ̄chɛ ge̍ ya̍ nīi e̍ gwāajɛ lɛlā ɔdwɔ̄bi̍ ɔyɔ̍ɔ̄ya̍ bɛ̍ɛ? O̍ ngma̍ nīi e̍ ē de lɛchɔ̄ yī ɛdɛ̄ to̍ōrī pla ɔlɔjā la ɔkɔ, ē nāa anu̍ ta̍tū ga u̍nyi. 43Abɔ̄ yī wɔ ɔha̍ ge̍ ya̍ nīi a gwāajɛ lɛlā ɔdwɔ̄bi̍ ɔyɔ̍ɔ̄ya̍, de abɔ̄ ɔla̍ā hɛ̍ ta̍anū. A ge̍ chɛ̄ ga ɔhɔ̄leyī la ɛbɛ yī Ɔchwɔ̄lɛ̍ Oro̍ōre̍ yī Ɔwɔ la abɔ̄ ūkpo̍he ngrɛ̄dɛ̄, o̍ hwɔhi fi̍yɛ̍ hi̍ ɔta̍tū ga ayekū oli̍gba̍o̍ la abɔ̄ ɛpɛpa. Ɛbɛ ɔla̍ā, ɔla̍ yī nū i̍ nyo̍ōnyi̍ ni̍. 44[Abɔ̍ɔ, ‘ayi̍iju nīi ē re̍ wā ma̍ i̍ ē ko̍ōku̍ ni̍; ɔla̍ nīi ē pa̍ wā ma̍ i̍ ē nyo̍ōnyi̍ ni̍.’] 45Ikpo̍ yī wɔ ɔha̍ ge̍ chī ya̍ nīi a gwāajɛ lɛlā ɔdwɔ̄bi̍ ɔyɔ̍ɔ̄ya̍ de ɔ̍ hɛ̍ ta̍anū. A ge̍ chɛ̄ ga ɔhɔ̄leyī la ɛbɛ yī Ɔchwɔ̄lɛ̍ Oro̍ōre̍ yī Ɔwɔ la ikpo̍ ūkpo̍he ngrɛ̄dɛ̄, o̍ hwɔhi fi̍yɛ̍ hi̍ oku̍ wɔ ta̍tū ga ayekū oli̍gba̍o̍ la ikpo̍ ɛpɛpa ɔla̍ā. 46[Abɔ̍ɔ, ‘ayi̍iju nīi ē re̍ wā ma̍ i̍ ē ko̍ōku̍ ni̍; ɔla̍ nīi ē pa̍ wā ma̍ i̍ ē nyo̍ōnyi̍ ni̍.’] 47Īkprī yī wɔ ɔha̍ ge̍ chī ya̍ nīi a gwāajɛ lɛlā ɔdwɔ̄bi̍ ɔyɔ̍ɔ̄ya̍, de ɔ̍ wu̍ ta̍anū. A ge̍ chɛ̄ ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ la īkprī ūkpo̍he, o̍ hwɔhi fi̍yɛ̍ hi̍ oku̍ wɔ ta̍tū ga ayekū oli̍gba̍o̍ la īkprī ɛpɛpa ɛla̍ā. 48Abɔ̍ɔ, ‘ayi̍iju nīi ē ra̍ wā ma̍ i̍ ko̍ōku̍ ni̍; ɔla̍ nīi ē pa̍ wā ma̍ i̍ ē nyo̍ōnyi̍ ni̍.’

49“Wu̍chē oji̍ nɛ, e̍ ge̍ē de ɔla̍ ē tū ɔ̄chɛmɔ̄chɛ lɔkɔ nīi e̍ ē de ɔmā tū ɔjā ma̍. 50Ɔmā ma̍ lwɔnyɛ. Ɔmā i̍ ge̍ chī lɛ ɔmɔ̄ɔmā ni̍, kana̍ nīi ɔ̄chɛ ge̍ē ya̍ nīi o̍ ge̍ē lɛ ɔmɔ̄ɔmā mɛ we̍ ma̍? Ala̍ ā tū iyī ala̍ ɔmā nīi ala̍ ge̍ gblāa la ogbodɔ̍dɔ̍ ba̍la iyī ala̍.”

Currently Selected:

Ima̍aki 9: YBASR

Highlight

Copy