Zákaryâ 10
10
Óburúkpâbí o/ryí Ocím o/fu, Nyǐ o/chi o-nyii Banet Emen
1Bí n̂g Óburúkpâbí o-kye běn omu ké nkéré mú ashí-kyifang. Óburúkpâbí nké mu o-twóm m ófíbí mú odana omu mú oryên ne mú odanyérê, o-chi byifát byi-kán byi-kye nang yeě nang yeě. 2Banet mbe ba-da ng ebí erím-bakye ne bansô epé, nké ejá nyí mbe ba-koo ng nyi byisédéng byísedeng ne e*da/byí chwǒm*. Banet bakíri ba/fu, mbé ba-man n esét kyikû-burê ḿbú onet odari, nké banet ámbe mbe ba-nîm m běn. Dyityém ńdyí mbe ba-fâ běn dyi*da/byí chwǒm*. Ké bubwô ámbu, banet mbe ba-yêe ng ké byikit wǎ etám-ebû nyí ee/tánê. Mbé ba/firi ké afaníkong, ké nǎ, ba*fí ne onet-dyishí*.
3Óburúkpâbí o/raa o/fu, me kafâ nke ka-sa ng mě ne bacinbánet ámbe ḿbé mbe ba-tún n banet ejí, ne n/chi n-kye kámbé busông. Banet ḿbé Júda ba/já mě, ne me, Óburúkpâbí mú o/rêe o-shwôm, n/chi n-kûtún kámbé kanong. Mbé ba/chi ba-kyú bubyî-orá-byití ejí ḿbú mbu ne busa. [ 4Batu ne banet-ashí ne bannyân byití ba/chi ba-fím ké burwám ebe, ḿbé ba/chi ba-kûtún banet ejí.] 5Banet ḿbé Júda ba/chi ba-kpógê byití wǎ basúja ḿbé badacím banet-bushwôn ebe ké byiká-oshê ba-fé ké biǐntóng. Mbé ba/chi ba-nwa byití, ké nǎ, Óburúkpâbí mu ne mbé, ne mbé ba/chi ba-kpógê nang banet-bushwôn ebe ḿbé badayú ké bubyî-orá.
6Me n/chi n-chi banet ḿbé Júda ba-shwane.
Me n/chi n-nyii banet ḿbé Ézerel n-koo.
N/chi n-ri kámbé bafip,
n-kúng kámbé kángkáng m-bwa ne mbé dyijê.
Mbé ba/chi ba-firi wǎ me m/mû n*da/né kámbé*.
Me n-chi i Osówo Óburúkpâbí ebe,
ne n/chi n-jwo banshwam ebe.
7Banet ḿbé Ézerel ba/chi ba-firi ne busa wǎ basúja,
ba-kyú ké bunyîn-dyityém
wǎ banet ḿbé mbe ba-jwáp ng bato.
Bwǎn ebe ba/chi ba-zîim dyikpóge ebe ńdyín,
ne kyi/chi kyi-nyîn kámbé
ké bubwô ḿbú chwǒm ńkyí Óburúkpâbí oo/chi.
8Me n/chi n-kó banet ejí m-kpaa kámbé n-tî kyikit kyibónge.
Me n/chi n-ré kámbé dyifwá-búsóng ebe,
n-chi kámbé ba-jê chwóó wǎ eringe nyí ba/mû.
9Nang ké mm/pwó kámbé byiryibyiryi ké eshê,
ba-kyú u ké byikit ámbyi ḿbyí tíbítíbí ba-zîim mě.
Mbé ne bwǎn ebe ba/chi ba-waa bakpó,
ba-bwa esim dyijê ashí amúmú nkéré obónge.
10Me n/chi m-kpî kámbé ké Éjip ne ké Asyírya
m-bwa esim ne mbé dyijê,
m-ba-tî kámbé ké oshê ebe mú o/já kámbé.
N/chi n-tî to kámbé ké Gyílet ne ké Lebánon,
ne esí emúmú e/chi e-sú ne banet.
11Â mbé ba-kú ba-nyáng ng kace-afaníkong ebe,
me Óburúkpâbí n/chi n-díp bunâng-kace,
ne kace ńké Nâl ka/chi ka-núng.
N/chi m-bwa ne bantông byiko-banet-Asyírya kyísí,
ne kiǐtí-oshê-Éjip kii*ba/chi kyi-chîchi ne busa*.
12Me n/chi n-chi banet ejí ba-shwane.
Mbé ba/chi ba-fé mě,
ba-chi ńkyí ndasét kámbé.
Óburúkpâbí nké o/raa.
Currently Selected:
Zákaryâ 10: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
