Mâk 1

Bǎmpém ḿbé Jǒn mú Nkye Banet Osoo mú Osówo o/pem

(Mátyuu 3:1-12; Lûk 3:1-18; Jǒn 1:19-28)

1Nyín něen Bǎmpém ḿbé Banong kyi-kim ne Jisos Karâs mú Wǎn-Osówo. 2Kyi/kpet wǎ eringe nyí mkpábé mú odasét byiraa-Osówo, mú odabángê Azáya o/sáng o/fu, Osówo o/fu, nyín něen onet-kyitwóm ejí. Me n/chi n-twóm ǎ o-bwóp ǒ kashú, o-da-bâa bukwóp o-tî ǒ. 3Onet obónge mu o-wonge e ké kyikim-dyikán o/fu, nap n̂g bukwóp ḿbú Otu Kyítá ba-tî ǎ. Chi n̂g kiǐfáng ńkyí dángdáng ba-tî ǎ ńkyí odacen.

4Ne Jǒn o-byí o-bwom kâng ké kyikim-dyikán, o-kpet ekye banet osoo mú Osówo o-sét ng kámbé kyitwóm emen o/fu, byiko byikpú běn ba-mîng byibî echi, ba-koo osoo mú Osówo, ne Osówo o/chi o-pwoo běn ké byibî enen. 5Kángkáng banet ḿbé ba/fím Judyâ ne ḿbé ba/fím Jerúsélem ba-dim edajwo ńkyí Jǒn o/mû mu o-sét ng. Ba-sét byibî ebe, ne Jǒn o-kye kámbé osoo mú Osówo ké kace ńké badakó Jódan.

6Jǒn o/mû o/bwá byídí ḿbyí ba/chi ké eríp-enyam. O-sît to emâp-ekwop-enyam ké osín. O/mû o-ryí i agurubí ne bakút-bukwan. 7O-sét banet ámbe o/fu, onet mú o/chi o-bâ, mú me m/bwóp ǎ kashú, o/rêe o-shwôm mě kampén chwóó. Me n*da/kwárê mú ndasiring kyísí m-pii ǎ nang abe emen*. 8Me mu n-kyâ běn osoo mú Osówo ké omu, nké nyǐ o/chi o-kye běn osoo mú Osówo ké Busun-Osówo.

Osoo mú Osówo mú Jisos ne Okan Emen

(Mátyuu 3:13-17; ne ké4:1-11; Lûk 3:21-22; ne ké4:1-13)

9Ka*da/rí* Jisos o-fím Názáret mú mu ké esí nyí Gályílyi o-bâ. Jǒn o-kye ǎ osoo mú Osówo ké kace ńké badakó Jódan. 10Jisos o-byí i o-bâ ké kafâ-kace, o-ri ké bubóng bu-kú bu-bâa ng, ne Busun-Osówo éné wǎ karúú bu-shû ng bu-bâ ǎ ké byiko. 11Ne ejá e-fím kyíbóng e-raa e/fu, wo a-chi i Wǎn ejí mú dyityém. Nkyi kyi-nyîn n mě kanong kanong ne wo.

12Ké abe ányi, Busun-Osówo bu-chi ǎ o-dim ké kyikim-dyikán. 13O-rí áku bajam-ací bafee, Sátan mú mu Otu-Byibî-Barím o-kan ǎ. Enyam-dyikán e/mû to ké kyikim-dyikán ánkyi, nké barím ḿbé banong ba/ba ǎ echwáp.

Jisos o/kó Bankâm Ekworê Ashí Anyii

(Mátyuu 4:12-22; Lûk 4:14-15; ne ké5:1-11)

14Ké nkéré mú baa/mán Jǒn ké mgbokobá, Jisos o-dim o-ca ké Gályílyi o-sét ng banet Bǎmpém ḿbé Banong ḿbé ba/fím ne Osówo. 15O/fu, ochíchí-nkéré oo/fyi. Butu ḿbú Osówo bu/firi jwángjwáng. Byiko byikpú běn ba-mîng byibî echi, ba-bángê ne atyém enen ké Bǎmpém ḿbé Banong.

