Mátyuu 27

Ba/kúng Jisos ba-ca ne Nyǐ Kyikit-Pálet

(Mâk 15:1; Lûk 23:1-2; Jǒn 18:28-32)

1Ké dyicófóróng pirípirí, kángkáng batu-banchi kyifen-Osówo ne bakínkán-banet-Jûs ba-tóbê kyi-kim ne Jisos, eringe nyí bada ǎ eju. 2Ba-fé ǎ bamgbokobá ké abwô, ba-kúng ǎ ba-da-kye Pálet mú mu onet-dyishí mú esí ányi.

Júdas o/kpú

(Âak 1:18-19)

3Ké nkéré mú Júdas mú o/chi ba-kám Jisos o/ri o/fu, baa/két mpan ba/fu, baju Jisos, byiko byi-kpú ǎ ké kyibî emen ńkyí o/chi. O-kúng akpuga ányi bujam esim diǐkpú nyí ba/chi ké syílyíba o-bwa esim ne nyǐ o-da-kye batu-banchi kyifen-Osówo ne bakínkán-banet-Jûs. 4O-raa o/fu, me nn/chi kyibî ńkyí n/chi ba-kám onet mú o*da/chi chwǒm* ba-ju.

Mbé ba-faa ba/fu, ńkyí nkyí kyi*da bě ekím be*. Kyi/kím ǒ wo.

5Júdas o-pwó akpuga ányi ké kiǐtí-kyise-kyifen-Osówo echi o-dim o-mîng kámbé. O-dim kâng o-da-shwân.

6Batu-banchi kyifen-Osówo ba-bwóp akpuga ányi, ba-raa ba/fu, akpuga ńnyín akpuga-baróng. Ne kyije eten kyi*da/bángê kyi/fu, bafé kányí ké kiǐtí-kyise-kyifen-Osówo echi*. 7Ké nkéré mú baa/raa ba-bángê ne barî kyi-kim ne akpuga ányi, ba/kúng kányí ba-ré esí nyí nchi butí, eringe nyí esí ányi edakyú oryii mú bacinbánet. 8Nkyí nké badakó esí ányi esí-baróng, tata dyicí ńdyí kurún.

9Ké bukwóp ḿbún kâng, ńkyí mkpábé mú odasét byiraa-Osówo, mú odabángê Jeryimáya o/sét kyi/chi ntûntû. Ńkyí o/fu, ba/kúng akpuga ányi bujam esim diǐkpú nyí ba/chi ké syílyíba, ocím-akpuga mú banet-Ézerel ba/bángê ba/fu, mbé ba-kyâ ké dyishí emen, 10ba-ré esí nyí nchi butí, wǎ eringe nyí Otu Kyítá o/sét mě.

Pálet o/bí Jisos Bǎmbím

(Mâk 15:2-5; Lûk 23:3-5; Jǒn 18:33-38)

11Jisos o/bwom ké bushú ḿbú otu-dyishí mú odabángê Pálet, mú o/bí ǎ o/fu, wo a-chi i otu mú banet-Jûs dí.

Jisos o-faa ǎ o/fu, éné nké wo a/fu. 12Nyǐ o*da/bwa o-faa nang ojá kyi-kim ne byěm ḿbyí batu-banchi kyifen-Osówo ne bakínkán-banet-Jûs ba/sét ba-bât ǎ*.

13Pálet o-raa kâng ne nyǐ o/fu, wo a*fí a-jwo ng kángkáng byěm ḿbyín ḿbyí mbe ba-sét ng ba-bât ng ǒ*?

14Nké Jisos o/né efaa nang ojá. Kyi-fím ányi, byiko byi-kaa otu-dyishí ámu kanong kanong.

