Mátyuu 23

Jisos o/kuri Ekó kyi-kim ne Bantánge Byije-Músis ne Banet-Ncibi mú badakó Fárasyî

(Mâk 12:38-39; Lûk 11:43, 46; ne ké20:45-46)

1Jisos o-raa kâng ne bujê-banet ḿbé ba/mû ányi ne bǎmgbán emen to 2o/fu, bantánge Byije-Músis ne banet-ncibi mú badakó Fárasyî nké mbe banet ḿbé mbe ne busa ḿbú badasét byikû-byěm kyi-kim ne Byije ḿbyí Músis. 3Ben kâng ba-man ba-bángê ne mbé, ba-kûchi to kángkáng byěm ḿbyí ba/sét běn ba/fu, ben chi n̂g. Nké *da n̂g echi ba-kúng kyiká-bucen ebe* ké ebóng, mbé ba*fí ba-chi i ńkyí mbé mbe ba-sét ng*. 4Mbé mbe ba-nap ng biǐróró-atû ba-tû ng banet ké dyishí, nké mbé kyi*fí kyi-nyîn n kámbé ńkyí badayip nang kafwa káfwa ba-chwáp banet ámbe atû ányi etû*. 5Mbé mbe ba-chi i kángkáng byěm eringe nyí banet badari kámbé. Kû n̂g eri eringe nyí biǐré-bakye ḿbyí mbé ba/fé basáng-nwet ḿbé ejá-Osówo nyí ba/sáng kyísí byi/rêe, ḿbyí mbe ba-sît ng ké bambwô ebe ne ké abwô ebe, ba-kan achi to ba-ri eringe nyí ecím-ágbádá ebe nyí kyísí e/rêe. 6Mbé ba-cá ng byikit ḿbyí byinong byinong ké ajî ne bukyúng ḿbú baa/nap kámbú ba-tî ké byise-ékwâbashi ḿbyí banet-Jûs. 7Mbé kyi-nyîn n kámbé ńkyí badata kámbé kyiraa ne ofê ké bantim-busî, banet to ba-kûkó kámbé bantánge byiraa-Osówo. 8Nké ben, *da n̂g echi ba-bángê banet ba-kû běn ekó bantánge byiraa-Osówo* ké ebóng, ben kángkáng ba/fím ne barî, ne bamu ne ntánge byiraa-Osówo obónge mǔ mu. 9Ne *da n̂g ekó onet nang obónge ké ejíí ńnyín ba/fu, bonchí* ké ebóng, ben bamu ne Bonchí enen mú kyíbóng nké nke. 10Nang onet-dyishí to, ben *da n̂g echi ba-bángê banet ba-kû běn ekó* ké ebóng, onet mú Osówo o/kúng ǎ butu nké mu onet-dyishí enen kǎnchí. 11Onet mú mu kiǐtí o-shwôm ké burwám enen o-man o-kyú ḿgbán enen. 12Nang yeě nké o/yip byiko emen kyíbóng, Osówo o/chi o-bwa ne nyǐ kyísí, ne nang yeě nké o/bwa ne byiko emen kyísí, Osówo o/chi o-bêem ǎ kyíbóng.

Jisos o/shú Bantánge Byije-Músis ne Banet-Fárasyî ḿbé mbe ba-nîm m Banet

(Mâk 12:40; Lûk 11:39-42, 44, 52; ne ké20:47)

13Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ké ebóng, ben bamu ba-fâng ng dyifyi ńdyí Butu ḿbú Osówo ké bushú ḿbú banet, nké ben baa*ba/chi ba-nung ké kafâ* ne nang banet to ben ba*fí ba-bángê e kámbé ba-nung* ḿbé mbe ba-kan n ba/fu, mbé ba-nung ng*.

[14Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu ba-koo ng banyǐnkú byěm, ba-jii ng kámbé byise ebe, ne ba-kûtông byiko ké biintintang-banshwam efé. Ké bubwô ḿbún, busông ḿbú enen bu/chi bu-bên bu-shwôm.]

15Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu ba-cen n ké baya ḿbé baryên ba-nyáng ng eshê, eringe nyí badachi onet obónge o-yángê dyityém emen. Ne ké nkéré mú kii/byí běn dyishí, ba-chi onet ámu o-firi ofiríng mú odajé ké kyikit-busông eri o-shwôm eringe nyí ben bayén bamu ba-jâ.

16Kyi/bên ne ben kanong kanong, ben bantông banet bukwóp ḿbé ba*fí ba-rángê e*. Ben bamu ba-tángê e banet ba/fu, â onet o/sem kiǐtí-kyise-kyifen-Osówo echi, Osówo oo*kám ǎ*. Nké â nyǐ o/sem gûl mú mu ké kiǐtí-kyise-kyifen-Osówo echi, Osówo o-kám m ǎ, 17Ben enyam-banet ḿbé ba*fí ba-rángê e*. Kyirá ńkyí nkyi kiǐtí kyi-shwôm, gûl aa, aa kiǐtí-kyise-kyifen-Osówo echi kyiyén ńkyí kyi/chi gûl o-firi chwǒm-ociring. 18Ben bamu ba-tángê e to ba/fu, â onet o/sem kyikit-kyifen-Osówo echi, Osówo oo*kám ǎ*. Nké â nyǐ o/sem byěm-eyáré ḿbyí ba/tî ké kyikit-kyifen-Osówo echi ánkyi, Osówo o-kám m ǎ. 19Ben ba*fí ba-rángê e cácá*. Kyirá ńkyí nkyi kiǐtí kyi-shwôm, byěm-eyáré aa, aa kyikit-kyifen-Osówo echi kyiyén ńkyí kyi/chi byěm-eyáré byi-firi byěm-ociring. 20Ké bubwô ámbu kâng, â onet o/sem kyikit-kyifen-Osówo echi, nyǐ mu o-sem m kánkyí ne kángkáng byěm-eyáré ḿbyí mbyi ké nkyí. 21Ne â onet o/sem to kiǐtí-kyise-kyifen-Osówo echi, nyǐ mu o-sem m kánkyí ne mu o-sem m to Osówo mú mu o-kyú u ányi ké nkyí. 22Ne â onet o/sem bubóng, nyǐ mu o-sem m kakyúng-butu ńké Osówo ne nyǐ to mú mu o-kyú u ké nké.

23Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu ba-kyii ng byidóng-kasu wǎ eyím ne ashí-ose ne kángkáng byidóng-kasu byikíri ké byikit diǐkpú, ba-kye Osówo kyikit kyibónge, nké ben bamu ba-né ng bachíchí-byěm echi ḿbyí Byije-Músis byi/tángê, wǎ mpan mú ntûntû ekét ne orî-onet bafip eri ne dyityém ekyú wááng. Ḿbyín nké ben badaman ba-kûchi kámbyí, ba-cibi ne ḿbyí áku. 24Ben bantông banet bukwóp ḿbé ba*fí ba-rángê e*. Ben bamu ba-fîm m ocincing ké bato enen ba-twóp, nké bamu ba-myii ng kaanyam-atû.

25Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu ba-soo ng esim-mmîk enen ne dyicáng enen nyí kyíjí, nké kafâ kaa/sú ne byěm ḿbyí ben baa/koo ké bunwa etwóp ne kanim enim. 26Ben banet-Fárasyî ḿbé ba*fí ba-rángê e* soo n̂g kpá ńkyí nkyi ké kafâ-mmîk, fím ányi kâng esim emen e/chi e-cé to.

27Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu wǎ akun nyí ba/sabe kányí mpén, nyí adari kányí anong anong ké esim nyí kyíjí, nké aa/sú ne byikúú-banet ne biifwoofwoo-byěm ké kafâ ebe. 28Ké dyizong-bukwóp ándyi dyibónge, ben nang yeě nang yeě mu o-ri ng běn ké kiintaa ńkyí kyíjí wǎ banet ḿbé banong, nké ké kafâ ben baa/sú ne banet enîm ne byibî echi.