16Ńdyí Jisos mu o-cen n o-câ ké bukô-baya ḿbé Gályílyi, o/ri bankâm ekworê ashí afee, Sámon ne wǎn-boné emen mú onyinchéng, mú odabángê Ánduru ké mbe ba-pwó ng bantûfúk ebe ké baya ámbe. 17Jisos o-raa ne mbé o/fu, bâ n̂g ne me ké kyikû, ne me n/chi n-tángê běn ba-kûkám banet. 18Ké abe ányi, ba-mîng bantûfúk ebe, ba-dim ne nyǐ ké kyikû.

19Jisos o-chîking o-ca kashú kaǎnyín, o-chîri bwǎn-bané bakíri ashí afee, Jêmsyi ne Jǒn, ḿbé bonchí ebe o/mû o-bángê e Zébédyi. Ba/mû ké kafâ-ókpǐ ebe ba-nap ng boǒsém ebe. 20Jisos o-ri ng kámbé o-bâ, o-kó kámbé. Ba-mîng Zébédyi mú bonchí ebe ne banet-bǎmkpóngé emen ḿbé o/yámê ányi ké ókpǐ, ba-dim ne Jisos ké kyikû.

Onyinchéng mú mu ne Kyibî-Bucí

(Lûk 4:31-37)

21Ba-da-ribi ké Kapánum. Ké nnyinyěng-dyicí-ékwâbashi, Jisos o-da-nung ké kyise-ékwâbashi ebe, o-kpet etángê. 22Banet ḿbé ba/jwo byiraa emen byiko byi/kaa kámbé ké eringe nyí o/tángê. Nyǐ o/mû o*fí wǎ bantánge Byije-Músis* nké nyǐ o/tángê wǎ onet mú mu ne busa.

23Ké abe ányi, onyinchéng obónge mú mu ne kyibî-bucí o-ba-nung ké kyise-ékwâbashi ánkyi, o-wonge o/fu, 24Jisos mú o/fím Názáret, wo amu a-bâ bě ebachi ebóng. A/bê bě ebaju dí. Me mu n-nyît ng ǒ kanong kanong. Wo a-chi i onet-kyitwóm mú onong mú Osówo.

25Jisos o-nyán bucí ámbu o/fu, cít ocím a-byí onyinchéng mún ké byiko.

26Kyibî-bucí ánkyi kyi-chi onyinchéng ámu o-kpet eziri banê ké byiko gbagbagbak, kyi-wonge kakânkakân, ne kyi-byí ǎ ké byiko. 27Kángkáng banet byiko byi/kaa kámbé kanong kanong, ne ba-kpet eraa ne barî ba/fu, ńkyín ebóng. Dyizong-otánge ńdyí dyifyîfî dí. Onyinchéng mún mu ne busa ḿbú odanyán byibî-bací, byi-chi to eringe nyǐ o/sét.

28Ne bǎmpém ḿbé ba/mû ba-pem m kyi-kim ne Jisos ba-káng ochéé óchee ké kángkáng esí nyí Gályílyi.

Jisos o/chi Banet Chwóó Erwôm Ebe e-man

(Mátyuu 8:14-17; Lûk 4:38-41)

29Ba-mîng kyise-ékwâbashi ánkyi, ba-dim ké kyise ńkyí Sámon ne Ánduru. Jêmsyi ne Jǒn ba-dim ne mbé ké kyikû. 30Boné-onyi-Sámon o/mû ké karíng sáre o-rwôm m mbyép-byiko. Ńdyí Jisos o-ribi ng o-câ áku, ba-sét ǎ kyi-kim ne nyǐ. 31Jisos o-dim o-kâm ǎ. O-níbî ǎ ké bubwô o-bêem ǎ o-kyú me. Mbyép-byiko o-man ǎ, ne boné-onyi-Sámon o-kpet kámbé enen.