Ba/két Mpan ba/fu, baju Jisos

(Mâk 15:6-15; Lûk 23:13-25; Jǒn 18:39-40; ne ké19:1-16)

15Ké dyijî-kyifen ńkyí Shwôm nang kyirá, otu-dyishí ámu o-fwam m ezú onet-mgbokobá obónge abwô mú bujê-banet bada ǎ esét ba/fu, ozú. 16Ké nkéré ámu, onet-mgbokobá obónge o/mû ányi mú banet chwóó baa/jwo kyi-kim ne nyǐ, mú odabángê Jisos-Barábas. 17Ké nkéré bujê-banet baa/cibi kâng, Pálet o-bí kámbé o/fu, onet orá mú ben bamu ba-ryuu ng ba/fu, me nzú ǎ abwô. Mú odabángê Jisos-Barábas aa, aa Jisos mú odabángê Karâs. 18Nyǐ o/mû mu o-nyît ng kanong kanong o/fu, banet ba/níbî Jisos Karâs ba-da-kye ǎ, ké ebóng, o/mû o-sa ng kámbé kafâ.

19Ké nkéré mú Pálet mu ányi me ké kakyúng-bampan epan, onyi emen o-twóm kyitwóm ba-ba-sét ǎ. O/fu, *dachi a-chi onyinchéng ámu nang chwǒm* mú o*da/chi chwǒm*. Ké ebóng, me n/ri busông kanong kanong kyísóng ké burê, ké dyishí emen.

20Batu-banchi kyifen-Osówo ne bakínkán-banet-Jûs ba-chi bujê-banet ámbu ba/fu, basét Pálet o-zú Barábas abwô, o-fu ba-ju Jisos. 21Nké otu-dyishí ámu o/chîbí kámbé o/fu, banet ḿbén ashí afee, orá mú ben bamu ba-ryuu ng ba/fu, me nzú ǎ abwô.

Mbé ba-faa ba/fu, Barábas.

22Ne Pálet o-bí kâng kámbé o/fu, me n/chi n-chi ebóng ne Jisos mú odabángê Karâs.

Mbé ba-faa ba/fu, ju ǎ, ju ǎ.

23Nké Pálet o/bí kámbé o/fu, ebóng kyibî ńkyí nyǐ o/chi.

Mbé ba-kpet ewonge kâng ne ejá kyíbóng kyíbóng ba/fu, ju ǎ, ju ǎ.

24Ké nkéré mú Pálet o/nyît o/fu, mpún o*fí to mú nyǐ odachîraa o-ca kashú* nké eringe nyí bunwa boo*róng ké oshê* o/yip omu o-soo abwô emen ké bushú ḿbú bujê-banet ámbe. O-raa o/fu, *chí me nké n/fu, baju onyinchéng mún*. Ben nké bamu ba-chi i kánkyí.

25Kángkáng bujê-banet ámbe ba-faa ba/fu, mîng busông ḿbú ké dyishí-bukyû emen bu-bâ bu-kâm bě be ne bwǎn eten.

26Ne Pálet o-zú kâng Barábas abwô o-kye kámbé. O-fu ba-mín Jisos, ne o-níbî ǎ o-kye o/fu, bada-mán ǎ ké kyikwap ńkyí badashwân onet.

Basúja ba/fát Jisos Kiikuku

(Mâk 15:16-20; Jǒn 19:2-3)

27Basúja-Pálet ba-kúng kâng Jisos ba-nung ne nyǐ ké kyibám ńkyí Pálet. Kángkáng basúja emen ba-ba-wáp ǎ ba-fé ké kafâ. 28Ba-pii ǎ byídí ké byiko, ba-yip ágbádá-butu ba-fé ǎ. 29Ba-chi kâng etam-butu ké byire-byichí ḿbyí mbyi ne byiwong ba-cít ǎ ké dyishí, ba-fé ǎ ochí ké bubwô-etyebéng. Ne ba-tím arông kyísí ké bushú emen, ba-kpet ǎ efát kiikuku. Ba/fu, otu mú banet-Jûs okpen o-wu. 30Ba-shú ǎ akorong, ba-koo ochí ámu, ba-díp ǎ ké dyishí. 31Ké nkéré mú baa/fát ǎ kiikuku ba-mîng, ba-pii ǎ ágbádá ányi, ba-bwa ne byídí ḿbyí emen ba-fé ǎ. Ba-kpî ǎ kâng ba-wâa edamán ké kyikwap ńkyí badashwân onet.

