Ima̍aki 7

Lɛlā yī a̍dɔ̄kū ongōngū

(Ima̍tiyu 15:1-9)

1Āchɛ yī Ifa̍rasīi ɛha̍ ba̍la āchɛ ongū Lihɔ yī Iju̍u bū la Ijɛru̍sālɛm wā dikpo̍ba̍ Iji̍sɔ̄ɔsi. 2E̍ ma̍ hīka a̍chi̍kpo̍ yī ɔ̍lɔ yɛ ē re̍ ɔjā yī lɛbi̍. Ɔla̍ā re̍ka e̍ i̍ na abɔ̄ o̍bū ni̍.

3Wu̍chē oji̍ nɛ, Āchɛ yī Ifa̍rasīi wa̍a̍ ba̍la Iju̍u ehēhī ē yɛ̍ɛ̄lā yī ɔchɔ̍ɔwɔ yī wā nīi e̍ nāa bū la abɔ̄ yī a̍dɔ̄kū yī wā ma̍. E̍ i̍ ge̍ na abɔ̄ lɔkɔ nīi e̍ ē ya̍ kpakpa ma̍ ni̍, e̍ i̍ ē re̍ ɔjɔ̄jā ni̍. 4E̍ ge̍ cha la lihī, ɔ̍chi̍kpa̍kpa̍ e̍ gwā lɛbi̍ wa̍a̍ o̍bū; nɛ̄ni̍ e̍ i̍ ē re̍ ɔjɔ̄jā ni̍. Lihɔ yī a̍dɔ̄kū yī wā lyɛ̄mɛ̄mɛ̄ nīi e̍ ē gbō ma̍. Ɛha̍ re̍ka ɔgwlɛ̄bi̍ hī ɛjā bāa ɔgba̍galā, yɛ̄hī, u̍kpu̍ūhā yī ikɔ̍pa ba̍la ɛjā ɔgbwɔlā ma̍.

5Āchɛ yī Ifa̍rasīi ba̍la āchɛ ongū lihɔ yī Iju̍u ɛla̍ā che Iji̍sɔ̄ɔsi ikpo̍ bɛ̍ɛ̄nɛ̄ hīka, “Oji̍ - ohu̍ nīi a̍chi̍kpo̍ yī wɔ i̍ ē yɛ̍ɛ̄lā yī ɔchɔ̍ɔwɔ yī alɔ nīi alɔ ngū bū la abɔ̄ yī a̍dɔ̄kū yī alɔ ni̍ ma̍? A̍chi̍kpo̍ yī wɔ chōo̍chē re̍ ɔjā la abɔ̄ yī lɛbi̍?”

6Iji̍sɔ̄ɔsi hīya aa̍ ɔkɔ hīka, “Lēchi̍, lɛlā nīi Ayisa̍ya ka ku̍ ala̍ la īpū yī nū ma̍ ku kpa̍a! Ala̍ - āchɛ ɔkɛlā ɔha̍ chōo̍chē ya̍ ɔha̍ lɔkɔ nīi o̍ ka hɔ̄ ma̍ ma̍ a̍nɛ:

“ ‘Āchɛ nūma̍ ē de otūlichō de u la oko̍ko̍o ji.

Ūkpɔ̄tū yī wā lā hwɛɛ hī u.

7Otūlichō yī u nīi e̍ ē ya̍ ma̍ - a̍ji nɛ.

Wu̍chē oji̍ nɛ, e̍ ē ngū āchɛ lihɔ yī āchɛ̄ɛchɛ,

bɔ̄ɔjā nīi o̍ - lɛlā yī Ɔwɔ nɛ̄ ma̍.

Ami Ɔwɔ ka i̍ngɔ̍ɔ a̍nɛ.’

8“Ala̍ tu̍ Lihɔ yī Ɔwɔ lā ga ɛkū hɛ̄ɛbɛ ge̍ē ta̍ābɔ̄ ku̍ lɛlā yī āchɛ̄ɛchɛ ongōngū a̍nɛ.