32Ké nkéré mú dyikurúku dii/fyi, ányi esû ee/ríbî, banet ba/bê ne kángkáng banet-byirwóm ne ḿbé mbe ne byibî-bací ba-kâm Jisos. 33Kángkáng banet ḿbé mbe ké oshê ámu ba-dim ba-da-cít ké ocím-dyifyi. 34Jisos o-chi banet chwóó ḿbé ba/mû ne byirwóm ké azong ké azong byirwóm ebe byi-man. O-ró to byibî-bací chwóó ḿbyí byi/mû banet ké byiko byi-byí. O*da/bángê byibî-bací ámbyi byi-faa ojá* ké ebóng, byi/mû byi-nyît ng ǎ kanong kanong.

Jisos o/pem ké Gályílyi

(Lûk 4:42-44)

35Pirípirí ké orî-dyicí, ányi kyifip kyi/tôong, Jisos o-jwóbê ké kyise ánkyi o-byí kyíjí. O-shwôm oshê, o-dim o-wâa ké kyikit ńkyí banet ba*fí* o-da-fé nshwam. 36Nké Sámon ne banet ḿbé ba/mû ne nyǐ ba/dim ba-kyé ng Jisos ba-câ. 37Ké nkéré mú baa/ri ǎ, ba-sét ǎ ba/fu, nang yeě nang yeě mu o-kyé ng ǒ.

38Nké Jisos o/faa kámbé o/fu, byi-man byi-ca to ké eshê ekíri nyí nyi ké esí ányi. M-man n-da-pem to kámbé Bǎmpém ḿbé Banong, ké ebóng, nkyí nké m/bê.

39Ne o-cen kâng ké eshê emúmú nyí nyi ké Gályílyi, o-pem m Bǎmpém ḿbé Banong o-câ ké byise-ékwâbashi ebe. O-ró ng to byibî-bací ḿbyí mbyi banet ké byiko.

Jisos o/chi Onet-Kyibî-Orwôm o-nyange

(Mátyuu 8:1-4; Lûk 5:12-16)

40Onet obónge mú kyibî-orwôm-enyam-byiko kyi/kám ǎ o/bê o-kâm Jisos. O-tím arông kyísí, ne o-tîm Jisos arông o/fu, ochwáp ǎ. O-sét Jisos o/fu, â kyi/nyîn ǒ, a-man n echi orwôm ejí o-man.

41Jisos byiko byi-kpú ǎ, o-tan bubwô o-ta onet ámu, ne o-raa o/fu, kyi-nyîn n mě, orwôm eyên oman. 42Ké abe ányi, orwôm ámu o-waa o-man. 43Ne Jisos o-sét onyinchéng ámu ké busa o/fu, odim babap. 44O-kuri ǎ ekó o/fu, fwôo atông a-jwo, *dachi a-sét onet nang obónge* kyi-kim ne chwǒm ńkyín*. Nké ca ocǎng a-kâm nchi kyifen-Osówo o-jebe ǒ enyam-byiko eyên, ne a-chi kyifen wǎ eringe nyí Músis o/sét, eringe kyidatông banet ba-nyît ba/fu, orwôm eyên oo/man.

45Nké onyinchéng ámu o/dim o-kpet esét kánkyí o-câ ké kángkáng byikit. Ké ntûntû, nsêt mú onyinchéng ámu o/jang esét o/chi Jisos o*da/chîman enung ké oshê nang obónge wááng*. Nké o/kpet ekyú ké byikit ḿbyí banet ba*fí*. Banet ba-fím m ké kángkáng byikit ba-kâm m ǎ ányi.

Currently Selected:

Mâk 1: BKY

Highlight

Copy