U̍ku̍rɔ̍ yī Alɛrɔ̄ 26

Ipɔ̍ɔli koko̍o yī lɛlā yī nū la iyɔ̄bū yī A̍grīpa

1A̍grīpa da Ipɔ̍ɔli bɛ̍ɛ̄nɛ̄ hīka ɔ̍lɔ ge̍ īcha la oko̍o yī lɛlā yī ɔ̍lɔ gɛ. Ipɔ̍ɔli wī abɔ̄ hī iyē bɛ̍ɛ̄nɛ̄, kū la oko̍o yī lɛlā yī nū la ɔkɔ̄ka bɛ̍ɛ̄nɛ̄ hīka,

2“Ādā A̍grīpa, Ɔgāmode! N lɛ ɔwɔ̄wīyā kpɛ̍ɛji nīi ami ɔlɔjā rɛ ma̍ i̍chɛ la iyɔ̄bū yī wɔ ge̍ē koko̍o yī u ma̍. Oko̍o yī lɛlā ɔla̍ā nīi Iju̍u wa̍a̍ ka ku̍ um ma̍ nɛ. 3Wu̍chē oji̍ nɛ, awɔ ɔlɔjā jyɛ̍ɛ̄lā yī ɔchɔ̍ɔwɔ yī āchɛ yī Iju̍u wa̍a̍ ba̍la lɛlā nīi e̍ ē bī ta̍ahu̍ ma̍. N ra̍ābɔ̄ de wɔ, chu̍chu̍u! Gbɔtū hɛmɛɛ nīi a ā plɛ̍ɛ̄lā yī u!

4“Iju̍u wa̍a̍ jo̍ōkū lɔkɔ nīi ɔhɔ̄leyī yī u lɛ bū la lɛɛ̍pɛ̄ɛ̍pɛ̄ ma̍. E̍ jo̍ōkū wa̍a̍ hīka obū la owu̍tu, amɔ̍lɔ hɔ̄ abɔ̍ɔ la ɔcha yī amɔ̍lɔ la Ijɛru̍sālɛm ba̍la āchɛ yī amɔ̍lɔ. 5E̍ je̍ u gbi̍chɛ gbi̍chɛ. E̍ jo̍ōkū hwɔhi hwɔhi, nīi e̍ ge̍ yɛ ge̍ē chɛ̄ ka nɛ, hīka amɔ̍lɔ tū tāa ribi yī āchɛ nīi re̍ka Ifa̍rasīi ma̍. Ɔpɔ̄pū nīi Āchɛ yī Ifa̍rasīi ē bī ya̍ otūlichō yī Ɔwɔ ma̍ lɛ kɛ̍mɛ̍kɛ̍mɛ̍ hi̍ iyī ribi ehēhī yī āchɛ yī alɔ a̍nɛ. 6U̍ma̍ama, e̍ chī ku̍ u yarɛ yɛ ē klɛpɔ̄ tāa ami; wu̍chē oji̍ nɛ, n deyīche lɛlā nīi Ɔwɔ choko̍o de aa̍ ɔ̍kɔ̄kū yī alɔ ma̍. 7Oko̍o ochōche ɔla̍ā nīi āchɛ yī alɔ ipwɔ̍ɔma igwo̍lɛpa chī yɛ ē deyīche ge̍ē nāa a̍nɛ. E̍ ē ya̍ otūlichō de Ɔwɔ myɛ̄grāa-myɛ̄grāa ma̍, i̍ngɔ̍ɔ nīi e̍ chī yɛ abɔ̍ɔ ē deyīrɛ yī nū a̍nɛ. Wu̍chē lɔkɔ nīi ami deyīche i̍ngi̍ngɔ̍ɔ ma̍, aa̍ nīi Iju̍u wa̍a̍ yɛ ma̍ ē kɛlā abi̍ ku̍ u a̍nɛ ko̍ō, Ɔgāmode! 8Oji̍ - ohu̍ nīi o̍ lichi̍chi̍ de ala̍ Iju̍u la ɔchɛ̄ hīka Ɔwɔ ge̍ē de okū hye̍ēyī ma̍ gɛ?