Ba/mán Jisos ké Kyikwap ńkyí badashwân Onet

(Mâk 15:21-32; Lûk 23:26-43; Jǒn 19:17-27)

32Ké nkéré mú mbe ba-cen n ba-câ, ba/kwárê ne onyinchéng obónge mú odabángê Sámon, mú o/fím Saryínyi. Ba-níbî ǎ ké busa ba/fu, okúng kyikwap ńkyí Jisos. 33Ba-da-ribi ké kyikit ńkyí badakó Gógúta, ányi kyi/byí, kyikit-kiǐfâa-dyishí-onet. 34Ba-kye Jisos bato ányi ḿbé ba/chwáp kámbé ne chwǒm ńkyí badakó gâl. Nké ké nkéré mú oo/fwôo kámbé, o*da/bángê ejwáp*.

35Ba-mán ǎ ké kyikwap ńkyí badashwân onet. Ne ba-kyii kâng byídí emen ké dyímám etwóp. 36Ńdyí baa/mán ǎ éné, ba/kyú ányi ba-kû ǎ ebám. 37Ba-sáng chwǒm ńkyí ba/bât ǎ ba-lák ányi kyíbóng-dyishí emen ba/fu, nyín Jisos mú otu mú banet-Jûs. 38Ba-mán to kâng banet-kajii ashí afee ké byikwap ḿbyí ebe ányi ne Jisos, obónge ké kyicê-bubwô-etyebéng emen, mú obónge to ké kyicê-bubwô-eku.

39Banet ḿbé mbe ba-shwôm m ba-me dyishí ba-kye Jisos edángé. 40Ba/fu, wo mú adaman ebú kiǐtí-kyise-kyifen-Osówo echi a-bi kánkyí ké ací achât, nyángê byiko eyên, â wo a-chi i Wǎn-Osówo. Shû a-bâ kyísí ké kyikwap ánkyi.

41Éné to nké batu-banchi kyifen-Osówo ne bantánge Byije-Músis ne bakínkán-banet-Jûs ba/fát Jisos kiikuku. 42Ba/fu, nyǐ o/nyángê banet bakíri, nké oo*man enyángê byiko emen*. Nyǐ, *chí otu mú banet-Jûs dí*. Oshû kâng kántîk o-bâ kyísí ké kyikwap ánkyi, ne be byi/chi byi-bángê ne nyǐ. 43Nyǐ mu o-fâ dyityém emen ne Osówo, ne mu o-raa ng o/fu, nyǐ o-chi i Wǎn-Osówo. Mîng n̂g kâng byi-ri, â Osówo o/chi o-nyángê ǎ kántîk. 44Nang banet-kajii to ḿbé ba/mán kámbé ké kyikwap ne nyǐ ba/kye ǎ to edángé ké dyizong-bukwóp ándyi.

Jisos o/kpú

(Mâk 15:33-41; Lûk 23:44-49; Jǒn 19:28-30)

45Ké nkéré mú esû ee/kán, kyifip kyi/cít ké oshê omúmú ńkyí kyi/bwon ké égbáng echât. 46Ké chwǒm wǎ égbáng echât nyí esû, Jisos o-wonge ejá kyíbóng kyíbóng o/fu, elô, elô, lama sabatányi. Ányi kyi/byí, Osówo ejí, Osówo ejí, ebóng ńkyí wo aa/mîng mě.

47Banet bakíri ḿbé ba/mû ba/bwom ányi ba/jwo, ba-raa ba/fu, mu o-kó ng Elája. 48Onet mú o/mû ányi to o-zóngê ozóngé, o-yip oringe o-lip ké bato ḿbé baa/myám, o-fâp ké dyishí-ochí, o-kan o/fu, nyǐ o-chi i ǎ o-jwáp kámbé.

49Nké banet ḿbé áku ba/raa ba/fu, mîng kpá byi-ri, â Elája mu o-bâ o-ba-nyángê ǎ.

50Jisos o-chîwonge kampén kabónge kyíbóng kyíbóng, o-kune.

