U̍ku̍rɔ̍ yī Alɛrɔ̄ 24

Lɛlā nīi Iju̍u bī pīyeyīta̍ Ipɔ̍ɔli ma̍

1Ɔ̄chī ɔmɛrwɔ̄ yī nū, Anana̍yāasi nīi - A̍dā Aligbe ma̍ pīya ga abɔ̍ɔ ga Isi̍sari̍ya. O̍ bī ɛgabɔ̄ ɛha̍ ba̍la ilo̍ya ɔha̍ nīi re̍ka Itɛ̍tūlusi ma̍ yɛ. E̍ gāa ga ipwɔ̍ɔ̄nū ge̍ kū la okoko̍o yī lɛlā nīi Ipɔ̍ɔli ya̍ ma̍ de Ādā Ifi̍līisi bɛ̍ɛ̄nɛ̄. 2E̍ de Itɛ̍tūlusi nīi - ilo̍ya yī wā ma̍ hɛ̄ra̍ wā abɔ̍ɔ. Ilo̍ya ɔla̍ā de oko̍o nāa lɛlā abi̍ yī Ipɔ̍ɔli bɛ̍ɛ̄nɛ̄ hīka,

“Ādā Ifi̍līisi, Ɔgāmode! Lɛlā ojo̍ōje̍ nīi ya̍ nīi a bī ajɛ yɛ̍yɛ̍ ma̍ - ohu̍ nīi ɛbɛ ogbodɔ̍dɔ̍ hɔ̄ ma̍ kpɛɛ de alɔ a̍nɛ. Ɔhīyabɔ̄ yī lɛlā yɛ̄mɛ̄mɛ̄ nīi ge̍ē bī ɔnɛ̄ɛhɛhi ge̍ē de ɔcha yī alɔ ma̍ hɔ̄ u̍ma̍ama wu̍chē yī wɔ. 3Alɔ ē lɛ ɔwɔ̄wīyā wu̍chē yī lɛlā nūma̍ myɛ̄grāa-myɛ̄grāa la ɛbɛha̍ ɛbɛha̍ wa̍a̍. Alɔ da wɔ o̍be kpɛ̍ɛji, Ādā. 4N i̍ chikpo̍ ge̍ē nāa awɔ yɛ̄grāa la lɛlā ɔkɔ̄ka kpradada ni̍. A chī ge̍ē chu̍chu̍u! A ge̍ē plɛ̍ɛ̄lā ɔha̍ pi̍nyɛ̍ tāa alɔ! 5Alɔ ma̍ ɔngrɔ̄ɔ nīi rɛ ma̍ ma̍, ɔ̄chɛ ɔta̍tu̍tu̍ yī lɛlā dwɔ̄bi̍ dwɔ̄bi̍ nɛ. Anu̍ ē ta̍tu̍tu̍ yī lɛlā ogbōgbō ē de Iju̍u nīi gblāa la ɔcha ɔha̍lɔha̍ wa̍a̍ ma̍ a̍nɛ. Anu̍ chī - ɔlɛhu̍ yī ribi yī āchɛ nīi re̍ka Alina̍jārɛ̄ɛti ma̍ a̍nɛ. 6O̍ kū yɛ ge̍ de u̍nu̍ yī Ɔwɔ yī alɔ ē bīya la lɛlā abi̍ ɔyɔ̍ɔ̄ya̍, anu̍ nīi alɔ de ɔ̍ ku̍ a̍nɛ. [Alɔ yɛ ge̍ klɛpɔ̄ yī nū lɔkɔ nīi lihɔ yī alɔ ka ma̍; 7a̍dā icho̍ojiya nīi re̍ka Ili̍sīyasi ma̍ wā wɔhu̍ wɔhu̍ ge̍ de ɔ̍ bī pīya. 8O̍ koko̍o de āchɛ nīi bī lɛlā tū anu̍ ma̍ ka ɛ̍lɛ ge̍ wā ge̍ ka la apli̍kpo̍ yī aɔ̍lɔ.] Awɔ ɔlɔjā ge̍ u̍tu che ɔngrɔ̄ɔ nūma̍ ikpo̍, a ge̍ ma̍ lɛlā nūma̍ wa̍a̍ nīi alɔ ka ku̍ ɔ̄ ma̍.” 9Iju̍u ehēhī titi tū oko̍o bɛ̍ɛ̄nɛ̄ hīka lɛlā nīi ɔ̍lɔ ka wa̍a̍ ma̍, i̍ngɔ̍ɔ ke̍e̍ nīi ɔ̍lɔ lɛ a̍nɛ.

