U̍ku̍rɔ̍ yī Alɛrɔ̄ 25

Ipɔ̍ɔli nāa lɛpɔ̄ yī nū pīya ga ɛbɛ yī Isi̍sa

1Ifɛ̍si̍tusi gbajɛ wā la ajɛ ɔla̍ā re̍ ɔ̄chī ɛta̍ ma̍, o̍ wā ge̍ pīya bū la Isi̍sari̍ya ga Ijɛru̍sālɛm. 2Bɛ̍ɛ̄nɛ̄, alɛhu̍ aligbe ba̍la ɛgabɔ̄ yī Iju̍u gāa ge̍ koko̍o yī lɛlā nīi e̍ lɛ ba̍la Ipɔ̍ɔli ma̍ de ɔ̍. E̍ ra̍ābɔ̄ de Ifɛ̍si̍tusi ka ɔ̍lɔ ge̍ chu̍chu̍u! 3Ɔ̍lɔ ge̍ ya̍ hwɔhi hwɔhi de aa̍. Ɔ̍lɔ ge̍ ka nīi ɛ̍lɛ ge̍ bī Ipɔ̍ɔli wā la Ijɛru̍sālɛm. Iju̍u ɛla̍ā de ɔmɔ̄miya ya̍ lɔ̄lā mɛ̍. E̍ ka hɛ̄ɛbɛ nīi e̍ ge̍ē de Ipɔ̍ɔli ē ngmo̍ la ɔpɔ̄pū. 4Ifɛ̍si̍tusi koko̍o de wa̍ hīka, “Ipɔ̍ɔli ma̍, e̍ ku̍ ɔ̄ tū abɔ̍ɔ la igbakɔbɔ la Isi̍sari̍ya we̍. Ami ɔlɔjā chī cha yɛ amu yɛ gānyɔ̄ lipu̍ yī ɔ̄chī ɛpɛpa nūma̍. 5Alɛhu̍ yī ala̍ ge̍ wā la Isi̍sari̍ya tāa ami gɛ. Ipɔ̍ɔli ge̍ yɛ̍ɛ̄lā abi̍ ɔha̍, hɛ̄ɛbɛ nīi e̍ klɛpɔ̄ ba̍la anu̍ abɔ̍ɔ.”

6Ifɛ̍si̍tusi gba̍a hɔ̄ abɔ̍ɔ gbajɛ la ɔ̄chī arāata̍ kɛ̄ɛ igwo̍ o̍bū nīi o̍ cha ga Isi̍sari̍ya. La eyī ɔnyɔ̄nyā yī nū, o̍ pīya ga ɛbɛ yī lɛpɔ̄ yī nū ge̍ hyāhɔ̄. O̍ ka hīka ɛ̍lɛ ge̍ bī Ipɔ̍ɔli wā abɔ̍ɔ. 7Ipɔ̍ɔli gbajɛ wā ma̍, Iju̍u nīi bū la Ijɛru̍sālɛm ma̍ yarɛ ta̍kakatū ɔ̄, kɛlā yɛ̄mɛ̄mɛ̄ ke̍ke̍ni̍ ke̍ke̍ni̍ ku̍ Ipɔ̍ɔli. E̍ i̍ chī ya̍ ochi̍chi̍ lɛlā nīi ge̍ē chabɔ̄ hīka ɔ̍lɔ - ichɛ̄ɛhi nɛ ma̍ ni̍. 8Ipɔ̍ɔli nyiya iyī nū bɛ̍ɛ̄nɛ̄ hīka, “N i̍ bīya lihɔ yī Iju̍u ni̍; n i̍ chī bīya lihɔ yī u̍nu̍ yī Ɔwɔ kɛ̄ɛ iyī Isi̍sa nīi - Ɔchwɔ̄lɛ̍ Ɔnɔ̄kɔ̄kū yī Iro̍om ma̍ ni̍.”

