Mátyuu 20
20
Dyitím-Ekan kyi-kim ne Banet ḿbé ba/yámê Kámbé ké Bǎmkpóngé-Kyifát
1Ké ebóng, Butu ḿbú Osówo mbu wǎ oyén-kyifát mú o/dim ké dyicófóróng pirípirí, o/fu, nyǐ o-da ng eyámê banet ḿbé badachi bǎmkpóngé ké kyifát emen. 2O-bángê o/fu, nyǐ o-kyâ kámbé kóbo diǐkpú diǐkpú wǎ eringe nyí mbe ba-yámê e banet ké dyicí-bǎmkpóngé dyibónge, ne o-twóm kámbé ba-dim edachi bǎmkpóngé ké kyifát emen. 3O-chîbûu o-dim ké ntim-kasî, ké égbáng kátángekányi, o-ri banet bakíri ányi chwǒm ba*fí ba-chi i* 4ne o-sét kámbé kâng o/fu, ben to, ca n̂g ké kyifát ejí ba-da-chi bǎmkpóngé, ne n/chi n-kye běn ocím-akpuga mú odakwárê. 5Mbé kâng ba-dim. Ké égbáng diǐkpú ne efee, ne ké égbáng echât to, nyǐ o-chîchi dyizong ándyi dyibónge. 6Kyi/mû kii/byí chwǒm wǎ égbáng etánge nyí dyikurúku, ńdyí nyǐ o/chîce ké ntim-kasî, o-ri banet bakíri ba/tôong ányi cip. O-bí kámbé o/fu, ben bamu ba-bên n kyirim-dyicí nyín ebóng, chwǒm ba*fí ba-chi i*. 7Mbé ba-faa ǎ ba/fu, nkyi éné, ké ebóng, onet o*fí mú o/yámê bě o/fu, byichi ǎ bǎmkpóngé*. Nyǐ o-sét kámbé o/fu, ben to kâng, ca n̂g ké kyifát ejí ba-da-chi bǎmkpóngé.
8Ké nkéré mú dyikurúku dii/fyi, oyén-kyifát o/sét onet-dyishí-bǎmkpóngé emen o/fu, kó banet-bǎmkpóngé a-kye kámbé akpuga-bǎmkpóngé ebe. Kpet ké banryî esim-banet ḿbé n/yámê kámbé, ne a-kûribi ké bambwôp kashú-banet. 9Banet ḿbé ba/kpet bǎmkpóngé echi ké égbáng etánge, ba/kye kámbé kóbo diǐkpú diǐkpú. 10Ké nkéré mú bambwôp kashú-banet kâng ḿbé ba/yámê kámbé ba/bê akpuga ekoo, mbé ba/mû ba/kabe ba/fu, mbé ba/chi ba-koo akpuga a-jê a-shwôm éné. Nké mbé to ba/kye kámbé kóbo diǐkpú diǐkpú. 11Ba-koo akpuga ebe, ba-kpet erime ké kyitông ne onet mú o/koo kámbé ké bǎmkpóngé. 12Ba/fu, banet ḿbén ḿbé ba/yámê kámbé ké nryî esim ba/chi bǎmkpóngé ké égbáng ebónge nké nke, mú be byi/bwom byi-chi bǎmkpóngé ké kyirim-dyicí, esû e-byâ bě ké byiko. Nké nang ké nkyi éné, wo a/kye kámbé akpuga wǎ nyí a/kye bě be. 13Oyén-bǎmkpóngé o-faa onet ebe obónge o/fu, kûjwo, ǎ ocín ejí, me n*da běn eryí mpún*. Ben ba/mû ba*da/bángê ne me ké kóbo diǐkpú diǐkpú dí*. 14Kúng n̂g akpuga enen ba-dim dyijê. Me mu n-ryuu ng n/fu, n-kyâ onyinchéng mún mú n/yámê ǎ ké nryî esim akpuga wǎ eringe nyí nn/kye běn. 15Me n*fí ne busa ḿbú ndachi eringe nyí kyi/nyîn mě ne akpuga nyí ejí*? Aa wo amu a-sa ng kafâ, ké nǎ, me n/cángê dyityém?
16Ne Jisos o-kúlî kâng o/fu, ké bubwô ámbu banet ḿbé mbe banryî esim ba/chi ba-kyú bambwôp kashú, ne banet ḿbé mbe bambwôp kashú ba/chi ba-ryí esim.
