Ima̍aki 10
10
Iji̍sɔ̄ɔsi ngū āchɛ lɛlā yī lɛba̍ ɔwīyatū
(Ima̍tiyu 19:1-12; Ilu̍uku 16:18)
1Iji̍sɔ̄ɔsi wā ge̍ pīya hī Ikapa̍num ga ajɛ yī Ijudi̍ya yɛ i̍ngɔ̍ɔ wa̍a̍ ga abɔ̍ɔ ga oe̍ ɔla̍nū yī Ɔkpa̍ yī Ijɔ̍dan. Āchɛ gba̍a pɛ̍ kpɛ̍ɛji ge̍ grēeyī nīi o̍ ngū wā lɛlā lɔkɔ nīi o̍ ē ya̍ ogbo̍gbe̍ ma̍.
2Āchɛ yī Ifa̍rasīi ɛha̍ wā abɔ̍ɔ. E̍ yɛ ē chikpo̍ ge̍ē trɛ̍ɛda ē gwō Iji̍sɔ̄ɔsi la ikpo̍ yī lɛlā ochōche. E̍ che ɔ̍ ikpo̍ hīka, “Ɔ̄chɛ ge̍ ta̍ ɔnyā yī nū ma̍ - lihɔ nɛ?”
3Iji̍sɔ̄ɔsi bī ikpo̍ yī lɛlā hīya aa̍ ɔkɔ hīka, “Lihɔ nīi Imo̍sīisi de de ala̍ ma̍ ka kana̍?”
4E̍ hīya anu̍ ɔkɔ hīka, “Imo̍sīisi ka hīka ɔ̄chɛ ɔ̍lɔ ge̍ ya̍ īpū yī lɛba̍ ɔkwɛ̍ɛjī de ɔnyā yī ɔ̍lɔ, ɔla̍ā ɔ̍lɔ re̍ka ɔ̍lɔ de yenyi hu ɔnyā ɔla̍ā mɛ̍.”
5Iji̍sɔ̄ɔsi ka de wa̍ bɛ̍ɛ̄nɛ̄ hīka, “Wu̍chē yī ūkpɔ̄tū yī ala̍ nīi de ngmu̍wɔ̍hu̍ ɔ̄kɔ̄kū ma̍, anu̍ - ohu̍ nīi Imo̍sīisi de lihɔ ɔla̍ā de ala̍ a̍nɛ. 6Nɛ̄ni̍, la owu̍tu nīi Ɔwɔ ya̍ yɛchɛ ma̍, ‘O̍ ya̍ ɔngrɔ̄ɔ ba̍la ɔnyā. 7Ɔla̍ā - ohu̍ nīi ɔngrɔ̄ɔ ē pīya ē hī a̍dā ba̍la ɛ̍nɛ̍, ge̍ē hɔ̄ lɛ̍kɛ̍kɔ̍ ba̍la ɔnyā yī nū a̍nɛ. 8Aa̍ āchɛ ɛpa ɛla̍ā de ē pīya āchɛ ūkpo̍he bɛ̍ɛ̄nɛ̄.’ Bū la ɛbɛ ɔla̍ā, e̍ i̍ re̍ka āchɛ ɛpa gɛ ni̍, āchɛ ūkpo̍he kpo̍kpo̍ bɛ̍ɛ̄nɛ̄ nɛ. 9Ɔjā nīi Ɔwɔ de ngmo̍tu̍chɛ̄ la ɛbɛ ūkpo̍he ma̍, ɔ̄chɔ̄chɛ ge̍ e̍e de ɔ̍ yi̍ya gɛ ni̍!”
10Yɛ̄grāa nīi e̍ pīya ge̍ gblāa la ipu̍nu̍ ma̍, a̍chi̍kpo̍ yī nū che ɔ̍ ikpo̍ yī lɛlā nūma̍. 11Iji̍sɔ̄ɔsi ka bɛ̍ɛ̄nɛ̄ hīka, “Ɔ̄chɛ nīi ge̍ nū ɔnyā yī nū pīya ge̍ wu̍ ɔha̍, ɔlɔjā la̍ ɔ̍bɔ̍ɔ̄nyā wu̍chē yī ɔnyā yī nū ɔrāarāa ɔla̍ā. 12Ɔnyā nīi ge̍ chī tlɛ̍ba̍ ɔha̍ pīya ge̍ ba̍ ɔha̍, ɔnyā ɔla̍ā la̍ ɔ̍bɔ̍ɔ̄nyā i̍ngi̍ngɔ̍ɔ.”