9“Ala̍ lɛ ɔpɔ̄pū yī a̍chālā kpa̍a nīi ala̍ ē bī ta̍ Lihɔ yī Ɔwɔ ma̍, hɛ̄ɛbɛ ge̍ē jɔ̍ɔkɔ ē ta̍ābɔ̄ ku̍ lɛlā yī ɔchɔ̍ɔwɔ yī ala̍. 10Ma̍ gɛ! Imo̍sīisi ka hīka, ‘Tū a̍dā yī wɔ ba̍la ɛ̍nɛ̍ yī wɔ la ichō. Ɔ̄chɛ nīi ge̍ kɛlā ɔdwɔ̄bi̍ tāa a̍dā yī nū kɛ̄ɛ ɛ̍nɛ̍ yī nū, e̍ ge̍ de ɔlɔjā ngmo̍.’ 11Ala̍ chī ka hīka, ɔ̄chɛ ɔ̍lɔ ge̍ da a̍dā yī ɔ̍lɔ kɛ̄ɛ ɛ̍nɛ̍ yī ɔ̍lɔ hīka, ‘Ɔjā nīi n lɛ ge̍ē de ē tū wɔ wɔbɔ̄ ma̍ - Ikɔ̍ban bɛ̍ɛ̄nɛ̄ nɛ.’ Ochi̍chi̍ yī Ikɔ̍ban re̍ka, ‘Ɔjā ode kɔ̄ de Ɔwɔ.’ 12Bū la ɛbɛ ɔla̍ā, ala̍ i̍ chɛ̄ nīi o̍ tū a̍dā yī nū kɛ̄ɛ ɛ̍nɛ̍ yī nū wɔbɔ̄ gɛ ni̍. 13Bū la ɔpɔ̄pū nūma̍, ala̍ i̍ ē nāa lɛlā yī Ɔwɔ bāa ɔjɔ̄jā ma̍ ni̍, wu̍chē yī lɛlā yī a̍dɔ̄kū yī ala̍ la ongōngū. Ita yī lɛlā oli̍ngɛ̍ɛ̄nɛ̄ lyɛ̄mɛ̄mɛ̄ nīi ala̍ ē ya̍ ma̍.”

Ɔjā nīi ya̍ nīi ɔ̄chɛ de ē bri̍īnyī ma̍

(Ima̍tiyu 15:10-20)

14Iji̍sɔ̄ɔsi gba̍a de ɛra̍ hī wā, koko̍o de wa̍ hīka, “Ala̍ wa̍a̍, ala̍ ā darɔ̄ku lɛlā nūma̍ nīi ala̍ ge̍ po̍ ɔ̄ la ochi̍chi̍! 15Ɔjɔ̄jā i̍ ē bū la yɛchɛ ē gāa lipu̍ yī ɔ̄chɛ ge̍ē ya̍ nīi o̍ ē de ē bri̍īnyī mɛ ni̍. Ɔjā nīi ē bū lipu̍ wā la yɛchɛ ma̍, anu̍ ē ya̍ nīi ɔ̄chɛ de ē bri̍īnyī a̍nɛ. 16[Ɔ̄chɛ nīi ge̍ tū arɔ̄ ɔplɛ̍ɛ̄lā ma̍ ge̍ po̍ gɛ!]”

17Iji̍sɔ̄ɔsi pīya hī āchɛ ɛla̍ā ga u̍nu̍ ma̍, a̍chi̍kpo̍ yī nū che ɔ̍ ikpo̍ yī ochi̍chi̍ yī wɔ̄chīije ɔla̍ā. 18O̍ da wa̍ hīka, “O̍ re̍ka ala̍ i̍ je̍ ochi̍chi̍ yī nū ni̍ kpa̍a? Ala̍ i̍ jo̍ōkū i̍ngɔ̍ɔ ni̍? Ɔjɔ̄jā i̍ ē bū la yɛchɛ ē gāa lipu̍ yī ɔ̄chɛ ge̍ē ya̍ nīi ɔ̄chɛ de ē bri̍īnyī ni̍. 19Wu̍chē oji̍ nɛ, o̍ i̍ chɛ̄ ga ūkpɔ̄tū yī ɔ̄chɛ ni̍; ubu nīi o̍ ē yɛ a̍nɛ. O̍ ē chī bīyɛchɛ ē hī ibi̍īyē ke̍e̍.” Bū la lɛlā nūma̍, Iji̍sɔ̄ɔsi yɛ ē de ē chabɔ̄ hīka ojōre̍ wa̍a̍ ɔ̍lɔ hwɔhi la oro̍ōre̍.