9“Ami ɔlɔjā gbɛri̍ya̍ ge̍ yɛ̍ɛ̄lā abi̍ yɛ̄mɛ̄mɛ̄ pīyeyīta̍ riyī yī Iji̍sɔ̄ɔsi yī Ina̍jārɛ̄ɛti nūma̍ je̍. 10Lɛlā nīi n ya̍ la Ijɛru̍sālɛm ma̍, n nāa wɔhu̍ bū abɔ̄ yī alɛhu̍ yī aligbe. N ku̍ āchɛ yī Ɔwɔ nūma̍ yɛ̄mɛ̄mɛ̄ ge̍ tū igbakɔbɔ. E̍ hɛ̍ wā ɔpīyaku̍ ma̍, n chɛ̄ hīka e̍ ge̍ de wa̍ ngmo̍. 11Yɛ̄grāa yɛ̄mɛ̄mɛ̄, n ē gāa ge̍ē ya̍ wā ichi̍ la u̍nu̍ ogrēeyī yī Iju̍u. N chikpo̍ hīka e̍ ge̍ wa̍ābɔ̄ hī lɛlā ɔla̍ā nīi e̍ chɛ̄ ma̍. O̍ wu̍ um ɔtū tāa aa̍ kpɛ̍ɛji, n nōnuni̍ pīya yɛ gāa ipwo̍gra ɛha̍ ge̍ē ya̍ wā ichi̍.

Lɔkɔ nīi Ipɔ̍ɔli de pīya ɔ̄chɛ yī Ikra̍yisi ma̍

(U̍ku̍rɔ̍ yī Alɛrɔ̄ 9:1-19; 22:6-16)

12“I̍chi̍chɛ ɔha̍, n pīya yī Idama̍si̍kɔsi wu̍chē yī lɛlā nūma̍ pi̍i̍. N nāa wɔhu̍ ba̍la lɛhu̍ īpū bū la abɔ̄ yī alɛhu̍ aligbe. 13Ɔgāmode, n wā ge̍ gbajɛ la ɔpɔ̄pū yɛ̄grāa yī yɛnɔ oche la yakpalɛ̄hu̍ bɛ̍ɛ̄nɛ̄ ma̍, n ma̍ ɔla̍ ɔha̍ nīi wu̍ bū abɔ̍ɔ la ichō. O̍ hu̍ kpɛɛ hi̍ yɛnɔ pɛtɛpɛtɛ. O̍ fi̍yajɛ ta̍kakatū ami ba̍la āchɛ nīi yɛ abɔ̍ɔ tāa ami ma̍. 14Alɔ wa̍a̍ ngma̍ mla̍ajɛ. N po̍ ɔkɔlɛ̄lā ɔha̍ nīi ka grāa ami la oko̍o yī Ihi̍bru bɛ̍ɛ̄nɛ̄ hīka, ‘Isɔ̍ɔli be̍e! Isɔ̍ɔli! Oji̍ - ohu̍ nīi a yɛ ē ya̍ um ichi̍ dwɔ̄bi̍ dwɔ̄bi̍ ma̍/? A i̍ jo̍ōkū ni̍ ma̍, yɛna ge̍ ta̍ ɛka dra̍ ogblo̍ yī abā yī nū, o̍ ē ya̍ iyī nū ɔjā/. I̍ngi̍ngɔ̍ɔ nīi a yɛ aa̍ ē ya̍ ge̍ē ya̍ iyī wɔ ɔjā a̍nɛ.’ 15N chikpo̍ bɛ̍ɛ̄nɛ̄ hīka, ‘Awɔ - Ɔ̄nyɛ nɛ, Ādā?’ O̍ ka grāa ami bɛ̍ɛ̄nɛ̄ hīka, ‘Ami Iji̍sɔ̄ɔsi nīi a yɛ aa̍ ē ya̍ um ichi̍ dwɔ̄bi̍ dwɔ̄bi̍ i̍ngɔ̍ɔ a̍nɛ. 16Nīichō gɛ! Nīichō yarɛ gɛ! N wā ge̍ de iyī u chabɔ̄ hu̍ wɔ hɛ̄ɛbɛ nīi a ge̍ē de ē pīya ɔ̍chɛ̍ yī u. N hu wɔ ohōhu nīi a ge̍ē koko̍o ē de āchɛ lɔkɔ nīi a ma̍ u i̍chɛ ma̍. A ge̍ē koko̍o ē de wa̍ yɛ̄grāa ɛha̍ nīi n ge̍ē gba̍a ē de iyī u ē chabɔ̄ hu̍ wɔ ma̍. 17N ge̍ē gbō wɔ ogbōgbō hī Ali̍sɛ̄rɛli nīi - āchɛ yī wɔ ma̍. N chī ge̍ē gbō wɔ ē hī Ɛchɛkɔcha nīi n ge̍ē de wɔ tɛ̄rɔ̄ hu wa̍ ma̍. 18N ge̍ē de wɔ ē tɛ̄rɔ̄ hu wa̍, hɛ̄ɛbɛ ge̍ē ya̍ nīi eyī yī wā ge̍ē lwāa; hɛ̄ɛbɛ nīi e̍ ge̍ē pīya ē hī ɛbɛ odobū wā la ɛbɛ ɔlɛgēdēgēdē; hɛ̄ɛbɛ nīi e̍ ge̍ē pīya ē hī wɔhu̍ yī Ɔngūwɛ̄gā wā dikpo̍ ē ba̍ Ɔwɔ; hɛ̄ɛbɛ nīi e̍ ge̍ de ɔtū che u nīi Ɔwɔ ē de lɛlā ɔdwɔ̄bi̍ yī wā kɔ̄ de wa̍; hɛ̄ɛbɛ nīi e̍ ē wā ge̍ē hɔ̄ ba̍la āchɛ nīi Ɔwɔ hōhu ma̍.’