Iji̍sɔ̄ɔsi de ɔpiyɛ de aɛ̍pɛ̄ enīchi̍chɛ̍
(Ima̍tiyu 19:13-15; Ilu̍uku 18:15-17)
13Āchɛ ɛha̍ bī aɛ̍pɛ̄ enīchi̍chɛ̍ yɛ ē wā ge̍ de Iji̍sɔ̄ɔsi nīi o̍ ge̍ē de abɔ̄ che wa̍ lɛhu̍. A̍chi̍kpo̍ yī nū ka tāa āchɛ ɛla̍ā. 14Iji̍sɔ̄ɔsi ma̍ lɛlā nūma̍ nīi a̍chi̍kpo̍ yī nū ya̍ ma̍, o̍ wu̍ ɔ̄ ɔtū. O̍ da wa̍ bɛ̍ɛ̄nɛ̄ hīka, “Ala̍ ā pi̍ye̍mā nīi aɛ̍pɛ̄ enīchi̍chɛ̍ ge̍ wā dikpo̍ba̍ u. Ala̍ e̍e gū wā ɔpɔ̄pū ni̍; ma̍a ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ - iyī ita yī aa̍ enūma̍ nɛ. 15Lēchi̍-lēchi̍, n ā koko̍o de ala̍! Ɔ̄chɛ nīi i̍ ge̍ nāa Ɔchwɔ̄lɛ̍ Oro̍ōre̍ yī Ɔwɔ bɔ̄ɔkɔ nīi ɔɔ̍pɛ̄ nāa ma̍ ni̍, ɔlɔjā i̍ ge̍ē tū la anu̍ ni̍.” 16Bɛ̍ɛ̄nɛ̄, Iji̍sɔ̄ɔsi wā ge̍ tu̍ aɛ̍pɛ̄ ɛla̍ā wa̍a̍ bla̍a iyē, de abɔ̄ che ɔnyɔnyɛ-ɔnyɔnyɛ, de ɔpiyɛ de wa̍.
Lɛlā yī ɔlwɔdu ɔha̍
(Ima̍tiyu 19:16-30; Ilu̍uku 18:18-30)
17Iji̍sɔ̄ɔsi yɛ ē pīya ma̍, ɔngrɔ̄ɔ ɔha̍ rɛ̄ɛnya ɔpɔ̄ɔpɔ̄ɔpɛ̄ wā ge̍ de ūnōowu tū ajɛ la iyɔ̄bū yī nū ka hīka, “Ɔ̄chɛ Ɔnɛ̄ɛhɛhi Ongū Āchɛ Lɛlā be̍e! Kana̍ nīi n ge̍ē ya̍ o̍bū nīi n ge̍ē lɛ ɔhɔ̄leyī i̍mɔ̄mɛni̍ ma̍/?”
18Iji̍sɔ̄ɔsi da ɔngrɔ̄ɔ ɔla̍ā hīka, “Oji̍ - ohu̍ nīi a hī u ka ɔ̄chɛ ɔnɛ̄ɛhɛhi ma̍? Ɔ̄chɔ̄chɛ i̍ ɔ̄chɛ ɔnɛ̄ɛhɛhi ni̍, ɔ̍chi̍kpa̍kpa̍ Ɔwɔ lōri̍īnū. 19Je̍ka aa̍ a je̍ Lihɔ yī Ɔwɔ? ‘A ā ngmo̍ ɔ̄chɛ ni̍. A ā la̍ ɔ̍bɔ̍ɔ̄nyā yī ɔ̄chɛ ni̍. A ā wūwī ni̍. A ā warīmɛ̄ ni̍. A ā ya̍ ɔ̄chɛ re̍ ni̍. Tū a̍dā yī wɔ ba̍la ɛ̍nɛ̍ yī wɔ lichō.’ ”
20Ɔngrɔ̄ɔ ɔla̍ā hīya anu̍ ɔkɔ hīka, “Ɔngūlɛ̄lā, n de lihɔ nūma̍ wa̍a̍ gbō i̍ngɔ̍ɔ bū la lɛɛ̍pɛ̄ɛ̍pɛ̄.”
