Mátyuu 24

Jisos o/raa kyi-kim ne Kiǐtí-Kyise-Kyifen-Osówo echi ńkyí ba/chi ba-bên

(Mâk 13:1-2; Lûk 21:5-6)

1Jisos o-dim, ne o/mû o-kú o-mîng ng kiǐtí-kyise-kyifen-Osówo echi, ńdyí bǎmgbán emen ba/bê ba-kâm ǎ, eringe nyí bada ǎ etông byise ḿbyí ba/bi ḿbyí kiǐtí-kyise-kyifen-Osówo echi. 2Nké nyǐ o/faa kámbé o/fu, nkyi éné, ben bamu ba-ri ng kámbyí kángkáng? Me mu n-sét ng běn ńkyín n/fu, nang buká bubónge nyín boo*ba/chi bu-chîwaa ké kyikit emen*. Ba/chi ba-bú kányí kángkáng ba-pwó kyísí.

Afaníkong ne Busông eri

(Mâk 13:3-13; Lûk 21:7-19)

3Ké nkéré mú Jisos o/kyú me ké kaku ńké badakó Ólif, bǎmgbán emen ba/bê ba-kâm ǎ ké kadip. Ba-bí ǎ ba/fu, sét bě nkéré mú kángkáng byěm ḿbyín byi/chi byi-chi, ne ekap to nyí e/chi e-tông e/fu, nkéré oo/fyi mú wo adabê, ne mú nkéré odaman to.

4Jisos o-faa kámbé o/fu, kû n̂g ebám byiko, ne *da n̂g echi ba-mîng onet nang obónge o-nîm běn*. 5Ké ebóng, banet chwóó ba/chi ba-bâ ké dyizîn ejí ba-kûsét ba/fu, me nké mu onet mú Osówo o/kúng ǎ butu, ne ba/chi ba-nîm banet chwóó. 6Ne ben ba/chi ba-kûjwo kyirime-byití ńkyí kii/fárâng běn ne bǎmpém to kyi-kim ne byití ḿbyí mbyi tete. Nké kû n̂g ejwo, *da n̂g ekédê ofong*. Azong-byěm ányi a-man a-chi, nké kyi*da/byí kyi/fu, nkuli kyikû-nkéré oo/fyi*. 7Oshê ne oshê o/chi o-kûnwa ne barî, butu ne butu ba/chi ba-kûkye barî bunwa. Esong e/chi e-róng, ne esí e/chi e-náng kakânkakân ké kángkáng byikit. 8Kángkáng byěm ḿbyín mbyi wǎ mbwôp kashú-bubân ḿbú onyinyi mú o-kú o-bâ efwon.

9Ba/chi ba-kám běn kâng ba-kye ba/fu, bakye běn busông, ba-ju běn. Ben ba/chi ba-kûsa kángkáng banet kafâ ké dyishí ejí. 10Banet chwóó ba/chi ba-zú abwô ké dyityém ebe efé ne me ké nkéré ámu. Mbé ba/chi ba-nîm barî, ba-sa ng kafâ to ne barî. 11Ányi kâng nké bamkpábé chwóó ḿbé badasét byisédéng ba/chi ba-byí ba-nîm banet chwóó. 12Byibî byi/chi byi-jê chwóó ḿbyí kyijé ńkyí banet chwóó kyi/chi kyi-bwa kyísí kyísí. 13Nké nang yeě mú o/cíp dyityém tata o-ribi nkuli kyikû, Osówo o/chi o-nyii ǎ. 14Ne Bǎmpém ḿbén ḿbé Banong kyi-kim ne Butu ḿbú Osówo, ba/chi ba-sét kámbé ké ejíí emúmú wǎ kyitwóm ńkyí kángkáng banet, ne nkuli kyikû kâng o-kûfyi.

Kiinchi Bushî-Chwǒm-Ociring

(Mâk 13:14-23; Lûk 21:20-24)