Lɛpɔ̄ nīi Ipɔ̍ɔli ka la iyɔ̄bū yī Ifi̍līisi ma̍

10Ɔ̄chɛ odeyīrɛ ajɛ ɔla̍ā da Ipɔ̍ɔli ka ɔ̍lɔ ge̍ īcha la iyī ɔ̍lɔ gɛ! Lɛlā yī Ipɔ̍ɔli hɔ̄ ma̍ a̍nɛ:

“N jo̍ōkū hīka awɔ ē klɛpɔ̄ yī ɔcha nūma̍ gbi̍chɛ gbi̍chɛ a̍nɛ. Wu̍chē yī ɔla̍ā, n lɛ ɔwɔ̄wīyā kpɛ̍ɛji nīi n rɛ ma̍ ge̍ē koko̍o yī lɛpɔ̄ yī u la iyɔ̄bū yī wɔ ma̍. 11Awɔ ɔlɔjā ge̍ chikpo̍ po̍, a ge̍ē jo̍ōkū hīka o̍ i̍ gla ɔ̄chī igwo̍lɛpa ta̍ we̍ ni̍ nīi n ga ga Ijɛru̍sālɛm gāa ge̍ē ya̍ otūlichō de Ɔwɔ ma̍, 12Iju̍u ɔha̍lɔha̍ i̍ ma̍ u nīi yɛ ē ta̍ahu̍ yī lɛlɛ̄lā ba̍la ɔ̄chɔ̄chɛ abɔ̍ɔ la u̍nu̍ yī Ɔwɔ ni̍. E̍ i̍ ma̍ u nīi n yɛ ē ta̍tu̍tu̍ yī lɛlā ogbōgbō la u̍nu̍ ogrēeyī yī wā kɛ̄ɛ ɛbɛha̍ abɔ̍ɔ la ipwo̍gra ɔla̍ā ni̍. 13Ɔ̄chɔ̄chɛ yī wā i̍ yɛ abɔ̍ɔ ge̍ē ya̍ ochi̍chi̍ yī lɛlā ɔla̍ā nīi e̍ ka ku u wa̍a̍ ma̍ ē de wɔ ē mɛ ni̍. 14Lɛlā nīi n chɛ̄ nīi n ge̍ē ka ē de wɔ ma̍ re̍ka, ami ē ya̍ otūlichō de Ɔwɔ yī a̍dɔ̄kū yī alɔ la Ɔpɔ̄pū yī Lɛlā Nīi Ādā Chabɔ̄ nīi aa̍ chī ka ɔ̍lɔ - arīmɛ̄ nɛ ma̍. N chī chɛ̄ku lɛlāha̍ ɛlāha̍ wa̍a̍ nīi tū la īpū yī Lihɔ yī Imo̍sīisi ba̍la iyī āchɛ ɔkɛrɔ̄ yī Ɔwɔ ma̍. 15N de ɔtū che Ɔwɔ, chɛ̄ hīka āchɛ wa̍a̍ ge̍ē hye̍ēyī la okū, āchɛ ɛnɛ̄ɛhɛhi tūla āchɛ ɛdwɔ̄bi̍ wa̍a̍. I̍ngi̍ngɔ̍ɔ nīi aa̍ titi chī de ɔtū che a̍nɛ. 16N ē chɛ̄rī myɛ̄grāa-myɛ̄grāa hɛ̄ɛbɛ nīi ɛri̍ya̍ yī ūkpɔ̄tū yī u ge̍ē lɛ u kpakpa ē tāa Ɔwɔ ba̍la āchɛ̄ɛchɛ wa̍a̍.

17“N pīya hī Ijɛru̍sālɛm gbajɛ lɛ̍yi̍ ɛmɛ̍ɛmla̍a mɛ̍; aa̍ nīi n ga abɔ̍ɔ, bī okpo ge̍ē de āchɛ yī u, hɛ̄ɛbɛ ge̍ē ya̍ ɔpɔ̄pā de Ɔwɔ abɔ̍ɔ i̍ngi̍ngɔ̍ɔ a̍nɛ. 18Yɛ̄grāa nīi yɛ ē yɛ̍ɛ̄lā nūma̍ ma̍, aa̍ nīi e̍ ma̍ u abɔ̍ɔ la u̍nu̍ yī Ɔwɔ a̍nɛ. Yɛ̄grāa ɔla̍ā, n chī kwɛ̍ɛjī la lɛbi̍ ɔgwɔ̄gwā wa̍a̍ mɛ̍. Āchɛ i̍ gbɔ̄gblāa abɔ̍ɔ mwɛbɛ ta̍kakatū u ni̍. Ɛbɛ i̍ chī tɔ̍ɔ̄ti̍yatu̍ ni̍. 19Iju̍u ɛha̍ nīi bū la ajɛ yī E̍siya ma̍ gblāa abɔ̍ɔ a̍nɛ. O̍ ngma̍ nīi aa̍ pi̍i̍ ē wā la iyɔ̄bū yī wɔ ge̍ē koko̍o yī lɛlā yī wā, nīi e̍ ge̍ lɛ lɛlā ɔha̍ ɔka ku̍ u. 20Kɛ̄ɛ i̍ i̍ngɔ̍ɔ ni̍, aa̍ enūma̍ ge̍ koko̍o yī lɛpɔ̄ yī yɛ̄grāa nīi e̍ bī u ga iyɔ̄bū yī Ogrēeyī yī Alihiyo ma̍ gɛ! Lɛlā abi̍ ɔna̍ nīi lɛpɔ̄ ku̍ u wu̍chē yī nū ma̍? 21Lɛlā nīi n ka abɔ̍ɔ ka̍ta̍ ma̍, n ka hīka, ‘O̍ re̍ka ala̍ ē klɛpɔ̄ tāa ami i̍chɛ nūma̍ wu̍chē lɔkɔ nīi n de ɔtū che hīka āchɛ ge̍ē hye̍ēyī la okū ma̍?’ ”