Oko̍o yī lɛlā yī u̍ku̍rɔ̍ yī Ipɔ̍ɔli

19“Wu̍chē yī ɔla̍ā, n i̍ tɔ̍ɔkɔ yī ɔ̄chɛ ɔla̍ā nīi n ma̍ nīi kɛlā tāa ami bū la ichō ma̍ ni̍ ko̍ō, Ādā A̍grīpa! 20N gāa ge̍ kā Wɔ̄kā Ɔlwɔnyɛ ɔla̍ā de ala̍ Idama̍si̍kɔsi ba̍la Ijɛru̍sālɛm yɔbɔ̄ɔbū. O̍bū, n gāa ge̍ ka la ɔcha yī Iju̍u wa̍a̍. N de wa̍ hīka e̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ nīi e̍ ge̍ pīya ūkpɔ̄tū kɔ̍ Ɔwɔ. N da wa̍ hīka e̍ ge̍ ya̍ ɔhɔ̄leyī nīi ge̍ē chabɔ̄ hīka ɛ̍lɛ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍. 21Lɛlā nūma̍ - ohu̍ nīi Iju̍u ku̍ u la u̍nu̍ yī Ɔwɔ yɛ ge̍ de u ngmo̍ a̍nɛ. 22Ɔwɔ chī tū u wɔbɔ̄ kpɛɛ ku i̍chɛ nūma̍; aa̍ nīi n rɛ ma̍ ē koko̍o yī lɛlā de āchɛ enīchi̍chɛ̍ tūla āchɛ ɔnɔ̄kɔ̄kū wa̍a̍ a̍nɛ. Lɛlā yī u nīi n ka ma̍, i̍ngi̍ngɔ̍ɔ nīi Imo̍sīisi ba̍la āchɛ ɛkɛrɔ̄ yī Ɔwɔ chī ka hīka ɔ̍lɔ ge̍ ya̍ a̍nɛ. 23E̍ ka Ikra̍yisi ɔ̍lɔ ge̍ē mi̍chi̍. Ɔ̍lɔ ge̍ē hye̍ēyī la okū yɔbɔ̄ɔbū a̍nɛ. Ɔ̍lɔ ge̍ē koko̍o yī lɛlā yī ɔhɛ̍ta̍ de āchɛ. Ɔla̍ā ɔ̍lɔ ge̍ē lɛ bāa ɔla̍ ɔmyɛ̍ma̍ ma̍ ē de āchɛ yī Iju̍u ba̍la Ɛchɛkɔcha.”

24Ipɔ̍ɔli rɛ ma̍ ē koko̍o yī lɛlā nūma̍ i̍ngɔ̍ɔ bɛ̍ɛ̄nɛ̄ ma̍, Ifɛ̍si̍tusi to̍ohwe̍e! Ipɔ̍ɔli ɔ̍lɔ de gbyɛ̍lɛ̍ mɛ̍! Īpū ojo̍ōje̍ ɔ̄kɔ̄kū yī ɔ̍lɔ de ɔ̍lɔ gbyɛ̍lɛ̍ mɛ̍!