9Ifɛ̍si̍tusi yɛ ē ya̍ lɛbɛ nīi lɛlā yī nū ge̍ē hi Iju̍u ɔtū. Wu̍chē yī ɔla̍ā, o̍ chōo̍chē che Ipɔ̍ɔli ikpo̍ hīka, ɔ̍lɔ chikpo̍ ge̍ē gāa Ijɛru̍sālɛm nīi anɔ̍lɔ ē wā ge̍ē klɛpɔ̄ yī ɛ̍lɛ abɔ̍ɔ bɛ̍ɛ̄nɛ̄ ni̍?

10Ipɔ̍ɔli hīyɔkɔ bɛ̍ɛ̄nɛ̄ hīka, “Ɛbɛ ɔklɛpɔ̄ nīi - iyī Isi̍sa, Ɔchwɔ̄lɛ̍ Ɔnɔ̄kɔ̄kū yī ajɛ yī Iro̍om wa̍a̍ ma̍ nīi n rɛ ma̍ a̍nɛ. Anu̍ ge̍ē nāa lɛpɔ̄ yī u ē ka bɛ̍ɛ̄nɛ̄ a̍nɛ. N i̍ yɛ̍ɛ̄lā abi̍ ɔha̍lɔha̍ ku̍ Iju̍u ni̍; awɔ ɔlɔjā jo̍ōkū i̍ngɔ̍ɔ hwɔhi hwɔhi. 11N ge̍ bīya lihɔ ɔha̍, yɛ̍ɛ̄lā ɔha̍ nīi ngma̍ nīi e̍ ge̍ē de u ē ngmo̍, n i̍ ra̍ābɔ̄ yī ɔhɔ̄leyī yī u ni̍. Lɛlā nīi e̍ chī yɛ aa̍ ē ka ē ku̍ u wa̍a̍ ma̍ i̍ ge̍ - ichɛ̄ɛhi ni̍, ɔ̍lɔma̍ ɔ̄chɔ̄chɛ i̍ lwɔhu̍ ge̍ē wa̍ābɔ̄ la ami ē de wa̍ mɛ ni̍. Ɔjā nīi n chikpo̍ ma̍, Isi̍sa ge̍ē klɛpɔ̄ yī u nūma̍ bɛ̍ɛ̄nɛ̄ a̍nɛ.”

12Ifɛ̍si̍tusi wā ge̍ ka̍rɔ̄ ba̍la ɛgabɔ̄ yī nū wa̍a̍ bɛ̍ɛ̄nɛ̄ ma̍, o̍ hīya Ipɔ̍ɔli ɔkɔ hīka ɔ̍lɔ hwɔhi. Ɔ̍lɔ chikpo̍ ka Isi̍sa ɔ̍lɔ ge̍ē klɛpɔ̄ nūma̍ a̍nɛ ma̍, ɛbɛ yī Isi̍sa nīi ɔ̍lɔ yɛ gāa bɛ̍ɛ̄nɛ̄ a̍nɛ.

