Zákaryâ 11
11
Dyirông ńdyí Bambên Atyém
1Oshê mú Lebánon, bâa afyi eyên
eringe okwâ odashí byichí-séda eyên.
2Byichí-sáperes, wonge n̂g ba-tii ng,
ké nǎ, byichí-séda bii/myii.
Baa/bên byichí ámbyi ḿbyí byidajang enwa.
Byichí-ôok ḿbyí Báshan, wonge n̂g ba-tii ng,
ké nǎ, baa/bên kyizinge ńkyí kyi/jang ejê ne byichí.
3Batu ba-kú ba-tii ng ké bafip,
ké nǎ, akpee ebe a*fí to*.
Fwôo n̂g atông ba-jwo eringe nyí ekpang nyi e-fém m.
Baa/bên kyizinge ńkyí oshê ebe mú nyi e-kyú u,
ńkyí nkyi ké bukô-kace ńké Jódan.
Bambâm Ebû Ashí Afee
4Osówo Óburúkpâbí ejí o/sét mě o/fu, bwom wǎ mbâm ebû mú dyibóng-ebû ńdyí ba-kú ba-bâ eju kányí. 5Bayén-ebû ba-ju ng kányí, baa*chi kámbé chwǒm*. Ba-yip enyam ányi ba-shee, ba-raa ba/fu, kye n̂g Óburúkpâbí akpee. Be bii/fang. Nang bambâm ebû ḿbé ebe mbé bayén baa*ri kányí bafip*.
6Óburúkpâbí o/raa o/fu, mm*ba/chi n-chîri nang yeě mú mu ké ejíí bafip*. Me oyén n/chi n-kúng kángkáng banet n-fé kámbé ké abwô nyí batu ebe. Batu ámbe ba/chi ba-bên ejíí, ne mm*ba/chi n-nyii kányí ké abwô ebe*.
7Banet ḿbé ba/ré ebû ányi ba-shee kányí nké ba/yámê mě, ne me n-firi mbâm ebû nyí ba-kú ba-bâ eju kányí. Me n/kúng buchí bufee. Kabónge n/kó kánké, Kanong, ńké kabónge n-kó kánké, Ocibi, ne m-bám ebû ányi. 8Me n*da/chîman ecíp dyityém ne bambâm ebû ḿbé áku ashí achât* ḿbé m/mû n-sa ng kámbé kafâ* ne n-ju kámbé kángkáng ké otukáku obónge. 9Ne n-raa kâng ne dyibóng-ebû ejí n/fu, me mm*ba/chi n-chîkyú mbâm ebû enen*. Ebû nyí edakpú, ekpú, nyí ba/chi ba-ju kányí, baju kányí. Nyí e/chi e-waa ekpó, e/chi e-ju barî. 10Ne n-kúng kâng kachí ńké mu n-kó ng kánké, Kanong, m-bún kánké eringe nyí ndabên ocím mú Óburúkpâbí o/mû o/ryí ne ejíí emúmú. 11Ké bubwô ámbu, ocím ámu o/bên ké dyicí ándyi. Banet ḿbé ba/ré ebû ányi ba-shee kányí, ba/mû mbe ba-tún n mě, ne ba/nyît ba/fu, Óburúkpâbí nké o/mû o-raa ng byěm ḿbyí n/chi. 12Me n-raa ne mbé n/fu, â kyi/nyîn běn, kye n̂g mě akpuga-otukáku ejí. Nké â kyi*da běn enyîn* tî n̂g kányí. Ne ba-kpêe mě akpuga bujam esim diǐkpú wǎ akpuga-otukáku ejí.
13Óburúkpâbí o-sét mě o/fu, [fé akpuga ányi ké akpuga nyí mbe ba-tî ng ké kiǐtí-kyise-kyifen ejí echi.] Ne n-kúng kâng akpuga ányi bujam esim diǐkpú, kiǐtí-akpuga ányi nyí ba/kabe ba/fu, a/kwárê ne bǎmkpóngé ejí, [n-fé kányí ké akpuga nyí mbe ba-tî ng ké kiǐtí-kyise-kyifen-Osówo echi.] 14Ne m-bún kâng nnyinyěng-kachí, ńké mu n-kó ng, Ocibi, ne ocibi mú Júda ne Ézerel o-bên.
15Ne Óburúkpâbí o-raa kâng ne me o/fu, chîbwom wǎ mbâm ebû. Ntáng mún, bwom wǎ mbâm ebû mú o*fí ne dyishí*. 16Me nn/tî mbâm ebû mú odatún dyibóng-ebû ejí, nké o*fí o-chwáp ng ebû nyí mbe ba-kyé ng kányí eju*. O*fí o-kyé ng nang nyí ee/tánê* o-chi nang nyí ba/némê kányí bukye*. Nang nyí e/waa ekpó o*fí o-kyâ kányí byiryíng*. O/bwa mu o-ryí i ebû nyí e/rêe e-shwôm, o-pii ng kányí biintaa-byiká. 17Mbâm ebû ámu mú o*fí ne dyishí* o/firi ké busông. Oo/dim o-mîng dyibóng-ebû emen. Byití byi/chi byi-ju busa emen kángkáng. Bubwô emen bu/chi bu-bok, ne dyichi emen ńdyí bubwô-etyebéng dyi/chi dyi-sêe.
Currently Selected:
Zákaryâ 11: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