15Ben ba/chi ba-ri kiinchi bushî-chwǒm-ociring ńkyí Dányel mú mkpábé mú odasét byiraa-Osówo o/mû o/raa kyi-kim ne nkyí, ké kyikit ńkyí kyi/já Osówo. Onet mú mu o-kó ng, okó o-jwo dyishí kanong kanong. 16Banet ḿbé mbe ké Judyâ ba-man ba-chêe kâng ba-jâ ké eku. 17Onet mú mu kyíbóng-mbwôm mú kyise emen o*dachi o-bên nkéré o/fu, nyǐ o-shû ng o-da-kúng byěm emen ké kafâ-kyise*. 18Onet mú mu ké dyikán o*dachi o-bwa esim o/fu, nyǐ o-da ng ekúng kyídí emen*. 19Kyi/chi kyi-bên kanong kanong ne banyinyi ḿbé baa/koo afít, ne ḿbé mbe ne bwǎn ké abwô, ké nkéré ámu. 20Fé n̂g nshwam ba-kye Osówo ba/fu, ochéé mún o*dachi o-kyú ké nkéré mú kyifang* nang ké dyicí-ékwâbashi ńdyí eten*. 21Ké ebóng, afaníkong nyí ké nkéré ámu a/chi a-bên kanong kanong a-shwôm nyí a/mû aa/róng, kyi-fím ké kiimkpet kyikû-ejíí tata kyi-ribi dyicí ńdyí kurún. Nang dyizong-chwǒm to wǎ ńdyín dii*ba/chi dyi-chîchi*. 22Nké Osówo oo/shwô ocím-ací ányi. Â nyǐ o/mû o*da/chi éné* nang onet obónge o/mû oo*ba/chi o-kpen*. Ké bubwô ḿbú banet ḿbé Osówo o/cá kámbé nké nyǐ o/chi o-shwô ací ányi.

23Ne â nang yeě nké o/sét běn o/fu, dǐi onet mú Osówo o/kúng ǎ butu i, nang o-sét běn o/fu, dǐi nyǐ áku i, *da n̂g echi ba-bángê ne nyǐ*. 24Ké ebóng, banet ḿbé ba/chi ba-kûsét kyisédéng ba/fu, mbé nké Osówo o/kúng kámbé butu, ne ḿbé ba/fu, mbé ba-chi i bamkpábé ḿbé badasét byiraa-Osówo, ba/chi ba-byí. Mbé ba/chi ba-kûtông biǐtí-akat ne byěm ḿbyí byidakaa banet byiko, eringe nyí badanîm banet ḿbé Osówo o/cá kámbé, â kyi-nwa ng echi. 25Kû n̂g ejwo, me nn/sét běn ńkyín ne nkéré o-kûfyi.

26Nang â banet ba/sét běn ba/fu, kû n̂g eri, nyǐ mu ké kyikim-dyikán. *Da n̂g echi ba-ca áku*. Nang ba-sét běn ba/fu, kû n̂g eri, nyǐ mu o-rem m nyín. *Da n̂g echi ba-bángê ne mbé*. 27Ké ebóng, Wǎn mú Onet o/chi o-bâ wǎ kasabang ńké nke ka-kédê ng ka-nyáng ng bubóng bumúmú, fím ké kyicê ńkyí esû edabyí ka-ribi ké ńkyí edaríbî.

28Nang kyikit kyirá ńkyí kyikwóm-okúsí kyidakyú, biinfuu akun byi-cibi ng ányi.

Obê mú Wǎn mú Onet

(Mâk 13:24-27; Lûk 21:25-28)

29Â afaníkong nyí ací ányi a-man n a-bâ, óbyísû o/chi o-róng kyifip, otukáku oo*ba/chi o-chîsan* ékpére e/chi e-fím kyíbóng e-róng kyísí, ne busa ḿbú mbu bu-níbî ng byěm ḿbyín kyíbóng bu/chi bu-náng. 30Ekap nyí Wǎn mú Onet kâng e/chi e-byí kyíbóng. Ányi kâng nké kángkáng byikim-banet ḿbyí mbyi ké ejíí byi/chi byi-tii, ne mbé ba/chi ba-ri Wǎn mú Onet o-cen n o-bâ ké ófíbí mú kyíbóng ne busa ne kiǐtí-busan ḿbú ragerage. 31Ntán mú oryên o/chi o-raa, ne nyǐ o/chi o-twóm barím emen ḿbé banong ké bakô-ejíí banyii, ne mbé ba/chi ba-cibi banet emen ḿbé nyǐ o/cá kámbé kyikit kyibónge, kyi-fím ké bakô-ejíí bamúmú.

Chwǒm ekwâa kyi-kim ne Kyichí ńkyí badakó Fyîk, ńkyí nkyi wǎ Kyifem

(Mâk 13:28-31; Lûk 21:29-33)

32Mîng n̂g kyichí ńkyí badakó fyîk, ńkyí nkyi wǎ kyifem kyi-tángê běn chwǒm. Ké nkéré mú byire emen bii/bwá aku, byi-kpet ebyet eshǎan, ben ba-nyît ng ba/fu, kyifang kyi/firi jwángjwáng. 33Ké dyizong-bukwóp ándyi to, ké nkéré mú ben ba/ri kángkáng byěm ḿbyín, ben ba/chi ba-nyît ba/fu, nkéré mú Wǎn mú Onet o/firi jwángjwáng mú odakpet. 34Kû n̂g ezîim ńkyín. Kángkáng byěm ḿbyín byi/chi byi-chi ne banet ḿbé mbe něen ké ejíí kántîk ba-kûkpú ba-man. 35Bubóng ne esí byi/chi byi-man, nké ejá ejí e/chi e-waa ne banyá.