20Iji̍sɔ̄ɔsi gba̍a ka bɛ̍ɛ̄nɛ̄ hīka, “Ɔjā nīi ē bū lipu̍ yī ɔ̄chɛ ē wā la yɛchɛ ma̍, anu̍ ē ya̍ nīi ɔ̄chɛ de ē bri̍īnyī a̍nɛ. 21Wu̍chē oji̍ nɛ, bū abɔ̍ɔ lipu̍ yī ūkpɔ̄tū yī āchɛ̄ɛchɛ nīi ɛri̍ya̍ yī lɛlā ɔdwɔ̄bi̍ ɔyɔ̍ɔ̄ya̍ wa̍a̍ ē bīyɛchɛ a̍nɛ: Ɔnyā ɔla̍ bɛ̍bɛ̍bɛ̍, uwī owōwī, āchɛ ongmo̍ōngmo̍, 22ɔ̍bɔ̍ɔ̄nyā, ānyānyi ɔyɔ̍ɔ̄ya̍, lɛlā abi̍ ita ɔha̍lɔha̍ wa̍a̍, yɛ̍gra̍ ɔgla̍ āchɛ, a̍kpla yī lɛlā ɔyɔ̍ɔ̄ya̍, uji otū āchɛ, lɛlā abi̍ ɔka ku̍ āchɛ, ɛba̍achɛ ɔjɔ̄jɛ̄ ba̍la i̍bobo ɔyɔ̍ɔ̄ya̍. 23Lɛlā ɔdwɔ̄bi̍ ɔyɔ̍ɔ̄ya̍ nūma̍ wa̍a̍ ē bīyɛchɛ ē bū lipu̍ yī ɔ̄chɛ. Aa̍ ē ya̍ nīi ɔ̄chɛ ē de ē bri̍īnyī a̍nɛ.”

Ɔnyā nīi de ɔtū che Iji̍sɔ̄ɔsi ma̍

(Ima̍tiyu 15:21-28)

24Bɛ̍ɛ̄nɛ̄, Iji̍sɔ̄ɔsi pīya bū abɔ̍ɔ ga ajɛ yī Ita̍ya. O̍ pīya tū la u̍nu̍ ɔha̍, o̍ i̍ chikpo̍ nīi ɔ̄chɔ̄chɛ ge̍ jo̍ōkū hīka ɔ̍lɔ hɔ̄ abɔ̍ɔ ni̍. O̍ i̍ chī ge̍ē trɛ̍ba ē hī āchɛ ē mɛ ni̍. 25Ɔnyā ɔha̍ hɔ̄ abɔ̍ɔ; ɔyi̍ yī nū ɔnɔ̄nyā ē ku̍ yapri̍ija ɔdwɔ̄bi̍. Ɔnyā ɔla̍ā po̍ ohu yī Iji̍sɔ̄ɔsi ma̍, o̍ wā dikpo̍ba̍ ɔ̄ ge̍ de ūnōowu tū ajɛ la apli̍kpo̍ yī nū. 26Ɔnyā ɔla̍ā - Ɛchɛkɔcha nɛ. E̍ ma ɔ̄ la Ifoni̍siya la ɔcha yī Isi̍riya. O̍ ra̍ābɔ̄ de Iji̍sɔ̄ɔsi kpɛ̍ɛ ka ɔ̍lɔ ge̍ de yapri̍ija ɔdwɔ̄bi̍ ɔla̍ā nū hī ɔyi̍ yī anu̍. 27Iji̍sɔ̄ɔsi hīyɔkɔ hīka, “Alɔ ā bī de ojōre̍ de aywɔ̍lɛ̍ o̍bū. O̍ i̍ ngma̍ nīi ɔ̄chɛ ē nāa ojōre̍ yī aywɔ̍lɛ̍ de yoō ni̍.”

28Ɔnyā ɔla̍ā hīya anu̍ ɔkɔ hīka, “Ādā, o̍bū je̍ka yoō nīi ē gblāa la ihi̍yajɛ yī okpōkōlō ma̍ ē re̍ irwi yī ojōre̍ yī aywɔ̍lɛ̍!”

