Mátyuu 28

Osówo o/jwóbê Jisos ké Bukyû

(Mâk 16:1-10; Lûk 24:1-12; Jǒn 20:1-10)

1Ké nkéré mú dyicí-ékwâbashi ńdyí banet-Jûs dii/shwôm, pirípirí ké orî-dyicí, Méryi mú o/fím Mágádála ne Méryi mú áku ba/dim ba-wâa dyikun edakpúrî. 2Ké abe ányi, esí e-náng kakânkakân. Orím mú onong mú Otu Kyítá o-fím kyíbóng o-shû kyísí, o-bírî buká ámbu, o-kyú me ké mbú. 3Bushú emen bu/mû bu-san n wǎ kasabang, ne byídí emen byi/mû byi-cé ng wǎ abíp. 4Bushî bu-kám basúja ámbe ba-kûtím banê, ba-firi wǎ baa/kpú.

5Nké orím ámu o/raa ne ḿbé banyinyi ámbe o/fu, *da n̂g eshî*. Ké ebóng, me mu n-nyît ng n/fu, ben bamu ba-kyé ng Jisos mú ba/mû ba/mán ǎ ké kyikwap ńkyí badashwân onet. 6Nyǐ o*fí nyín*. Osówo oo/jwóbê ǎ ké bukyû wǎ eringe nyí o/mû o/sét. Bâ n̂g nyín ba-ba-ri kyikit ńkyí ba/mû ba/ren ǎ. 7Ca n̂g kâng babap ba-da-sét bǎmgbán emen ba/fu, Osówo oo/jwóbê ǎ ké bukyû, ne kántîk oo/bwóp běn kashú o-wâa Gályílyi. Áku nké ben ba/chi ba-ri ǎ. Zîim m̂ ńkyí n/sét běn.

8Ba-dim kâng babap ba-mîng dyikun, ne bushî ké byiko, ne bunyîn-dyityém to ḿbú boo/sú kámbé, ba-zóngê ba-wâa bǎmgbán-Jisos esét.

9Jisos o-waa o-kâm kámbé ké abe ányi. O-raa o/fu, bunyîn-dyityém bukyú ne ben. Mbé ba-bâ ba-ba-kâm ǎ, ba-shwá ǎ abwô ké byiká, ba-kye ǎ ofê. 10Jisos o-raa ne mbé o/fu, *da n̂g eshî*. Ca n̂g ba-da-sét barî-banet ejí ba/fu, baca Gályílyi. Áku nké mbé ba/chi ba-ri mě.

Ńkyí Basúja ba/sét

11Ké nkéré mú ḿbé banyinyi ámbe baa/dim kiǐfáng ńkyí ebe, kyicê-basúja ḿbé ba/mû ba-bám m dyikun ba/bwa esim ké oshê ba-da-sét batu-banchi kyifen-Osówo kángkáng byěm ḿbyí byi/chi. 12Batu-banchi kyifen-Osówo ámbe ba-dim ba-kâm bakínkán-banet-Jûs ba-tóbê ne barî. Ba-fîm bujê-akpuga ba-kye basúja ámbe. 13Ba-sét kámbé ba/fu, sét n̂g banet ba/fu, bǎmgbán emen ba/bê ké buchú ba-ba-jii kyikwóm-enyam-byiko emen ba-dim ne nkyí, nkéré mú be byimu byi-rê ng. 14Ne â nang onet-dyishí mú esí ńnyín o/jwo kyi-kim ne nkyí, be byi/chi byi-man ǎ esét eringe nyí odabángê, ne ben *da n̂g echi ba-kérê chwǒm nang kyibónge kyi-kim ne nkyí*.

15Ḿbé basúja ámbe ba-koo akpuga ányi, ba-chi wǎ eringe nyí ba/sét kámbé ba/fu, bachi. Tata dyicí ńdyí kurún, éné nké banet-Jûs mbe ba-sét ng.

Jisos o/byí o-kâm Bǎmgbán Emen

(Mâk 16:14-18; Lûk 24:36-49; Jǒn 20:19-23; Âak 1:6-8)

16Bǎmgbán-Jisos ḿbé ashí diǐkpú ne din ba-dim ba-wâa ké kaku ńké ké Gályílyi, ké kyikit ńkyí Jisos o/sét kámbé o/fu, baca. 17Ké nkéré mú ba/ri ǎ, ba/kye ǎ ofê, nang ké bakíri ba/mû ne atyém afee. 18Jisos o-tín o-fárâng kámbé, o-sét kámbé o/fu, Osówo oo/kye mě busa ké kángkáng byěm ḿbyí ké bubóng ne ḿbyí ké ejíí. 19Ca n̂g kâng ba-kâm kángkáng banet ké ejíí emúmú, ba-chi kámbé ba-firi bǎmgbán ejí. Kye n̂g kámbé osoo mú Osówo ké busa ḿbú dyizîn ńdyí Kyítá ne ńdyí Wǎn ne ńdyí Busun-Osówo. 20Ba-tángê to kámbé eringe nyí badachi kángkáng byěm ḿbyí me nn/sét běn n/fu, bachi. Ne zîim m̂ to ba/fu, me n/chi n-kyú ne ben kángkáng nkéré, tata ké nkuli kyikû-nkéré.

Currently Selected:

Mátyuu 28: BKY

Highlight

Copy