Mátyuu 18

Yeě mu Kiǐtí o-shwôm

(Mâk 9:33-37; Lûk 9:46-48)

1Ké ochíchí-nkéré ámu, bǎmgbán-Jisos ba/bê ba-kâm ǎ, ba-bí ǎ ba/fu, yeě mu kiǐtí o-shwôm ké Butu ḿbú Osówo.

2Jisos o-kó wǎsíng obónge o-sét ǎ o/fu, obwom ké bushú ebe, 3ne o-raa o/fu, zîim m̂ ńkyín. Â ben ba*da/yángê ba-firi wǎ bwǎsíng* ben baa*ba/chi ba-nung ké Butu ḿbú Osówo*. 4Onet mú mu kiǐtí o-shwôm ké Butu ḿbú Osówo o-chi i onet mú mu o-bwa ng ne byiko emen kyísí kyísí o-firi wǎ wǎn mún. 5Ne nang yeě to mú o/koo dyizong-wǎsíng wǎ ńdyín kanong ké bubwô ejí, onet ámu o/koo mě me to kanong.

Okan mú Kyibî echi

(Mâk 9:42-48; Lûk 17:1-2)

6Â nang yeě nké o/chi dyizong-wǎsíng wǎ ńdyín o-mîng dyityém emen efé ne me, kyi-nwa ng kyi-shwôm ńkyí badatú onet ámu kiimbâng-buká ké kyitông, ba-yip ǎ ba-twóp ké kafâ-baya. 7Kyi/bên ne ejíí kanong kanong ńkyí byěm mbyi kô ḿbyí byidachi banet ba-bírî mě esim. Byěm ámbyi byi-man byi-chi kángkáng nkéré. Nké kyi/bên kanong kanong ne onet ámu mú mu o-cen n ne mbyí.

8Â nang bubwô eyên nang kyiká eyên nké nkyi kyi-chi i ǒ a-bírî mě esim, két kánkyí a-twóp kú. Nkyi kanong ne wo ńkyí adanung ké dyikpen ńdyí ne banyá ne bubwô bubónge nang kyiká kyibónge, kyi-shwôm ńkyí adakyú ne abwô afee ne byiká byifee ba-yip ǒ ba-twóp ké okwâ mú ne banyá. 9Ne â dyichi eyên nké ndyi dyi-chi i ǒ a-bírî mě esim, zú kándyí a-twóp kú. Nkyi kanong ne wo ńkyí adanung ké dyikpen ńdyí ne banyá ne dyichi dyibónge nké nke, kyi-shwôm ńkyí adakyú ne achi afee ba-yip ǒ ba-twóp ké okwâ mú kyikit-busông eri.

Dyitím-Ekan ńdyí Etám-Ebû nyí e/tánê

(Lûk 15:3-7)

10Bám m̂ byiko enen ba/fu, ben baa*ba/chi ba-tún dyizong-wǎsíng ńdyín nang dyibónge fúú*. Ké ebóng, me mu n-sét ng běn n/fu, barím ebe ḿbé banong ḿbé mbe kyíbóng, mbe ba-bwom m kángkáng nkéré ké bushú ḿbú Bonchí ejí mú mu kyíbóng. [11Ké ebóng, Wǎn mú Onet o/bê ebanyii banet ḿbé baa/tánê.]

12Ben ba/kabe nǎ. Onet mú mu ne bajam-etám-ebû batánge ne ebónge e-tánê ǎ, onet ámu o-chi i nǎ. Onet ámu o-mîng ng nyí áku bajam banyii esim onyiryiká ne enyii ké bukô-kaku o-wâa edakyé nyí e/tánê. 13Me mu n-sét ng běn n/fu, ké nkéré mú oo/ri kányí, nyǐ o-firi ng ké bunyîn-dyityém o-shwôm ké etám-ebû ányi ebónge, kyi-shwôm nyí kwán bajam banyii esim onyiryiká ne enyii nyí e*da/tánê*. 14Ké dyizong-bukwóp ándyi to dyibónge nké Bonchí enen mú kyíbóng o*fí o-ryuu ng o/fu, dyizong-wǎn ńdyín nang dyibónge dyitánê*.

Wǎn-Boné Eyên mú o/chi Kyibî

15Â wǎn-boné eyên o/chi ǒ kyibî-chwǒm, ca a-kâm ǎ, a-da-sét ǎ kyibî ńkyí o/chi ǒ. Nké chi kánkyí ké bukwóp ḿbú onet otô oo*nyît* kyi-cibi ne ben ashí afee*. Â nyǐ o/jwo ǒ, ányi kyi/byí, wo aa/chîkoo wǎn-boné eyên ámu a-fé ké byiko. 16Nké â nyǐ o*da ǒ ejwo* kpî onet obónge nang banet ashí afee bakíri a-ca ne mbé, eringe nyí ńkyí wo a/sét kángkáng a-bât ǎ kyidakyú ké ejá nyí banet ashí afee nang ashí achât badasét, wǎ eringe ejá-Osówo nyí ba/sáng kyísí e/raa. 17Nké â nyǐ o/né kámbé ejwo, a-sét kâng banet-ékwâbashi enen kyibî-chwǒm ánkyi. Ne â nyǐ o*da/jwo nang banet ḿbé ékwâbashi enen* kyi-fím ányi kâng, kû ǎ echi wǎ onet mú ba*da/fím oshê obónge ne nyǐ* ne wǎ nkoo akpuga-dyishí.