Jisos o/raa ké Kampén Kachât kyi-kim ne Bukyû Emen
(Mâk 10:32-34; Lûk 18:31-34)
17Ké nkéré mú Jisos mu o-cen n o-câ ḿbú Jerúsélem, nyǐ o/kúng bǎmgbán emen ḿbé ashí diǐkpú ne afee o-raa ng ne mbé o-câ ké booju o/fu, 18kû n̂g ejwo, be byi-kú byi-wâa ng Jerúsélem, kyikit ńkyí ba/chi ba-kúng Wǎn mú Onet ba-kye batu-banchi kyifen-Osówo ne bantánge Byije-Músis. Mbé ba/chi ba-két mpan ba/fu, baju ǎ, 19ne ba-kúng ǎ kâng ba-kye banet ḿbé ba*fí banet-Jûs* ḿbé ba/chi ba-fát ǎ kiikuku, ba-mín ǎ, ne ba-mán ǎ ké kyikwap ńkyí badashwân onet. Ne ké ací achât, Osówo o/chi o-jwóbê ǎ ké bukyû.
Boné-Bwǎn-Zébédyi o/bí Jisos Chwǒm
(Mâk 10:35-45)
20Boné-bwǎn-Zébédyi kâng o-bâ o-kâm Jisos ne bwǎn emen, o-tím arông kyísí ké bushú emen, ne o-bí ǎ o/fu, ochwáp ǎ.
21Jisos o-bí ǎ o/fu, wo amu a-ryuu ng ebóng.
Nyǐ o-faa o/fu, ryí ocím a/fu, bwǎn ejí ḿbén ashí afee ba/chi ba-kyú ké bubwô-etyebéng eyên ne ḿbú eku ké nkéré mú a/firi otu.
22Jisos o-faa kámbé o/fu, ben ba*fí ba-nyît ng ńkyí bamu ba-bí ng*. Ben ba-man n ejwáp ké mmîk mú busông eri, mú me n-kú m-bâ ebajwáp dí.
Mbé ba-faa ba/fu, be byi-man n ejwáp ké mǔ.
23Jisos o-sét kámbé o/fu, ké ntûntû, ben ba/chi ba-jwáp ké mmîk mú busông eri mú ejí, nké me n*fí ne busa ḿbú ndacá onet mú o/chi o-kyú ké bubwô-etyebéng ejí ne ḿbú eku*. Byikit ḿbyín byi/já banet ḿbé Bonchí ejí oo/nap kámbyí o-tî kámbé.
24Ké nkéré bǎmgbán-Jisos ḿbé áku ashí diǐkpú ba/jwo kyi-kim ne ńkyín, kafâ ka-kpet kámbé esa ne bwǎn-Zébédyi ámbe ashí afee. 25Jisos o-kó kâng kámbé ashí kángkáng ba-bâ ba-kâm ǎ, o-raa o/fu, ben bamu ba-nyît ng ba/fu, banet ḿbé ba/kúng kámbé wǎ banet-ashí nké mbe ne busa ḿbú banet badakyú ké bubwô ebe. Banet-ashí ámbe to mbe ne banet-ashí bakíri ḿbé badasét kámbé ńkyí badachi. 26Nké kii*ba/chi kyi-kyú éné ne ben*. Â onet enen obónge mu o-ryuu ng o/fu, nyǐ o-kyú u kiǐtí, nyǐ o-man o-kyú ḿgbán mú enen ashí amúmú. 27Ne â onet enen obónge mu o-ryuu ng o/fu, nyǐ o-bwóp ng kashú, nyǐ o-man o-kyú ósóng enen. 28Wǎ eringe nyí Wǎn mú Onet mú o*da/bê o/fu, banet bakyú ǎ ḿgbán* nké o/fu, nyǐ o-kyú u ḿgbán, ne o-kye to kyitông emen eringe nyí odaré dyifwá ńdyí banet chwóó o-kye Osówo.
Jisos o/chi Bansêe Achi Ashí Afee ba-kûrángê
(Mâk 10:46-52; Lûk 18:35-43)
29Ké nkéré mú ba-kú ba-mîng ng Jéríku, bujê-banet chwóó ba/dim ne Jisos ké kyikû. 30Bansêe achi ashí afee ḿbé ba/mû me ké bukô-bukwóp ba/jwo ba/fu, Jisos o-kú o-shwôm m, ba-kpet kâng ewonge ba/fu, wǎn-Otu Dívit, ri bě bafip, ǎ bonchí.
31Bujê-banet ámbe ba-nyán kámbé ba/fu, bacíbî pyêp. Nké mbé ba/bwa ba-wonge owongé kakânkakân ba-shwôm ba/fu, wǎn-Otu Dívit, ri bě bafip, ǎ bonchí.
32Jisos o-bwom o-kó kámbé. O-bí kámbé o/fu, ben bamu ba-ryuu ng ba/fu, me nchi běn ebóng.
33Mbé ba-faa ǎ ba/fu, be byimu byi-ryuu ng byi/fu, chi bě byi-kûrángê, ǎ bonchí.
34Jisos o-ri kámbé bafip, o-ta kámbé abwô ké achi. Ké abe ányi, ba-kpet erángê, ne ba-dim ne Jisos ké kyikû.
Currently Selected:
Mátyuu 20: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
