Mátyuu 19

Jisos o/tángê kyi-kim ne Dyibé eman

(Mâk 10:1-12)

1Ké nkéré Jisos oo/raa byiraa ḿbyín o-mîng, o-dim ké Gályílyi o-wâa Judyâ, ké esim-kace ńké badakó Jódan nyí áku. 2Bujê-banet chwóó ba-dim ne nyǐ ké kyikû, nyǐ o-chi kámbé áku ba-nyange ké erwôm nyí ba/mû mbe ba-rwôm m.

3Kyicê-banet-ncibi mú badakó Fárasyî bakíri ba-bâ ba-kâm ǎ, ba/fu, mbé ba-kan n ǎ ba-ri. Ba-bí ǎ ba/fu, kyije eten kyi/bángê kyi/fu, onyinchéng oman dyibé ne onyi emen ké bukwóp nang burá ḿbú kyi/nyîn ǎ dí.

4Jisos o-faa o/fu, nâng ben baa/kó ejá-Osówo ńnyín nyí ba/sáng kyísí nyí e/fu, ké kiimkpet kyikû, Osówo o/chi kámbé onyinchéng ne onyinyi, 5ne nyǐ o-raa o/fu, ké bubwô ḿbún, onyinchéng o/chi o-mîng bonchí emen ne boné emen o-cibi ne onyi emen, ne mbé ashí ebe afee ba/chi ba-firi onet obónge. 6Mbé kâng ba*fí to banet bafee* nké ba/firi onet obónge. Onet oo*man o-pap kâng ńkyí Osówo oo/cibi kyikit kyibónge*.

7Banet-Fárasyî ámbe ba-bí ǎ kâng ba/fu, ebóng kyi/chi kâng ne Músis o-kye onyinchéng kyije o/fu, onyinchéng okye onyi emen nwet mú oda ǎ esét o/fu, dyibé ebe dyiman, ne o-ró ǎ o-dim.

8Jisos o-faa kámbé o/fu, Músis o/kye běn busa o/fu, ben man n̂ abé ne banyi enen, ké ebóng, ben ba-sóng ng etángê kanong kanong. Nké kyi/mû kyi*fí ké dyizong-bukwóp ḿbún* ké nkéré mú Osówo o/chi ejíí*. 9Me mu n-sét ng běn kâng n/fu, nang onyinchéng orá nké o/man dyibé ne onyi emen, nang ké onyi emen o*da/chi kyinam* onyinchéng ámu mu o-chi i kyinam, â nyǐ o/bé onyinyi okíri.

10Bǎmgbán emen ba-faa ǎ ba/fu, â něen nké nkyi ké onyinchéng ne onyi emen, éné nkyi kanong kyi-shwôm ńkyí onet odakyú dyikpe.

11Jisos o-faa kámbé o/fu, ńkyí mu n-tángê e něen, *chí nang yeě nang yeě nké odaman ekoo kánkyí* nké kyi*da/shwôm banet ḿbé Osówo oo/kye kámbé kánkyí*. 12Ké ebóng, azong-akwóp nyi kô chwóó nyí nyi a-chi i banet ne ba*fí ba-bé ng banyi*. Bakíri, ké ebóng, mbe bukwom. Bakíri, ké ebóng, ba/pê kámbé. Ne bakíri to ba*fí ba-bé ng banyi* ké bubwô ḿbú Butu ḿbú Osówo. Onet mú odaman ekoo kánkyí, mîng n̂g ǎ o-koo.

Jisos o/jware Boǒbwásíng

(Mâk 10:13-16; Lûk 18:15-17)

13Banet bakíri ba/bê ne boǒbwásíng ba-ba-kye Jisos, eringe nyí odatwôom kámbé abwô emen ké byiko o-fé nshwam, nké bǎmgbán emen ba/ró banet ámbe. 14Jisos o-faa o/fu, mîng n̂g ḿbé boǒbwásíng ba-bâ ba-kâm mě, *da n̂g eku kámbé* ké ebóng, banjware ḿbé Butu ḿbú Osówo ba/já banet ḿbé mbe wǎ boǒbwásíng ḿbún.

15O-twôom kámbé abwô ké byiko ne o-byí o-dim.