Jisos o/sét Wááng kyi-kim ne Busông Ebe

(Lûk 11:47-51)

29Kyi/bên ne ben kanong kanong, ǎ bantánge Byije-Músis ne banet-Fárasyî, ben bannîm banet. Ben bamu ba-kwa ng akun nyí bamkpábé ḿbé badasét byiraa-Osówo, ne bamu ba-nap ng byěm ḿbyí bamu ba-mee ng ba-tî ng wǎ onet, ḿbyí banet ḿbé ba/kpú akpen nyí anong. 30Ne ben bamu ba-raa ng ba/fu, â be nké byi/mû ké nkéré mú o/shwôm ké esim, ké nkéré mú banchí eten ḿbé kpákpá, be byi/mû bii*ba/chi byi-chi ńkyí mbé ba/chi* ba-ju bamkpábé ḿbé badasét byiraa-Osówo*. 31Ben baa/bángê kâng ké ntûntû, ba/fu, ben ba-chi i banet ḿbé ba/fím ké kyikû-banet ḿbé ba/ju bamkpábé ḿbé badasét byiraa-Osówo. 32Ca n̂g kashú kâng ba-man ne ńkyí banchí enen ḿbé kpákpá ba/kpet kyikû. 33Ben mú bamu wǎ efyi, ne wǎ bwǎn ḿbé efyi. Ben ba-cen n nǎ kâng ne ba-fem ké mpan mú Osówo o/chi o-két o-bên běn ba-jâ ké kyikit-busông eri. 34Ké bubwô ámbu kâng, me mu n-sét ng běn n/fu, me n/chi n-twóm běn bamkpábé ḿbé badasét byiraa-Osówo, ne bannyît byiraa, ne bantánge banet byiraa-Osówo. Ben ba/chi ba-ju kyicê-banet ámbe, ba-mán bakíri ké kyikwap ńkyí badashwân onet, ba-mín bakíri ké byise-ékwâbashi enen, ba-nye ne mbé ké kyikû ké oshê ké oshê. 35Ké bubwô ámbu, busông ḿbú ba/ju kángkáng banet ḿbé ba/kpú dyikáá bu/chi bu-shû běn ké byiko, kyi-fím ké Ébel mú ba/ju ǎ dyikáá tata kyi-ribi ké Zákaryâ mú wǎn-Barákya, mú ben ba/ju ǎ ké otyém ótyem mú kiǐtí-kyise-kyifen-Osówo echi ne kyikit-kyifen-Osówo echi. 36Me mu n-sét ng běn ntûntû n/fu, busông ḿbú ké dyishí kángkáng banet ḿbén bu/chi bu-shû bwǎn-bafî ḿbé kántîk ké byiko.

Kyijé ńkyí Jisos mu ne nkyí ne Jerúsélem

(Lûk 13:34-35)

37Jisos o/fu, ô Jerúsélem, Jerúsélem. Ben bamu ba-ju ng bamkpábé ḿbé badasét byiraa-Osówo, ba-tím m to banet-kyitwóm-Osówo ḿbé nyí o/twóm běn aká. Kampén ka/firi kafěng ńké me m/mû mu n-ryuu ng n/fu, m-kpárê ng banet eyên kángkáng abwô, wǎ eringe nyí buma-ekwa mbu bu-cít ng bwǎn emen ké abyibabang, nké ben ba*da mě ebángê*. 38Kántîk, Osówo o/chi o-byí o-mîng oshê eyên. 39Me mu n-sét ng běn n/fu, kyi-fím kántîk kyi-ca kashú, wo aa*ba/chi a-chî mě eri* tata a-bâa ocím a/fu, ojware okyú ne onet mú mu o-bâ ké bubwô ḿbú Otu Kyítá.

Currently Selected:

Mátyuu 23: BKY

Highlight

Copy