Onet o*fí mú odanyît Dyicí ándyi* ne Ochíchí-Nkéré ámu*

(Mâk 13:32-37; Lûk 17:26-30, 34-36)

36Nké onet o*fí nang obónge mú odanyît dyicí ándyi* nang ochíchí-nkéré ámu mú o/chi o-bâ*. Nang barím ḿbé banong ḿbé kyíbóng, nang Wǎn-Osówo baa*nyît*. Kyi*da/shwôm Bonchí ejí kǎnchí nké mu o-nyît ng*. 37Obê mú Wǎn mú Onet o/chi o-kyú wǎ ńkyí kyi/chi ké nkéré mú Núwa. 38Wǎ eringe nyí kyi/mû ne buce bu-sú bu-cít ejíí emúmú, banet ba/mû mbe ba-ryí i byiryíng, ba-jwáp ng bato. Banyinchéng ne banyinyi ba-bé ng barî, tata kyi-ba-ribi ké dyicí ńdyí Núwa o/nung ké ńsukyíkang. 39Nké banet ba/mû ba*fí ba-nyît ng ńkyí nkyi kyi-chi i* tata buce bu-sú bu-ba-jwoo kámbé ashí kángkáng. Éné nké kyi/chi kyi-kyú ké nkéré mú Wǎn mú Onet o/chi o-bâ. 40Ké nkéré ámu, banyinchéng ashí afee ba-kyú u ké kyifát mbe ba-chi i bǎmkpóngé, barím ḿbé banong ba/chi ba-ba-kúng obónge, obónge o-waa. 41Banyinyi ashí afee ba-kyú u to mbe ba-kwa ng esang-byichí nyí badaryí, ba-ba-kúng obónge, obónge o-waa. 42Kû n̂g ebám byiko enen kâng, ké ebóng, ben ba*fí ba-nyît ng dyicí ńdyí Otu Kyítá enen o/chi o-bâ*. 43Kû n̂g ezîim ńkyín ba/fu, â oyén-kyise mu o-nyît ng nkéré mú onet-kajii odabê, nyǐ o-man n ekyú achi fúú, eringe nyí oo*bángê onet-kajii ámu o-sé kyise emen*. 44Ké bubwô ḿbún kâng, ben to ba-man ba-kyú ne byiko kpákpá kángkáng nkéré, ké ebóng, Wǎn mú Onet o/chi o-bâ ké nkéré mú ben ba*fí ba-tî ng achi*.

Ḿgbán mú Onong, aa Kyibî-Ḿgbán

(Lûk 12:41-48)

45Yeě kâng mu ḿgbán mú onong, ne mú odanyît byinyídíng. Nyǐ kâng o-chi i onet mú bonchí emen o/tî ǎ onet-dyishí mú bǎmgbán ḿbé áku, o/fu, okûkye kámbé byiryíng ké ochíchí-nkéré. 46Bunyîn-dyityém mbu ne ḿgbán ámu, â bonchí emen o/kâm ǎ mu o-chi i éné, ké nkéré oo/fyi. 47Me mu n-sét ng běn ké ntûntû n/fu, bonchí emen ámu o/chi o-tî ǎ onet-dyishí mú kángkáng byěm emen. 48Nké â nyǐ mu kyibî-ḿgbán, nyǐ o/chi o-raa ne byiko emen o/fu, bonchí ejí oo*ba/chi o-wá efyi* 49ne nyǐ o/chi o-kpet emín bábe-bǎmgbán, o-ryí i byiryíng, o-jwáp ng bato o-bwóm m. 50Bonchí-ḿgbán ámu kâng o/chi o-fyi dyicí dyibónge, ké nkéré mú nyǐ o*fí o-tî ng achi* ne ké nkéré to mú nyǐ oo*nyît*. 51Bonchí emen o-két ng ǎ byikim byikim, o-chi ǎ o-nung to ké busông ḿbú banet ḿbé mbe ba-nîm m banet. Ányi nké nyǐ o/chi o-kûtii o-ryí i asháng.

Currently Selected:

Mátyuu 24: BKY

Highlight

Copy