21Iji̍sɔ̄ɔsi ma̍ ɔngrɔ̄ɔ ɔla̍ā chi̍i̍; ɔngrɔ̄ɔ ɔla̍ā chī hi ɔ̍ ɔtū. O̍ da ɔ̍ hīka, “Ɔya, ɔjā ūkpo̍he e̍e hōhī! Pīya gɛ nīi a ā gāa ge̍ de āɛ̄jā yī wɔ kpo̍ ra̍ wa̍a̍ nīi a ā de okpo yī nū kɔ̄ de alyeklo̍. Ya̍ i̍ngɔ̍ɔ hɛ̄ɛbɛ nīi wɔdu ogbōgbō yī wɔ ge̍ hɔ̄ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ, nīi a ā pīya wā ge̍ ku u la u̍tu.” 22Ɔngrɔ̄ɔ ɔla̍ā plɛ̍ɛ̄lā nūma̍ ma̍, o̍ ya̍ eyī bāa oji̍jiji̍ ma̍, pīya la eyīwɔnɔ-eyīwɔnɔ. Wu̍chē oji̍ nɛ, o̍ gbwɔdu gba̍a̍.
23Iji̍sɔ̄ɔsi pīyeyī kaka ma̍ āchɛ ɛla̍ā wa̍a̍, o̍bū ka de a̍chi̍kpo̍ yī nū hīka, “O̍ lichi̍ gba̍a̍ o̍bū nīi ɔlwɔdu ge̍ē chɛ̄ ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ.”
24Lɛlā nūma̍ lɛ a̍chi̍kpo̍ yī nū lɛbɛ̍bi̍ gba̍a̍. Iji̍sɔ̄ɔsi gba̍a ka bɛ̍ɛ̄nɛ̄ hīka, “Ayi̍ yī u, lēchi̍ nɛ! O̍ lichi̍ gba̍a o̍bū nīi ɔ̄chɛ ge̍ē chɛ̄ ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ. 25O̍ ge̍ē lɛnyɛnya ē de ɛbɛ̍ obīho̍ ogbigū la ɔga la a̍rɛ̍pa̍ yī ɔnya̍ hi̍ ɔlwɔdu ɔchɛ̄ ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ.”
26Lɛlā nūma̍ ku̍ a̍chi̍kpo̍ yī nū ibi̍īyē grigri kpɛ̍ɛji. E̍ che ɔ̍nyīnū ikpo̍ hīka, ɔ̄nyɛ ɔ̍lɔ chī ge̍ē lɛ ɔhɛ̍ta̍ bɛ̍ɛ̄nɛ̄ ma̍/?
27Iji̍sɔ̄ɔsi ma̍ wā chi̍i̍, hīya aa̍ ɔkɔ hīka, “Ɔla̍ā ma̍, ɔ̄chɛ̄ɛchɛ i̍ ē ya̍ mɛ ni̍ a̍nɛ; i̍ Ɔwɔ ni̍. Wu̍chē oji̍ nɛ, ɔjā nīi Ɔwɔ i̍ ya̍ mɛ ni̍ hɔ̄ ni̍.”
28Ipi̍ta hu oko̍o kpa̍ ka bɛ̍ɛ̄nɛ̄ hīka, “Ma̍ gɛ! Alɔ ma̍ nīi chī tū hī ɔjāha̍-ɔjāha̍ yī alɔ wa̍a̍, pīya wā ge̍ ku wɔ ma̍ bɛ̍ɛ?”