Byěm ené ne Byěm ebángê

18Ké bubwô ámbu, me mu n-sét ng běn ashí amúmú n/fu, ńkyí ben ba/né kánkyí ké ejíí, ba/chi ba-né to kánkyí kyíbóng. Ne ńkyí ben ba/bángê ne nkyí ké ejíí, ba/chi ba-bángê to ne nkyí kyíbóng.

19Me mu n-chî ng běn esét n/fu, nang nkéré orá nké ben ashí afee ké ejíí ńnyín ba/bángê ejá ebónge kyi-kim ne nang ebóng chwǒm ńkyí bamu ba-fâ nshwam, Bonchí ejí mú kyíbóng o/chi o-chi kánkyí o-kye běn. 20Ké ebóng, nang kyikit kyirá nké banet ashí afee nang ashí achât ba/cibi ányi ké dyizîn ejí, me mu ányi ne mbé.

Dyitím-Ekan ńdyí Ḿgbán mú oo*pwoo Orî*

21Pyíta kâng o-dim o-kâm Jisos, o-bí ǎ o/fu, Otu Kyítá, me m-man m-pwoo wǎn-boné ejí kampén kafěng, â mu o-chi i mě kyibî. Kampén káchâtkányi dí.

22Jisos o-faa o/fu, aa*wááng* *chí kampén káchâtkányi* nké kampén kaa*nwa epan*. 23Ké ebóng, Butu ḿbú Osówo mbu wǎ otu mú o/kabe dyicí dyibónge o/fu, nyǐ o-kyé ng kyikû kyi-kim ne eringe nyí bǎmgbán emen mbe ba-tî ng akpuga emen. 24O-kpet ng kyikû o-bâ, baa/ribi ǎ ne ḿgbán emen obónge mú o/ryí ǎ égot-akpuga nyí ee*nwa epan*. 25Ḿgbán emen ámu o/mû o*fí ne akpuga nyí oda ǎ eré dyifwá emen ándyi*. Ne bonchí emen ámu o-kye busa o/fu, bashee ǎ wǎ ósóng ne onyi emen ne bwǎn emen ne kángkáng byěm emen ḿbyí mu ne mbyí, eringe nyí akpuga adakwárê ké dyifwá ándyi. 26Ḿgbán emen ámu o-waa ányi o-tím arông kyísí ké bushú-bonchí emen ámu, o-tîm ǎ arông o/fu, mîng mě ké kaǎnyín-nkéré, n/chi n-ré ǒ dyifwá eyên kángkáng. 27Byiko byi-kpú bonchí emen ne ḿgbán emen ámu kanong kanong, ne o-waa ányi o-pwoo ǎ ké dyifwá emen ándyi, o/fu, oca o-dim.

28Onyinchéng ámu o-dim o-kâm óbe-ḿgbán mú o/ryí ǎ boǒnyín-akpuga. O-waa ányi o-tím ǎ byizim, o-ché ǎ abwô ké kyitông, o-raa ne nyǐ o/fu, ré mě dyifwá eji. 29Óbe-ḿgbán ámu o-waa ányi o-tîm ǎ arông o/fu, mîng mě ké kaǎnyín-nkéré, n/chi n-ré ǒ dyifwá eyên. 30Nké nyǐ o*da/bángê*. O-bwa o-waa ányi o-chi ba-fé óbe-ḿgbán ámu ké mgbokobá, o/fu, owaa ányi tete o-ré ǎ dyifwá emen. 31Ké nkéré bábe-bǎmgbán bakíri ba/ri ńkyí ḿgbán ámu o/chi éné, kafâ ka-bírî kámbé. Ne ba-bwa esim ba-da-sét bonchí ebe kángkáng eringe nyí kyi/chi. 32Ne bonchí ebe o-kó ḿgbán ámu o-bâ ké kafâ-kyise. O-raa ne nyǐ o/fu, wo ósóng mú o*da/byí chwǒm*. Me m/pwoo ǒ ké kángkáng akpuga nyí wo a/ryí mě, ké nǎ, wo a/tîm mě arông a/fu, mpwoo ǒ. 33Wo a/mû a/chi a-ri to ónen-ḿgbán bafip, wǎ eringe nyí me n/ri ǒ wo bafip. 34Kafâ ka-sa bonchí ebe ámu kanong kanong, ne o-twóm ḿgbán emen ámu ké mgbokobá, o/fu, batî ǎ ké busông tete o-ré ǎ dyifwá dyimúmú.

35Ne Jisos o-kuli bǎmpém emen o/fu, éné to nké Bonchí ejí mú mu kyíbóng o/chi o-chi běn, â ben ashí amúmú ba*fí ba-pwoo ng bwǎn-bané enen ne atyém enen*.

Currently Selected:

Mátyuu 18: BKY

Highlight

Copy