25Ipɔ̍ɔli ka de ɔ̍ bɛ̍ɛ̄nɛ̄ hīka, “Ādā Ifɛ̍si̍tusi, i̍ yɛ̍lɛ̍ nīi n gbōgbo a̍ni̍; lɛlā lēchi̍ lēchi̍ nīi n yɛ ē ka a̍nɛ. O̍ lɛ bāa ɔkpakpa ma̍. 26Ādā A̍grīpa! Awɔ ɔlɔjā jo̍ōkū yī lɛlā nūma̍ wa̍a̍; anu̍ - ohu̍ nīi n rɛ ma̍ ē kɛlā nūma̍ de wɔ nīi n i̍ tūuhwi ni̍ a̍nɛ. N jo̍ōkū hīka a je̍ ɔha̍lɔha̍ yī nū wa̍a̍. Wu̍chē oji̍ nɛ, lɛlā nūma̍ i̍ ya̍ la lɛ̍bɛ̍ba ni̍. 27Ādā A̍grīpa be̍e! Je̍ka aa̍ a chɛ̄ lɛlā yī āchɛ ɔkɛrɔ̄ yī Ɔwɔ? N jo̍ōkū hīka a chɛ̄ku wa̍!”

28A̍grīpa Ipwɔ̍lɛ̍ da Ipɔ̍ɔli bɛ̍ɛ̄nɛ̄ hīka, “Ipɔ̍ɔli, re̍ka a gbɛri̍ya̍ ka aɔ̍lɔ ge̍ē de amɔ̍lɔ ē pīya Ɔ̄chɛ yī Ikra̍yisi yɛ̄grāa pi̍nyɛ̍ nūma̍ bɛ̍ɛ̄nɛ̄ ni̍?”

29Ipɔ̍ɔli ka de ɔ̍ hīka, “Ādā, o̍ ge̍ ro̍ōre̍ka yɛ̄grāa opi̍nyɛ̍ nūma̍ kɛ̄ɛ yɛ̄grāa ɔgwɔ̄gwā oo, n yɛ ē jɔhā de Ɔwɔ hīka o̍ ge̍ ya̍ nīi a ē lɛ bāa ami ma̍, awɔ ba̍la āchɛ nīi gblāa ma̍ ā plɛ̍ɛ̄lā yī u i̍chɛ ma̍. Ɔ̍chi̍kpa̍kpa̍ yī agba̍ nīi e̍ de tū u hɔ̄ ma̍ ma̍ ge̍ hɔ̄ɔ̄hɔ̄.”

30A̍grīpa Ipwɔ̍lɛ̍ wā ge̍ nīichō bɛ̍ɛ̄nɛ̄. Ifɛ̍si̍tusi nīi - ɔ̄chɛ odeyīrɛ ajɛ ɔla̍ā ma̍, ba̍la Ibɛni̍isi, ba̍la āchɛ ɛla̍ā nīi gblāa abɔ̍ɔ wa̍a̍ ma̍ nīichō i̍ngi̍ngɔ̍ɔ. 31E̍ pīya hī ɛbɛ ogrēeyī ɔla̍ā bɛ̍ɛ̄nɛ̄. E̍ kū abɔ̍ɔ ē ka ē de iyī wā ka Ipɔ̍ɔli ɔ̍lɔ i̍ ya̍ lɛlɛ̄lā abi̍ nīi - ɔ̍lɔ ngma̍ la ode ɔ̍lɔ ngmo̍ kɛ̄ɛ de ɔ̍lɔ tū igbakɔbɔ ni̍. 32A̍grīpa koko̍o de Ifɛ̍si̍tusi ka Ipɔ̍ɔli ɔ̍lɔ i̍ ge̍ de lɛpɔ̄ yī ɔ̍lɔ nāa ga ɛbɛ yī Isi̍sa we̍ ni̍ nɛ, ɔ̍lɔ ge̍ tu̍ hī ɔ̍lɔ.

Currently Selected:

U̍ku̍rɔ̍ yī Alɛrɔ̄ 26: YBASR

Highlight

Copy