29Iji̍sɔ̄ɔsi koko̍o de wa̍ hīka, “Lēchi̍-lēchi̍, n ā koko̍o de ala̍! Ɔ̄chɛ nīi ge̍ pīya hī wɔlɛ̍ yī nū, kɛ̄ɛ aɛ̍nɛ̍ yī nū, kɛ̄ɛ ɛ̍nɛ̍ yī nū, kɛ̄ɛ a̍dā yī nū, kɛ̄ɛ ayi̍ yī nū, kɛ̄ɛ yɛrɔ̄ yī nū, wu̍chē yī ami ba̍la Wɔ̄kā Ɔlwɔnyɛ yī Ɔwɔ, 30Ɔwɔ ge̍ kla̍ ɔlɔjā ure̍ mwɛbɛ la ɔhɔ̄leyī nūma̍. Ɔlɔjā ge̍ē lɛ āɛ̄jā nūma̍ wa̍a̍ igbohu ɛrwɔ̄ chɔba-chɔba: wɔlɛ̍, aɛ̍nɛ̍, ɛ̍nɛ̍, ayi̍ ba̍la yɛrɔ̄. Ichi̍ chī ge̍ē hɔ̄ de ɔlɔjā i̍ngi̍ngɔ̍ɔ. Yɛchɛ ɔha̍ nīi ge̍ē wā ma̍, ɔlɔjā chī ge̍ē lɛ ɔhɔ̄leyī i̍mɔ̄mɛni̍. 31Āchɛ yɛ̄mɛ̄mɛ̄ nīi yɔbū ma̍ ge̍ē de ē gwīihi; enīi gwīihi ma̍ chī ge̍ē de ē yɔbū.”
O̍mgbo̍mɛta̍ nīi Iji̍sɔ̄ɔsi kɛlā ku̍ ɔpīyaku̍ yī nū ma̍
(Ima̍tiyu 20:17-19; Ilu̍uku 18:31-34)
32Iji̍sɔ̄ɔsi ba̍la a̍chi̍kpo̍ yī nū yɛ la ɔpɔ̄pū yɛ gāa Ijɛru̍sālɛm ma̍, o̍ yɔbɔ̄ɔbū de wa̍ wa̍a̍. O̍ de ya̍ a̍chi̍kpo̍ yī nū lɛbɛ̍bi̍. Āchɛ nīi yɛ la okwi̍ihi yī wā ma̍ de kpo̍ tūuhwi. O̍ hī a̍chi̍kpo̍ yī nū āchɛ igwo̍lɛpa ɛla̍ā ɛra̍ ga ɛkū ge̍ koko̍o yī lɛlā nīi ge̍ē ya̍ ɔ̄ ma̍ de wa̍. 33O̍ ka hīka, “Alɔ yɛ amu yɛ gāa Ijɛru̍sālɛm mɛ̍. E̍ ge̍ē tu̍labɔ̄ hī Ɔyi̍ yī Ɔngrɔ̄ɔ ē de alɛhu̍ aligbe ba̍la āchɛ ongū Lihɔ yī Iju̍u abɔ̍ɔ. E̍ ge̍ē de lɛpɔ̄ ku̍ ɔ̄, ē hɛ̍ ɔ̄ ɔpīyaku̍. E̍ ge̍ē wa̍ābɔ̄ la anu̍ ē de Ɛchɛkɔcha ɛha̍ ji. 34E̍ ge̍ē bī ɔ̄ ya̍, ē ta̍arɛ ē kla̍ anu̍, ē gwō ɔ̄ lijē, o̍bū de ɔ̄ ē ngmo̍. Ɔ̄chī ɔmɛta̍, o̍ chī ge̍ē hye̍ēyī la okū ke̍e̍.”
Lɛlā nīi hla̍ ayi̍ yī Ijɛ̍bɛ̄di anāngrɔ̄ɔ ma̍
(Ima̍tiyu 20:20-28)
35Ije̍mēehi ba̍la Ijɔ̍ɔn nīi - ayi̍ Ijɛ̍bɛ̄di ma̍ wu̍rɛ ga iyɔ̄bū bɛ̍ɛ̄nɛ̄, ge̍ ka de Iji̍sɔ̄ɔsi hīka, “Ɔngūlɛ̄lā be̍e! Lɛlā ɔha̍ hɔ̄ amu nīi alɔ chikpo̍ nīi a ge̍ē ya̍ de alɔ.”