Wǎn-Kyisat mú mu Nfang-Onet

(Mâk 10:17-31; Lûk 18:18-30)

16Nkéré obónge, onyinchéng obónge o/bakâm Jisos. O-bí ǎ o/fu, ntánge byiraa-Osówo, ebóng chwǒm nkyi kanong ńkyí me ndaman n-chi eringe nyí ndakoo dyikpen ńdyí ne banyá.

17Jisos o-faa ǎ o/fu, ebóng kyi/chi ne a-bí mě me kyi-kim ne chwǒm ńkyí nkyi kanong. Kyi*da/shwôm Osówo kǎnchí nké mu kanong*. Kûtî byije, â wo amu a-ryuu ng a/fu, a-nung ng ké dyikpen ńdyí ne banyá.

18Onyinchéng ámu o-bí ǎ o/fu, ebóng dyizong-byije.

Jisos o-faa ǎ o/fu, *daju onet* *dachi kyinam* *dajii kajii* *dasét kyisédéng* 19fé ńchân ne ńnân, ne orî-onet to ojê ǒ wǎ eringe enyam-byiko nyí eyên nyi e-jê ng ǒ.

20Wǎn-kyisat ámu o-faa ǎ o/fu, me nn/tî byije ḿbyín kángkáng. Ebóng kyikíri kyi/waa ńkyí ndachîchi.

21Jisos o-faa ǎ o/fu, â wo amu a-ryuu ng a/fu, a-kyú u onet mú onong, ca a-da-shee kángkáng byěm eyên ḿbyí amu ne mbyí, a-yip akpuga ányi a-kye banet-kyikpu, ne wo a/chi a-fang kyíbóng. A-bwa kâng esim a-kûcen ne me ké kyikû.

22Ké nkéré mú wǎn-kyisat ámu o/jwo ńkyín, o-dim bafip báfip, ké ebóng, o/mû ne esang kanong kanong.

23Jisos o-raa kâng ne bǎmgbán emen o/fu, me mu n-sét ng běn n/fu, kyi/chi kyi-sóng kanong kanong ne nfang-onet o-nung ké Butu ḿbú Osówo. 24Me mu n-chî ng běn esét n/fu, kyi-sóng ng ńkyí nfang-onet odanung ké Butu ḿbú Osówo, kyi-shwôm ńkyí kaanyam-atû kadasát ké mbyí-ága.

25Ké nkéré mú bǎmgbán emen ba/jwo ńkyín, byiko byi/kaa kámbé kanong kanong. Ba-bí kâng ba/fu, yeě kâng mú Osówo o/chi o-nyii ǎ.

26Jisos o-bírî achi o-tún kámbé, o-raa o/fu, ńkyín banet baa*man echi* nké Osówo o-man n echi nang ebóng chwǒm.

27Pyíta o-faa kâng o/fu, be ké ntûntû bii/mîng kángkáng byěm byi-kú byi-cen n ne wo ké kyikû. Be byi/chi byi-já kâng ebóng chwǒm.

28Jisos o-faa kámbé o/fu, me mu n-sét ng běn n/fu, ké nkéré mú Wǎn mú Onet oo/kyú ké kakyúng-butu emen ńké ragerage, ké nkéré mú Osówo oo/chi kángkáng byěm byi-firi byikpó, ben to kâng ashí enen diǐkpú ne afee ḿbé bamu ḿbé ejí, ḿbé bamu ba-cen n ne me ké kyikû, ba/chi ba-kyú to ké bukyúng-butu, ba-pan byikû-banet-Ézerel diǐkpú ne byifee mpan. 29Ne nang yeě to mú oo/mîng byise nang bwǎn-bané emen nang bonchí nang boné nang bwǎn nang aká-byifát ké dyishí ejí, nyǐ o/chi o-chîkoo byěm ámbyi kampén bajam batánge, ne Osówo o/chi o-kye ǎ dyikpen ńdyí ne banyá. 30Nké banet chwóó ḿbé mbe bambwôp kashú kántîk ba/chi ba-ryí esim, ne banet to chwóó ḿbé mbe banryî esim kántîk ba/chi ba-bwóp kashú.

Currently Selected:

Mátyuu 19: BKY

Highlight

Copy