E̍ bī Ipɔ̍ɔli ga iyɔ̄bū yī A̍grīpa ba̍la Ibɛni̍isi

13I̍chi̍chɛ ɔha̍, A̍grīpa Ipwɔ̍lɛ̍ ba̍la Ibɛni̍isi wā la Isi̍sari̍ya ge̍ē ma̍ Ifɛ̍si̍tusi ē ta̍ ɔ̄ ogo̍go̍o. 14E̍ hɔ̄ abɔ̍ɔ tāa anu̍ gbajɛ la ɔ̄chī ɛmɛ̍ɛmla̍a o̍bū, Ifɛ̍si̍tusi wā ge̍ koko̍o yī lɛlā yī Ipɔ̍ɔli de A̍grīpa bɛ̍ɛ̄nɛ̄ hīka, “Ala̍ ma̍ ko̍ō! Ifi̍līisi pīya hī ɔngrɔ̄ɔ ɔha̍ tū amu la igbakɔbɔ. 15Yɛ̄grāa nīi n ga Ijɛru̍sālɛm īchāha̍ ma̍, alɛhu̍ yī aligbe ba̍la ɛgabɔ̄ yī Iju̍u wā dikpo̍ba̍ u. E̍ kɛlā abi̍ yɛ̄mɛ̄mɛ̄ ku̍ ɔngrɔ̄ɔ ɔla̍ā ka ɔ̍lɔ bīya lihɔ. E̍ ka amɔ̍lɔ ge̍ de lɛpɔ̄ ku̍ ɔ̍lɔ, ya̍ ɔ̍lɔ ichi̍. 16N koko̍o de wa̍ hīka āchɛ yī Iro̍om i̍ ya̍ i̍ngɔ̍ɔ ni̍. E̍ i̍ ē de lɛpɔ̄ ku̍ ɔ̄chɛ ē ya̍ ɔ̄ ichi̍ ji ni̍; ɔ̍chi̍kpa̍kpa̍ ɔlɔjā ba̍la āchɛ nīi bī lɛlā tāa anu̍ ma̍ gblāa lɛpɔ̄ o̍bū. Bū la ɛbɛ ɔla̍ā, ɔlɔjā lɛ yɛ̄grāa ē nyiyoko̍o iyī nū. 17Wu̍chē yī ɔla̍ā, e̍ wā amu lɛpɔ̄ la ɛbɛ yī u: La eyī ɔnyɔ̄nyā yī nū, n pīya ge̍ hɔ̄ la ɛbɛ yī lɛpɔ̄ ɔpɔ̄ɔpɛ̄. N i̍ ya̍ irwɛ ni̍ kpɛkpɛ. N ka nīi e̍ de ɔngrɔ̄ɔ ɔ̍lɔma̍ bī wā. 18Āchɛ ɛla̍ā nīichō yarɛ bɛ̍ɛ̄nɛ̄. Lɛlā ɔdwɔ̄bi̍ nīi n gbɛri̍ya̍ wa̍a̍ hīka e̍ ge̍ē ka ē ku̍ ɔ̄ ma̍, e̍ i̍ ka ni̍. 19Ahu̍ yī lɛlā yī ɔpɔ̄pā Ɔwɔ yī wā nīi e̍ chōo̍chē ka a̍nɛ. Ahu̍ yī lɛlā yī ɔngrɔ̄ɔ ɔha̍ nīi re̍ka Iji̍sɔ̄ɔsi nīi pīyaku̍ nīi Ipɔ̍ɔli chī ka ɔ̍lɔ e̍e hɔ̄leyī ma̍ nɛ. 20Ami i̍ chī je̍ lɔkɔ nīi n ge̍ē klɛpɔ̄ oli̍ngɔ̍ɔ ni̍. Wu̍chē yī ɔla̍ā, n che Ipɔ̍ɔli ikpo̍ ka o̍ ge̍ē gāa Ijɛru̍sālɛm nīi e̍ ē de lɛlā nūma̍ ka abɔ̍ɔ bɛ̍ɛ̄nɛ̄ ni̍? 21Ipɔ̍ɔli ra̍ābɔ̄ ka anɔ̍lɔ ge̍ē tū amu nīi ɛ̍lɛ ē deyīrɛ anu̍ kpɛɛ nīi Isi̍sa ɔ̍lɔ klɛpɔ̄ yī anu̍. O̍ de lɛpɔ̄ yī nū nāa ga ɛbɛ yī Isi̍sa. Wu̍chē yī ɔla̍ā nīi n ka nīi o̍ hɔ̄ aa̍ nīi e̍ ē deyīrɛ ɔ̍, kpɛɛ nīi n ge̍ē de ɔ̍ tɛ̄rɔ̄ hu Isi̍sa a̍nɛ.”