36Iji̍sɔ̄ɔsi che wa̍ ikpo̍ hīka, “Oji̍ nīi ala̍ chikpo̍ nīi n ge̍ē ya̍ de ala̍ ma̍?”
37E̍ koko̍o de ɔ̍ bɛ̍ɛ̄nɛ̄ hīka, “Yɛ̄grāa nīi a ge̍ē hɔ̄ la atɛ̍ la rīgā yī Ɔchwɔ̄lɛ̍ Oro̍ōre̍ yī wɔ ma̍, ya̍ lɛbɛ nīi alɔ ā hɔ̄ bla̍a awɔ; ɔ̄chɛ ɔha̍ ge̍ hɔ̄ la abɔ̄ līre̍ yī wɔ nīi ɔ̄chɛ ɔha̍ ge̍ hɔ̄ la abɔ̄ līfīyē.”
38Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ i̍ je̍ ɔjā nīi ala̍ yɛ aa̍ ē chikpo̍ ma̍ ni̍. Ala̍ ma̍ ge̍ē gwa̍ ɔjā la ɔgba̍galā yī ichi̍ ɔla̍ā nīi ami ge̍ē gwa̍ ma̍ mɛ̍? Kɛ̄ɛ, e̍ ge̍ē hu ala̍ yenyi la ita yenyi ohōhu nīi e̍ ge̍ē hu ami ma̍ ē mɛ?”
39Ije̍mēehi ba̍la Ijɔ̍ɔn de chɛ̄ ka aɛ̍lɛ ge̍ē ya̍ i̍ngɔ̍ɔ ē mɛ.
Iji̍sɔ̄ɔsi ka de wa̍ bɛ̍ɛ̄nɛ̄ hīka, “Lēchi̍ nɛ, ala̍ ge̍ē gwa̍ ɔjā la ɔgba̍galā yī ichi̍ nīi ami ge̍ē gwa̍ ma̍; e̍ chī ge̍ē hu ala̍ yenyi la ita yī yenyi ohōhu nīi e̍ ge̍ē hu ami ma̍. 40Lɛlā yī yāhɔ̄ ɔhɔ̄ la abɔ̄ līre̍ ba̍la abɔ̄ līfīyē yī u ma̍, i̍ ami ge̍ē de a̍ni̍. Ɛbɛ nūma̍ lā de āchɛ nīi Ɔwɔ ya̍ lā de wa̍ ma̍.”
41A̍chi̍kpo̍ yī nū āchɛ igwo̍ ehēhī plɛ̍ɛ̄lā nūma̍ ma̍, e̍ de kpo̍ wɔ̍ɔ̄tū tāa Ije̍mēehi ba̍la Ijɔ̍ɔn. 42Wu̍chē yī ɔla̍ā, Iji̍sɔ̄ɔsi de ɛra̍ hī wā wa̍a̍, koko̍o de wa̍ hīka, “Je̍ka aa̍ ala̍ jo̍ōkū hīka, āchɛ odeyīrɛ ajɛ yī Ɛchɛkɔcha ē ya̍ nīi āchɛ yī wā tū wā lichō. Alɛhu̍ yī wā ē ka de wa̍ lɔkɔ nīi e̍ ge̍ē ya̍ ma̍ nīi e̍ ē ya̍ a̍nɛ. 43Iyī ala̍ ma̍ i̍ ge̍ē lɛ i̍ngɔ̍ɔ ni̍. Ɔ̄chɛ nīi ge̍ē chikpo̍ ge̍ re̍ka ɔmaga lipu̍ yī ala̍, anu̍ ge̍ē hɔ̍chɛ̍ yī ala̍ wa̍a̍ a̍nɛ. 44Ɔ̄chɛ nīi ge̍ chikpo̍ ge̍ē re̍ka ɔlɛhu̍ yī ala̍, anu̍ ge̍ē wɛ ɔfiyɛ yī ala̍ wa̍a̍ a̍nɛ. 45Wu̍chē oji̍ nɛ, Ɔyi̍ yī Ɔngrɔ̄ɔ i̍ wā nīi āchɛ ge̍ē hɔ̍chɛ̍ yī nū ni̍. O̍ wā ge̍ hɔ̍chɛ̍ yī āchɛ ē de ɔhɔ̄leyī yī nū nāa ē de, hɛ̄ɛbɛ ge̍ē de āchɛ wa̍a̍ hīya lɛfiyɛ.”