51Ne ékpígí nyí ba/mû ba/tîm ké kiǐtí-kyise-kyifen-Osówo echi e-járê byicê byifee kyi-fím kyíbóng tete kyi-ribi kyísí. Esí e-náng, aká a-járê byicê byicê, 52akun a-bâa, ne banet-Osówo chwóó ḿbé ba/mû baa/kpú, Osówo o-jwóbê kámbé. 53Ba-byí ké akun. Ne ké nkéré Jisos oo/jwóbê ké bukyû, mbé ba/dim ba-wâa Jerúsélem, banet chwóó ba/ri kámbé.

54Ké nkéré onet-dyishí-basúja ne basúja ḿbé ba/mû ne nyǐ ḿbé ba/mû mbe ba-bám m Jisos ba/ri esí nyí e/náng ne kángkáng byěm to ḿbyí byi/chi, bushî bu-róng kámbé, ne ba-raa ba/fu, nyǐ o-chi i Wǎn-Osówo ntûntû.

55Banyinyi ba/mû ányi chwóó ḿbé ba/bwom tíbítíbí mbe ba-tún n, ḿbé ba/bê ne Jisos ké kyikû fím ké Gályílyi, mbe ba-chwáp ng ǎ. 56Méryi mú o/fím Mágádála ne Méryi mú boné-Jêmsyi ne Josêf, ne boné-bwǎn-Zébédyi ba/mû ké burwám-banet ámbe.

Ba/ryii Jisos

(Mâk 15:42-47; Lûk 23:50-56; Jǒn 19:38-42)

57Ké nkéré mú dyikurúku dii/fyi, nfang-onyinchéng obónge mú o/fím Aramatyâ o/baribi. Dyizîn emen dyi/mû dyi-bángê e Josêf. Ne nyǐ to o/mû ḿgbán-Jisos. 58O-dim o-ca ké bushú-Pálet, o-bí ǎ o/fu, okye ǎ kyikwóm-enyam-byiko-Jisos. Pálet o-kye busa o/fu, bakye ǎ kánkyí. 59Josêf o-kúng kánkyí kâng o-ním kyídí-okpówo ńkyí kyifyîfî. 60Ne o-kúng o-ren ké dyikun ńdyí emen nyǐ oyén, ńdyí o/sím kándyí ké buká abeabe. O-bírî kâng kiimbâng-buká o-cít ké ocím-dyikun, o-dim. 61Méryi mú o/fím Mágádála ne Méryi mú áku ba/mû ányi me ba-bírî kashú ké dyikun.

Basúja ḿbé ba/chi ba-bám Dyikun

62Ké nnyinyěng-dyicí, ányi kyi/byí, ké dyicí-ékwâbashi ńdyí banet-Jûs, batu-banchi kyifen-Osówo ne banet-ncibi mú badakó Fárasyî ba-dim ba-kâm Pálet. 63Ba-kó ǎ ba/fu, bonchí, be byimu byi-zîim m byi/fu, ké nkéré mú nsêt kyisédéng ámu o/mû o/tôong okpó, nyǐ o/raa o/fu, Osówo o/chi o-jwóbê mě ké bukyû, ké ací achât. 64Kye kâng busa, eringe nyí badabám dyikun ándyi kanong kanong tata ké ací achât ányi. Eringe nyí bǎmgbán emen baa*ba/chi ba-ca ba-da-jii ǎ ba-kúng ǎ ba-dim* ba-kûsét banet kâng ba/fu, Osówo oo/jwóbê ǎ ké bukyû*. Nkuli kyikû-kyisédéng mún o/chi o-bên o-shwôm mú mbwôp kashú.

65Pálet o-sét kámbé o/fu, kúng n̂g basúja. Ca n̂g ba-da-bám dyikun eringe nyí badaman ebám.

66Ba-dim kâng ba-da-chi dyikun ándyi eringe nyí onet oo*man ebâa kándyí* ké omwane mú mbé ba/mwane ocím-buká ḿbú ba/cít ké dyikun. Ba-tî basúja ányi ba-kûbám.

Currently Selected:

Mátyuu 27: BKY

Highlight

Copy