22A̍grīpa da Ifɛ̍si̍tusi ka anɔ̍lɔ chikpo̍ ge̍ē plɛ̍ɛ̄lā la oko̍o yī ɔngrɔ̄ɔ ɔ̍lɔma̍ la abɔ̄ yī anu̍ ɔlɔjā.

23Ɔ̄chī ɔ̍mɛpa, A̍grīpa ba̍la Ibɛni̍isi wā ge̍ pīya gānyɔ̄. E̍ tū ɔjā la ibi̍īyē kpɛ̍ɛji. Āchɛ kpo̍ bāa ɔkɛ̍kɛkɛ̍ ma̍ tū wā. E̍ chɛ̄ ga u̍twɔ̄ɔda ɔnɔ̄kɔ̄kū ɔla̍ā la ɛbɛ nīi āchɛ wa̍a̍ ē grēeyī ma̍, aa̍ ba̍la alɛhu̍ yī āchɛ ɛkplɛ̍wu̍ ba̍la āchɛ ɔnɔ̄kɔ̄kū yī ipwo̍gra ɔla̍ā. Ifɛ̍si̍tusi ka grāa āchɛ yī nū ɔpɔ̄ɔpɛ̄, e̍ bī Ipɔ̍ɔli wā abɔ̍ɔ. 24Lɛlā nīi Ifɛ̍si̍tusi koko̍o de wa̍ o̍bū ma̍ hɔ̄ ma̍ a̍nɛ. “Ādā A̍grīpa ba̍la ala̍ āchɛ nīi gblāa ma̍ wa̍a̍ ba̍la alɔ ma̍! Je̍ka aa̍ ala̍ ma̍ ɔngrɔ̄ɔ nīi rɛ ma̍ ma̍! Anu̍ nīi Iju̍u wa̍a̍ amu u̍ma̍ ba̍la Ijɛru̍sālɛm grēeyī tū ɔ̄, kɛlā ku̍ ɔ̄ la ikpo̍ yī u a̍nɛ. E̍ ya̍ ojiya ka ɛ̍lɛ ge̍ de ɔ̍lɔ ngmo̍! 25Ami i̍ chī ma̍ lɛlɛ̄lā nīi o̍ ya̍ abi̍ nīi ngma̍ lɛbɛ nīi o̍ ge̍ē ku̍ rikū ɔla̍ā ni̍. Anu̍ ɔlɔjā de lɛpɔ̄ yī nū nāa ga ɛbɛ yī Isi̍sa mɛ̍ ma̍, n chikpo̍ ge̍ē de ɔ̍ tɛ̄rɔ̄ gāa. 26N i̍ chī je̍ lɛlɛ̄lā kpakpa nīi n ge̍ē ka ē tū la īpū ē tɛ̄rɔ̄ hu Isi̍sa ma̍ ni̍. Wu̍chē yī ɔla̍ā nīi n bī ɔ̄ wā ma̍ la iyɔ̄bū yī ala̍ a̍nɛ. Iyɔ̄bū yī awɔ pi̍i̍ nɛ, Ādā A̍grīpa! A ge̍ plɛ̍ɛ̄lā la oko̍o yī nū mɛ̍, n gbɛri̍ya̍ kɛlā ɔha̍ ge̍ē hɔ̄ nīi n ē ta̍ tū la īpū ɔ̍lɔma̍. 27Wu̍chē oji̍ nɛ, n gbɛri̍ya̍ ka ɔ̄chɛ ge̍ de oligbakɔbɔ nāa tɛ̄rɔ̄ ji i̍ngɔ̍ɔ, nīi o̍ i̍ ge̍ kɛlā abi̍ nīi o̍ ya̍ ma̍ ni̍, o̍ i̍ lɛ kpakpa la eyī ni̍.”

Currently Selected:

U̍ku̍rɔ̍ yī Alɛrɔ̄ 25: YBASR

Highlight

Copy