Iji̍sɔ̄ɔsi ya̍ nīi ɔngrɔ̄ɔ opriyī ɔha̍ de myɛ̍ma̍
(Ima̍tiyu 20:29-34; Ilu̍uku 18:35-43)
46E̍ yɛ ge̍ gbajɛ la ipwo̍gra yī Ijɛ̍rīko bɛ̍ɛ̄nɛ̄. Iji̍sɔ̄ɔsi ba̍la a̍chi̍kpo̍ yī nū yɛ ē pīya hī Ijɛ̍rīko ma̍, āchɛ yɛ̄mɛ̄mɛ̄ pɛ̍ ku ɔ̍. Ɔngrɔ̄ɔ opriyī ɔha̍ nīi re̍ka Ibatime̍yūsi, ɔyi̍ yī Itime̍yūsi ma̍ hɔ̄ abɔ̍ɔ la oko̍o yī ɔpɔ̄pū ē bɔjā. 47Ɔngrɔ̄ɔ ɔla̍ā po̍ hīka Iji̍sɔ̄ɔsi yī Ina̍jārɛ̄ɛti ɔ̍lɔ yɛ ē ga a̍nɛ. Wu̍chē yī ɔla̍ā, o̍ to̍ohwe̍e ka ɔ̍lɔ ge̍, “Iji̍sɔ̄ɔsi, Ībī yī Ide̍bīidi be̍e! Chu̍chu̍u, mlɛ̍ha̍ yī u oo!”
48Āchɛ yɛ̄mɛ̄mɛ̄ ka tāa anu̍ ka ɔ̍lɔ ge̍ cho̍cho̍! Ɔla̍ā kpɛ̍ɛ nīi o̍ tɔ̍ɔna gbōō we̍ a̍nɛ, “Ībī yī Ide̍bīidi be̍e! Mlɛ̍ha̍ yī u oo!”
49Iji̍sɔ̄ɔsi ku̍ jīyarɛ bɛ̍ɛ̄nɛ̄, ka ɛ̍lɛ ge̍ hī ɔ̍lɔ ɛra̍ wā.
E̍ hī ɔngrɔ̄ɔ opriyī ɔla̍ā ɛra̍ ka de ɔ̍ hīka, “Ɔya, tū ūkpɔ̄tū nīi a ā nīichō gɛ; ma̍a o̍ yɛ amu ē hī wɔ ɛra̍ mɛ̍.”
50O̍ wa̍ābɔ̄ la ɔ̄pa̍ ɔta̍kla̍ yī nū lā ga ɛkū ɔpɔ̄ɔpɛ̄, nyɔ̄ gbru wā dikpo̍ba̍ Iji̍sɔ̄ɔsi.
51Iji̍sɔ̄ɔsi che ɔ̍ ikpo̍ hīka, “Oji̍ nīi a chikpo̍ nīi n ge̍ē ya̍ de wɔ ma̍?”
Ɔngrɔ̄ɔ ɔla̍ā ka de ɔ̍ hīka, “Ādā, n chikpo̍ nīi a ge̍ē ya̍ u nīi n de ē myɛ̍ma̍.”
52Iji̍sɔ̄ɔsi ka de ɔ̍ hīka, “Pīya gɛ, ma̍a ɔtū ode chōche yī wɔ hɛ̍ wɔ ta̍ mɛ̍!”
Ɔpɔ̄ɔpɛ̄, ɔngrɔ̄ɔ opriyī ɔla̍ā de myɛ̍ma̍ ke̍e̍. O̍ pīya yɛ abɔ̍ɔ tāa Iji̍sɔ̄ɔsi la ɔpɔ̄pū.
Currently Selected:
Ima̍aki 10: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