29Bɛ̍ɛ̄nɛ̄, Iji̍sɔ̄ɔsi da ɔnyā ɔla̍ā hīka, “Wu̍chē yī ɔkɔ yī lɛlā nīi a hīya ma̍, pīya ga wɔlɛ̍ gɛ! Yapri̍ija ɔdwɔ̄bi̍ ɔla̍ā bīyɛchɛ hī ɔyi̍ yī wɔ mɛ̍.”

30Ɔnyā ɔla̍ā pīya ga wɔlɛ̍ ma̍, o̍ ma̍ hīka yapri̍ija ɔdwɔ̄bi̍ ɔ̍lɔ ngmɛ̍ɛchɛ hī ɔyi̍ i̍ngɔ̍ɔ ke̍e̍ mɛ̍. Ɔyi̍ gbo abɔ̍ɔ la u̍bwɔ̍ kpɛ̍kpɛ̍kpɛ̍.

Iji̍sɔ̄ɔsi nyiya ɔngrɔ̄ɔ ɔdarɔ̄ gba̍a gwōko̍o ɔha̍

31Iji̍sɔ̄ɔsi pīya hī ajɛ yī Ita̍ya ga la Isa̍yi̍dɔn ga Li̍hu yī Iga̍līli. E̍ ga la ɔpɔ̄pū yī ɔcha yī ipwo̍gra Ogblīigwo̍. 32Āchɛ ɛha̍ bī ɔngrɔ̄ɔ ɔha̍ nīi gwōko̍o gba̍a darɔ̄ ma̍ wā ge̍ de Iji̍sɔ̄ɔsi. E̍ ra̍ābɔ̄ de ɔ̍ ka ɔ̍lɔ ge̍ de abɔ̄ che ɔ̍lɔ lɛhu̍. 33Iji̍sɔ̄ɔsi de abɔ̄ ku̍ ɔngrɔ̄ɔ ɔla̍ā ge̍ rɛ la ɛkū hī ɔgbādu, de ayi̍kābɔ̄ gatū ɔ̄ la arɔ̄ ɛpɛpa, ku arɛ yī oko̍o re̍tū ɔ̄ la u̍blɛ̍ɛ̄nyī. 34Iji̍sɔ̄ɔsi hu eyī hwa̍a̍ ga ichō hīiru, ka hīka ɔ̍lɔ ge̍, “Ɛ̍fata.” Ochi̍chi̍ yī ɔla̍ā re̍ka, “Lwāa tɔ̍ɔ̄ta̍.”

35Ɔpɔ̄ɔpɛ̄, arɔ̄ yī ɔngrɔ̄ɔ ɔla̍ā lwāa, u̍blɛ̍ɛ̄nyī yī nū wī ta̍. O̍ kū abɔ̍ɔ ē kɛlā bāa ɔcha̍cha̍ ma̍ ɔpɔ̄ɔpɛ̄. 36Bū la ɛbɛ ɔla̍ā, Iji̍sɔ̄ɔsi ta̍ wā ɔna ka ɛ̍lɛ ge̍ e̍e koko̍o yī lɛlā ɔla̍ā de ɔ̄chɔ̄chɛ ni̍. Onīi o̍ ka ɛ̍lɛ ge̍ e̍e ka ni̍ ma̍ kpɛ̍ɛ nīi e̍ ka ga iyɔ̄bū iyɔ̄bū a̍nɛ. 37Āchɛ nīi plɛ̍ɛ̄lā ɔla̍ā wa̍a̍ ma̍, o̍ lɛ wa̍ lɛbɛ̍bi̍ kpɛ̍ɛji. E̍ kā ɔ̄ ɔkɔ̄kā hīka, ɔ̍lɔ ē yɛ̍ɛ̄lā mɛlā yɛ̍yɛ̍ kpa̍a! Ɔ̍lɔ ē ya̍ nīi ɔdarɔ̄ ɔ̍lɔ de ē plɛ̍ɛ̄lā, nīi ogwōko̍o ɔ̍lɔ de ē kɛlā ke̍e̍.

Currently Selected:

Ima̍aki 7: YBASR

Highlight

Copy