22Bɛ̍ɛ̄nɛ̄, Ifi̍līisi wā ge̍ de lɛpɔ̄ ku̍ kla̍. Wu̍chē oji̍ nɛ, o̍ jo̍ōkū yī lɛlā yī Ɔpɔ̄pū Nūma̍ Nīi Ɔwɔ Chabɔ̄ ma̍ hwɔhi hwɔhi. O̍ ka de wa̍ bɛ̍ɛ̄nɛ̄ hīka Ili̍sīyasi a̍dā icho̍ojiya ɔ̍lɔ ge̍ gbajɛ wā mɛ̍, anɔ̍lɔ ge̍ē je̍ ochi̍chi̍ yī lɛpɔ̄ ɔla̍ā yɛ̍yɛ̍. 23Ifi̍līisi ka de ɔlɛhu̍ yī āchɛ nīi ē gbō Ipɔ̍ɔli ma̍ ka ɔ̍lɔ ge̍ bī ɔ̍lɔ gāa ge̍ deyīrɛ ɔ̍lɔ yɛ̍yɛ̍. Ɔ̍lɔ ge̍ de yɛ̄grāa de ɔ̍lɔ yɛ̍yɛ̍. Ɔ̍lɔ ge̍ pi̍ye̍mā nīi aɛ̍ɛya yī ɔ̍lɔ ge̍ wā ge̍ ma̍ ɔ̍lɔ nīi ɛ̍lɛ ge̍ de ɔjā nīi - ɔ̍lɔ ku̍ ɔ̍lɔ ɔkɔ ma̍ de ɔ̍lɔ.

Ipɔ̍ɔli kɛlā de Ifi̍līisi ba̍la Idrusi̍la

24Ɔ̄chī ɛha̍ wā ge̍ ga ma̍, Ifi̍līisi ba̍la Idrusi̍la ɔnyā yī nū nīi - Iju̍u ma̍ wā abɔ̍ɔ bɛ̍ɛ̄nɛ̄. Ifi̍līisi de ɛrɔ̄ tū hu Ipɔ̍ɔli. E̍ gblāa abɔ̍ɔ ē darɔ̄ku lɛlā nīi Ipɔ̍ɔli yɛ ē ka ma̍. Lɛlā yī ɔtū ode che Ikra̍yisi nīi - Iji̍sɔ̄ɔsi ma̍ nīi o̍ yɛ ē ka a̍nɛ. 25Ipɔ̍ɔli wā ge̍ yɛ ē kɛlā yī lɛlā ɔya̍ kpakpa, ba̍la ūkpɔ̄tū iyī ɔ̄chɛ oku̍bī, ba̍la Ɔ̄chī Nīi Ɔwɔ Ge̍ Ē Hlɛ̍ɛ̄pɔ̄ ma̍, Ifi̍līisi de tūuhwi. O̍ ka Ipɔ̍ɔli ɔ̍lɔ ge̍ pīya gɛ. Yɛ̄grāa nīi anɔ̍lɔ ge̍ lɛ yɛ̄grāa mɛ̍, anɔ̍lɔ ge̍ē gba̍a ē hī ɔ̍lɔ ɛra̍. 26O̍ yɛ ē deyīche hīka Ipɔ̍ɔli ɔ̍lɔ ge̍ē de okpo ē tū anu̍ la oko̍o. Wu̍chē yī ɔla̍ā, o̍ ē hī Ipɔ̍ɔli ɛra̍ myɛ̄grāa-myɛ̄grāa ge̍ē kwɔ̄kā tāa anu̍.

27Lɛ̍yi̍ ɛpa wā ge̍ ga ma̍, ɔngrɔ̄ɔ ɔha̍ nīi re̍ka Ipɔ̍kīyusi Ifɛ̍si̍tusi ma̍ wā ge̍ nāa ɛbɛ yī Ifi̍līisi nīi - ɔ̄chɛ odeyīrɛ ajɛ ɔla̍ā o̍bū ma̍. Ifi̍līisi chikpo̍ nīi lɛlā yī nū ge̍ē hi Iju̍u ɔtū ma̍, o̍ tū hī Ipɔ̍ɔli tū abɔ̍ɔ la igbakɔbɔ kpɔ̍ɔ̍.

Currently Selected:

U̍ku̍rɔ̍ yī Alɛrɔ̄ 24: YBASR

Highlight

Copy